1 बिधाता बोला इहअ, "परमेशरे बेदी, एरुशलेम नगरी लै पल़अ घणअ दुख! ज़हा नगरी राज़ै दाबेदो डेरअ थिअ, तेता लै भाल़ा केही आफ़त पल़ी! एक-दूई साला दैआ होर बितणै ज़ेथ तिह-थैर मनाऊंणै।" 2 तेखअ पाणीं बिधाता तैहा नगरी लै आफ़त ज़हा लै "परमेशरे बेदी" बोला। तेथ हणैं तेखअ लेरदै अर हिक्‍का पटाक्‍कदै अर सारी नगरी हणीं ज़ेही बेदी फेर लोधल़अ ई लोधल़अ हआ पल़अ द। 3 परमेशरा गोटणैं एरुशलेम नगरीए गहल़-कोट फेरा-फेर संघा पल़णअ एता लै चुटी। 4 एरुशलेम नगरी हणीं मणशाणा ज़ेही ज़ुंण धरनीं माट्टै हेठा का गल्‍ला करने कोशिश करा, ज़ुंण सुलै करै बोल्दअ शुण्हिंआं।

5 "ज़ुंण नर्दैई परदेसी दुशमण एरुशलेम हारदै-मारदै एछा तै, तिंयां बी फर्लाऊंणैं धूल़ै माट्टै ज़िहै अर तिन्‍नें डरैऊंणै आल़ी बडी सैना फर्लाऊंणीं नाज़े किशा ज़ेही दूर। 6 स्वर्गे सारी सैनो मालक बिधाता एछणअ एरुशलेम नगरी बच़ाऊंदअ, तेभै हणअ बडअ गुल़ूबिज़ल़ू अर धरती दी हणीं ज़ाज़री अर तेऊ संघै एछणअ आगी ज़ेही कुर्लू बागरी संघै ढिश-डुआल़अ। 7 तेखअ ज़ुंण देश परमेशरे बेदी आल़ी नगरी संघै जुधा करदै एछणैं, तिन्‍नां सोभी देशे सैना अर अस्त्र-शस्त्र राची भाल़ै दै सुपनै ज़िहै खतम। 8 सोभ देश ज़ुंण एरुशलेम नगरी संघै जुधा करना लै कठा ज़ुल़णै तिंयां हणैं तेऊ भुखै मणछा ज़िहै ज़ुंण सुपनै दी खांदअ-पिंदअ हआ लागअ द, पर ज़ांऊं सह निंजा का खल़अ उझ़िआ, सह हआ भुखअ अर चिशै हआ तेऊओ गअल़ शुक्‍कअ द।"

9 ईशायाह बोला, "एरुशलेम नगरीए लोगो, तम्हैं हआ हक्‍कै-बक्‍कै अर झशकिआ! तम्हैं हआ कांणै कि तम्हां का शुझिए निं। तम्हैं लागा शराबा बाझ़ी एही झुटदै बेशदै! तम्हैं लागा बाझ़ी शराब झुटै धरनीं जुंघल़दै! 10 बिधाता पाई तम्हां लै ज़ैंईं, तम्हैं डाहै तेऊ घणीं निंजा सताऊई। गूर हआ मणछा लै आछी ज़िहअ पर बिधाता आसा तिन्‍नें आछी ढोपी डाही दी।✝ 11 तैही निं तम्हां का बिधाता प्रगट किई दी गल्‍लो सार समझ़ एछदअ, सह आसा तम्हां लै एही जंतरी ज़िहअ ज़ुंण बागै मोहर लाई शाट्टै भितरी आसा पल़ेटी डाही दी। ज़ै तैहा जंतरी कहा पहल़ै लिखै दै मणछे हाथै दैई बोले कि ऐहा पहल़! तेऊ बोल़णअ इहअ कि सह निं ऐहा पहल़ी सकदअ किल्हैकि सह आसा बागै मोहर लाई दी ज़ेता चोल़ी निं सकदै।✝ 12 ज़ै तैहा तम्हैं कहा नपहल़ा लै बोले कि ऐहा पहल़! तेऊ बोल़णअ इहअ कि सह निं पहल़ी ई ज़ाणदअ।"

13 मालक बोला इहअ, "ईंयां ज़पा खाखा का मेरअ नाअं, पर दिला का आसा ईंयां मुखा दूर। ईंयां खोज़ा सिधै मणछे सूल अर रिती-रबाज़ ज़ुंण इनै रटी आसा डाहै दै।✝ 14 तैही करनै मुंह भिई इना लै इहै नुआहरै काम कि ईंयां ज़ाण-प्रबीण झशकणैं अर इना बेघै अक्ली आल़ै लागणअ प्राच। तिन्‍नें अक्ल अर च़लाकी हणीं बृथा।"✝

15 तिन्‍नां लै पल़णीं घोर आफ़त ज़ुंण आपणीं गल्‍लो बिधाता का छ़पाअ करदै फिरा! तिंयां फिरा आपणैं कामों इहअ छ़पाअ करदै कि तिंयां निं कोही लाऐ भाल़ी कि तिंयां किज़ै करा। 16 ईंयां करा हर गल्‍ला उंबल़ी ई। बडअ कुंण आसा, खमार कि तेऊ बणाऐं दै माट्टे भांडै? तम्हैं बणाईं दी च़ीज़ तम्हैं कधू इहअ बोल्दी शूणीं, "हुंह निं तंऐं आथी बणाईं दी?" कि इहअ बोला, "ताखा निं थोघ ई आथी कि ताह किज़ै लागा करनअ।" ✝

17 ज़ेही कहाबत बी आसा कि लाबानोन धारो बण हणअ थोल़ै धैल़ै बाद फल़ा दैणैं आल़अ बाग। फल़ा दैणैं आल़ै खेच शुझणैं घणैं बणां ज़िहै।

18 ज़ेभै ईंयां धैल़ै एछे, तेभै शुणनअ टौणैं कताबा पहल़णैं आल़ै का ज्ञैन अर कांणै ज़हा का तेभै तैणीं किछ़ निं शुझदअ थिअ, तिंयां लागणै भाल़ै। 19 भोल़ै अर रैनै-गरीब मणछ हणीं खुशी ज़ुंण तिन्‍नां लै इज़राईले पबित्र परमेशर बिधाता दैणीं।✝ 20 नर्दैई अर शरेरै हणैं सदा लै खतम, उपद्रभ अर ज़ुल्म करनै आल़ै मरनै सोभ। 21 इना संघै ज़ुंण नर्दोश मणछे बारै झ़ुठी शाजत दैई तिन्‍नों नसाफ निं हणैं दैंदै तिंयां बी हणैं खतम।

22 ऐबै ज़ुंणीं इज़राईले परमेशर बिधाता आबरामे खरी दूर किई, सह बोला तम्हां याकबे आद-लुआदा लै इहअ, "मेरै लोगो, ऐबै निं आजू तम्हां शर्मिंदै पल़णअ हणअ, ऐबै निं तम्हां कोहिए डरै उटअ मूंड करी हांढणअ पल़णअ। 23 ज़ांऊं तम्हां का शुझणअ कि मंऐं तम्हां लै केही खास्सी आद-लुआद दैनी, तेखअ जाणीं तम्हां समझ़ एछी कि हुंह आसा याकबो पबित्र परमेशर। तेखअ करनअ तम्हां इज़राईली मेरअ अदर अर मेरी डरा हेठै बी जाणअ तम्हां रही। 24 तेभै दैणीं मुंह ऐडै मणछा लै बी अक्ल, ज़ुंण कबल्‍लै भुल़्हखदै रहा लागी तिंयां हणैं मेरी शिक्षा लै खुश।"