2 राज़ै 2

एलियाह गूर च़कअ बिधाता स्वर्गा लै

1 एक बगत पुजअ इहअ कि बिधाता बहाऊई खास्सी कुर्लू बागरी कि तेथ संघै च़कअ बिधाता एलियाह उझै स्वर्गा लै। इहअ हणैं का थोल़ै धैल़ै आजी तै एलियाह अर एलिशा गिलगाल नगरी, अर ज़ांऊं तिंयां तिधा का हांढदै लागै, 2 बाता बोलअ एलियाह एलिशा लै, "ऐबै रह तूह इधी, बिधाता किअ मुल्है बेतेल डेऊणेओ हुकम।"

पर एलिशा बोलअ इहअ, "हुंह खाआ बिधाता अर तेरै सोह, मुंह रहणअ ताह ई संघै।" इहअ करै डेऊअ एलिशा बी एलियाह संघै बेतेल तैणीं।

3 ज़ुंण गूर बेतेल नगरी रहा तै, तिंयां लागै एलिशा सेटा एछी बोल्दै, "ताखा थोघ बी आसा! आझ़ लाअ बिधाता तेरअ गूरू ताह सेटा का उझै च़की?"

एलिशा दैनअ तिन्‍नां लै ज़बाब, "हाँ, मुखा आसा थोघ, कांग निं लाआ।"

4 तेखअ बोलअ एलियाह गूरै एलिशा लै, "तूह रह इधी, बिधाता बोलअ मुल्है कि जेरिहो नगरी लै डेऊ।"

एलिशा बोलअ इहअ, "हुंह खाआ बिधाता अर तेरै सोह, मुंह रहणअ ताह ई संघै।" तेखअ डेऊअ एलिशा बी एलियाह गूरा संघै जेरिहो नगरी लै।

5 ज़ुंण गूर जेरिहो नगरी का बेतेल नगरी रहा तै, तिंयां लागै एलिशा सेटा एछी बोल्दै, "ताखा थोघ बी आसा, आझ़ लाअ बिधाता तेरअ गूरू ताह सेटा का उझै च़की?"

एलिशा दैनअ तिन्‍नां लै ज़बाब, "हाँ, मुखा आसा थोघ, कांग निं लाआ!"

6 तेखअ बोलअ एलियाह गूरै एलिशा लै, "तूह रह इधी बिधाता किअ मुल्है हुकम कि जरदण नदी लै डेऊ।"

एलिशा बोलअ इहअ, "हुंह खाआ बिधाता अर तेरै सोह, मुंह रहणअ ताह ई संघै।"

तेखअ डेऊअ एलिशा बी एलियाह संघै जरदण नदी लै। 7 तिन्‍नां पिछ़ू-पिछ़ू आऐ गूरा मांझ़ै कोई पज़ाह ज़ण्हैं, संघा रहै जरदण नदीए बाढै दूर ज़िहै खल़्हुई। 8 जरदण नदीए बाढै पुजी खोल्हअ एलियाह आपणअ च़ोल़अ संघा बणाईं तेते मिंडल़ी तेखअ बाही जरदण नदीए पाणीं प्रैंदै अर जरदण नदीओ पाणीं हुअ ओर्ही-पोर्ही दूई बाखा अर दरैऊआ मांझ़ै निखल़ी शुक्‍की ज़ैगा! तेखअ टपै एलियाह अर एलिशा दरैऊआ मांझ़ा-मांझ़ी शुक्‍की ज़ैगा बाती जरदण नदी पार। 9 तिधी बोलअ एलियाह गूरै एलिशा लै इहअ, "ऐबै गअ सह बगत पुजी कि बिधाता करनअ हुंह ताखा दूर। ऐबै इहअ हणैं का आजी तूह किज़ै च़ाहा कि हुंह ताल्है करूं?"

एलिशा बोलअ, "ज़ेतरअ बल ताखा आसा, मुल्है दै तेता का दुगणअ बल ताकि हुंह होरी गूरा प्रैंदै तेरी ज़ैगा सैणअ गूर होए।"

10 एलियाह दैनअ ज़बाब, "अह मांगी तंऐं बेघै कठण गल्‍ल, बिधाता च़कणअ हुंह उझै ताखा दूर, पर ज़ै ताखा हुंह तेता बाद बी शुझिए, तै जाणीं तेरी अह मांग पूरी हई, नांईं ता निं हणीं।"

11 एलियाह अर एलिशा तै बाता हांढदी-हांढदी इना एही गल्‍ला करदै लागै दै, तिधी हुअ हेरा-हेरी आगी ज़िहअ रथ प्रगट अर तेऊ रथा दी थिऐ घोल़ै बी आगी ई ज़िहै। एलियाह च़कअ बिधाता कुर्लू बागरी जैंदरी उझै स्वर्गा लै। 12 एता भाल़ी लागअ एलिशा ज़ोरै-ज़ोरै इहअ बोल्दअ, "आईओ मेरै बाबा, ए मेरै बाबा, इज़राईले फाज़त करनै आल़ैआ, ऐबै केस्सी डेऊअ तूह!" ज़ांऊं एलियाह तेऊ सेटा का दूर मुक्‍कअ डेऊई, सह हुअ खास्सअ दुखी अर तेऊ दुखा दी धेल़ै तेऊ आपणीं घेरीए सारै झिकल़ै बी।

13 तेखअ च़कअ तेऊ एलियाह गूरो सह च़ादरू ज़ुंण तेऊ प्रैंदै पल़अ त। तेखअ डेऊअ एलिशा फिरी संघा रहअ जरदण नदीए बाढै खल़्हुई। 14 एलियाह गूरो ज़ुंण च़ादरू एलिशा प्रैंदै पल़अ त, एलिशा बाही तेऊ च़ादरू करै जरदण नदीए पाणीं प्रैंदै संघा बोलअ इहअ, "एलियाहो परमेशर बिधाता किधी आसा?" ज़ांऊं तेऊ नदीए पाणीं प्रैंदै बाही, पाणीं हुअ ओर्ही-पोर्ही दूई बाखा अर दरैऊआ मांझ़ा-मांझ़ी निखल़ी शुक्‍की ज़ैगा अर एलिशा टपअ पार। 15 ज़ुंण जेरिहो नगरी का जरदण नदीए बाढै तिंयां पज़ाह गूर तै आऐ दै, तिन्‍नैं हेरअ एलिशा भाल़ी संघा लागै इहअ बोल्दै, "एलियाह गूरो सारअ बल आअ एलिशा दी!" तेखअ आऐ तिंयां एलिशा सेटा मिलदै, तेऊ सेटा टेक्‍कअ तिन्‍नैं सोभी माथअ। 16 संघा बोलअ तिन्‍नैं इहअ, "इधी आसा हाम्हैं तेरै पज़ाह दासा संघै पज़ाह ज़ण्हैं होर मर्ध अर तिंयां आसा खास्सै ज़ोर-ज़ाहणा आल़ै बी। हाम्हैं छ़ाडूं तिन्‍नां तेरै गूरू लोल़ै, हई सका कि बिधाते आत्मां सह किधी धारा डाहअ होए पजैल़ी कि कहा खागै होए डाहअ द पजैल़ी।"

एलिशा बोलअ, "ऐबै निं लागा तेऊ लोल़ै।"

17 पर तिंयां रहै भिई-भिई एतरै बोल्दै लागी कि तिन्‍नैं आणी अंतै अर खिरी बोलअ एलिशा, "डेओआ तै लोल़ै।" तेखअ डेऊऐ तिन्‍नां मांझ़ै पज़ाह ज़ण्हैं लोल़ै। तिंयां रहै चिई धैल़ै तैणीं नाल़ै-धारा हर ज़ैगा एलियाह लोल़ै लागी पर तिन्‍नां निं सह भेटअ। 18 तेखअ फिरै खिरी तिंयां मणछ एलिशा सेटा बापस, एलिशा त जेरिहो नगरी तिन्‍नां न्हैल़अ लागअ द। तेखअ बोलअ तेऊ तिन्‍नां लै, "मंऐं तम्हां लै बोली निं हेरअ त कि नांईं लागा डेऊंदै।"

एलिशा करै च़मत्कार

19 जेरिहो नगरीए कोई आदमी डेऊऐ एलिशा सेटा संघा लागै इहअ बोल्दै, "म्हारै मालक, ताखा आसा थोघ भाल़ अह नगरी आसा बधिया ज़ैगा बस्सी दी। पर ऐहा ज़ैगा आसा पाणीं इहअ खराब कि तेता करै निं साल-फसल बी राम्बल़ी हंदी।"

20 एलिशा बोलअ तिन्‍नां लै, "एकी कोरै पारू दी पाआ लूंण संघा आणा तेता मुंह सेटा लै।" तिन्‍नैं किअ तिहअ ई। 21 तेखअ डेऊअ सह पाणींए कुहै सेटा, तेथ पाअ सह लूंण संघा बोलअ इहअ, "बिधाता बोलअ इहअ, ‘अह पाणीं किअ मंऐं ऐबै निम्बल़अ, ऐबै निं एथ फिटक रहअ अर नां एता करै साल-फसल मरनी।’" 22 सह पाणीं आसा आझ़ तैणीं बी तिहअ ई बधिया ज़िहअ एलिशा बोलअ त कि हणअ।

23 एलिशा लागअ तिधा का बेतेल नगरी बाखा हांढदअ, सह थिअ कुआल़ी उझै हांढदअ लागअ द, तेथ आऐ नगरी का कई शोहरू संघा लागै ज़ोरै-ज़ोरै इहअ बोली तेऊए सुहांगा करदै, "हे ताम्बीआ इधा का डेऊ, ए ताम्बीआ इधा का डेऊ।"

24 एलिशा भाल़अ पिछ़ू फिरी तिन्‍नां बाखा, संघा दैनअ तिन्‍नां लै बिधाते नाओंऐं फिटक। हेरा-हेरी निखल़ी बणां का दूई भाल्‍लणी अर तिन्‍नां मांझ़ै पाऐ बयाल़ी शोहरू धेल़ी-च़िरी मारी।

25 तिधा का डेऊअ एलिशा कर्मेल नगरी अर तिधा का फिरअ सह बापस सामरी नगरी लै।