2 राज़ै 12

यहूदा मुल्खै राज़अ जोआश

1 इज़राईल मुल्खै त ज़ैऊ राज़अ अर तेऊए राज़ा दी सातुई साला बणअ यहूदा मुल्खै जोआश राज़अ। जोआशै किअ एरुशलेम नगरी का च़ाल़्ही साला तैणीं राज़। तेऊए ईजा नाअं त सिबीया अर सह थिई बेर्शेबा का। 2 जोआशै किऐ आपणीं ज़िऊंदी ज़िता तिहै ई काम ज़िहअ बिधाता च़ाहा त कि सह करे। किल्हैकि जहोयादा प्रोहत करा त तेऊ का खोज़ी। 3 पर जोआशै बी निं उछ़टी धारे तिंयां गान-स्तान खतम किऐ अर तेऊए ज़मानै बी करा तै लोग तेथ बल़ी करदै अर धूप ज़ाल़दै डेऊई।

4 एकी धैल़ै बोलअ जोआश राज़ै प्रोहता लै, "बिधाते भबनै लोगै ज़ुंण ढब्बै भैंट किऐ, तिन्‍नां कर कठा। च़ाऐ सह लोगै कारअ होए दैनअ द, च़ाऐ भैंट होए।✝12:4 गण. 30:11-16 5 सोभी प्रोहते ज़िम्मैंबारी आसा एही कि सह आणै आपणैं जमाना का बी ढब्बै मांगी। तेखअ तम्हां बिधाते भबनै ज़िधी चूट-फूट, ढूल़अ-पल़अ द शुझिए, तिन्‍नां ढब्बै करै लागै तम्हैं ज़रुरतीए साबै तेते मराम्मत करदै।"

6 राज़ै जोआशा गई ती राज़ करदी बाई साला बिति पर प्रोहतै निं बिधाते भबनै किधी बी किछ़ै मराम्मत अज़ी तैणीं किई आथी ती। 7 तेखअ शादै राज़ै जोआशै जहोयादा प्रोहत अर होर प्रोहत संघा पुछ़अ तिन्‍नां का, "तम्हैं तिन्‍नां ढब्बै करै बिधाते भबने मराम्मत किल्है निं करदै? ऐबै निं जमाना का बिधाते भबने मराम्मत करने नाओंऐं होर ढब्बै मांगी आप्पू का डाही आपणीं गरज़ा पूरी करना लै खर्च़ करी। एते ज़िम्मैंबारी सभाल़ा आझ़ा पोर्ही होरी का ताकि बिधाते भबने मराम्मत होए।" 8 सोभी प्रोहतै किअ तैहा गल्‍ला लै हाँ कि ऐबै निं तिन्‍नां आपणैं जमाना का होर ढब्बै मांगणै अर ऐहा गल्‍ला लै बी किअ हाँ कि बिधाते भबने मराम्मत करने ज़िम्मैंबारी दैणीं होरी का।

9 जहोयादा प्रोहता भेटअ एक काठो सदूक, तेऊ पाअ तेते ढक्‍कणा प्रैंदै एक खाढ संघा डाहअ सह सदूक बेदीए काछ़ा खाणैं हाथा बाखा बिधाते भबना भितरा लै एछणें प्रऊल़ी अर तेते फाज़त करने ज़िम्मैंबारी लै डाहअ प्रोहता मांझ़ै एक पहरी। तेखअ लोग ज़ुंण बी ढब्बै दैआ तै, सह प्रोहत करा त तेता सदूका भितरी पाई ज़सरी प्रऊल़ी सेटा पहरीए ज़िम्मैंबारी हआ ती। 10 ज़ांऊं सह सदूक ढब्बै करै भर्हिया त, तेखअ एछा त राज़ैओ काईथ अर माहा प्रोहत संघा डाहा तै तिन्‍नां ढब्बै गणी करै थैल्‍ली दी भरी। 11 तेखअ दैआ तै तिंयां तिन्‍नां ढब्बै तिन्‍नां मणछा का सभाल़ी ज़हा का बिधाते भबने मराम्मत करने ज़िम्मैंबारी हआ ती। तिन्‍नैं दैनी तिन्‍नां ढब्बै करै काठे कारीगीरे मज़दूरी, पात्थरे कारीगीर अर 12 भित्ती च़िणनै आल़ै मिस्त्री अर पल़ैमूए मज़दूरी। धख ढब्बअ किअ तिन्‍नैं काठ-पात्थर मोल लणा लै खर्च़ ज़ुंण मराम्मत करना लै लागै अर होर ज़ेही ज़रुरत पल़ी तेऊ साबै किअ तेता का खर्च़।

13 बिधाते भबनै ज़ुंण बी ढब्बअ भैंट आअ, सह ढब्बअ निं तिन्‍नैं च़ंदीए डबरी, च़िमटै, प्रिहै, नर्शिंगै अर किज़ै होर सुन्‍नैं-च़ंदीए भांडै बणाणां लै खर्च़ किअ। 14 तेता करै दैनी तिन्‍नैं सिधी कामां करनै आल़ेए मज़दूरी अर काठ-पात्थर अर होरी च़िज़ो मोल ज़ुंण बिधाते भबनै मराम्मत करना लै लागी। 15 ज़हा का अह काम त सभाल़अ द, सह थिअ शुचअ-पाक्‍कअ मणछ, तैही निं तेऊ का साब-कताब मांगणे ज़रुरत ई पल़दी ती कि किधी केतरै ढब्बै खर्च़ हुऐ।✝12:15 2 राज़. 22:7 16 ज़ुंण ढब्बै लोग पाप बल़ी, दोश बल़ीए साबै दैआ तै, तेता निं तेऊ सदूका दी पांदै तै। तिंयां ढब्बै हआ तै प्रोहते।✝12:16 लेब. 7:7

17 तिन्‍नां ई धैल़ै हुअ इहअ कि अराम देशे राज़ै गोटी गात नगरी संघा किअ तेथ कबज़अ अर सह आअ एरुशलेम नगरी बाखा लै। 18 यहूदे राज़ै जोआशै किअ इहअ कि तेऊए दाद-बाब जहोशापात, जेहोराम अर अहाजया ज़ुंण सुन्‍नअ अर होर च़िज़ा बिधाते भबने भढारै अर राज़े मैहलै बिधाता लै ज़ुदै पबित्र तै डाहै दै, तेऊ दैनै तिंयां सोभ अराम देशे राज़ै हज़ाएला लै भैंट अर तेखअ फिरअ सह पिछ़ू संघा निं एरुशलेम नगरी बाखा लै आअ।

19 राज़ै जोआशै किऐ दै सोभ काम आसा यहूदा मुल्खे राज़े इतिहासे कताबा दी लिखी डाहै दै।

20,21 राज़ै जोआशे कार-करिंदै किअ तेऊ लै धोखअ, तिन्‍नां मांझ़ै तै दूई ज़ण्हैं अमोनी बेटल़ी शमातो शोहरू जोजकार अर मोआबी बेटल़ी शमेरो शोहरू जोजबाद, तिन्‍नैं पाअ राज़अ जोआश मिल्‍लो नाओंए मैहलै मारी ज़ुंण एरुशलेम पुर्बा बाखा थिअ च़िणअ द अर ज़ेसी बाती उंधै सिल्‍ला लै बात डेओआ।

जोआश डाहअ दाबेदपूर तेऊए दादा-बाबा संघै दाबी अर तेऊओ शोहरू अमास्या बणअ तेऊए ज़ैगा यहूदा मुल्खो राज़अ।