2 राज़ै 16

यहूदा दी राज़अ अहाज

1 इज़राईल थिअ रेमलो शोहरू पेका राज़अ, तेऊए राज़ा दी स्तार्हुई साला बणअ यहूदा जतामो शोहरू अहाज राज़अ। 2 ज़धू अहाज राज़अ बणअ, तधू ती तेऊए अमर बिहा साले, तेऊ किअ एरुशलेम नगरी का यहूदा मुल्खै सोल़ा साला तैणीं राज़। तेऊ निं आपणैं दाद-बाब दाबेदा ज़िहअ भलअ किअ! पर तेऊ किअ तेता का उंबल़अ ज़ेता का बिधाता नफरत करा। 3 तेऊ ढाकी इज़राईले कई राज़ै ज़ेही बात। होर ता होर, तेऊ किअ आपणअ सक्‍कअ शोहरू बी होरी देअए गान-स्ताना दी हूम बल़ीदान! तेऊ मनै तिन्‍नां लोगे च़िल़्हखरै रबाज़ ज़ुंण लोग बिधाता तेऊ देशा का इज़राईली पुजणैं का आजी दूर काढै तै। 4 अहाज राज़ै किऐ उछ़टी धारा प्रैंदै देहुरै, ज़ोता अर कई बडै-बडै बूटा गोधै बल़ीदान अर धूप ज़ाल़ी पूज़ा।

इज़राईल अर अराम देशो जुध

5 तेखअ ज़ुल़ै अराम देशो राज़अ रसीन अर इज़राईल मुल्खो राज़अ रेमलो शोहरू पेका कठा संघा आऐ एरुशलेम नगरी अहाब राज़ै संघै जुधा लै। सह गोटअ तिन्‍नैं फेरा-फेर पर तिंयां निं अहाज राज़ै का ज़िती सकै। 6 तिन्‍नां ई धैल़ै किई अराम देशे राज़ै रसीनै एलात नगरी आपणैं कबज़ै दी, ज़ुंण तिधी यहूदी तै बस्सै दै, तिंयां काढै तेता का पोर्ही अर आप्पू बस्सै एदोमी लोग तिधी अर तिंयां आसा आझ़ तैणीं बी तिधी बस्सै दै। 7 अहाज राज़ै छ़ाडै अश्शूर देशे राज़ै तिगला-पेल़सरा सेटा लै इहअ समाद दैई दूत, "हुंह आसा तेरअ दास ज़ुंण ताह दिला का मना, तूह कर इधा लै एछी मेरी मज़त संघा बच़ाऊ मुंह इज़राईल अर अराम देशे राज़ै का, तिन्‍नैं आसा मुंह संघै जुध छ़ेल़अ द।" 8 अहाज राज़ै काढअ बिधाते भबना अर राज़े मैहले भढारा का सुन्‍नअ-च़ंदी संघा दैनअ अश्शूर देशे राज़ै लै भैंट। 9 ज़िहअ ई अहाज राज़ैओ समाद अश्शूर देशे राज़ै तिगला-पेल़सरा सेटा पुजअ, सह निखल़अ आपणीं सैना संघी अराम देशा बाखा लै। तेऊ किअ तिन्‍नें राज़धानी दमिश्क कबज़अ। तिधी बस्सै दै लोग निंयैं तेऊ कैद करी कीर नगरी लै अर राज़अ रसीन पाअ मारी।

10 ज़ांऊं राज़अ अहाज अश्शूर देशे राज़ै तिगला-पेल़सरा सेटा लै मिलदअ दमिश्क नगरी डेऊअ, तिधी भाल़ी तेऊ एक बेदी संघा दैनअ तेऊ तैहा बेदीओ नक्षअ बणाईं कसरै हाथै उरियाह प्रोहता सेटा पजैल़ी। 11 उरियाह प्रोहतै बणाईं तेते साबै ज़ाथी तेही ई बेदी ज़िहअ नक्षअ राज़ै दमिश्क नगरी का दैनअ त, अर अहाज राज़ै बापस फिरनैं का आजी छ़ेक्‍की तेऊ सह बणाईं। 12 ज़ांऊं अहाज राज़अ दमिश्क नगरी का बापस फिरअ, तेऊ भाल़अ कि बेदी आसा बणाईं हेरी दी, 13 तेखअ किअ तेऊ तैहा बेदी प्रैंदै पशू अर नाज़ा करै हूम बल़ीदान खिरी दैनअ तेऊ दाखे रसो अर्घअ अर मेल़-ज़ोल़े बल़ीदानो लोधल़अ छ़ल़िकअ फेर। 14 ज़हा कांस्से बेदीए प्रतिष्ठा बिधाते भबनै थिई हुई दी, अहाजै सकैऊई सह बेदी तिधा का पोर्ही उतर दिशा बाखा लै अर सह नऊंईं बेदी बशैल़ी भबना आजू सम्हनै। 15 तेखअ किअ अहाज राज़ै उरियाह प्रोहता लै हुकम, "दोत्ती उडै हणैं आल़ै हूम बल़ीदान, नाज़ बल़ीदान अर अर्घअ करै आझ़ा पोर्ही ऐहा नऊंईं बेदी दी। ज़ुंण राज़ै अर लोगा लै मेल़-ज़ोल़ो बल़ीदान हआ, तेता बी करै आझ़ा पोर्ही ऐहा ई बेदी दी। बल़ीदान करनै बाद लोधल़अ बी छ़ल़िकै ऐहा ई बेदी दी। ऐहा पराणीं कांस्से बेदी डाहै सिधी मुल्है इहअ पुछ़णा लै कि बिधाता मुल्है किज़ू गल्‍ले ज़ाज़त दैआ अर किज़ै नांईं।" 16 ज़िहअ अहाज राज़ै हुकम किअ, उरियाह प्रोहतै किअ तिहअ ई।

17 ज़ुंण बिधाते भबनै कांस्से गाड्डै थिऐ, तेथ प्रैंदै डाहै दै कांस्से डबरै बी काढै तेऊ पोर्ही। ज़ुंण बारा कांस्से बल्दा प्रैंदै कांस्सैओ बडअ कल़ाह थिअ, सह बी थुआल़अ अहाज राज़ै पोर्ही संघा डाहअ धरनीं पात्थरा प्रैंदै। 18 ज़ुंण बशैघे धैल़ी खास खिम्भ लागा त, सह बी काढअ तेऊ पोर्ही अर ज़हा खास दुआरा बाती यहूदा मुल्खो राज़अ बिधाते भबना लै एछा त, सह बी किअ तेऊ बंद। तेऊ किई ईंयां सोभै गल्‍ला अश्शूर देशे राज़ै तिगला-पेल़सरा खुश करना लै।

19 अहाज राज़ै ज़िहै-ज़िहै काम किऐ तिंयां आसा यहूदा मुल्खे राज़े इतिहासे कताबा दी लिखी डाहै दै। 20 खिरी मूंअ अहाज अर संघा डाहअ दाबेदपूर गहल़ै तेऊए दादा-बाबा संघै दाबी। तेऊए ज़ैगा बणअ तेऊओ शोहरू हिजकिया यहूदा मुल्खो राज़अ।