यहूदा मुल्खो राज़अ जोशिया
(2 इतिहास 34:1,2)
1 ज़धू जोशिया यहूदा मुल्खो राज़अ बणअ, सह थिअ तधू आठा सालो शोहरू। तेऊ किअ एरुशलेम नगरी का कत्ती साला तैणीं यहूदा मुल्खै राज़। तेऊए ईजा नाअं त जदीदा अर तेसो बाब थिअ बोसकत नगरीओ अदाया। 2 जोशिया रहअ बिधाता लै शुचअ-पाक्कअ अर तेऊ किअ तिहअ ई ज़िहअ बिधाता च़ाहा त कि सह करे। ज़िहअ तेऊओ दाद-बाब राज़अ दाबेद थिअ, तेही ई किई तेऊ सोभै गल्ला परमेशरे बधाने साबै।
बधाने कताब लोल़ी
(2 इतिहास 34:8-28)
3 ज़ांऊं जोशिया राज़ करदी ठार्हुई साल लागी, तेऊ छ़ाडअ आपणअ एक काईथ असलाहो शोहरू मशूलामो पोचअ शापान बिधाते भबना लै अर तेऊ लै किअ इहअ हुकम, 4 "तूह डेऊ माहा प्रोहत हिलकिया सेटा संघा बोल तेऊ लै इहअ कि बिधाते भबनै ज़ेतरै ढब्बै प्रऊल़ी सेटा पहरी लोगा का दान ढाकै तिन्नों कर कठा ज़ोल़ कि केतरै हुऐ। 5 तेखअ दै तिन्नां ढब्बै तिन्नां का सभाल़ी ज़हा लै बिधाते भबने मराम्मत करने ज़िम्मैंबारी आसा सभाल़ी दी। तिंयां दैऐ तिन्नां ढब्बै मांझ़ै 6 काठे कारीगीर अर मिस्त्रीए मज़दूरी अर बाकी लऐ तेता करै काठ-पात्थर अर होर च़िज़ा मोलै ज़ुंण भबने मराम्मती दी कामैं एछे।" 7 ज़हा का बिधाते भबने मराम्मत करनैओ काम त सभाल़अ द, तिंयां थिऐ शुचै-पाक्कै मणछ अर तैही निं तिन्नां का ढब्बैओ साब-कताब मांगअ कि केतरै ढब्बै किधी खर्च़ै।
8 हिलकिया माहा प्रोहतै बोलअ शापान काईथा लै, "मुंह भेटी बिधाते भबनै बधाने कताब।" तेखअ दैनी सह कताब तेऊ शापान काईथे हाथै अर सह लागअ तेता पहल़दअ। 9 तेखअ डेऊअ शापान राज़ै सेटा बापस अर तेऊ खोज़अ, "ज़ेतरै बी बिधाते भबनै ढब्बै थिऐ, तिंयां सभाल़ै तेरै कार-करिंदै तिन्नां का ज़हा लै बिधाते भबने मराम्मत करने ज़िम्मैंबारी आसा सभाल़ी दी।" 10 तेखअ बोलअ शापान काईथै, "इधी दैनी हिलकिया माहा प्रोहतै मुल्है एक कताब।" तेखअ लागअ शापान तैहा कताबा पहल़ी करै राज़ै का खोज़दअ।
11 बधाने कताबे गल्ला शूणीं धेल़ै दुखै राज़ै आपणैं झिकल़ै। 12 तेखअ किअ तेऊ हिलकिया प्रोहत, शापाने शोहरू आहीकाम, मिके शोहरू अकबोर, शापान काईथ अर असाया नाओंए एकी दरबारी लै इहअ हुकम, 13 "बिधाता हणीं मुल्है अर यहूदा मुल्खे परज़ा लै खास्सी रोश्शै आई दी! किल्हैकि म्हारै दादै-बाबै निं सह बधान पूरअ किअ ज़ुंण ऐहा कताबा दी आसा लिखअ द! तम्हैं एछा बिधाता पुछ़ी कि बिधाता किज़ै च़ाहा कि हाम्हैं करे।"
14 तेखअ डेऊऐ हिलकिया प्रोहत, शापाने शोहरू आहीकाम, मिके शोहरू अकबोर, शापान बज़ीर अर असाया नाओं दरबारी हुल्दा नाओंए एकी बेटल़ी सेटा पुछ़दै। तेसे लाल़ै नाअं त शलूम अर सह थिअ बिधाते भबनै झिकल़ैओ भढारी। शलूम थिअ तिकबो शोहरू अर हरहासो पोचअ। हुल्दा रहा ती एरुशलेम नगरी नऊंऐं गराऊंऐं। तिन्नैं खोज़ी तैहा का सारी गल्ला। 15 हुल्दा बोलअ तिन्नां लै इहअ कि तम्हैं डेओआ राज़ै सेटा बापस फिरी, 16 संघा खोज़ै राज़ै का एऊ समादा कि इज़राईलो परमेशर बिधाता बोला इहअ, "मंऐं लाई एरुशलेम नगरी अर तेथ बस्सै दै सोभी लै तेही सज़ा दैई ज़ुंण तैहा कताबा दी आसा लिखअ द ज़ुंण राज़ै पहल़ी। 17 यहूदे परज़ा समझ़अ हुंह नकदरअ। तिंयां लागै पराऐ देअआ पूज़दै अर बल़ीदान करदै। तिन्नैं आणी मुल्है खास्सी रोश्शै अर ऐबै निं मेरअ रोश्श फांभअ हंदअ। 18 यहूदे राज़ै ज़ुंणीं तम्हैं पुछ़दै छ़ाडै, तेऊ का खोज़ै इहअ कि इज़राईलो परमेशर बिधाता बोला तेरै बारै इहअ कि 19 मंऐं भाल़अ कि तूह किहअ दुखी हुअ ज़ांऊं तंऐं इहअ शूणअ कि अह देश अर एथ बस्सै दै लोग हणैं पठी खतम। तंऐं धेल़ै तेऊ दुखै आपणैं झिकल़ै अर मंऐं शूणअ तूह लेरदअ बी। 20 ऐबै करनअ मुंह इहअ कि ज़ुंण आफ़त मुंह एरुशलेम नगरी लै पाणीं, तैहा निं हुंह तेरी ज़िऊंदी ज़िता पल़णै दैंदअ, तेरी आछी नदरी निं ईंयां गल्ला हणीं।"
तेखअ फिरै तिंयां बापस संघा खोज़अ राज़ै का बिधातो अह समाद।