ईशायाह 7

अहाज राज़ै लै समाद

1 ज़धू उज़ियाहो पोचअ जतामो शोहरू अहाज यहूदा मुल्खो राज़अ थिअ, तेऊ ज़मानै छ़ेल़अ अराम देशे राज़ै रसीन अर इज़राईले राज़ै रेमलो शोहरू पेका एक्‍कअ करी एरुशलेम नगरी संघै जुध, पर तिंयां निं ज़िहअ तिन्‍नैं सोठअ त तिहै सफल हुऐ।

2 ज़ांऊं दाबेदपूर गहल़ै अह खबर यहूदा मुल्खे राज़ै अहाजा सेटा पुजी कि अराम देशे सैना गई इज़राईली मुल्खै एछी, तिन्‍नैं किअ एप्रैमी संघै गांठ-ज़ोल़। यहूदा मुल्खे राज़ै अर सारी परज़ा छ़ुटी डरै काम्मणीं ज़िहै डाल़-बूट बागरी करै काम्बा।

3 बिधाता बोलअ ईशायाह लै, "आपणैं शोहरू शेआर-जाशूबा निंऊं आप्पू संघा अहाज राज़ै सेटा लै। सह भेटणअ ताह तैहा बाता ज़िधी धोबी हआ कामां लागै दै, सह हणअ तैहा नाल़टीए पुंझ़ै ज़ेथ प्रैंधल़ी कोफरी का पाणीं एछा। 4 तूह दै तेऊ लै हैअ कि फिकर निं करी, रसीन राज़ै का निं रसीन अर रेमले शोहरू राज़ै पेका का डरदअ लागी। राज़ै रसीन अर तेऊए अरामी सैना अर राज़ै पेको रोश्श आसा दूई हिठै दै पर्ज़ाल़ा का लागै दै धूँआं ज़िहअ। 5 अरामी राज़ै अर एप्रैम गोत्रे इज़राईलीए राज़ै रेमले शोहरू आसा इहअ एक्‍कअ किअ द कि 6 तिन्‍नां छ़ेल़णअ यहूदा मुल्खा संघै जुध संघा करनअ तेथ आप्पू कबज़अ। तेखअ बणाणअं तबेलो शोहरू यहूदा मुल्खो राज़अ।

7 "पर मंऐं थारै मालक बिधाता डाहअ तम्हां लै बोली कि इहअ निं कधि हणअ। 8 किल्हैकि अराम देशे राज़धानी आसा दमिश्क अर दमिश्क नगरी दी करा रसीन राज़। लागी एप्रैमे खिंबे गल्‍ल, आजू पैंहठ साला भितरी हणअ इज़राईल पठी खतम, अह निं एक देश रहणअ ई। 9 इज़राईले राज़धानी आसा सामरी नगरी अर सामरी नगरी करा रेमलो शोहरू पेका राज़।

"ज़ै तम्हैं ऐहा गल्‍ला दी पाक्‍कअ भरोस्सअ डाहे, तै रहणैं तम्हैं बी पाक्‍कै टेक्‍की।"

इमानुएलो नछ़ैण

10 बिधाता दैनअ अहाज राज़ै लै एक होर समाद, 11 "हुंह आसा तेरअ परमेशर बिधाता, तूह मांग मुखा नछ़ैण। च़ाऐ सह इहअ डुघै दी मूंऐं दै मणछे संसारो होए, च़ाऐ सह बेघै उछ़टै स्वर्गो होए।"

12 अहाज राज़ै बोलअ, "मुंह निं किछ़ै नछ़ैण मांगणअ, मुंह निं ताह बिधाता परखदै लागणअ।"

13 एता लै बोलअ मंऐं ईशायाह, "तम्हैं ज़ुंण राज़ै दाबेदे आद-लुआद आसा, तम्हैं शूणां, मणछ ता गऐ तम्हां लै सबर करी-करी थकी, ऐबै तम्हैं मेरै परमेशरा संघै बी इहअ ई च़ाहा करनअ? 14 पर मालक बिधाता दैणअ तम्हां लै तज़ी बी नछ़ैण ज़रूर। एकी कुंआरी शोहरी का हणअ एक शोहरू, तेऊ शोहरू नाअं डाहणअ तैहा ‘इमानुएल।’✝7:14 मोत्त. 1:23; लूक. 1:31 15 ज़ेभै तैणीं सह भलै-बूरै समझ़णैं जोगी निं हणअ, तेभै तैणीं खाणअ तेऊ च़ोपल़ अर मखीर। 16 तेऊ शोहरू ज़ुआन हणैं का आजी जाणअ इना दूई राज़ैए देशो बनाश हई, ज़हा का तम्हैं डरदै आसा लागै दै।*7:16 सिरीया अर एप्रैम तै दूई मुल्ख अर तिन्‍नें राज़ै रसीन अर पेका ज़हा का अहाज राज़ै डअर लागा ती।

17 "बिधाता पाणै तम्हां लै, थारै लोगा लै अर सारै राज़ घरानै लै इहै धैल़ै कि तेथ पल़णीं तम्हां लै एही आफ़त कि ज़धू यहूदा का एप्रैम चुटी ज़ुदअ इज़राईल मुल्ख बणअ तधा ओर्ही निं तिहै धैल़ै कधि आऐ। तेऊ छ़ाडणअ अश्शूर देशो राज़अ तम्हां संघै जुधा लै।

18 "ज़ेभै ईंयां धैल़ै एछे, बिधाता पाणीं एक्‍कै शल़ेल़्ह अर मिसर देशे लोग एछणैं नील नदीए बाढै डाल़ै-बूटै रहणैं आल़ै रिंगल़ा ज़िहै अर अश्शूरी एछणैं तिन्‍नें देशे माहूँए गौणा ज़िहै। 19 तिंयां दुशमणे सैना बेशणै एऊ देशै नाल़ै-धारा, ढुंखरै-डुआरै अर सोभ कांडै-रिंडै अर घैहणीं हणीं तिन्‍नां करै भरी।

20 "ज़ेभै ईंयां धैल़ै एछे, मालका आणअ फरात दरैऊआ पारा बाखा का अश्शूर देशो राज़अ थारी ज़ामती करदअ! तेऊ करनै तम्हैं घुंढी उझै मुंडा तैणीं ज़ामत करी दाल़्ही, मुछ़ा अर तुंबी संघी पठी लाल।

21 "ज़ेभै ईंयां धैल़ै एछणैं, तेभै निं कोही डागै-चैणें हेल़्ही डाहणीं। तिन्‍नां धाचणी सिधी एक छ़ुहाण अर दूई भेडा, 22 तिन्‍नों ई दुध हणअ तिन्‍नां लै बतेर्हअ अर तेता करै हणीं तिन्‍नें ज़रुरती पूरी। ज़ुंण बी एऊ देशै ज़िऊंदै बच़ै दै होए, तिन्‍नां का हणअ खाणां लै दुध अर मखीर ई।

23 "ज़ेभै ईंयां धैल़ै एछे, तेभै ज़ुंण दाखे बागा दी हज़ार बेला ज़ेते किम्मत गैरा हज़ार गराम च़ंदीए सिक्‍कै हआ, तिंयां भर्हनीं एही खास्सी कि तेतो बणअ सिधअ झ़ाकल़। 24 लोगा डेऊणअ कतीर-कबाण पाई शकारा करदै किल्हैकि सारै देशै हणैं कांडै-रिंडे झ़ाकल़ भर्हुऐ दै। 25 धारा ज़ेथ एकी ज़मानै खेच कदाल़ी करै खण्हां तै, तेथ हणैं डाल़ बूट कांडै-रिंडै संघै इहै भर्हुऐ दै कि तेथ निं च़ाल्‍लअ डरै डेऊई। तिंयां धारा हणीं सिधी डागै अर भेडा-बाकरी च़रना लै।"