ईशायाह बोलअ इज़राईली लै,

1 "इज़राईलीओ, तम्हैं शूणां,

ज़ुंण तम्हैं याकबे आद-लुआद आसा,

ज़ुंण तम्हैं यहूदा गोत्रा का आसा,

तम्हैं फिरा मुंह बिधाते नाओंऐं सोह खांदै,

तम्हैं फिरा इज़राईले परमेशरे गल्‍ला करदै,

पर ज़िहअ तम्हैं बोला, तिहै निं तम्हैं असली दी आथी।

2 तम्हां इज़राईलीए हआ ऐहा गल्‍ला दी शमाकी कि

तम्हैं आसा पबित्र नगरीए बशिंदै अर

तम्हैं रहा इज़राईले परमेशरे आसरै,

ज़हा नाअं स्वर्गे सारी सैनो मालक बिधाता आसा।"

3 बिधाता बोला इज़राईला लै इहअ,

"मंऐं आसा पैहलकै जुगै खोज़ी हेरअ द कि आजू किज़ै हणअ

तेखअ दैनअ मंऐं नच़ानक

तिन्‍नां गल्‍ला तेही ई निभणैं।

4 मुखा थिअ थोघ कि तम्हैं हणैं हठू,

थारै कैल़ै आसा लोहे बिंडा ज़िहै ज़ुंण नपदै निं आथी अर

थारै माथै आसा कांस्सै ज़िहै लड्ड करदै।

5 तैही त मंऐं पैहलकै ज़मानैं खोज़ी डाहअ द कि आजू हणअ तम्हां लै इहअ,

ज़ुंण गल्‍ला हुई-बिति, तिंयां ती मंऐं पैहलै ई बोली डाही दी,

ताकि तम्हैं इहअ बोली निं सके कि ईंयां काम किऐ

थारै हाथै बणाईं दी मुहुर्ती अर मैहरै।

6 ज़ुंण मंऐं तम्हां का खोज़अ त, तिंयां गल्‍ला गई ऐबै तेही ई निभी,

तम्हैं बी मनअ कि तिंयां गल्‍ला निभी तेही ई।

ऐबै लाअ मंऐं तम्हां का होर नऊंईं गल्‍ला खोज़ी कि आझ़ा बाद किज़ै हणअ,

तिंयां गल्‍ला ज़ुंण मंऐं आझ़ तैणीं गुप्त ती डाही दी।✝

7 ऐबै दैणअ मुंह तिन्‍नां गल्‍ला हणैं,

एही गल्‍ला निं आझ़ तैणीं हुई नां बिति,

ज़ै हंदी, तै हेरनअ त तम्हां बोली कि तम्हां का आसा तिन्‍नां गल्‍लो थोघ!

8 इहअ बी आसा मुखा थोघ कि तम्हैं निं भरोस्सै करनै जोगी आथी

किल्हैकि तम्हैं किअ कबल्‍लअ मुल्है विश्वास घात ई।

तैही निं तम्हां का इना गल्‍लो थोघ आझ़ तैणीं लागअ,

तैही निं थारै काना का एतो एक बैण बी शुण्हुंअ।

9 आपणीं तैणीं ज़िरनै मुंह थारै रोश्श,

मुंह निं तम्हैं खतम करनै किल्हैकि

ऐहा गल्‍ला पिछ़ू लोल़ी मेरअ अदर हुअ।

10 मंऐं परखै तम्हैं आफ़ते आगी जैंदरी खास्सै,

ज़ेही आगी करै च़ंदी परखा,

पर तम्हैं दी निखल़ी खोट ई।✝

11 अह किअ मंऐं मेरी आपणीं तैणीं,

हुंह निं च़ाहंदअ कि मेरअ नाअं नकदरअ होए,

नां हुंह कहा संघै आपणअ प्रतप्प बांडणअ च़ाहंदअ,

सह आसा सिधअ मेरअ एक्‍कीओ।"

12 बिधाता बोला इहअ,

"तम्हैं याकबे आद-लुआद, तम्हैं इज़राईली दैआ मेरी गल्‍ला दी धैन ज़ुंण मंऐं शादै दै आसा!

हुंह आसा सह ई परमेशर ज़ुंण

सोभी का आजी थिअ अर खिरी बी आसा हुंह ई एक्‍कै!

13 पृथूईए आथरी आसा मंऐं आपणैं हाथै पाई दी,

प्रैंदै सरग बी आसा मंऐं छ़ैअ द,

सरगे इना सोभी तारै लै करा हुंह हुकम

अर ईंयां रहा ज़िहअ मंऐं बोलअ तिहै ई टेक्‍की।✝

14 तम्हैं करा मुंह सेटा झाल़अ!

देअ-देबी मांझ़ै निं कोही खोज़अ कि

ज़ुंण मणछ मंऐं छ़ांटअ अर ज़हा लै हुंह बिधाता झ़ूरा, तेऊ छ़ेल़णअ बाबेल देशा संघै जुध,

तेऊ करनअ ज़िहअ हुंह करनअ च़ाहा तिहअ।

15 सह आसा हुंह ज़ुंणीं बोलअ अर कुस्रू राज़अ शादअ,

तेऊ आजू-आजू त हुंह संघा किअ मंऐं सह सफल।

16 ऐबै एछा मुंह नेल़ संघा शूणां कि हुंह किज़ै बोला।

शुरू ओर्ही किई मंऐं सोभ गल्‍ला प्रगटी,

सोभ गल्‍ला निभी ज़ेही मंऐं बोली तेही ई।"

मेरै मालक बिधाता पाई मुंह दी आपणीं आत्मां, इज़राईलीओ, तेऊ छ़ाडअ हुंह तम्हां सेटा लै।

17 इज़राईलो पबित्र परमेशर बिधाता

ज़ुंणीं तम्हैं बच़ाऊऐ, सह बोला इहअ,

"हुंह आसा थारअ परमेशर बिधाता,

हुंह दैआ थारी भलाईए तैणीं तम्हां लै शिक्षा,

हुंह नढैऊआ तम्हां तेस्सी ज़हा बाता तम्हां हांढणअ लागा।

18 हुअ ता लोल़ी त इहअ कि तम्हैं मेरै सोभ हुकम मंदै!

तै हणीं ती तम्हां लै एही गाडा ज़ेही बर्गत

ज़ुंण कधि निं शुक्‍कदी।

ज़ीत एछणी ती तम्हां लै एही ज़ेही

समुंदरे छ़ाल्‍ली बाढा लै एछा।

19 तै हणीं ती आजू थारी आद-लुआद समुंदरे रेता ज़ेही खास्सी,

अर मुंह बी करनअ निहंचअ कि तम्हैं निं कधि बरैबाद हणैं।"

20 बाबेल देशा का निखल़ा पोर्ही!

छ़ेक्‍कअ करा, तिन्‍नां जैंदरी निं रहा!

खुशी-खुशी खोज़ा एऊ समादा सोभी ज़ैगा,

"बिधाता हेरै आपणैं दास याकबे आद-लुआद बच़ाऊई!"

21 ज़धू बिधाता आपणीं परज़ा इज़राईली दहंदै-प्लुशदै

शुक्‍कै रेगीस्ताना बाती नढैऊऐ, तेऊ निं तिंयां नचिशै डाहै,

तेऊ काढअ तिन्‍नां लै शुक्‍की टोल्हा का पाणीं,

तेऊ धुआशी टोल्ह संघा लागअ तेता का पाणीं बगदअ।

22 "पापी मणछ निं बच़ी सकदै," बिधाता डाहअ अह बैण बोली।