ईशायाह 60

एरुशलेम परमेशरो प्रतप्प

1 एरुशलेम, खल़ी उझ़ू संघा च़मक सुरज़ा ज़ेही,

ताह प्रैंदै आसा बिधाते प्रतप्पो झ़ामण लागअ द!✝60:1 इफि. 5:14

2 होर देश आसा न्हैरै दी पेठै दै,

पर ताखा लागणअ बिधाते प्रैश्शैओ झ़ामण,

बिधातो प्रतप्प हणअ ताह दी प्रगट।✝60:2 प्रका. 21:23

3 देश-देश एछणैं तेरै प्रैश्शै नेल़ अर

राज़ै-राज़ै एछणैं तेरै नऊंईं धैल़ीए प्रैश्शै दी।✝60:3 प्रका. 21:24

4 फेर दै भाल़णीं अर भाल़ कि किज़ै आसा हंदअ लागअ द,

तेरी परज़ा आसा घअरा लै फिरी एछणा लै झाल़्हदै लागै दै!

तेरै शोहरू-माठै एछणैं दूरा-दूरा का फिरी,

तेरी शोहरी दैणीं होछ़ै लान्हैं ज़ेही भोसल़ै च़की ताह सेटा पजैल़ी।

5 तूह हणीं एता भाल़ी नाच़णै जोगी खुश,

ताह छ़ुटणीं भितरा का खुशी दी काम्मणीं,

देशा-देशे धन-माया आणनीं ताह सेटा लै,

दूर-दूर समुंदरे खज़ानै बी एछणैं ताह सेटा लै।✝60:5 जेर. 33:9; जोए. 2:26; ईशा. 61:6

6 मिद्यान अर एपा देशा का एछणैं ऊँटे बडै-बडै छ़ुंढ।

तिन्‍नां दी आणनैं शेबा*60:6 शेबा शेबा मुल्ख त सुन्नैं अर मसालै मशूर। मुल्खे लोगा सुन्‍नअ अर लोवान लादी।

लोगा खोज़णीं खुशीए खबर कि बिधाता किज़ै-किज़ै किअ!✝60:6 भज. 72:10; 15; 1 राज़. 10:1,2; मोत्त. 2:11

7 कदार मुल्खै अर नबाओत मुल्खै च़रदी

भेडा-बाकरीए हेल़्ही आणनीं ताह सेटा लै कि तूह तिन्‍नां मांझ़ै गाभू बल़ीदान करे

अर तिन्‍नां मुंह बिधाता खुश करना लै बेदी दी भैंट करे।

मुंह बिधाता पाणअ आपणैं भबना दी होर बी खास्सअ प्रतप्प।

8 ईंयां ज़हाज़ किज़ै आसा ज़ुंण बादल़ा ज़िहै आसा एछदै लागै दै

अर ज़ुंण कबूतरे छ़ुंढा ज़िहै आसा घअरा बाखा एछदै लागै दै?

9 ईंयां तरशीश नगरीए ज़हाज़ आसा दूर देश समुंदरे टापू का एछदै लागै दै,

ईंयां आसा परमेशरे परज़ा घअरा लै फिरदी लागी दी।

तिन्‍नां संघै आणअ तिन्‍नैं खास्सअ सुन्‍नअ-च़ंदी

कि तेऊ बिधाते नाओं अदर करे ज़ुंण

इज़राईलो पबित्र परमेशर आसा अर

ज़ुंणी सोभ देश आपणीं परज़े अदर करदै डाहै लाई।

10 बिधाता बोला एरुशलेम नगरी लै इहअ,

"परदेसी मणछा च़िणनै ताह फेर-फिरदै गहल़ भिई,

तिन्‍नें राज़ै करनीं तेरी च़ाकरी।

मंऐं दैनी रोश्शै ताल्है सज़ा,

पर ऐबै आसा हुंह ताखा खुश अर ऐबै लागी मुंह तेरी झींण।

11 तेरी नगरीए प्रऊल़ी रहणीं धैल़-राच घुआल़ी,

ताकि देशा-देशे राज़ै एछे अर

ताह सेटा लै आपणीं धन-माया आणे।✝60:11 प्रका. 21:25,26

12 पर ज़ुंण देश तेरी च़ाकरी नांईं करे

तिंयां हणैं पठी बरैबाद।

13 लाबानोन बणें सोभी का बधिया काठ आणनैं ताह भिई च़िणना लै,

केल़ुई, कैलीए अर च़ीले काठ आणनैं एरुशलेम नगरी लै

ताकि तेता करै मेरअ भबन होर बी शोभलअ बणांए अर

मेरी नगरीए शोभा होर बी खास्सी बणें।

14 ज़ुंण ताह हंता तै, तिन्‍नें आद-लुआद बी एछणी ताह सेटा लै

संघा टेक्‍कणअ तेरै अदर करना लै तम्हां सेटा माथअ।

ज़ुंण तम्हां बृथा समझ़ा तै, तिन्‍नां करनीं ताह सेटा माथअ टेक्‍की थारी स्तोती।

तिन्‍नां बोल़णअ ताल्है, ‘बिधाते नगरी,

सियोन ज़ुंण इज़राईले पबित्र परमेशरे नगरी आसा।’✝60:14 प्रका. 3:9

15 ऐबै निं तूह आजू छ़ाडी दी अर एही रहणीं ज़हा लै नफरत करा,

नां तूह शुन्‍नीं अर उज़र रहणीं।

तूह बणाणीं मुंह शोभली अर महान एही ज़ैगा

ज़ेथ पोस्ती दर पोस्ती नंद रहणीं।

16 देश-देश अर राज़ै-राज़ै धाचणै ताह इहै

ज़िहै माआ आपणैं दुध झुटणैं आल़ै शोहरू धाचा।

तेखअ लागणअ ताखा थोघ कि मंऐं बिधाता आसा तूह बच़ाऊई दी अर

मंऐं याकबे महान परमेशरै किई तूह आज़ाद ज़हा का सारअ बल आसा।

17 मुंह आणअ ताल्है कांस्से बदल़ै सुन्‍नअ,

लोहे अर काठे बदल़ै च़ंदी अर कांस्सअ,

पात्थरे बदल़ै आणअ मुंह ताल्है लोहअ।

ज़ुंण ताह प्रैंदै राज़ करा, तिन्‍नां निं तूह आजू हंतणी;

मुंह करनअ इहअ कि तिंयां ताह संघै मेल़-ज़ोल़ डाहे अर नसाफ डाही राज़ करे।

18 तेखअ निं उपद्रभ अर ज़ुल्म करने गल्‍ला शुण्हनी,

तेरै देशै निं बरैबादी अर लुट-घशिट्टे गल्‍ला भिई हणीं।

मुंह करनीं उछ़टै गहल़े दुआली ज़ेही तेरी फाज़त,

ताह करनीं मेरी ज़ै-ज़ैकार किल्हैकि मंऐं बच़ाऊई तूह।

19 तेखअ निं ताह धैल़ीए प्रैश्शै लै सुरज़े धुप्पे ज़रुरत हणीं अर

नां राचीए प्रैश्शै लै ज़ोथे ज़रुरत हणीं,

ताल्है हणअ हुंह बिधाता प्रैश्शअ,

ताह दी हणअ मेरै प्रतप्पो धुप्पअ।✝60:19 प्रका. 21:23; 22:5

20 तेखअ हणीं तेरी दुख तकलिफीए धैल़ी खतम,

ताल्है हणअ हुंह बिधाता सदा प्रैश्शअ,

ज़ुंण सुरज़ अर ज़ोथा का खास्सअ सदा रहणअ।

21 तेखअ हणीं तेरी सोभ परज़ा धर्मीं,

अर तिंयां रहणैं ऐहा ज़ैगे सदा मालक बणी।

तिंयां आसा बुटी ज़िहै मंऐं रोहै दै अर मंऐं आपणैं हाथै बणाऐं दै

ताकि सोभी लै मेरअ प्रतप्प प्रगट होए।✝60:21 प्रका. 21:27; इफि. 2:10; 2 पत. 3:13

22 तिन्‍नां मांझ़ै धख ज़िहै टबरा आल़अ

बी हणअ आजू एक महान अर बलबान देश।

ज़ेभै तेतो बगत एछणअ,

तेभै दैणअ मुंह इहअ झ़ट च़ारै हणैं।

हुंह आसा बिधाता!"