1 एरुशलेम नगरी लै हिम्मत दैणा लै लणअ मुंह बोली,

ज़ेभै तैणीं सह बच़ाऊई निं हेरी तेभै तैणीं निं मुंह च़ुप्पी रहणअ,

एरुशलेम नगरीए ज़ीत हणीं राची आगीए मसाल्‍लै ज़ेही।

2 एरुशलेम, सोभी देशा भाल़णअ तेरअ धर्म अर

सोभी राज़ै भाल़णअ तेरअ प्रतप्प।

तेरअ पल़णअ नऊंअ इहअ नाअं

ज़ुंण बिधाता ताल्है आप्पै डाहणअ।✝

3 तूह हणीं बिधाता लै शोभलै मुगटा ज़ेही।

4 ऐबै निं आजू ताल्है कोही इहअ बोल़णअ, "अह आसा छ़ाडी दी।"

नां तेरी ज़ैगा लै इहअ बोल़णअ, "अह आसा बांढी बेटल़ी ज़ेही।"

तेरअ नऊंअ नाअं हणअ, "बिधाता आसा ऐहा का खुश।"

तेरी ज़ैगा लै बोल़णअ, "सुहागण बेटल़ी।"

किल्हैकि बिधाता आसा ताल्है खुश अर

सह हणअ तेरी ज़ैगा लै बेटल़ीए मर्धा ज़िहअ।

5 ज़िहअ ज़ुआन मणछ कुंआरी शोहरी संघै बैह करा,

तिहअ ई करनअ तेऊ ताह संघै बैह ज़ुंणीं तूह बणाईं दी आसा।

ज़िहअ लाल़अ आपणीं लाल़ी करै खुश हआ,

तिहअ हणअ तेरअ परमेशर ताह करै खुश।

6 एरुशलेम, मंऐं आसा नगरीए दुआली दी पहरी डाहै दै,

तिंयां नां धैल़ी च़ुप्पी बेशणै अर नां राची।

तम्हैं ज़ुंण बिधाता आद करा, तम्हैं

निं आप्पू बेशी रही,✝

7 तम्हैं निं तेभै तैणीं बिधाता बशैघ करनैओ मोक्‍कअ दैई, ज़ेभै तैणीं एरुशलेम नगरी भिई तेही ई नां बणें

अर सोभी देशा जैंदरी मशूर निं हई जाए।

8 बिधाता आसा कऊंलै बच़न दैनै दै,

तेऊ करनै आपणैं ज़ोरै तिंयां पूरै,

"थारअ नाज़ निं कधि थारै दुशमणा खाणैं दैंदअ,

नां हुंह परदेसी थारअ दाखो रस झुटणैं दैंदअ।

9 पर तम्हैं ज़ुंणीं साल-फसल बऊई अर लऊई

सह खाणीं बी तम्हां ई, संघा करनीं बिधाते ज़ै-ज़ैकार।

ज़ुंणीं दाखो रस काढअ अर भढारै डाहअ

तम्हां भेटणअ मेरी पबित्र ज़ैगा सह झुटणा लै।"

10 एरुशलेम नगरीए लोगो, नगरी बागै निखल़ा

संघा बणाआं तिन्‍नां लै बाता ज़ुंण थारै लोग घअरा लै बापस आसा एछदै लागै दै!

तिन्‍नां लै बणाआं खुल्ही सल़क अर गल़ू-पात्थर च़का तेता का पोर्ही!

बडअ फ्रहरअ करा खल़अ ताकि देशा-देशे लोगा का थोघ लागे

11 कि बिधाता बोलअ पृथूईए पुंझ़ै तैणीं इहअ खोज़णा लै,

"एरुशलेम नगरीए लोगा लै बोला इहअ कि

बिधाता एछणअ तम्हां बच़ाऊंदअ, अर

तेऊ आणनैं तिंयां लोग बी संघा ज़ुंण तेऊ बच़ाऊऐ।"✝

12 तम्हां यहूदे परज़ा लै बोल़णअ लोगा, "परमेशरे पबित्र परज़ा,

ज़ुंण बिधाता आसा बच़ाऊऐ दै।"

एरुशलेम नगरी लै बोल़णअ लोगा इहअ, "सह नगरी ज़हा लै परमेशर झ़ूरा,

सह नगरी ज़ुंण बिधाता शोटी निं डाही।"