बिधाता डाहणीं एरुशलेम नगरी बच़ाऊई
1 तिन्नां लै हणीं आफ़त! ज़ुंण मिसर देशा का मज़त मांगा! तिंयां आसा मिसर देशे बडी सैना, घोल़ै अर रथे आसरै। तिंयां निं इज़राईले पबित्र परमेशर बिधाते आसरै रहंदै अर नां तेऊ का मज़त मांगदै। 2 बिधाता निं कमुर्ख आथी! तेऊ पाणीं आफ़त। तेऊ पल़णअ कदुष्ट अर नर्दैई मणछ अर तिन्नों साथ दैणैं आल़ै लै चुटी संघा करनै तिंयां बरैबाद।31:2 इधी आसा यहूदा मुल्खे परज़े बारै बोलअ द 3 मिसरी निं परमेशर आथी, तिंयां बी आसा मणछ ई। तिन्नें घोल़ै निं स्वर्ग दूत आथी, तिन्नां बी आसा हाड-मास्सा आल़ै। ज़ांऊं बिधाता आपणअ बल रहैऊंणअ, तेभै करनै तेऊ मिसरी खतम अर तिंयां बी ज़ुंण तिन्नें आसरै आसा। तिंयां हणैं दुहै बरैबाद।
4 बिधाता खोज़अ मुखा इहअ, "ज़ुआन सिह निं आपणैं शकारा छ़ाडदअ ई आथी ज़ुंण तेऊ ढाकी हेरअ, सह डाहा घ्रूं लाई। गुआल़ै फुआल झाल़्हिआ खास्सै ज़ण्हैं तेऊ दरल़ाऊंदै, पर सह सिह निं तिन्नें हाक्का-भ्रुका अर हाल्लै गोल्लै का डरदअ ई आथी। तिहअ ई निं मुंह बी सियोन धारा बच़ाऊंणै का कोहै रोक्की सकदअ नां तेता का मुंह कुंण दूर करी सकदअ। हुंह आसा स्वर्गे सारी सैनो मालक बिधाता। 5 ज़िहै च़ेल्लू-पखीरू फैंख फुआरी आपणैं होछ़ै-होछ़ै बच्च़े फाज़त करा, तेही फाज़त करनीं मुंह एरुशलेम नगरीए संघा डाहणीं सह बच़ाऊई। हुंह आसा स्वर्गे सारी सैनो मालक बिधाता।"
6 बिधाता बोला इहअ, "इज़राईलीओ, तम्हैं किअ मुल्है पाप अर द्रोह। पर ऐबै फिरा मुंह सेटा लै बापस! 7 एक बगत एछणअ इहअ कि तम्हां शोटणी तिंयां सुन्नैं-च़ंदीए मुहुर्ती पोर्ही ज़ेता बणाणें पापो तम्हां लै दोश आसा। 8 अश्शूरी पाणै जुधा दी तलबारा करै मारी, पर सह तलबार निं मणछे हणीं सह हणीं स्वर्ग दूते। मिसरी ठुर्हनै तैहा तलबारे डरै जुधा का दूर पर तिन्नें ज़ुआन मणछ ढाकणैं संघा डाहणैं गलाम बणाईं। 9 तिन्नों माहा राज़अ बी ठुहर्नअ डरै दूर अर तिन्नें सोभी सैनापति छ़ुटणअ डरै दर्छ़णअ अर तिंयां ठुर्हनै जुधा लै खल़ै किऐ दै फ्रहरै छ़ाडी दूर।" अह गल्ल डाही बिधाता बोली। सह बिधाता ज़सरी पूज़ा-गाज़ा एरुशलेम नगरी हआ अर ज़िधी तेऊओ आगीओ कूंड कबल्लअ हआ ज़ल़दअ लागअ द।