3 Boriba, kar bizir aghuir Ikiavɨra Itir God anɨdiba,

da bar dera.

4 Gumazir igiamɨn boriba,

mati afuziba mɨdorozir gumazir mamɨn dafarimɨn iti.

5 Gumazir borir avɨriba itim a bar akongegh.

A uan apaniba ko kotiam damuamim dughiamɨn,

me kotiar danganimɨn an akurvagham.

Eghtɨ an kotiam deragh mangam.

1 Gumazamizir Ikiavɨra Itir Godɨn atiatia an apengan ikia, an akaba baragha dar gɨn zuiba,

me bar akongegh.

2 Ingangarir nɨ amibara nɨ dar dagɨaba inigh

bizir nɨ ifongezibagh ivezam.

Eghtɨ bizir nɨ amiba bar deraghtɨ

nɨ bar akuegham.

3 Nɨn amuim, wainɨn ikarɨzimɨn mɨn

ava ovɨzir avɨriba iti moghɨn, a borir avɨriba batam.

Nɨn boriba bar avɨrasemegh nɨn avir mɨriam,

olivɨn temer igiabar mɨn bar an okarigham.

4 Bar guizbangɨra,

gumazir Ikiavɨra Itir Godɨn atiatia an apengan itim,

a kamaghɨrama otogham.

1 Gumazamizir Ikiavɨra Itir Godɨn atiatia an apengan ikia, an akaba baragha dar gɨn zuiba,

me bar akongegh.

2 Ingangarir nɨ amibara nɨ dar dagɨaba inigh

bizir nɨ ifongezibagh ivezam.

Eghtɨ bizir nɨ amiba bar deraghtɨ

nɨ bar akuegham.

3 Nɨn amuim, wainɨn ikarɨzimɨn mɨn

ava ovɨzir avɨriba iti moghɨn, a borir avɨriba batam.

Nɨn boriba bar avɨrasemegh nɨn avir mɨriam,

olivɨn temer igiabar mɨn bar an okarigham.

12 E kamaghɨn ifonge, en otarir igiaba aghung mangɨ ekevegh,

temebar mɨn gavgavigham.

Eghtɨ en guivibar ganganiba bar deragham,

mati Atrivimɨn dɨpenir ekiamɨn aven itir dɨpenir akɨnibar itir nedazir bar aghuiba.

2 Gumazir aghuibar boriba, nguazir kamɨn ikɨ

ziar ekiaba ikiam.

Men ovavir boriba,

Ikiavɨra Itir God deravɨra me damuam.

28 Ezɨ God me deraghasa, mɨgɨrɨgɨar aghuim me gamua kamaghɨn mɨgei, "Ia avɨrasemegh mangɨ nguazir oteviba bar dar apiagh egh bizir nguazimɨn itiba bar dar gan. Kɨ osiriba ko, kuaraziba ko, nguazimɨn itir asɨzir guar avɨriba ian dafarim darɨgham."

4 "Egh God borir avɨriba ia danɨngtɨ, ian azeniba dagheba bar izɨvaghtɨ, a bulmakauba ko sipsipɨn avɨriba ia danigham.

14 God bar deravɨra ia gami moghɨn, a nguazir kamɨn ikɨziba bar, men tongɨn ikɨzir igharazitam, ian mɨn deragha me gamizir puvatɨ. Ian amiziba, ko ian bulmakaun amebaba, tam pura ikian kogham, me bar moghɨra otam.

6 ✝Nɨ arazir aghuimɨn gɨn mangɨsɨ uan borimɨn sure damutɨ, a tuavir kamɨn mangɨvɨra ikɨ mangɨ a bar ghurigham.

15 Boriba onganigha arazir igharagha garibagh ami. Ezɨ kamaghɨn nɨ me akɨrsɨ me mɨsueghtɨ, me arazir kam ategham.

24 ✝Afeziam uan borim arazir kuram bagha a mɨsoghezir puvatɨ, kamaghɨn a borim gifongezir puvatɨ. Ezɨ afeziam borim gifonge, ana mɨsogha egha anekɨri.

15 Nɨ uan borim akɨrsɨ a mɨsoghtɨ, a nɨghnɨzir aghuim iniam. Eghtɨ borim zurara uan ifongiamɨn gɨn mangɨva, uan amebam damutɨ an aghumsigham.

13 ✝Nɨ borim akɨrsɨ, a mɨsoghsɨ atiatingan markɨ. Nɨ aghorimɨn a mɨsogh, an aremeghan kogham.

1 Nan boriba, kɨ ian afeziam, ia bar deraghvɨra nan aghuzir akam baragh,

egh ia mɨngariba izɨvazir akaba, deraghvɨra dagh fogham.

1 Kar Atrivim Solomonɨn aghuzir akar oteviba, da dabirabir aghuimɨn arazimɨn gun mɨgei:

Borim nɨghnɨzir aghuim ko fofozim ikiam, eghtɨ an afeziam bar akuegham. Eghtɨ borim arazir onganimɨn gɨntɨghtɨ, an amebam bar osemegham.

6 ✝Kɨ ia ganɨdir akar kaba, ia da isɨ uan navir averiabar arigh, egh dagh nɨghnɨghvɨra ikɨ. 7 Egh dughiar ia uan boriba ko dɨpenimɨn ikia avughsiba, ko dughiar ia me ko tuavibar zuiba, ko ia dakuasa mɨsiabar itir dughiaba, ko dughiar ia mɨsiabar dɨkaviba, ia zurara akar kaba dar men sure damuvɨra ikɨ.

14 ✝Me men atarima, Iesus men ganigha navim an ikuvizɨma, a kamaghɨn me mɨgei, "Nɨ tina God Bizibagh Ativamin Dughiamɨn aven ikɨsɨ, borir dozir kabar mɨn ikɨ. Kamaghɨn amizɨ, ia borir doziba ateghtɨ, me na bagh izɨ. Men anogoroghan markɨ.

11 ✝"Ia afeziar arazir kurabagh amiba, ia zurara bizir bar aghuiba uan boribagh anɨdi. Ia deraghvɨra kamaghɨn fogh, guizbangɨra ian Afeziar uan Nguibamɨn itim bar akueghvɨra bizir aghuiba isɨ gumazamizir a ko mɨgeibar anɨngam.

52 ✝Ezɨ Iesus fofozir aghuim ko mɨkarzim sarama aghui. Ezɨ an araziba God ko gumazamizibagh amima, me a gifonge.

13 ✝E fo, afeziaba uan boribar apangkuvi moghɨra,

Ikiavɨra Itir God uan gumazamizir an atiatia

an apengan itibar apangkufi.

1 ✝Ia nɨghnɨgh, Afeziar Ekiam bar e gifuegha en dɨghorim gami. Egha ziar kam, Godɨn boriba, e gatɨ. Ezɨ guizbangɨra, e an boribara. Nguazir kamɨn gumazamiziba God gɨfozir puvatɨ, me kamaghɨn uaghan e gɨfozir puvatɨ.

24 " ‘Ikiavɨra Itir God, deraghvɨra ia damuva,

egh deraghvɨra ian ganam.

25 Ikiavɨra Itir God, ian apangkuv egh,

mati an guamɨn angazangarim ia gisirazɨ moghɨn,

deraghvɨra ian ganam.

26 Egh Ikiavɨra Itir God, navir aghuim ian ikɨ,

egh navir amɨrizim ko dabirabir aghuim ia danɨngam.’

28 Kɨ Godɨn azai, a dɨmagaribar ghuariabar dɨpabar amutɨ

da izighirɨ nɨn azenibagh izɨtɨ da aghung dagher avɨriba ikɨ.

Kɨ an azai, a wit ko wainɨn avɨriba nɨ danɨng.

29 ✝Kɨ kamaghɨn Godɨn azai, nguazimɨn itir gumazamiziba

nɨn ingangarir gumazibar mɨn ikiam,

eghtɨ kantrin mabar gumazamiziba nɨn apengan ikiam.

Eghtɨ nɨ uan aveghbuaba me gativagh men ganam.

Eghtɨ nɨn amebamɨn ovavir boriba nɨn apengan ikiam.

Eghtɨ gumazir paza nɨ damuasa Godɨn azangsɨziba,

kɨ kamaghɨn Godɨn azai, eghtɨ a me gasɨghasigham.

Eghtɨ gumazir deragh nɨ damusɨ nɨ bagha Godɨn azangsɨziba,

kɨ kamaghɨn Godɨn azai, a uaghan deraghvɨram me damuam."

3 ✝Kɨ mati gumazim dɨpam isɨ nguazir dɨpaba puvatɨzibagh ingɨva,

egh dɨpam damightɨ, a nguazir mɨdiaribar ivemaram.

Kamaghɨra, kɨ uan Duam isɨ ian boribagh ingɨva,

ian ovavir boriba deragh me damuam.

4 Eghtɨ me deraghvɨra aghungam, mati grazir garir dɨpaba itibar mɨn ganganiba deragham.

Egh mati, temer faner mɨriabar aghuibar mɨn ganam.

13 ✝Kɨ Ikiavɨra Itir God, kɨ uabɨ nɨn boriba bar men sure damuam,

eghtɨ me dabirabir bar aghuim ikiam.

5 ✝"Kɨ tɨghar nɨn amebamɨn navir averiamɨn aven nɨn ingaramin dughiam,

kɨ nɨ gɨfogha, nɨ ginabagha gɨfa.

Nɨn amebam tɨghar nɨ batamin dughiamɨn,

kɨ kantribar tongɨn akam inigha izir gumazimɨn ingangarim damuasa nɨ amɨsefe,

nɨ na baghavɨra ikiamin gumazimɨn ikiasa, kɨ nɨ amɨsevegha gɨfa."

38 ✝Egh me nan gumazamizibar ikɨtɨ, kɨ men Godɨn ikiam. 39 Kɨ men navir averiabar aven navir vamɨra me danightɨ, me tuavir vamɨran gɨn mangam. Egh me zurara nan atiating nan apengan ikɨtɨ, kɨ me ko men boriba sara deraghvɨra me damuam.

13 Guizbangɨra, nɨ nan mɨkarzimɨn ingarir dughiam,

nɨ nan amebamɨn navir averiamɨn aven bar nan ingarizɨ,

nan mɨkarzim bar moghɨra iti.

14 Nɨ nan mɨkarzimɨn ingari,

ezɨ nan mɨkarzim bar deragha igharagha gari.

Kamaghɨn kɨ nɨn ziam fe.

Bizir nɨ ingariziba, da bar dera,

ezɨ kɨ guizbangɨra uan navir averiamɨn aven bizir kabagh nɨghnɨgha dagh fo.

15 ✝Kɨ uan amebamɨn navir averiamɨn aven modoghav ikia nɨmɨram irivima,

nɨ nan agharibar garima da ekɨva uari isavsuiki.

16 Nan amebam tɨghar na batamin dughiam,

nɨ faragha nan ganigha gɨfa.

Bar fomɨra, kɨ tɨghar nguazimɨn otivam,

kɨ nguazir kamɨn ikiasa nɨ ifongezɨ moghɨn dughiaba nɨ da osirigha gɨfa.

10 ✝Nan amebam na batezir dughiamɨn iza datɨrɨghɨn, kɨ nɨghnɨzir gavgavim nɨn iti.

Nan amebam na batezir dughiamra, nɨ nan Godɨn iti.

25 ✝Kɨ uan igiamɨn ikia iza datɨrɨghɨn kɨ ghurigha gari,

God akɨrim ragha gumazir aghuitam gasarazir puvatɨ.

Kɨ uaghan garima,

men boriba dagheba puvarɨgha da bagh azangsɨghizir puvatɨ.

Bar puvatɨ.

26 Gumazamizir aghuiba zurara apangkuva biziba isa pura gumazamizibagh anɨdi.

Ezɨ God bizir bar aghuiba isa me ganɨdi moghɨn, a boriba isa me ganɨdima

me bar akonge.

4 E akar kaba uan boribar ghuangsɨghan kogham.

Borir igiar datɨrɨghɨn otivamiba, e kamagh me geghanam,

Ikiavɨra Itir God, a gavgavir ekiam iti.

A ingangarir ekiabagh amua, mirakelɨn arazarazir avɨribagh ami.

6 Gumazim ghurigha egha igiar boriba iti, a me bagha bar akonge. Kamaghɨn amizɨ, bizir kam gumazamizibagh amima me ziar ekiam a ganɨdi. Ezɨ boriba uan amebaba ko afeziaba bagha bar akonge.

7 ✝Afeziatam, a gumazir aghuim, egha arazir aghuimɨn gɨn zui, eghtɨ an gɨn zamin boriba bar akongegham.

1 ✝Ia boriba, arazir aghuir ia damuamimra kara, ia Ekiam ko porogh uan ameboghfeziabar akaba baragh. 2 ✝✝Godɨn Akɨnafarim ghaze, "Ia uan ameboghfeziabar apengan ikɨva men akabar gɨn mangɨ." Akar Gavgavir kam, an Akar Gavgavibar tongɨn ikia, egha dar faraghavɨra akar dɨkɨrɨzim sara iti. 3 Akar dɨkɨrɨzir kam kamakɨn, "Ia kamaghɨn damutɨ, ian dabirabim bar deraghtɨ ia nguazir kam dughiar ruarimɨn an ikiam."

4 ✝Ia afeziaba, ia uan boribar nɨghnɨzibagh asɨghasɨgh me damutɨ, me ataran markɨ. Egh ia deravɨra men ganɨva Ekiamɨn damazimɨn men kuariba iniva men araziba akɨrɨva, Ekiamɨn arazibar men sure damu.

20 ✝Ia boriba, ia zurara uan ameboghfeziabar akaba baraghɨva dar gɨn mangɨ. Ia fo, Ekiam ian arazir kam bagh bar akuegham.

21 ✝Ia afeziaba uan boriba mɨghɨ me amir biziba bagh mɨkɨmɨva men nɨghnɨzibar amutɨ me ataran markɨ. Ia kamaghɨn damutɨ, borim osemegh kamaghɨn mɨkɨm suam, kɨ bizitam damuan kogham. Markɨ. Kɨ aghua.

12 ✝Egh ia vaghvagh uan afeziam ko amebamɨn apengan ikɨ, men akabar gɨn mangɨ. Ia kamaghɨn damighɨva, ia dughiar ruarimɨn nguazir kamɨn ikiam, kar nguazir Ikiavɨra Itir God, ian God a isa ia ganɨdim.

7 ✝Ia tuivigh gavgavigh, egh Godɨn amamangatɨghtɨ a ia akɨrmɨgh. Osɨmtɨzim ia batoghtɨ ia kamaghɨn fogh, mati afeziam uan boribagh amir arazimra, God uaghan ia gami. Borir manatam itima an afeziam ti anekɨrɨmɨzir pu? Puvatɨ. 8 God uan boriba bar da akɨrmɨsi. A ia akɨrmɨghan koghtɨ, ia fogh, ia guizbangɨrama an boriba puvatɨ. Ia pura tuavimɨn otivizir boriba.

4 ✝Eghtɨ amizir kam boriba ko igiaba ikɨtɨ, nɨ borir kabar akurvaghtɨ, me deraghvɨra kamaghɨn fogh suam, men ingangarir faragh Godɨn damazimɨn damuamim a kara, me bar deraghvɨra uan amebamɨn ganam. Egh arazir kamɨn, me uan amebam ko afeziamɨn akurvazim ko ingangarir dafar aning fomɨra me gamiziba ikarvagham. God arazir kam bar a gifonge.

21 ✝Amizim borim batasava amuava, a fo, a mɨzazim iniamin dughiam otogha gɨfa. Kamaghɨn an oseme. Egha an otegha gɨvagha, a ua mɨzazir kam gɨnɨghnɨzir puvatɨ. An borim nguazimɨn otogha gɨfa, kamaghɨn amizɨ, a bar akonge.

39 "Egha gɨn Ikiavɨra Itir God, kamaghɨn bar e mɨgei, ‘Ian borir aghɨrir datɨrɨghɨn itiba kamaghɨn fozir puvatɨ, bizir tizim a ikufi, ezɨ bizir tizim a dera, merara nguazir kamɨn aven mangam. Borir kabara, ia me mɨgɨa ghaze, Apaniba me mɨsueghtɨ me arɨghiregham. Eghtɨ kɨ nguazir kam me danightɨ, me a inigh a dapiagh an ikiam.