Esperar no Senhor

31 ila weng’ha walingitumbila kwa Mkulu Nguluwi,

wopata mong’ho unyale.

Woguluka kwa mabawa kota ikungule,

wobilima ne kutoka,

wojenda ne kutweguka nhumbula.

Mkulu Nguluwi kowatanza wanhu wa heye

18 Mkulu Nguluwi kangubeteza kuwalajila hemwe isungu,

nakewika goya kuwalechela kwa vila mazuwa gose kanguditaga gawele ga hachi.

Nawatambichizwa wala weng’ha walingitumbila kwa heye.

14 Witumbile kwa Mkulu Nguluwi.

Wime nzinzili, uleche kugozola.

Ena, witumbile kwa Mkulu Nguluwi.

13 Ndangukunda kota ndolyona isungu lya Mkulu Nguluwi,

kuli isi ya wawele wakomu.

14 Witumbile kwa Mkulu Nguluwi.

Wime nzinzili, uleche kugozola.

Ena, witumbile kwa Mkulu Nguluwi.

Lwimbo lwa kumtogola Mkulu Nguluwi

1 Mkulu Nguluwi ndo lumuli lwa heni na ulohozi wa heni,

ndimdumbe whaani?

Mkulu Nguluwi ndo ngome ya ukomu wa heni,

ndimdumbe whaani?

2 Wehile howonhowa,

na kugana kundumya,

wang’honyo na walingitwanza na heni wochikwang’wala na kugwa.

3 Hanga wamizi howonzunguluta,

nhumbula ya heni haidumba chinhu,

hanga ngondo hoilawila kwa heni,

ndowa nding’hali na kitumbila.

4 Mbuli imwe nandimlanda Mkulu Nguluwi,

ayo ndo ndilinguipala,

ndikale mng’handa mwa Mkulu Nguluwi

mazuwa geng’ha ga ukomu wa heni,

ndijese ng’hatu kunoga kwa Mkulu Nguluwi,

na kupala ulongozi wa heye kuli ng’handa ya heye.

5 Kukomya, zuwa lya magazo konyamila kuli chibumuli cha heye,

kovisa heni kuli ihema lya heye,

na kumbika kwa kikala goya mchanya mwa italawe.

6 Kwa kusumya nani ndolola mchanya mwa wang’honyo wa heni walingunzunguluta.

Ndomlavila nhambiko kwa kutowa luchenze mgati mwa ng’handa ya heye,

ndokwimba na kumtowela luchenze Mkulu Nguluwi.

7 Gwa Mkulu Nguluwi, unyhulichize hondikulilila,

umbonele isungu na kunyhidichila.

8 Nhumbula ya heni yangundonjela, "Uye umpale Nguluwi."

Lelo, ndanguya kwa hegwe, gwa Mkulu Nguluwi.

9 Uleche kuleka kundola,

uleche kundema kwa ng’halazi heni chitumagwa wa hegwe.

Hegwe nawali utanzi wa heni.

Uleche kunhoza ne kundeka, gwa Nguluwi Mlohozi wa heni.

10 Hanga mhaza na mayangu howondeka,

Mkulu Nguluwi kombochela.

11 Gwa Mkulu Nguluwi, undanguse nzila ya hegwe,

undongoze kuli nzila igoloche,

kwa chiwalo cha wang’honyo wa heni.

12 Uleche kundeka leka wang’honyo wa heni wanditile vyowogana,

kwa vila walolezi wa udesi nawambuyila,

hewo walingulavya ulonjelezi wihile.

13 Ndangukunda kota ndolyona isungu lya Mkulu Nguluwi,

kuli isi ya wawele wakomu.

14 Witumbile kwa Mkulu Nguluwi.

Wime nzinzili, uleche kugozola.

Ena, witumbile kwa Mkulu Nguluwi.

Lwimbo lwa lutogo

1 Nandimbeteza Mkulu Nguluwi kwa kwimilila,

nakanyuyila na kuhulika chililo cha heni.

2 Nakambusa kulawa kuli ikulubila likulu,

nakandavya kuli ndidi za ilamba,

nakemiza goya magulu ga heni mchanya mwa italawe,

nakagapa mong’ho magulu ga heni.

3 Nakandangusa lwimbo lunyale,

lwimbo lwa lutogo kwa Nguluwi wa hetwe.

Wenji womlola na kumdumba Mkulu Nguluwi,

na kitumbila kwa heye.

4 Nakatambichizwa munhu yalingitumbila kwa Mkulu Nguluwi,

munhu yohambe yelumbe na wanhu walingidaya,

wala walingujifugamila milungu ja udesi.

5 Gwa Mkulu Nguluwi, Nguluwi wa heni, nakutuditila kwa winji,

vinduzanduza na majesa ga hegwe kwa hetwe.

Haduhu yoweza kuwhanizwa na hegwe.

Wone ndahaganile kugawikula na kugadamla,

ndo menji lukami kugawaza.

6 Hegwe hulingunojezwa na nhambiko ne nhambiko za kulakazwa,

ila nakumha heni makutu ndikuhuliche.

Nhambiko za kulakazwa na nhambiko za kusa gehile hulinguzigana.

7 Aho nandonga, "Ulole nambuya,

kuli chitabu nagandichigwa kuwala heni,

8 kota ndangusangalala kweneza goulingugana, gwa Nguluwi wa heni,

ilajizo lya hegwe ndangulibatilila kwa nhumbula ya heni."

9 Nasimila mbuli inojile ya kutanganika,

hali nhing’hano ng’hulu ya wanhu.

Kota vyouvizelele, gwa Mkulu Nguluwi,

heni hambe ndilemeze kuiwikula.

10 Sivisile mnhumbula mwa heni kutanganika kwa hegwe,

nandiwikula kota hegwe kwa mlohozi wa kukundigwa.

Siivisile nhing’hano ng’hulu ya wanhu,

igano lya hegwe lya kwimilila na kukundigwa kwa hegwe.

11 Gwa Mkulu Nguluwi, uleche kuleka kumha heni isungu lya hegwe.

Igano lya hegwe lya kwimilila na kukundigwa kwa hegwe vinyamile mazuwa gose.

Kulanda utanzi

12 Kudumya kohambe kuwazigwe, kwangunzunguluta heni,

gehile ga heni gangundinya mbaka ndangulemwela kona,

ga menji kusinda mnvili kumutwi kwa heni,

nani ngozola.

13 Gwa Mkulu Nguluwi, ugane kundohola,

gwa Mkulu Nguluwi, uye himahima kunhanza.

14 Walingugana kundumya,

wabasigwe soni na kudeula.

Hewo walingugana ndumile,

wahiluche kumbele na kubezigwa.

20 Nhumbula za hetwe zangitumbila kwa Mkulu Nguluwi.

Heye ndo utanzi wa hetwe na ngawo ya hetwe.

21 Ena twangusangalala kwa chiwalo cha heye,

twangitumbila kuli itagwa lya heye lyelile.

22 Igano lya hegwe lya kwimilila likale na hetwe, gwa Mkulu Nguluwi,

kwa vila hetwe natukuwichila kitumbila kwa hetwe.

5 Ndangitumbila kwa Mkulu Nguluwi kwa nhumbula ya heni yeng’ha,

ndina makundo ng’hatu na ulonzi wa heye.

6 Ndangitumbila kwa Mkulu,

kusinda wamizi walingubeteza kubwemwenzuka,

kusinda wamizi walingubeteza mitondo.

5 Gwa nhumbula ya heni, usindamale kwa Nguluwi yaliyeka,

kitumbila kwa heni kwangulawa kwa heye.

34 Witumbile kwa Mkulu Nguluwi na kibata nzila za heye,

naye kokwinula leka uihalile isi,

na kuwona wehile wodumigwa.

5 Witumbile kwa Mkulu Nguluwi kwa nhumbula ya hegwe yeng’ha,

uleche kitumbila nyhala za gwegwe baho.

6 Umkumbuchile Nguluwi kuli chila choulingudita,

heye kozigolola nzila za hegwe.

3 Ena, haiwele ago hela, kahi twangusangalala mli magazo ga hetwe, tuvizela magazo gangigala ubetezo, 4 nako kubeteza kwangigala kukundigwa na kukundigwa kwangigala kitumbila.

11 Nguluwi yawape hemwe ludali kwa ludali lwa ukulu wa heye leka muweze kubeteza na kwimilila chila chinhu kwa usangalalo,

Kwimilila na kulanda

7 Lelo, wang’holozangu, mwimilile mbaka Mkulu hoyokuya. Mlole mlimi vyoyalingubeteza kwa wimililo mizuchila ja heye jilavye mbena inojile. Heye kangubeteza kwa kwimilila kulawila nhonya ya ng’humbusa walimi na luhela mbaka hala hoyobeta. 8 Hemwe namwe mkangaze nhumbula za hemwe na kwimilila nzinzili, mina zuwa lya kuya kwa heye Mkulu lyahabehi.

11 Twanguwachema wanhu awo wabweda kwa vila nawemilila. Namuhulika mbuli ya kwimilila kwa Ayubu na mvizela vila Mkulu navyoyamditile kuli kuduma. Kwa vila Mkulu ka liholile na kamema isungu.

22 Lelo kwa kuhulichiza kukomya, hemwe mweliza muhe wa hemwe na kuwagana wang’holozenu ne kuwa hela udesi, lelo migane kwa nhumbula yeng’ha yelile. 23 Mina mpondigwa lwa keli kwa kukolela ulonzi wa Nguluwi uwele ukomu mazuwa gose, nahaiwele kulawa kuli nyhadikwa ilingubagama, ila kulawa kuli nyhadikwa yohambe ibagame. 24 Kota Maandiko Matakatifu vyogalingulonga,

"Chila munhu ndo kota misolo,

na ukulu wa heye weng’ha ndo kota uluwa.

Misolo jikalaga na uluwa wake wangugwa.

25 Ila ulonzi wa Mkulu wangikala mazuwa gose."

Ulonzi awo ndo Mbuli Inojile yila idamligwe kwa hemwe.

9 Mkulu halingukawa kweneza gala goyalagane kota wanhu wanji vyowalingijesa kota kokawila. Ila heye kangwimilila kwa chiwalo cha hemwe, mina, halingugana ne yumwe wa hemwe yajilile, ila kanguwakwega weng’ha wamgalamchile Nguluwi.

Kiwhana kwa wahinza kumi

1 "Mhela awo, undewa wa kilanga ufanda kota wahinza kumi waholile vyenje vya hewo, waluta kumbochela mkasano. 2 Wahano wa hewo wali wapoka na wahano wanji wali na luhala. 3 Wala wapoka nawahola chenje za hewo, ila hawaholile na mafuta ga kuwesela. 4 Ila wala wawele na luhala nawahola mibuli ja mafuta gawo hamwe na chenje za hewo. 5 Kwa vila mkasano na kakawila kuya, wala wahinza weng’ha nawasinzila, wawasa. 6 Hagati ha nechilo kwali na iyowe, ‘Mwela yoo, Mkasano kanguya mlute kumbochela.’ 7 Aho wala wahinza weng’ha walilimka, waviwika goya vyenje vya hewo. 8 Wala wapoka nawawalonjela wala wawele na luhala, ‘Mtujidile mafuta mado ga hemwe kwa vila vyenje vya hetwe vyanguzima.’ 9 Ila wala wawele na luhala nawawalonjela, ‘Hatokwenela hetwe na hemwe! Fola mlute kwa walinguguza vinhu migulile!’ 10 Lelo wala wahinza wapoka lowalutile kugula mafuta, mkasano nakafika. Wala wahinza nawawele goya wenjila hamwe na heye mli ng’handa ya mkasano, hamba lwizi luhindigwa. 11 Hamba wala wahinza wanji nawoya, nawachema, ‘Mkulu, mkulu, tuchumulile!’ 12 Ila heye kawedichila, ‘Ndanguwalonjela ndikomya, siwazelele hemwe.’ " 13 Hamba Yesu nakasinda kwa kulonga, "Lelo mikale meho, kwa vila hamzelele zuwa ne saa.