1 तम्हां लै पल़णीं आफ़त! ज़ुंण तम्हैं नर्दैई आसा अर बेनसाफी करी मेरी परज़ा हंता। 2 तम्हैं मारा रैनै-गरीबो हक, तम्हैं निं तिन्नों नसाफ हणैं दैंदै। तम्हैं लुटा बिधबा बेटल़ी अर छ़ुटै-मुक्कै दै मणछे ज़ैदात। 3 ज़ेभै तम्हां लै बिधाता आफ़त पाए, तेभै किहअ करै बच़णअ तम्हां? ज़ेभै दूर देशा का परदेसी तम्हां बरैबाद करदै एछे तेभै किज़ै करनअ तम्हां? तम्हां केस्सी ठुहर्नअ अर कहा सेटा लणी शरण? तेभै किधी डाहणीं तम्हां अह आपणीं धन-माया च़ोरी?10:3 आयू. 31:14; 1 पत. 2:12 4 तम्हां कैद हणैं अर मरनै का किहअ करै बच़णअ? अज़ी बी निं बिधातो रोश्श फांभअ हुअ, सह आसा अज़ी बी सज़ा दैंदअ लागअ द।
अश्शूर देशे राज़ै करै दैनी परमेशरै सज़ा
5 बिधाता बोला इहअ, "अश्शूरी राज़ैआ! ताल्है भाल़ केही घोर आफ़त हणीं! अश्शूरी राज़अ आसा मेरै तम्हां लै सज़ा दैणें डांगा ज़िहअ ज़हा लै मुंह रोश्शै आसा फिरी दी। 6 मुंह छ़ाडणअ अश्शूरी राज़अ तम्हां पापी देशा संघै जुधा करदअ, ज़ुंणीं तम्हैं मुल्है रोश्श ठैऊई। तेऊ लुटणैं-घशिट्टणै तम्हैं अर तेऊ जैंटणैं तम्हैं बाता पल़ी दी च़िक्करै ज़िहै।"
7 पर अश्शूरी राज़ै आसा एता का बी प्रैंदी सोठदअ लागअ द, सह च़ाहा कई देशा खतम करनअ! 8 सह बोला घमंडा दी इहअ पै, "मेरअ हर सैनापति आसा राज़अ! 9 मंऐं हेरै तिन्नां करै कलनो, कर्कमीश, हमात, अर्पात, सामरी अर दमिश्क नगरी ज़िती। 10 मंऐं ज़ितै तिंयां बडी-बडी मुहुर्ती आल़ै बलबान देश बी ज़हा का सामरी अर एरुशलेम नगरी का बी खास्सै देअ देबतै थिऐ। 11 मंऐं किई सामरी नगरी अर तेते सोभ मुहुर्ती बरैबाद अर एरुशलेम नगरी अर तेथ तिन्नें देअ-देबी मुहुर्ती लै बी करनअ मुंह इहअ ई।"
12 पर मालक बोला इहअ, "ज़ांऊं हुंह अश्शूरी राज़ै करै सियोन धारा अर एरुशलेम नगरी लै ज़िहअ हुंह च़ाहा त तिहअ करी मुक्के, तेखअ दैणीं मुंह अश्शूरी राज़ै लै तेऊए घमंड अर शरेरी गल्ला लै सज़ा।"
13 अश्शूरी राज़अ मारा एही डिंगा, "मंऐं किई ईंयां सोभै गल्ला आप्पै। हुंह आसा सज़ाण अर अक्ली आल़अ अर ज़ोर बी आसा मुंह खास्सअ। हुंह पल़अ बणें बल्दा ज़िहअ देशे-देशे राज़ै लै चुटी संघा किअ तिन्नें ज़ैगा अर खज़ानै दी कबज़अ। 14 मंऐं ज़ितै संसारे सोभ देश! तिन्नें धन-माया झाल़ी मंऐं आप्पू लै एही ज़िहअ कुंण च़ुंनणा च़ुंघदी डेऊई दी च़ेल्लीए कोल्हा का आंडी झाल़ा, तेथ नां मुंडा प्रैंदै कुंण फैंख फल़ाक्कदअ अर नां च़ूंज़ खोल्ही च़ेल्ली छझैऊंदी!"
15 पर बिधाता बोला इहअ, "खराल़अ निं गरानी का बडअ हंदअ, नां कगोतर छदाणा का बडी हंदी। शोठी निं मणछा च़कदी, मणछै हआ शोटी च़की दी।"
16 स्वर्गे सारी सैने मालक बिधाता लाणअ अश्शूरी घमंडी सैना लै मारनै आल़अ रोग, तिन्नां एछणअ आगी ज़िहअ दहणैं आल़अ ज़अर ज़ुंण तिन्नां मुक्कणअ ई निं आथी। 17 बिधाता ज़ुंण इज़राईलो प्रैश्शअ आसा, इज़राईलो पबित्र परमेशर बणनी भकदी आग, अर तैहा धैल़ी करनै तेऊ दुशमण एकी ई धैल़ी कांडै-रिंडै ज़िहै दहई खतम। 18 ज़िहअ रोगी हणैं बाद मणछ दुबल़अ फिरा, तिहअ रहणअ अश्शूरी राज़ैओ बल घटदअ लागी। बिधाता करनी तिन्नें बण-बूट अर खेचे शोभा पठी खतम। 19 तिंयां रहणैं बणैं धख ज़िहै बूटा ज़िहै कि एक होछ़अ ज़िहअ लान्हअ बी सका तिन्नां गणी।
इज़राईली ज़ुंण ज़िऊंदै बच़णैं
20 एक बगत एछणअ इहअ कि ज़ुंण इज़राईली ज़िऊंदै हणैं रहै दै, तिन्नां निं आपणैं मारनै आल़ै10:20 मारनै आल़ै अश्शूरी राज़ेए सैना होरी देशे भरोस्सै रहणअ ज़ुंणीं तिंयां पठी खतम आणै तै करी। तिन्नां रहणअ तेखअ असली दी याकबे पबित्र परमेशर बिधाते आसरै। 21 याकबे आद-लुआदा मांझ़ै ज़ुंण धख ज़िहै बच़ै दै हणैं, तिंयां फिरनैं तेखअ आपणैं महान परमेशरा बाखा। 22 इज़राईली च़ाऐ समुंदरे रेता ज़िहै खास्सै किल्है निं होए, तिन्नां मांझ़ै एछणैं सिधै धख ज़िहै फिरी। इज़राईलीओ इहअ बनाश ता हणअ ई थिअ, किल्हैकि तिंयां थिऐ एता ई जोगी। 23 हाँ, स्वर्गे सारी सैने मालक बिधाता आसा एही डाही दी कि इज़राईलो करनअ बनाश।10:23 रोम. 9:27,28
बिधाता दैणीं अश्शूरी लै सज़ा
24 स्वर्गे सारी सैने मालक बिधाता बोला आपणीं परज़ा लै, "ज़ुंण सियोन आसा बस्सी दी, अश्शूरी तम्हां मिसरी ज़िहै शोठै करै बी च़िक्के, तम्हैं निं तिन्नां का डरदै लागी। 25 तम्हां लै रोश्श हणअ मेरै थोल़ी घल़ी लै अर तिंयां करनै मुंह तेखअ खतम। 26 हुंह आसा स्वर्गे सारी सैनो मालक बिधाता, अश्शूरी च़िक्कणै मुंह इहै ज़िहअ कुंण कहा कोल़ै करै च़िक्का।10:26 पांच़ 7:24,25 तिंयां करनै मुंह तिहै खतम ज़िहै मिद्यानी ओरेब टोल्हा सेटा खतम किऐ तै। अश्शूरी लै दैणीं मुंह तेही सज़ा ज़ेही मिसरी लै दैनी ती। 27 सह बगत एछणअ इहअ कि तेभै करनै मुंह तम्हैं अश्शूरीए राज़ा का आज़ाद। तिन्नें गलामीओ जूँ करनअ मुंह थारै कैल़ै का दूर अर थारी कान्हो बोझ़ काढणअ मुंह पोर्ही।"
अश्शूरी सैनो जुधा लै एछणअ
28 दुशमणे सैना हेरी एईआत नगरी गिम्मी! तिंयां गऐ मिग्रोन नगरी बाती आजू एछी! तिन्नैं हेरअ एरुशलेम उतरा बाखा मिकमाश नगरी आपणअ समान अर ज़िणस डाही! 29 तिंयां गऐ खागा आर एछी अर बैल़ी आसा तिंयां गिबा नगरी! रामाह नगरीए लोगा आसा डरै दर्छ़णअ छ़ुटअ द। राज़ै शाऊले गिबा नगरीए लोग ठुर्है दूर। 30 गलीम नगरीए लोग लागै ज़ोरै-ज़ोरै लैल़ा-पकारा पाई मज़त मांगदै! लैश नगरीए लोगो शूणां! ऐबै अनातोत10:30 अनातोत ऐहा नगरी आसा जेरमयाहो ज़ल्म हुअ द, अह नगरी आसा एरुशलेम नगरी का उतर-पछ़म दिशा बाखा बस्सी दी। नगरीए केही बूरी दशा हणीं! 31 मदमेना अर गेबीम नगरीए लोग आसा बच़णा लै ओर्ही-पोर्ही ठुर्हदै लागै दै। 32 आझ़ पुजणैं अश्शूरी दुशमण सैना नोब नगरी, तिधा का दैणीं तिन्नां एरुशलेम नगरीए सियोन धारा लै मुठी बाटी करै धमकी।
33 अश्शूरी सैना आसा बणैं खास्सै बूटा ज़िहै, स्वर्गे सारी सैने मालक बिधाता छ़ांबणी आपणैं महान बला करै तिन्नें शाण्हीं। तिन्नां मांझ़ै सोभी का बडअ बूट बी पाणअ तेऊ काटी फेटअ। 34 महान बिधाता करनअ घणअ बण आपणैं खराल़ै करै काटी खतम। तेऊ काटणी लाबानोन बणें लाम्मी-लाम्मी केल़ुई बी।