ईशायाह 42

बिधातो दास

1 बिधाता बोला इहअ,

"मेरै दासा भाल़ा, ज़ुंण मंऐं आसा सभाल़अ द,

ज़ुंण मंऐं छ़ांटअ द आसा, ज़हा का हुंह खुश आसा।

मंऐं पाई तेऊ दी आपणीं आत्मां अर

मुंह करनअ ज़ाती-ज़ाती लै नसाफ।"✝42:1 मोत्त. 3:17; लूक. 9:35; 2 पत. 1:7

2 बिधाते दासा नां झांशा काढणीं अर

नां तेऊ नगरीए बाता ज़ोरै-ज़ोरै भाषण दैणैं।

3 तेऊ निं जैंटी दी नगाल़ै चोल़णी,

नां तेऊ हिठदी धूँआं दैंदी बाती दैणअ हिठणै,

तेऊ दैणअ सोभी लै सत्त अर नसाफ।

4 नां सह थकणअ अर नां तेऊ हैअ चोल़णअ,

ज़ेभै तैणीं तेऊ पृथूई सारै दी नसाफ निं आणअ।

दूर समुंदरे टापू दी बस्सै दै मणछा बी रहणअ तेऊए शिक्षा न्हैल़ै लागी।

5 सरग आसा परमेशरै बणाअं द, अर तेऊ ई आसा सह प्रैंदै छ़ैई डाहअ द,

धरती बी आसा तेऊ ई फुआरी दी, तेथ पज़णै आल़ी सोभै गल्‍ला बी।

मणछा लै शाह बी दैआ सह ई ज़ुंण तेथ हांढा।

ऐबै बोला परमेशर बिधाता आपणैं दासा लै,

6 "मंऐं बिधाता छ़ांटै तम्हैं कि तम्हैं अर तम्हां लै दैनअ मंऐं बल कि

तम्हैं पृथूई दी नसाफ भाल़ी सके।

तम्हां बाती करनीं मुंह सोभी लोगा संघै करार अर

तम्हां करै करनअ मुंह सोभी देशा लै प्रैश्शअ।✝42:6 लूक. 2:32; शधा. 13:47

7 मुंह करनअ इहअ कि तम्हैं कांणै मणछे आछी घुआल़े अर

तिन्‍नां आज़ाद करे ज़ुंण न्हैरै कैदखानै आसा बेठै दै।

8 हुंह आसा बिधाता अर अह ई आसा मेरअ नाअं।✝42:8 ईशा. 61:1; शधा. 26:18

होर देअ-देबी निं मेरै प्रतप्पा दी साझ़ू आथी

ज़ुंण स्तोती मेरी लोल़ी हुई, तेतो भाग निं हुंह

हाथा करै बणाईं दी मुहुर्ती लै दैंदअ।

9 राम्बल़ै करै भाल़ा! ज़ुंण मंऐं बोलअ त, सह निभअ तिहअ ई।

ऐबै डाहणीं मुंह तम्हां का होर नऊंईं गल्‍ला खोज़ी,

तिन्‍नां हणैं का आजी डाहणअ मुंह तेते बारै तम्हां का खोज़ी।"

बिधाते स्तोती लै गिह

10 बिधाता लै बोला एक नऊंईं गिह,

सारै संसारे मणछो, तेऊए गिहा बोली करा तेऊए स्तोती!

दूर समुंदरै टापू दी बस्सै दै बपारी लोगो, तेऊए ज़ै-ज़ैकार करा!

समुंदरे सोभ ज़ीब करा तेऊए ज़ै-ज़ैकार!

दूर पृथूईए पुंझ़ै तैणीं रहणैं आल़ै सोभ लोग करा तेऊए ज़ै-ज़ैकार।✝42:10 भज. 96:1-3; 97:1

11 बणैं-बूटै बस्सै दै अर गराऊंऐं बस्सै दै लोग करा परमेशरे ज़ै-ज़ैकार,

कदारे अरब रेगीस्तानै बस्सै दै मणछ बी करा तेऊए ज़ै-ज़ैकार!

सेला नगरीए लोग करा धारा प्रैंदा का

ज़ोरै-ज़ोरै तेऊए ज़ै-ज़ैकार!

12 दूर-दूर टापू दी बस्सै दै लोग करा बिधाते स्तोती,

सोभ करा तेऊए ज़ै-ज़ैकार!

13 बिधाता डेओआ जोधै ज़िहअ जुधा करदअ,

तेऊ आसा जुध करनै आल़ै शूरबीरा ज़ेही रोश्शै आई दी,

तेऊ पाणीं जुधा लै हाक अर ज़ोरै लैल़।

तेऊ ज़ितणअ आपणैं दुशमणा का जुध।

बिधाता करनी आपणीं परज़े मज़त

14 बिधाता बोला इहअ,

"हुंह आसा कधा ओर्ही च़ुप्पी रहअ द,

मंऐं निं आपणीं परज़ा लै एक बैण बी बोलअ।

ऐबै गअ काम करनैओ बगत पुजी।

मुंह पाणीं ऐबै सूंणें दाह लागी दी बेटल़ी ज़ेही लैल़।

15 मुंह करनीं बडी-बडी धारा खतम,

डाल़-बूट अर घाह-पाच शकेऊंणै मुंह पठी।

बडी-बडी गाडा अर हरै-भरै खाग बणाणैं मुंह उज़र रेगीस्तान,

बडै-बडै पाणींए सअर बी शकेऊंणै मुंह पठी।

16 आपणीं कांणी परज़ा नढैऊंणीं मुंह तैहा बाता

ज़ेथ तिंयां कधि निं हांढै।

तिन्‍नों न्हैरअ बदल़णअ मुंह प्रैश्शै दी

ढेक-ढुंखरा आल़ी ज़ैगा करनीं मुंह तिन्‍नां लै सरली।

अह गल्‍ल डाही मंऐं बिधाता बोली अर

अह करनीं मुंह ज़िहअ मंऐं बोलअ तेही ई पूरी।✝42:16 लूक. 3:5; ईशा. 29:18

17 ज़ुंण हाथा करै बणाईं दी मुहुर्तीए आसरै आसा,

ज़ुंण तिन्‍नां मुहुर्ती आपणअ परमेशर मना,

तिन्‍नां पल़णअ पिछ़ू हटणअ अर शर्मिंदै हणअ।"

कांणै-टौणैं मणछ

18 बिधाता बोला इहअ,

"तम्हैं टौणैं मणछ शूणां!

तम्हैं कांणै मणछ भाल़ा राम्बल़ै करै!✝42:18 मोत्त. 11:5

19 मेरी च़ाकरी करनै आल़ी परज़ा का खास्सै कांणै निं कोहै आथी!

नां होर कुंण इना ज़िहै टौणैं आथी!

20 इज़राईलीओ, तम्हैं भाल़अ बतेर्हअ,

पर तम्हैं निं मुंह बाखा धैन ई दैनअ!

थारै कान ता आसा घुआल़ी पर

तम्हैं निं असली दी तेता शुणदै ज़ुंण हुंह बोला!"

21 बिधाता च़ाहा इहअ कि तेऊए परज़ा भाल़े कि

तेऊओ बधान किहअ महान अर प्रतप्पा आल़अ आसा।

सह च़ाहा तिन्‍नां का रहैऊंणअ कि सह करा हर बगत भलअ ई।✝42:21 मोत्त. 5:17,18; रोम. 7:12; 10:4

22 पर ऐबै हेरी तेऊए इज़राईली परज़ा पठी लुटी,

तिंयां आसा सोभै डुघी खात्ती दी शाचै दै!

तिंयां आसा न्हैरै कैदखानै दी हूल़ी डाहै दै।

तिंयां आसा पठी लुटै-खर्लुटै दै,

तिन्‍नां बच़ाऊंदअ निं कोहै निस्सअ एछी।

23 तम्हां मांझ़ै इहअ कुंण आसा ज़ुंणी शूणअ कि बिधाता किज़ै बोलअ?

बिधाते गल्‍ला दी आजू कहा दैणअ धैन?

24 याकबे आद-लुआद कुंणी दैनै लुटणैं?

सह दैनअ बिधाता आप्पै हणैं ज़हा लै तम्हैं इज़राईली पाप किअ!

हाम्हैं निं तिहअ किअ ज़िहअ सह च़ाहा त कि हाम्हैं ज़िऊए,

नां हाम्हैं सह बधान मनअ ज़ुंण तेऊ हाम्हां लै दैनअ।

25 तैही काढै तेऊ म्हारै सारै रोश्श हाम्हां इज़राईली प्रैंदै

अर तैही मूंऐं हाम्हां मांज़ै कई जुधा दी।

तेऊए रोश्शा करै प्लुशूऐ इज़राईली आगी ज़िहै,

एतरअ हई बी निं हाम्हां समझ़ आई!

हाम्हैं निं एता का बी किछ़ शिखल़अ!