2 राज़ै 8

शूनेम नगरीए बेटल़ी आई फिरी

1 शूनेम नगरी ज़हा बेटल़ीओ शोहरू एलिशा मरी करै भिई ज़िऊंदअ किअ त, एलिशा बोलअ तैहा लै, "बिधाता दैनी मुखा एही चतैनगी कि ऐहा ज़ैगा पल़णअ आगली साता साला तैणीं घोर नकाल़। तूह डेऊ आपणैं टांडै-टबरा संघी थोल़ै धैल़ै इधा का किधी होर्ता लै ताकि तम्हैं तैहा खरी का बच़े।" 2 ज़िहअ बिधाते गूर एलिशा खोज़अ, तैहा बेटल़ी किअ तिहअ ई संघा डेऊई पलिश्ती देशा लै अर आपणैं टबर बी निंयैं तैहा आप्पू संघा। तेखअ रही सह साता साला तैणीं तिधी।

3 ज़ांऊं सात साला बिति, तेखअ आई सह बेटल़ी पलिश्तीए देशा का फिरी संघा डेऊई इज़राईल मुल्खै राज़ै सेटा कि तेसो घअर अर ज़िम्मीं-ज़ैगा तैहा बापस भेटे। 4 राज़अ त तेभै बिधाते गूर एलिशे दास गेहज़ी संघै गल्‍ला करदअ लागअ द। सह थिअ तेऊ का एलिशा गूरे बडै-बडै च़मत्कारे बारै पुछ़दअ लागअ द कि तेऊ तिंयां किहै-किहै किऐ। 5 ज़ांऊं गेहज़ी राज़ै का सह गल्‍ल खोज़ी कि किहअ करै किअ एलिशा एक मूंअ द शोहरू भिई ज़िऊंदअ, तेतरी गई सह ई बेटल़ी तिधी पुजी संघा लागी राज़ै का अरज़ करदी। गेहज़ी बोलअ राज़ै लै, "मालक, अह आसा सह ई बेटल़ी ज़सरअ शोहरू बिधाते गूर एलिशा मरी करै भिई ज़िऊंदअ किअ त!" 6 ज़ांऊं राज़ै तैहा का पुछ़अ, तैहा खोज़ी पठी गल्‍ला कि सच्च़ी हुअ त इहअ। तेखअ शादअ राज़ै आपणअ एक दरबारी संघा किअ तेऊ लै हुकम कि ऐहा बेटल़ीए ज़ैगा-ज़िम्मीं ज़ुंण बी एसो आसा, तेता दैआ ऐहा लै बापस अर साता साला तैणीं एसे खेचा का ज़ेतरी फसल निखल़ी तेते घाल़ बी दैआ ऐहा लै बापस।

एलिशा अर अराम देशो राज़अ बेन्हदाद

7 एलिशा डेऊअ दमिश्क नगरी लै अर तधू काल्‍ला त अराम देशो राज़अ बेन्हदाद खास्सअ बमार। राज़ै का हेरअ कुंणी खोज़ी कि बिधातो गूर एलिशा आसा इधी आअ द, 8 तेऊ बोलअ आपणैं हज़ाएल नाओंए दरबारी लै, "एलिशा गूरा सेटा निंऊं भैंट संघा एछ तेऊ करै बिधाता पुछ़ी कि राज़अ बेन्हदाद ऐहा बमारी का बिज़रनअ कि नांईं?" 9 हज़ाएलै लादै दमिश्क नगरीए बधिया-बधिया च़िज़े च़ाल़्ही ऊँट संघा डेऊऐ एलिशा सेटा। तिधी पुजी बोलअ हज़ाएलै एलिशा लै, "तेरै दास अराम देशे राज़ै बेन्हदादै छ़ाडअ हुंह ताह सेटा लै पुछ़दअ, ‘हुंह आसा खास्सअ बमार, ऐहा बमारी का हुंह बिज़रनअ कि नांईं?’"

10 एलिशा दैनअ तेऊ लै ज़बाब, "बिधाता खोज़अ मुखा इहअ कि सह निं बच़दअ आथी। पर तूह डेऊ संघा खोज़ै राज़ै का इहअ कि तूह जाणअ बिज़री।" 11 बिधाते गूर एलिशा लागअ हज़ाएला बाखा करबैऊंणीं आछी करी कोहरअ भाल़अ कि हज़ाएले हुई झुखी। तेखअ लागअ एलिशा लेरा लांदअ। 12 हज़ाएल लागअ बोल्दअ, "मेरै मालक, तंऐं किल्है लाई लेरा?"

एलिशा दैनअ ज़बाब, "मुखा आसा लागअ द शुझदअ कि ताह इज़राईलीए केही बूरी दशा करनीं अर ताह किहै-किहै उपद्रभ करनै! ताह चैल़णीं तिन्‍नें गहल़ा आल़ी नगरी आग, तिन्‍नें खारकै मणछ मारनै ताह तलबारा करै, तिन्‍नें शोहरू मारनै ताह धरनीं छ़णांटी करै अर तिन्‍नें सुंदी बेटल़ी धेल़णीं-च़िरनी ताह ज़ेही नां केही!"

13 हज़ाएलै बोलअ, "हुंह किहअ करै सका इहअ बलबान हई? हुंह ता किछ़ बी निं आथी!"

एलिशा बोलअ, "बिधाता रहैऊअ मुखा इहअ कि तूह बणनअ अराम देशो राज़अ।"

14 हज़ाएल डेऊअ एलिशा सेटा का अराम देशे राज़ै बेन्हदादा सेटा फिरी। राज़ै पुछ़अ तेऊ का, "एलिशा ताखा किज़ै खोज़अ?"

तेऊ दैनअ ज़बाब, "तेऊ खोज़अ मुखा इहअ कि तूह जाणअ बिज़री।" 15 दुजै धैल़ै भेऊई हज़ाएलै एक खिंथ पाणीं जैंदरी अर तेऊ क्सोप्पअ राज़अ तेता करै इहअ कि सह मूंअ।

तेखअ बेठअ हज़ाएल बेन्हदादे ज़ैगा अराम देशो राज़अ।

यहूदा मुल्खो राज़अ जेहोराम

16 इज़राईल मुल्खै थिअ अहाबो शोहरू जोराम राज़अ, तेऊए राज़ा दी पांज़ूई साला बणअ जहोशापाते ज़िऊंदी ज़िता तेऊओ शोहरू जेहोराम यहूदा मुल्खो राज़अ। 17 जेहोराम बणअ बत्ती साले अमरा राज़अ अर तेऊ किअ एरुशलेम नगरी का इज़राईल देशै आठा साला तैणीं राज़। 18 तेऊए राणीं ती अहाब राज़ेए देई अर इज़राईले राज़ै अहाबे खिंबा ज़िहअ किअ जोरामै बी सह ई पाप ज़ेता बिधाता नांईं च़ाहंदअ त कि सह करे। 19 पर बिधाता निं यहूदा बरैबाद करनअ च़ाहंदअ त, किल्हैकि तेऊ ती आपणैं दास दाबेदा लै ज़बान दैनी दी कि तेऊए आद-लुआदा मांझ़ै रहणअ यहूदा दी कुंण नां कुंण राज़अ बणी।

20 जेहोरामे राज़ा दी हुअ एदोम देश यहूदे गलामी का आज़ाद संघा बणाअं तिन्‍नैं आपणअ एक राज़अ। 21 राज़ै जोरामै किऐ आपणैं सारै रथ कठा संघा पुजअ सेईर। तिधी गोटै तिंयां एदोम देशे सैना फेर-फिरदै। तैहा राची पल़ै सह अर तेऊओ सैनापति एदोमी सैना लै नभैऊशै चुटी संघा बच़ै तिधा का अर बाकी सैना बी ठुर्ही आपणैं-आपणैं डेरै लै। 22 इहअ करै हुअ एदोम यहूदा का आज़ाद अर सह आसा आझ़ तैणीं बी*8:22 आझ़ तैणीं बी ऐहा कताबा लिखणे ज़मानै तैणीं तिहअ ई। लिब्ना नगरी बी हुई तेऊ ई ज़मानै यहूदा का आज़ाद।

23 राज़ै जोरामै ज़िहै बी काम किऐ, तिंयां आसा यहूदा मुल्खे राज़े इतिहासे कताबा दी लिखी डाहै दै। 24 खिरी ज़ांऊं जोराम मूंअ, सह डाहअ दाबेदपूर गहल़ै राज़ै दाबणे ज़ैगा दाबी अर तेऊए ज़ैगा बेठअ आजू तेऊओ शोहरू अहाजया यहूदा दी राज़अ।

यहूदी मुल्खै अहाजया राज़अ

25 इज़राईल मुल्खै त अहाबो शोहरू जोराम राज़अ, तेऊए राज़ा दी बार्हूई साला बणअ यहूदा दी जेहोरामो शोहरू अहाजया राज़अ। 26 अहाजया त तधू बाई सालो ज़धू सह राज़अ बणअ। तेऊ किअ एरुशलेम नगरी का यहूदा मुल्खे इज़राईली प्रैंदै एकी ई साला राज़। तेऊए ईजा नाअं त अताल्या अर सह थिई इज़राईले राज़ै ओमरीए पोची। 27 अहाजयो बैह त अहाबे खिंबा का हुअ द अर तेऊ बी किअ अहाबे खिंबा ई ज़िहअ पाप ज़ेता का बिधाता नफरत करा त।

28 अहाजया डेऊअ उतरा बाखा इज़राईले राज़ै अहाबे शोहरू जोरामा संघै गलाद मुल्खै रामोत अराम देशे राज़ै हज़ाएला संघै जुधा लै। तेऊ जुधा दी हुअ जोराम खास्सअ ज़खमी। 29 राज़अ जोराम आअ फिरी कि जज्रेल पुजी सह तिन्‍नां ज़खमो लाज़ करे ज़ुंण तेऊ अरामी संघै जुधा लै पल़ै तै। यहूदो राज़अ जेहोरामो शोहरू अहाजया डेऊअ तिधी तेऊ झेठू।