2 राज़ै 21

यहूदा मुल्खै राज़अ मनिश्शे

1 ज़धू मनिश्शे यहूदा मुल्खो राज़अ बणअ, तेऊए अमर ती तधू बारा साले अर तेऊ किअ एरुशलेम नगरी का पजुंजा साला तैणीं राज़। तेऊए ईजा नाअं त हेपसिबी।

2 मनिश्शे किअ पाप ज़ेता बिधाता नांईं च़ाहंदअ त कि सह करे! तेऊ किऐ तिन्‍नां ज़ाती ज़िहै च़िल़्हखरै काम ज़ुंण बिधाता तेऊ देशै इज़राईली पुजणैं का आजी दूर किऐ तै। 3 तेऊ च़िणैं उझै धारा देहुरै भिई ज़ुंण तेऊए बाब हिजकिया खतम किऐ तै! तेऊ बणाईं इज़राईले राज़ै अहाबा ज़ेही बाल देअ अर अशेरा देबीए मुहुर्ती। सरगे ग्रहा पूज़दअ बी रहा त मनिश्शे लागी। 4 एरुशलेम नगरी बिधाते भबनै ज़िधी सिधै बिधाता सेटा माथअ टेक्‍का तै, तिधी बणाईं तेऊ होरी देअआ लै बी बेदी। 5 बिधाते भबनै दोहरी बाखा खोल़ै बणाईं ग्रहे पूज़ा करना लै बेदी। 6 तेऊ किअ आपणअ शोहरू बी बल़ीदान करी हूम! मनिश्शे करा त डांऊं-च़ेल्‍लै, शाऊई भाल़णैं आल़ै, मणशाण झ़ैऊंणै आल़ै सेटा डेऊई। इहअ करै किअ तेऊ बिधाता लै घोर पाप अर तेता लै आई बिधाता खास्सी रोश्शै।

7 मनिश्शे ज़ुंण अशेरा देबीए मुहुर्ती बणाईं, सह स्तापी तेऊ बिधाते तेऊ भबनै ज़ेता लै बिधाता राज़ै दाबेद अर तेऊए शोहरू सुलैमाना का इहअ बोलअ त, "इज़राईले बारा गोत्रे सोभी ज़ैगा मांझ़ै छ़ांटी मंऐं एरुशलेम नगरी अह ज़ैगा आप्पू लै ज़िधी सोभी एछी मुंह सेटा माथअ टेक्‍कणअ। 8 ज़ै इज़राईली मेरै सोभै हुकम मने अर मेरै तेऊ बधाने साबै आपणीं ज़िन्दगी ज़िऊए ज़ुंण मेरै दास मोसा तिन्‍नां लै दैनअ, तै डाहणैं मुंह तिंयां तेऊ देशै बसाऊई ज़ुंण मंऐं तिन्‍नें दादा-बाबा लै दैनअ। तिन्‍नां निं तिधा का किधी ठुल़णें ज़रुरत आथी।" 9 पर यहूदा मुल्खे लोगै निं बिधाते साबै ज़िन्दगी ज़िऊई। राज़ै मनिश्शे पाऐ तिंयां इहै कबाता कि तिंयां लागै तिन्‍नां होरी ज़ाती का बी खास्सै पाप करदै ज़ुंण बिधाता तेऊ देशा का इज़राईली नदरी खतम किई ती।

10 तैही बोलअ बिधाता आपणैं गूरा बाती इहअ, 11 "राज़ै मनिश्शे किऐ अमोरी अर कनानी का बी खास्सै च़िल़्हखरै काम, तेऊ कराऊअ मेरी परज़ा का पाप! तिंयां डाहै तेऊ तिन्‍नां मुहुर्ती पूज़दै लाई ज़ुंण यहूदी मणछै आपणैं हाथै ती बणाईं दी। 12 तैही बोला हुंह इज़राईलो परमेशर बिधाता इहअ कि यहूदा मुल्ख अर एरुशलेम नगरी लै पाणीं मुंह एही आफ़त कि ज़हा का बी तेते बारै थोघ लागे, सह हणअ नड़क्‍क। 13 साहुल लाई ज़ेही सज़ा मंऐं सामरी नगरी, इज़राईले राज़ै अहाब अर तेऊए आद-लुआदा लै दैनी, एरुशलेम नगरी लै बी दैणीं मुंह तेही ई सज़ा। एरुशलेम नगरी टुशणी मुंह एही ज़िहअ लोग रोटी खाई थाल़ू टुशा संघा डाहा धोई करै उटी बाखा! 14 मेरी परज़ा मांझ़ै ज़ुंण अज़ी ज़िऊंदै होए, तिंयां डाहणैं मुंह शोटी अर तिन्‍नां दैणअ मुंह तिन्‍नें दुशमणा का हारनै अर लुटणैं। 15 मुंह दैणअ आपणीं परज़ा लै इहअ हणैं किल्हैकि तिन्‍नैं किअ तिहअ ई पाप ज़ेता हुंह नांईं च़ाहंदअ त कि तिंयां करे! ज़धकै तिन्‍नें दाद-बाब मिसर देशा का निखल़ै, तधा ओर्ही आझ़ तैणीं आसा तिंयां मुल्है रोश्श ई ठैऊंदै लागै दै।"

16 मनिश्शे लै आसा यहूदा मुल्खे परज़ा का पाप कराऊणेंओ अर बिधातो हुकम नांईं मनणैओ दोश। तेऊ निं नर्दोश मणछे फाज़त किई अर तिन्‍नां मांझ़ै पाऐ तेऊ कई मारी अर तिन्‍नां मणछे लोहू करै आसा सारै एरुशलेम नगरीए बाता भर्हुई दी।

17 राज़ै मनिश्शे ज़ुंण काम किऐ अर ज़ुंण तेऊ पाप किऐ, तिंयां सोभै गल्‍ला आसा यहूदा मुल्खे राज़े इतिहासे कताबा दी लिखी डाही दी। 18 खिरी मूंअ राज़अ मनिश्शे संघा डाहअ सह तेऊए दादा-बाबा संघै तेऊए मैहलै उज्ज़ा नाओंए बागा दी दाबी। आजू बणअ तेऊओ शोहरू अमोन तेऊए ज़ैगा यहूदा मुल्खो राज़अ।

यहूदा मुल्खै राज़अ अमोन

19 ज़धू अमोन यहूदा मुल्खो राज़अ बणअ, तधू ती तेऊए अमर बाई साले। तेऊ किअ एरुशलेम नगरी का दूई साला तैणीं राज़। तेऊए ईजा नाअं त मशूलमेथ अर सह थिई जोतबा नगरीए हारुज़े शोहरी। 20 अमोनै बी किअ आपणैं बाब मनिश्शे ज़िहअ पाप, ज़ेता बिधाता नांईं च़ाहंदअ त कि सह करे। 21 तेऊ किई सोभै गल्‍ला आपणैं बाबा ई ज़ेही अर सह बी लागअ आपणैं बाब मनिश्शे ज़िहअ मुहुर्तीए पूज़ा करदअ। 22 सह निं तेऊ परमेशर बिधाता मंदअ ई आथी त ज़ुंण तेऊए दाद-बाब मना तै।

23 अमोने कार-करिंदै किअ तेऊ लै राज़ द्रोह संघा डाहअ सह तेऊए ई मैहला भितरी मारी। 24 यहूदा मुल्खे आम परज़ा पाऐ तिंयां मारी ज़ुंणीं अमोन मारअ त अर तेखअ बणाअं तिन्‍नैं अमोने ज़ैगा तेऊओ शोहरू जोशिया राज़अ।

25 ज़िहै बी काम राज़ै अमोनै किऐ तिंयां आसा यहूदा मुल्खे राज़े इतिहासे कताबा दी लिखी डाहै दै। 26 सह बी डाहअ उज्ज़ा नाओंए बागा दी दाबी अर तेऊओ शोहरू जोशिया बणअ यहूदा मुल्खो राज़अ।