1 एरुशलेम नगरीए बारै डाहअ बिधाता मुखा इहअ खोज़ी।

एरुशलेम नगरी लै बोला सुपनैओ खाग। एरुशलेम नगरीए लोगो, तम्हां लै हुअ किज़ै? तम्हैं किल्है आसा सोभ आपणैं दल़बै प्रैंदै उखल़ै दै? 2 थारी नगरी किल्है आसा इहअ हाल्‍लअ पल़अ द? एथ* किल्है आसा बणें ज़ीबा ज़ेही क्रिंगा पांदै लागै दै?

एऊ जुधा लै ज़ुंण तम्हां मांझ़ै मूंऐं, तिंयां निं जुधा करै मूंऐं अर नां तिंयां कुंणी तलबारा करै काटै। 3 थारै सोभ सैणैं अर ज़ुंण तम्हां प्रैंदै राज़ करनै आल़ै तै, तिंयां ठुर्है सोभ अर तिंयां हेरै कतीरा बाहणैं का आजी कैद करी। 4 तैही बोलअ मंऐं इहअ, "मुंह दैआ इधी कल्ही रहणैं, मुंह दैआ तिन्‍नां लै ज़ोरै-ज़ोरै ढाहा लाणैं अर हिक्‍की-सल़िक्‍की लेरा लाणैं ज़ुंण मेरै आपणैं लोग मूंऐं। मुंह च़पाऊंदै निं लागा।" 5 अह आसा धैनै-सुपने खागा लै खरी, हार अर दुखो बगत आअ द, स्वर्गे सारी सैने मालक बिधाता हाम्हां लै पाअ। म्हारी नगरी फेर-फिरदी दुआल किई हेठा का खोर्हली, अर सारी नगरी आसा धारा बाखा लै भाल़ी लागी दी कि झ़ाणीं तेथ बाखा मज़त एछी जाए।

6 एलाम देशे सैना आई घोल़े शुंआरी दी कतीर-कबाण पाई। कीर नगरीए सैना आई हाथै ढाल़ पाई। 7 यहूदा मुल्खे रज़दै-पज़दै खेच भर्हुऐ रथा करै, एरुशलेम नगरीए प्रऊल़ी आजू आसा सैना घोल़ै प्रैंदै शुंआर खल़्हुई दी। 8 यहूदा मुल्ख निं राज्ज़ी-राम्बल़अ रहणैं जोगी रहअ।

तेऊ बगतै फिरी तिन्‍नां अस्त्र-शस्त्रे आद ज़ुंण बणें ज़ैगा आसा डाहै दै। 9,10 तेभै शुझुई तम्हां का दाबेदपूर* गहल़ा फेर दुआली दी पल़ी दी द्रटा कि ईंयां ती सदेरना लै। तेभै लागै तम्हैं एरुशलेम नगरी दी सोभी घअरा भाल़ै अर तेता मांझ़ै ढोल़ै तम्हैं धख घअर कि तेता का निखल़ै दै पात्थरा करै नगरीए गहल़े दुआली सदेरे। 11 पाणीं झाल़णां लै बणाईं तम्हैं नगरी भितरी एक बडी कोफर संघा किअ पराणीं कोफरी का बगदअ पाणीं तेथ कठा। पर तम्हैं निं परमेशरा बाखा किछ़ धैन दैनअ ज़ुंण एकी ज़मानै ईंयां गल्‍ला सोठी ती डाही दी अर ज़ुंण आझ़ इहअ हणैं दैनअ।

12 तधू त स्वर्गे सारी सैने मालक बिधाता तम्हां लै शोग, लेर-पकार पाणै, मूंड छाम्बणा लै अर घेरी खिंथल़ै बान्हणां लै बोलअ द। 13 पर इहअ करनअ ता दूर, तम्हैं फिरै तधू हास्सदै अर खुशी मनाऊंदै। तम्हैं काटै तधू हेल़्ही मांझ़ा का रिठ-बाकरै संघा बेठै खांदै झुटदै। तम्हैं फिरै तधू इहअ बोल्दै, "आझ़ खाणअ-पिणअ हाम्हां मौज़ी किल्हैकि काल्‍ला सका हाम्हैं मरी बी।"✝

14 स्वर्गे सारी सैने मालक बिधाता किई आप्पै मुंह संघै गल्‍ला, तेऊ बोलअ इहअ, "अह कदुष्ट काम निं तिन्‍नें ज़िऊंदी ज़िता माफ करनै जोगी आथी। अह गल्‍ल डाही मंऐं बिधाता बोली ज़हा का सारी शगती आसा।"

15 स्वर्गे सारी सैने मालक बिधाता छ़ाडअ हुंह राज़ दरबारे कामां दी डाहै दै शेबना नाओंए भढारी सेटा समादा पजैल़अ कि तेऊ लै बोलै इहअ, 16 "तूह इधी नगरी बागै किज़ै करा? ताल्है कुंणी दैनी इधी आप्पू लै घोरी खण्हने ज़ाज़त? ताल्है कुंणी बोलअ कि तूह सका आप्पू लै धारा घोर कोती? ताल्है कुंणी दैनी भिल़ी दी तेरी ल्हासा डाहणां लै घोरी बणाईं डाहणें ज़ाज़त? 17 ताखा होए च़ाऐ ज़ेतरअ बी ज़ोर। पर बिधाता च़कणअ तूह उझै संघा शोटणअ दूर। 18 तेऊ च़कणअ तूह गिंदू ज़िहअ शोटणअ तूह दूर किधी बिरलै देशै। तूह मरनअ तेथ अर तेरअ रथ बी चुटणअ-फुटणअ पठी ज़ेतो ताह घमंड आसा। ताह पिछ़ू पल़णअ तेरै मालके घअरा आल़ै बी शर्मिंदै हणअ ज़सरी तूह च़ाकरी करा। 19 बिधाता करनअ तूह तेरै कामां का बी बाझ़ी अर तेरी बडी पदबी बी छ़ड़ैऊंणी ताखा पोर्ही।"

20 बिधाता बोला शेबना लै इहअ, "ज़ेभै ईंयां गल्‍ला हणीं, तेभै छ़ाडणअ मुंह एता लै मेरअ दास हिलकियो शोहरू एलीकीम। 21 तेरअ च़ोल़अ अर तेरी गाची दैणीं मुंह तेऊ लै अर तेरअ हक बी दैणअ मुंह तेऊ लै। सह हणअ यहूदा मुल्ख अर एरुशलेम नगरीए लोगा लै बाबा ज़िहअ। 22 राज़ै दाबेदो सारअ हक अर तेऊए मैहले कुंज़ी दैणीं मुंह तेऊ का। ज़ेता सह खोल्हे तेता निं कोहै बुदरी सकदअ अर ज़ेता सह बुदरे तेता निं कुंण घुआल़ी सकदअ।✝ 23 सह करनअ मुंह खुंढै ज़िहअ डुघअ खबेहुई पाक्‍कअ अर सह हणअ आपणीं खिंबे इज़त बढेरनैओ मूल़।

24 "तेऊओ खिंब अर तेऊए टबर हणैं तेऊ करै मशूर तिंयां हणैं लोटकी बतिल्‍ली ज़िहै ज़ुंण बडै भांडै प्रैंदै हअ डाहै दै। 25 ज़ेभै ईंयां गल्‍ला हणीं, तेभै हणीं सह खुंढअ ढिल्‍लअ संघा पल़णअ धरनीं ज़ुंण पाक्‍की ज़ैगा त टोक्‍की डाहअ द। तिंयां सोभै च़िज़ा बी अल़णीं धरनीं ज़ुंण तेथ छ़ड़ाऊई ती डाही दी।" ईंयां गल्‍ला आसा स्वर्गे सारी सैने मालक बिधाता बोली डाही दी।