1 बिधाता करनीं याकबे आद-लुआद इज़राईली लै झींण अर तेऊ दैणअ तिन्‍नां लै भिई आपणीं परज़ा हणैंओ हक। तेऊ दैणअ तिन्‍नां तिन्‍नें आपणैं देशै भिई बस्सणै अर होर परदेसी एछणैं कई देशा का, संघा बस्सणै तिधी तिन्‍नां संघै। 2 होरी कई देशा बी करनीं तिन्‍नें आपणैं तेऊ देशा लै बापस फिरना लै मज़त ज़ुंण ज़ैगा बिधाता तिन्‍नां लै थिई दैनी दी। तिधी करनी होरी देशा इज़राईलीए दास बणी च़ाकरी। ज़ुंणीं देशै इज़राईली कैद करी निंयैं थिऐ, तिंयां करनै तेखअ इज़राईली कैद, अर इज़राईली करनअ तिन्‍नां प्रैंदै राज़ ज़ुंण एकी ज़मानै तिन्‍नां हंता तै।

3 बिधाता दैणअ इज़राईली लै तिन्‍नें दुख-तकलिफी, बोझ़, डअर अर गलामीए कैद खानै का बशैघ। 4 ज़ेभै बिधाता इहअ करनअ, तेभै बोल़णीं तिन्‍नां बाबेल देशे राज़ै लै एही कहाबत,

नर्दैई राज़ैओ नाक लाअ धरनीं! ऐबै निं सह आजू होरी कोही हंतणैं जोगी डाहअ! 5 बिधाता किअ कदुष्ट राज़ैओ बल खतम 6 ज़ुंण रोश्शै लाल पिंऊंल़ै हई हारा-मारा तै, तिंयां मारा तै होरी देशा हंती-हंती। 7 ऐबै हणअ सारै संसारै सोभी लोगा सुख, सोभी देशे लोगा बोल़णीं राज्ज़ी-मौज़ी खुशीए गिहा। 8 बाबेल देशे राज़ैआ, कैली अर लाबानोन धारे केल़ुईए बूटा बी हुई खुशी अर तिंयां बी तोही बोला एही गिह, "ज़धकअ बाबेल देशो राज़अ धरनीं पल़अ, तधा ओर्ही हुअ हाम्हां सुख कि हाम्हां काटदअ निं ऐबै कोहै एछदअ!

9 "सह संसार आसा बाबेल देशे राज़ै न्हैल़अ लागअ द ज़ेथ मणछ मरी करै डेओआ। मूंऐं दै मणछ अर पृथूईए मशूर राज़ै ज़ुंण मरी आसा गऐ दै, तिंयां उझ़ुऐ जम्परी ताह भाल़णा लै खल़ै। 10 तिन्‍नां बोल़णअ ताह बाबेल देशे राज़ै लै इहअ, ‘ऐबै निं ताह हाम्हां ज़िहअ किछ़ै ज़ोर आथी! तूह बी आसा ऐबै हाम्हां ई ज़िहअ! 11 तेरै ज़ोर-ज़ाहण दाबै ताह ई संघै घोरी दी। तेरअ गाणैं-बज़ाणेंओ मज़अ हुअ इधी खतम। किल़ै आसा ऐबै ताल्है हेठी छ़ैणें खिंथ अर ज़ोका आसा प्रैंदी छ़ैणैंओ दोहल़ू।’"

12 बाबेल देशे राज़ैआ, तूह थिअ भैणूं तारै ज़िहअ, ऐबै पल़अ तूह सरगा का धरनीं! तूह करा त संसारै देशा-देशा प्रैंदै राज़ पर ऐबै पल़अ तूह धरनीं!✝ 13 तूह ता सोठा त इहअ, "मुंह उखल़णअ उझै सरगा लै संघा लाणीं मुंह आपणीं राज़गाद्दी सोभी का उछ़टै तारै का बी उझै!" सोठ ता थिई तेरी एही कि ताह करनअ उतरा बाखा सोभी पर्बता दी सोभी का उछ़टी च़ुंडी दी बेशी राज़ ज़िधी परमेशरे दूत झाल़्हिआ। 14 तूह बोला त इहअ, "मुंह उखल़णअ उझै बादल़ा प्रैंदै संघा हणअ हुंह परम प्रधान परमेशर ज़िहअ ज़हा का सारअ बल हआ।" 15 पर ताल्है हुअ उंबल़अ! तूह पेठअ संसारे सोभी का डुघी खाल़्ही दी।

16 ज़हा का तूह शुझणअ, तिन्‍नां सोठणअ ताह भाल़ी इहअ, "अह सह ई मणछ आसा ज़ुंणीं सारै संसारो सुख-चैन खतम किअ त अर ज़ुंण सोभी देशा ड्रैऊआ त? 17 अह सह ई निं आथी ज़ुंणीं खास्सी नगरी बरैबाद किई अर ज़ुंणीं सारी धरती रेगीस्तान शोटी बणाईं? अह सह ई मणछ आसा ज़ुंण कैद किऐ दै मणछा कधि कैद खानै का आज़ाद निं करदअ आथी त कि तिंयां बी तिन्‍नें घअरा लै डेओए?"

18 देशे-देशे राज़ै ज़ेभै मरा, तिन्‍नां डाहा बडी शान शोभा दी तिन्‍नें आपणीं ज़ैगा दाबी, 19 पर ताल्है निं घोरी दाबणे ज़ैगा बी आथी! तूह शोटणअ डाल़ा-बूटे बृथा शाण्हीं ज़िहअ काटी करै पोर्ही चिजदअ शोटी! तूह डाहअ जुधा दी मारै दै खास्सै सपाहीए ल्हासा ज़िहअ ज़ेता शाफल़े खाल़्ही दी लात्ता करै डाहा ढेस्सी। 20 किल्हैकि तंऐं किअ आपणअ ई देश बरैबाद अर तंऐं पाऐ आपणैं ई लोग मारी, तेरअ क्रिया-कर्म निं होरी राज़ै ज़िहअ शान-शोभा दी हणअ। तेरी कदुष्ट खिंबे हणीं अत्री। 21 लोगा बोल़णअ इहअ, "एऊ राज़ेए शोहरू-माठै पाआ मारी! तिन्‍नां दै तिन्‍नें दादा-बाबे पापे सज़ा भुगतणै! तिन्‍नां मांझ़ै निं आजू कोही ऐहा धरती दी राज़ किअ नां तिन्‍नैं नगरी लोल़ी बसाऊई।"

22 स्वर्गे सारी सैनो मालक बिधाता बोला इहअ, "मुंह पल़णअ बाबेल देशा लै चुटी संघा करनअ पठी खतम। एथ निं मुंह किछ़ छ़ाडणअ, लान्हैं-सुन्हैं बी निं ज़िऊंदै छ़ाडणैं। अह डाहअ मंऐं बिधाता बोली। 23 बाबेल देश करनअ मुंह इहअ ज़ेथ सिधै हुहल़ू हणैं बस्सै दै। अह देश करनअ मुंह इहअ बरैबाद कि एथ रहणीं सिधी च़िक्‍करै अर कछैरो झ़ाकल़। अह डाहअ मंऐं स्वर्गे सारी सैने मालक बिधाता बोली।"

24 स्वर्गे सारी सैनो मालक बिधाता काढै इहै सोह, "ज़िहअ मंऐं सोठी आसा डाहअ द, सह हणअ तिहअ ई पूरअ ज़िहअ मंऐं बोलअ। 25 मुंह करनै अश्शूरी मेरी इज़राईली परज़े देशे खतम, तिंयां मांडणै मुंह आपणीं धारा लात्ता करै। मुंह काढणअ आपणीं परज़ा इज़राईलीए कैल़ै का अश्शूरीए गलामीओ जूँ पोर्ही अर तिन्‍नें कान्हा का काढणअ मुंह अह बोझ़अ धरनीं। 26 अह आसा मंऐं सारै संसारा लै सोठी डाहअ द, इहअ करै दैणीं मुंह आपणैं हाथै सोभी देशा लै सज़ा। 27 हुंह आसा स्वर्गे सारी सैनो मालक बिधाता, ज़ुंण मंऐं सोठी हेरअ, तेखअ निं मुंह सज़ा दैणैं का कोहै रोक्‍की सकदअ।"

28 ज़हा साला यहूदा मुल्खो राज़अ अहाज मूंअ, तधू खोज़अ बिधाता कि आजू हणअ इहअ,

29 "पलिश्तीओ, तम्हैं निं खास्सै खुश हआ कि ज़हा शोठी करै तम्हां मार पल़ा ती सह चुटी! कि ज़ुंण राज़अ तम्हां मारदअ चुटी पल़ा थिअ, सह मूंअ! तेऊ झ़रीलै शपैल़ो बच़अ हणअ तेऊ का बी खास्सअ झ़रीलअ ज़ुंण प्रैंदी पोर्ही डैअ दैआ। 30 इज़राईली मांझ़ै ज़ुंण सोभी का गरीब बी होए, तेऊ लै हणअ खाणां-पिणां लै बतेर्हअ, तिंयां रहणैं निहंचै। पर तम्हां पलिश्ती लै पाणअ मुंह नकाल़ कि तम्हैं मरनै भुखै अर ज़ुंण तेता का बच़े तिंयां पाणै मारी।

31 "पलिश्ती नगरीए प्रऊल़ीओ, लेर-पकार पाई मांगा मज़त! तम्हैं सोभ लागा डरै काम्बदै! उतरा बाखा एछणी बलबान सैना धूँईं ज़ेही, तैहा सैना दी निं कुंण इहअ सपाही आथी ज़ुंण पिछ़ू रहा होए।

32 "पलिश्ती देशा बाखा ज़ुंण दूत एछणअ, तेऊ लै हाम्हां किज़ै ज़बाब दैणअ? हाम्हां बोल़णअ इहअ, ‘सियोन आसा बिधाता बणाअं द, तेऊ परज़ा मांझ़ै गरीबा का गरीब मणछ बी लआ तिधी शरण।’"