2 राज़ै 25

एरुशलेम नगरीए बरैबादी

1 खिरी किअ सिदकिया बाबेल देशे राज़ै नबूकदनेसरा लै द्रोह। सिदकिया राज़ै गई ती एरुशलेम नगरी का राज़ करदी आठ साला बिति, नहुई साला दसा माघै आअ नबूकदनेसर राज़अ आपणीं सारी सैना संघी एरुशलेम नगरी तेऊ संघै जुधा लै। तिन्‍नैं पाऐ एरुशलेम नगरी बागै डेरै अर नगरीए गहल़ा फेर-फिरदै डाहै बागै बाल़-गोट लाई। 2 तेखअ रहै तिंयां देहुल़ साला तैणीं तिहै ई अर खिरी मुक्‍की एरुशलेम नगरी ज़िणस पठी, नकाल़ पल़अ इहअ खास्सअ कि 3 खाणां लै निं ज़ाथी किछ़ रहअ। तैहा साला नौआ शाल़्है काढी 4 बाबेल देशे सैना नगरीओ गहल़ पेच़ी भितरी एछणा लै बात। तैहा ई राची हुअ इहअ कि दुशमणै ती नगरी गोटी डाही दी पर सिदकिया अर तेऊए सैना डेऊऐ तैहा प्रऊल़ी बाती बागा लै ज़ुंण राज़े बागा नेल़ थिई। संघा निखल़ै जरदण नदी बाखा लै अराबा डेऊणे बाता। 5 पर बाबेल देशे सैना ठुर्ही तिन्‍नां पिछ़ू अर जेरिहो नगरी नेल़ सरलै रेगीस्तानै हेरै तिंयां ठिमकी। तिन्‍नैं ढाकअ राज़अ सिदकिया पर तेऊए सैना छिंघुई ओर्ही-पोर्ही सारै दी लुक्‍कदै। 6 राज़अ सिदकिया निंयं कैद करी बाबेल देशै रिबला नगरी नबूकदनेसरा राज़ै सेटा संघा लाई तिधी तेऊए पेशी अर बादा का किअ तेऊ लै सज़ा दैणैंओ हुकम। 7 सिदकिया राज़े आछी सम्हनै पाऐ तिन्‍नैं तेऊए शोहरू मारी अर तेऊए आछी कोती करै किअ सह कांणअ संघा निंयं शांघल़ी अर कांस्से चागै बान्हीं बाबेल देशा लै।

एरुशलेम नगरी बिधातो भबन पाअ ढोल़ी

8 नबूकदनेसरा गई ती बाबेल देशै राज़ करदी ठारा साला हई, उन्हुंई साला साता शाऊंणै आअ नबूज़रदान एरुशलेम नगरी लै, सह थिअ नबूकदनेसर राज़ैओ बज़ीर अर सैनापति। 9 तेऊ चैल़ी एरुशलेम नगरी बिधाते भबन, राज़े मैहलै अर होरी कार-करिंदे अर सेठ लोगे घअरै आग। 10 तेऊ संघै ज़ुंण बाबेल देशे सैना थिई, तिन्‍नैं पाअ एरुशलेम नगरी फेर बणाअं द गहल़ ढोल़ी। 11 ज़ुंण आम लोगा मांझ़ै कैदी एरुशलेम नगरी बच़ै दै थिऐ, अर ज़ुंण बाबेल देशे राज़े पक्षा लै थिऐ फिरै दै, तिंयां निंयैं नबूज़रदानै बाबेल देशा लै। 12 पर रैनै-गरीब अर बाख दाल़जी मणछ डाहै तिन्‍नैं यहूदा मुल्खै ज़ैगा-ज़िम्मीं अर दाखे बागा दी बेठू लाई।

13 बिधाते भबनै ज़ुंण कांस्से थाम्ह, खुर्शी, गाड्डै, बडअ कांस्सैओ कल़ाह निंयैं तिन्‍नैं चोल़ी करै काढी बाबेल देशा लै आप्पू संघा। 14 भबनै पूज़ा-गाज़ा करने ज़ेतरै बी कांस्से चाण-भांडै, डबरी, छ़ारा काढणें पल़ैंज़ै, शूप, च़िमटै, धूप दानी, 15 धनैरै, सुन्‍नें कऊली अर ज़ेतरी बी सुन्‍नैं अर च़ंदीए च़िज़ा थिई, तिंयां निंईं नबूज़रदान सैनापति आप्पू संघै बाबेल देशा लै। 16 बिधाते भबना लै ज़ुंण राज़ै सुलैमानै कांस्से दूई थाम्ह, खुर्शी, गाड्डै अर बडअ कल़ाह अर तेता हेठै बारा बल्द तै बणाऐं दै, तेतो बज़न करनअ त बशा का बागै। 17 दूई थाम्ह तै ठारा-ठारा हाथ लाम्मै अर तिधा का उझै त तेतो टोप च़ार हाथ उछ़टअ। टोपा फेर फिरदी थिई ज़ाल़ीदार कांगणी लाई दी अर तेथ फेर तै नारदाणें फूला ज़िहै कांस्से शल़ुम्हणूं लाऐ दै।

होर ज़ुंण बाबेल देशा लै कैद करी निंयैं

18 एता का लाऊआ निंयैं नबूज़रदान सैनापति सरयाह माहा प्रोहत, बडअ प्रोहत सपन्याह अर बिधाते भबने चअन दरोगै कैद करी। 19 नगरी दी किऐ तिन्‍नैं एक सैनापति कैद, राज़े पांज़ खास बज़ीर अर सैनापतिओ काईथ ज़हा का सैने साब-कताब डाहणें ज़िम्मैंबारी हआ ती सह बी किअ कैद अर शाठ खास सपाही तै होर एरुशलेम बच़ै दै तिंयां बी निंयैं आप्पू संघै कैद। 20 नबूज़रदान सैनापति पजैल़ै तिंयां बाबेल देशे राज़ै सेटा हमात मुल्खै रिबला नगरी 21 तिधी बझ़ैल़ै बाबेल देशे राज़ै तिंयां खास्सै च़िक्‍कणै अर खिरी पाऐ तिंयां मारी।

इहअ करै निंयैं यहूदा मुल्खे लोग आपणीं ज़ैगा का दूर कैदी बणाईं।

गदाली राज़पाले हत्या

22 गदाली ज़ुंण आहीकामो शोहरू अर शापानो पोचअ थिअ, सह बणाअं नबूकदनेसर राज़ै यहूदा मुल्खै तिन्‍नां मणछा प्रैंदै राज़पाल ज़ुंण बाबेल देशा लै कैद करी नांईं निंयैं तै। 23 नतानियो शोहरू इशमाईल, कोराहो शोहरू जोहनान, नतपाह नगरी का तनमेथो शोहरू सरयाह अर मकात नगरी का जजनिया। ईंयां तै यहूदा मुल्खे सैने दलपति अर कार-करिंदै ज़ुंण बाबेल देशे सैना आजू नांईं झ़ुकै। ज़ांऊं इना का थोघ लागअ कि गदाली बणाअं बाबेल देशे राज़ै राज़पाल अर तिंयां आऐ आपणैं सोभी आदमी संघी मिज़पा नगरी गदाली सेटा मिलदै। 24 गदाली बोलअ तिन्‍नां लै, "मेरी रही तम्हां लै ज़बान कि तम्हां लै निं किछ़ हंदअ। एता का निं तम्हैं एही डअर डाही कि बाबेल देशे कार-करिंदै तम्हां लै किज़ै करे! ज़ै हाम्हैं आप्पू मांझ़ै मिल़ी-ज़ुल़ी ज़िहअ राज़अ नबूकदनेसर बोले तिहअ करदै रहे तै निं किछ़ै बूरअ हणअ।"

25 पर तैहा साला काती हुअ इहअ कि इशमाईल थिअ नतानियो शोहरू अर एलीशामो पोचअ राज़े खिंबा का, सह डेऊअ आपणैं दस आदमी संघा निंईं मिज़पा नगरी गदाली सेटा संघा पाअ सह मारी अर तेऊ संघै ज़ुंण इज़राईली अर बाबेल देशे तेऊए कार-करिंदै थिऐ, तिंयां बी पाऐ तेऊ मारी। 26 तेखअ ज़ुंण इज़राईली यहूदा मुल्खै थिऐ, तिंयां डेऊऐ होछ़ै का प्रोढै तैणीं बाबेल देशे सैने डरै मिसर देशा लै संघा लागै तिधी रहंदै।

जेहोकीन राज़अ किअ कैदखानै का आज़ाद

27 यहूदो राज़अ जेहोकीन थिअ बाबेल देशै कैद किअ द अर तेथ गई ती तेऊ सैईंती साला हई। तेखअ बणअ बाबेल देशै नबूकदनेसरो शोहरू एबल-मरोदक राज़अ अर तेऊ किअ राज़अ जेहोकीम आपणैं राज़ा दी पैहली ई साला सताई फागणै कैदखानै का आज़ाद। 28 एबल-मरोदक त जेहोकीना लै खास्सअ झणैल़ू अर तेऊ किअ तेऊ कैदखानै बी होरी राज़ै का खास्सअ अदर अर तेऊ लै दैनी बडी पदबी। 29 जेहोकीना का खलाऊऐ कैदीए झिकल़ै पोर्ही अर तधा बाद खाई तेऊ आपणीं ज़िऊंदी ज़िता राज़े मैहलै बाबेल देशे राज़े मेज़ा दी रोटी। 30 तेऊ लै त राज़ै हर धैल़ीए गरज़ पूरी करना लै खर्च़अ लाअ द अर सह रहअ तेऊ सारी अमरा भेटदअ लागी।