Deus é nosso refúgio

म्हारी शरण लणें ज़ैगा आसा परमेशर

1 म्हारअ बल अर शरण लणें ज़ैगा आसा परमेशर,

खरीए पलका करा सह ई म्हारी मज़त सदा।

म्हारी फाज़त करा बिधाता

1 ज़ुंण परम प्रधान बिधाता सेटा शरण लआ,

ज़ुंण परम प्रधान परमेशरे आसरै निहंचै रहा,

2 सह बोला बिधाता लै इहअ,

"तूह आसा मेरी शरण लणें ज़ैगा अर बच़णे ज़ैगा,

तूह आसा मेरअ परमेशर ज़हा दी हुंह भरोस्सअ डाहा।"

3 बिधाता डाहणैं तम्हैं तिन्‍नां आफ़ता अर

माहा मरी का बच़ाऊई ज़ुंण शकारी ज़ेही नच़ानक एछा।

4 तेऊ फुआरनै आपणैं फैंख,

संघा दैणअ तम्हां लै तेथ आसरअ।

तेऊओ सत्त आसा तम्हां लै बच़ाअ अर फाज़त।

बिधातो शूकर करना लै राज़ै दाबेदै बोली दी गिह

1 हे बिधाता, हुंह झ़ूरा ताल्है

अर मेरअ बल आसा तूह ई।

2 तूह परमेशर बिधाता आसा मुल्है बडी टोल्हा अर मुंह फेर उछ़टै गहल़ा ज़िहअ

ज़ेथ पिछ़ू शरण लई हुंह बच़ी रहा।

तूह बच़ाऊआ मुंह ढाल़ा ज़िहअ,

मेरी फाज़त करा तूह ई

अर तूह डाहा मुंह राज्ज़ी-राम्बल़ै बच़ाऊई।

3 मुंह करनी ताह बिधाता सेटा अरज़,

तंऐं बच़ाऊअ हुंह मेरै दुशमणा का,

ज़ै-ज़ैकार करनै जोगी आसा तूह ई।

विश्वास अर आशा

1 हे परमेशर, मेरी फाज़त कर तूह ई

मंऐं आसा ताह सेटा शरण लई दी।

ज़ै-ज़ैकार करना लै भज़न

1 बिधाता आसा मेरअ प्रैश्शअ ज़ुंण मुंह बच़ाऊआ।

हुंह निं कोही का डरदअ।

बिधाता करा मेरी फाज़त आप्पै अर

हुंह निं कधि फिकर करदअ।

2 कदुष्ट मणछ अर मेरै दुशमण

च़ाऐ मुंह मारदै किल्है निं एछे,

पर तिन्‍नां लागणीं ठोहल़

संघा बधल़णैं तिंयां धरनीं।

3 च़ाऐ सारी सैना मुंह फेरा-फेर गोटे,

हुंह निं तैबी बी डरदअ,

तिंयां च़ाऐ मुंह संघै जुध बी छ़ेल़े,

तज़ी बी आसा मेरअ भरोस्सअ बिधाता दी अटल़।

शरण मांगणा लै अरज़

1 हे बिधाता, हुंह लआ ताह सेटा शरण,

मुंह निं लोल़ी शर्मिंदै पल़अ हणअ।

तूह आसा धर्मीं परमेशर,

हुंह करा ताखा एही अरज़ कि मुंह बच़ाऊ।

2 हे बिधाता, मेरी अरज़ शुण! मुंह बच़ाऊ छ़ेक्‍कै,

तूह बण मुल्है मेरी शरण लणें बडी टोल्ह अर

इहअ गहल़ ज़िधी हुंह बच़ी सका।

3 हे बिधाता, मेरी शरण लणें बडी टोल्ह अर बच़णा लै गहल़ आसा तूह ई।

तूह खोज़ मुखा आजूए बात अर तूह नढैऊ मुंह तिहअ ई ज़िहअ तंऐं बोलअ द आसा।

4 ज़ुंण गुप्त ज़ज़ाल़ मुल्है मेरै दुशमणै आसा छ़ैई डाहै दै,

तिन्‍नां आफ़ता का डाहै तूह मुंह बच़ाऊई।

5 मंऐं छ़ाडी आपणीं ज़िन्दगी तेरै आसरै।

हे परमेशर बिधाता, हुंह डाहा तेरअ ई भरोस्सअ

किल्हैकि हुंह आसा तंऐं बच़ाऊअ द।✝

3 तूह बण मेरी शरण लणें ज़ैगा,

अर मुंह आजू लुक्‍कणा लै बडी टोल्ह,

मुंह बच़ाऊंणै आल़ी टोल्ह अर शरण लणें ज़ैगा आसा तूह ई।

8 मणछे आसरै रहणैं का आसा

बिधाता सेटा शरण लणी भली।

9 बलबान प्रधाने आसरै रहणैं का आसा

बिधाता सेटा शरण लणी भली।

5 हुंह रहा परमेशरे आसरै अर

हुंह डाहा तेऊ ई दी आशा।

6 मेरी फाज़त करनै आल़अ अर मुंह बच़ाऊंणै आल़अ आसा सह ई,

सह आसा मुंह बच़णा लै उछ़टअ गहल़ अर

तेखअ निं मुंह कोहै हारी सकदअ।

7 परमेशर दैआ मुल्है अदर अर उद्धार,

सह आसा मुंह बच़ाऊंणै आल़अ अर

मेरी शरण लणें ज़ैगा।

8 मेरै साथीओ, सदा डाहणअ परमेशरा दी भरोस्सअ,

आपणीं सारी खरी खोज़णीं तेऊ का,

म्हारी शरण लणें ज़ैगा आसा सह ई।

17 मुंह करनी तेरी ज़ै-ज़ैकार,

मेरी फाज़त करनै आल़अ आसा तूह,

तूह आसा सह परमेशर ज़ुंण मुल्है खास्सअ झ़ूरा।

मणछ अर अमर परमेशर

1 ए म्हारै मालक, तूह आसा पोस्ती दर

पोस्ती लै म्हारअ आसरअ।

2 ज़धू तंऐं ईंयां बडी-बडी धारा बणाईं,

ज़धू तंऐं अह पृथूई अर सारअ संसार बणाअं,

इना सोभी का आजी बी थिअ तूह परमेशर ई,

अर आजू बी रहणअ सदा तूह ई।

9 रैनै-गरीबा लै शरण आसा तूह बिधाता ई,

किल्हैकि आफ़तीए पलका लुक्‍कणा लै ज़ैगा आसा तिन्‍नां का तूह बिधाता ई।

10 ज़हा का ताह बिधाते बारै थोघ आसा, तिन्‍नां हआ तेरअ भरोस्सअ,

ज़ुंण ताह सेटा एछा, तेऊ निं तूह कल्ही छ़ाडदअ।

7 तेरअ हाम्हां मणछा लै झ़ूरनअ आसा किम्मती खज़ानै ज़िहअ!

हाम्हैं लआ तेरै फैंखा हेठै शरण।

7 बिधाता आसा भलअ,

सह करा आफ़ते पलका आपणीं परज़े फाज़त।

सह दैआ तिन्‍नां लै शरण ज़ुंण तेऊ बाखा फिरा।

4 रैनै-गरीब अर छ़ुटै मुक्‍कै दै एछा ताह सेटा लै ठुर्ही,

तिंयां लआ खरीए पलका ताह सेटा शरण।

तूह आसा तिन्‍नां लै ढिश-कुर्लू बागरी का लुक्‍कणे ज़ैगा ज़िहअ।

तूह आसा तिन्‍नां लै दपहरे चटाक्‍क धुप्पै का बच़णा लै छ़ैल्‍ली ज़िहअ।

नर्दैई दुशमण पल़ा हाम्हां लै चुटी ज़िहअ भराल़ो पाणीं ढिश-बागरी संघै भित्ती दी रल़ाखिआ।

तिंयां आणा हाम्हां रेगीस्तानै दपहरे धुप्पै ज़िहै दहई प्लुशी।

26 बिधातो अदर करी एछा भरोस्सअ,

तेता करै हआ तेऊ मणछ अर तेऊए टबरे फाज़त अर तेथ भेटा तेऊए लान्हैं सुन्हैं बी शरण।

29 धर्मीं मणछे करा बिधाता फाज़त,

पर कदुष्ट मणछा करा सह खतम।