2 राज़ै 20

राज़अ हिजकिया बच़अ मरनै का

1 तिन्‍नां ई धैल़ै हुअ इहअ कि हिजकिया राज़ै लागी एही बमारी कि तेऊए ती मौत हणैं आल़ी। आमोसो शोहरू ईशायाह गूर आअ तेऊ सेटा लै संघा बोलअ इहअ, "बिधाता बोला ताल्है इहअ कि, ज़िहअ-ज़िहअ ताह करनअ तेता कर, किल्हैकि तूह निं ऐहा बमारी का बिज़रदअ आथी। तूह मरनअ ऐबै।"

2 तेखअ लागअ हिजकिया भित्ती बाखा मुंह करी बिधाता सेटा एही अरज़ करदअ, 3 "हे बिधाता, ऐहा गल्‍ला निं बिस्सरी आथी कि हुंह ताल्है किहअ शुचअ-पाक्‍कअ रहअ, मंऐं मनअ तत्त-दिला का ज़िहअ तंऐं बोलअ तिहअ ई।" तेखअ लागअ सह तिधी हिक्‍की-सल़िक्‍की लेरा लांदअ।

4 ईशायाह लागअ राज़ै सेटा का हांढदअ, ज़ेतरी सह मैहले प्रऊल़ी बागै पुजअ, बिधाता बोलअ तेऊ लै इहअ कि 5 तूह डेऊ राज़ै हिजकिया सेटा भितरा लै फिरी संघा बोल तेऊ लै इहअ, "हिजकिया, तूह आसा मेरी परज़ा प्रैंदै राज़अ अर हुंह आसा सह परमेशर बिधाता ज़हा तेरअ दाद-बाब राज़अ दाबेद मना त। मंऐं हेरी तेरी लेर-पकार शूणीं। मुंह करनअ तूह ऐहा बमारी का नरोगअ अर पर्शी जाणअ तूह मेरै भबनै एछणैं जोगी हई। 6 ताह दैणअ मुंह अज़ी पंद्रा साला होर ज़िऊंणै। अश्शूर देशै राज़ै का डाहणअ मुंह तूह अर अह नगरी बच़ाऊई। मेरै दास राज़ै दाबेदा पिछ़ू निं हुंह ऐहा नगरी लै किछ़ दैंदअ हणैं।"

7 तेखअ बोलअ ईशायाह गूरै राज़े च़ाकरी करनै आल़ै लै, "फेडूए फल़े आणा एक टिक्‍की संघा लेस्सा तेता एऊए दुखणैं दी।" तिन्‍नैं किअ तिहअ ई अर हिजकिया हुअ नरोगअ। 8 राज़ै हिजकिया पुछ़अ ईशायाह गूरा का, "हुंह किहअ करै ज़ाणूं कि बिधाता करनअ हुंह ऐहा बमारी का नरोगअ अर पर्शी तैणीं जाणअ हुंह बिधाते भबनै एछणैं जोगी हई?"

9 ईशायाह बोलअ, "ज़िहअ बिधाता बोलअ, तेऊ करनअ तिहअ ई। तूह कै बोला तेतो नछ़ैण तूह धुप्पै करै बगत खोज़णैं आल़ी घल़ीए छ़ैल्‍ली दस गंईं आजू च़ाहा कि दस गंईं पिछ़ू च़ाहा?"

10 हिजकिया बोलअ, "धुप्पे घल़ीए छ़ैल्‍ली दस गंईं आजू डेऊणीं आसा सान, हुंह च़ाहा इहअ कि छ़ैल्‍ली लोल़ी दस गंईं पिछ़ू हटी।"

11 ईशायाह गूरै किई बिधाता सेटा अरज़ अर बिधाता किई धुप्पे घल़ीए छ़ैल्‍ली दस गंईं पिछ़ू। ज़ुंण घल़ी अहाज राज़ै थिई बणाईं दी।

हिजकिया आअ घमंड

12 तिन्‍नां ई धैल़ै हुअ इहअ कि बलदानो शोहरू बरोदक-बलदान थिअ बाबेल देशो राज़अ। तेऊ का लागअ थोघ कि हिजकिया राज़अ आसा बमार अर तेऊ लिखी हिजकिया लै एक च़िठी। 13 हिजकिया किअ तैहा च़िठी पजैल़णैं आल़ैओ सुआगत संघा रहैऊई तिन्‍नां का आपणीं सारी ज़ैदात, सुन्‍नअ, च़ंदी, भढारै किम्मती च़िज़ा, खुशबूदार मसालै अर किम्मती तेल अर सैने सारै अस्त्र शस्त्र। एही निं किज़ै च़ीज रही ज़ुंण तेऊ तिन्‍नां का नांईं रहैऊई। 14 तेखअ डेऊअ ईशायाह गूर राज़ै हिजकिया सेटा लै संघा पुछ़अ, "तिंयां मणछ किधा का थिऐ आऐ दै अर तिन्‍नैं ताखा किज़ै बोलअ?"

हिजकिया बोलअ, "तिंयां थिऐ खास्सै दूर बाबेल देशा का आऐ दै।"

15 ईशायाह पुछ़अ, "तिन्‍नैं राज़ दरबारै किज़ै-किज़ै भाल़अ?"

हिजकिया बोलअ, "तिन्‍नैं भाल़ी सोभै गल्‍ला। एही निं भढारै किज़ै च़ीज़ ई रही ज़ुंण तिन्‍नैं निं भाल़ी होए।"

16 तेखअ बोलअ ईशायाह राज़ै हिजकिया लै, "बिधाता बोला ताल्है इहअ कि 17 एक बगत एछणअ इहअ कि ज़ुंण बी तेरै मैहले भढारै तेरै दादै-बाबै आझ़ तैणीं आसा झाल़अ द, सह निंणअ बाबेल देशा लै अर एथ निं तिन्‍नां किछ़ छ़ाडणअ। 18 तेरी आद-लुआदा मांझ़ै बी निंणै तिन्‍नां कैद करी बाबेल देशा लै अर तिधी डाहणैं तिंयां गुंझी बणाईं राज़े च़ाकरी करदै लाई।"

19 हिजकिया सोठअ इहअ कि तेऊए ज़िऊंदी ज़िता ता हणीं देशै शांती अर तेऊ बोलअ ईशायाह लै, "ज़ुंण बिधाते गल्‍ला तंऐं मुखा खोज़ी तिंयां हणीं भली ई।"

हिजकिया राज़ैओ राज़ हुअ खतम

20 राज़ै हिजकिया ज़िहै बी काम किऐ, तेऊए शूरबीर हई जुधा करने काम, तेऊ किहअ पजैल़अ दरैऊऐ रोक्‍कअ लाई अर कुल्ह खण्हीं नगरी दी पाणीं, ईंयां सोभै गल्‍ला आसा यहूदा मुल्खे राज़े इतिहासे कताबा दी लिखी डाही दी। 21 खिरी मूंअ हिजकिया, आजू बणअ तेऊए ज़ैगा तेऊओ शोहरू मनिश्शे यहूदा मुल्खो राज़अ।