2 Numuu rí mbá xúgiáanꞌlóꞌ na̱ngra̱ꞌáanꞌlóꞌ mbaꞌa miꞌtsú. Xí xtáa mbáa tsí na̱nguá i̱ngra̱ꞌaa ído̱ rí naꞌthán, xa̱bo̱ tsí májáan mbá jayu máꞌ ñajuun tsúꞌkhue̱n, jamí na̱ꞌngo̱o̱ máꞌ rí naꞌthán-ñájun-mine̱e̱ꞌ mbá xúgíi̱ jayu mangaa.

27 Tsí gakon rí phú máján naꞌne-mbánuu rí nandoo Ana̱ꞌlóꞌ Mikhuíí ñajuun tsíge̱ꞌ: tsí nambáñúú i̱jín-dxuáꞌa jamí go̱ꞌóxuáꞌa ído̱ rí júwe̱e̱ꞌ ndaꞌñúu̱. Xúꞌkhue̱n máꞌ rí na̱ña̱wa̱n-míne̱e̱ꞌ rí ma̱xáꞌnii̱ rí xkawe̱ꞌ rí nune̱ xa̱bo̱ ná numbaa ríge̱ꞌ.

17 Mbá xúgíí kixná rí máján mi̱ndaꞌkho rí nu̱drígúlóꞌ, na̱ꞌkha̱ ne̱ ná mikhuíí, naxná ne̱ Ana̱ꞌlóꞌ tsí neꞌne-ku̱maa mbá xúgíí agu rí nambiꞌi-taꞌa ná mikhuíí. Tsí Ana̱ꞌlóꞌ, ni miꞌtsú tsíxtiꞌkhuu xómá rí jaꞌnii̱ ni máꞌ tsíba̱ñi̱i̱ꞌ xómá eꞌne nákua.

9 Ído̱ wámba̱ ni̱gu̱ma-káxi̱i̱, a̱ꞌkhue̱n ninindxu̱u̱ tsí ma̱ꞌne-jáwíin jámuu mbá xúgíin tsí nune̱-mbáníí rí naꞌthúu̱n ikhaa̱.

11 Na̱tha̱nꞌlaꞌ mbá xúgíí ríge̱ꞌ kajngó ma̱ꞌdxu a̱kia̱nꞌlaꞌ xómá rí nadxu a̱kui̱nꞌ ikhúúnꞌ, jamí ma̱ꞌne jañii rí nadxu a̱kia̱nꞌlaꞌ.

24 Asndo mbiꞌi ríge̱ꞌ nimbá rí xóó túnda̱ꞌa̱laꞌ ga̱jma̱á numuꞌ ikhúúnꞌ. Gu̱nda̱ꞌa̱laꞌ kajngó ma̱janálaꞌ, xkuaꞌnii kajngó ma̱ꞌne jañii rí nadxu a̱kia̱nꞌlaꞌ.

2 Ma̱xájuwalaꞌ xómá júwa̱ꞌ xa̱bo̱ ná numbaa ríge̱ꞌ, rí ga̱xtiꞌkhu̱u xó rí juwalaꞌ ga̱jma̱á numuu rí na̱gu̱ma-nuxi̱iꞌ rí na̱ju̱ma̱ꞌlaꞌ. A̱ꞌkhue̱n rí ma̱goo mu̱ne̱-nuwiinlaꞌ jamí mu̱ra̱ꞌwíí mu̱ne̱laꞌ rí nandoo Ana̱ꞌlóꞌ, ikhaa máꞌ rí máján, rí mitsaan jamí rí káxe̱ mbá jayu.

10 A̱ngui̱nꞌ, na̱tha̱n-jáñalaꞌ ríge̱ꞌ ga̱jma̱á numuu Tátiálóꞌ Jesukrísto̱: rí mbóó awan gáwaꞌdáálaꞌ mbá xúgiáanꞌlaꞌ, jamí mu̱xúxpíꞌthá-mijnálaꞌ. Mbá ꞌnduꞌ gájuwalaꞌ ga̱jma̱á numuu mbóó ju̱ma̱, jamí mbóó máꞌ numuu rí gájuwalaꞌ.

14 Rí phú i̱tha̱án gíꞌdoo numuu ñajuun rí ma̱galaꞌ ju̱ya̱-mijnálaꞌ, numuu rí ikhaa rúꞌkhue̱n ma̱ꞌne rí mbóó idxa̱ꞌlaꞌ gáꞌne.

1 Ikhaa jngó xúge̱ꞌ rá, xí Krísto̱ naxnáa la tsiakhe̱ a̱kia̱nꞌlaꞌ, xí naꞌni̱i a̱kia̱nꞌlaꞌ numuu rí nandoo̱ jaꞌyalaꞌ, xí ikhaa máꞌ Xu̱u̱ꞌ Ana̱ꞌlóꞌ xtáa ga̱jma̱á nindxa̱ꞌlaꞌ mbá xúgiáanꞌlaꞌ, xí phú nandalaꞌ ju̱ya̱-mijnálaꞌ, jamí xí nañáwíin a̱kia̱nꞌlaꞌ ju̱ya̱-mijnálaꞌ, 2 gu̱ne̱-gagi̱ilaꞌ mbá jayu a̱kui̱nꞌ xúꞌkhue̱n rá, ga̱jma̱á rí naꞌne mbóó rí nu̱ndxa̱ꞌwa̱-mijnálaꞌ mbá xúgiáanꞌlaꞌ, mbóó máꞌ xó rí nandalaꞌ ju̱ya̱-mijnálaꞌ, jamí mbóó máꞌ rí nu̱ꞌgí-mijnálaꞌ rí mu̱ne̱. 3 Asndo náá rí nu̱ne̱laꞌ, ma̱xátsa̱ña̱ꞌlaꞌ ni máꞌ mu̱xúxu̱xí-mijnálaꞌ. A̱ꞌkhue̱n gakon gu̱ne̱-waba-mijnálaꞌ, jamí mbámbáa gáju̱mu̱u̱ rí i̱tha̱án gíꞌdoo numuu dxájuu xó rí ikhaa. 4 Mu̱xúꞌyálaꞌ i̱ndo̱ó máꞌ rí ndaꞌyálaꞌ ikháanꞌlaꞌ, rí ga̱xná-gamiéjwanlaꞌ rí ndaꞌñúú i̱ꞌwíin mangaa.

5 Ikhaa jngó, ga̱ꞌne xúꞌkhue̱n a̱kia̱nꞌlaꞌ, xómá rí neꞌne a̱kui̱in Krísto̱ Jesús mangaa:

6 Maske máꞌ ikhaa̱ ñajuun Ana̱ꞌlóꞌ,

tándxaꞌwá-mine̱e̱ꞌ rí numuu rí mbéꞌtháa̱n ga̱jmáa̱ Ana̱ꞌlóꞌ, rúꞌkhue̱n ñajuun mbá rí ra̱jáꞌyoo̱ maniñuu̱.

7 A̱ꞌkhue̱n gakon niniñuu̱ janíí mbá xúgíí rí ñajuu̱n,

neꞌne-mine̱e̱ꞌ asndo xó mbáa yumbáá waꞌtsi̱i̱.

Jamí neꞌne-mine̱e̱ꞌ xómáꞌ jaꞌñúú xa̱bo̱ numbaa.

8 Jamí ído̱ rí ninindxu̱u̱ máꞌ xa̱bo̱ numbaa rá,

nixrígú-mine̱e̱ꞌ máꞌ ikhaa̱,

xúꞌkhue̱n máꞌ ninindxu̱u̱ xa̱bo̱ tsí naꞌne-mbánuu rí nitháán, asndo niniña-mine̱e̱ꞌ rí ma̱ja̱ñúu̱,

jamí nijáñuu̱ ná ixe̱ krúsi̱.

9 Ikhaa numuu rúꞌkhue̱n Ana̱ꞌlóꞌ mangaa nixúxi̱i̱ rí maphú ma̱gi̱ꞌdoo numuu̱,

jamí nixná-mbiꞌyuu̱ rí ma̱nújngoo-rámuu inuu mbiꞌñúú mbá xúgíin xa̱bo̱.

10 Ikhaa jngó ná inuu Jesús, tsí mba̱a̱ mbiꞌyuu,

mu̱sma̱ti̱gu̱ún mbá xúgíin xa̱bo̱,

tsí júwa̱ꞌ ná mikhuíí, jamí ná inuu numbaa, xúꞌkhue̱n máꞌ tsí júwa̱ꞌ ná agoo ju̱ba̱ꞌ.

11 A̱ꞌkhue̱n rí jámbi̱in xa̱bo̱ muthan rí Jesukrísto̱ ñajuun Táta̱ Ana̱ꞌlóꞌ,

kajngó xúꞌkhue̱n ma̱gu̱ma-mba̱a̱ Ana̱ꞌlóꞌ Mikhuíí.

12 Ikhaa jngó xúge̱ꞌ rá, a̱ngui̱nꞌ tsáanꞌ nandoꞌ ja̱ya̱ꞌlaꞌ, xómá rí nu̱ne̱-mbáníílaꞌ rí na̱tha̱n ído̱ rí xtáá ná majña̱ꞌlaꞌ, xkuaꞌnii máꞌ gúne̱-mbáníí ído̱ rí ndawu̱ún mangaa. Gu̱snga̱jmálaꞌ rí nijáwiáanꞌlaꞌ ga̱jma̱á majñu̱u̱ xó rí juwalaꞌ, ga̱jma̱á ngamí jamí ga̱ꞌne gamakuáanꞌlaꞌ ná inuu Ana̱ꞌlóꞌ. 13 Numuu rí Ana̱ꞌlóꞌ nagíwa̱nꞌ ná awúun a̱kia̱nꞌlaꞌ rí mu̱ne̱laꞌ rí máján rí nandoo̱ ikhaa̱, jamí ikhaa̱ máꞌ nambáyálaꞌ rí ma̱ꞌnga̱ꞌlaꞌ mu̱ne̱ rúꞌkhue̱n.

14 Mbá xúgíí rí nu̱ne̱laꞌ, mu̱xútha̱nlaꞌ rí ra̱máján ga̱jma̱á numuu nimbáa ni máꞌ ma̱xátsa̱ña̱ꞌlaꞌ. 15 A̱ꞌkhue̱n rí ma̱xáríga̱ nimbá rí ra̱máján mi̱ꞌthán ga̱jma̱á numalaꞌ, jamí nda̱a̱ máꞌ aꞌkhánlaꞌ gáꞌne. Ma̱nindxa̱ꞌlaꞌ i̱ji̱in Ana̱ꞌlóꞌ tsí jaꞌwuun júwa̱ꞌ ná majñu̱ú xa̱bo̱ tsí ra̱májíin mbá jayu. Jamí ná majñu̱ú xa̱bo̱ tsúꞌkhue̱n ma̱nindxa̱ꞌlaꞌ agu mba̱ꞌwo̱ rí nambiꞌi-taꞌa ná numbaa. 16 Ninguáná mu̱xúni̱ꞌñáálaꞌ ajngáa rí jayá mbiꞌyalóꞌ, kajngó ído̱ ma̱ꞌkha̱a Krísto̱, phú gagi ma̱xtáá ga̱jma̱á numalaꞌ rí tángrigo̱ꞌ xúgi̱í, jamí táñajun máꞌ xúgi̱í jayu. 17 Maske máꞌ ma̱ja̱ñúꞌ kajngó mu̱wa̱a iꞌdiuꞌ ga̱jma̱á tsi̱gi̱jña̱ꞌ rí nu̱xna̱xílaꞌ ná inuu Ana̱ꞌlóꞌ numuu rí nanimba̱ꞌlaꞌ ju̱yáa̱, ikhúúnꞌ nadxu a̱kui̱nꞌ, jamí nandoꞌ rí mbá xúgiáanꞌlaꞌ ma̱ꞌdxu a̱kia̱nꞌlaꞌ ga̱jma̱á nindxu̱ꞌ. 18 Xómáꞌ rí nadxuꞌ ikhúúnꞌ, xúꞌkhue̱n máꞌ jaꞌyoo rí ma̱ꞌdxalaꞌ mangáanꞌlaꞌ.

19 Gúꞌthu̱u̱n rí Táta̱ Jesús gáꞌne rí ma̱goo ma̱xu̱ꞌmáa wapha máꞌ Timotéo̱ ma̱ꞌga gáꞌyalaꞌ, kajngó ído̱ gádxawuun xáne juwalaꞌ, ma̱ꞌdxu a̱kui̱nꞌ xúꞌkhue̱n rá. 20 Numuu rí ra̱gúꞌdaa i̱mba̱a̱ꞌ xómá Timotéo̱, tsí mbéꞌtháán a̱kui̱in ga̱jmi̱ꞌ, jamí mbá jañii a̱kuii̱n naxná-gamiéjuu̱n rí ma̱juwa-májánlaꞌ. 21 Numuu rí mbá xúgíin nduꞌyá rí nandúún ikhiin, jamí tsíꞌyée̱ rí nandoo Krísto̱ Jesús. 22 Xómáꞌ ikháanꞌlaꞌ ndu̱ya̱álaꞌ máꞌ xáne phú jaꞌnii a̱kuii̱n, jamí ndu̱ya̱álaꞌ rí xómá naꞌne mbáa ada̱ ga̱jma̱á anu̱u̱, xkuaꞌnii niñajwii̱n ga̱jma̱á nindxu̱ꞌ rí ma̱tha̱n-ráꞌa ajngáa máján. 23 Ikhaa jngó gúꞌthu̱u̱n rí ma̱xu̱ꞌmáa̱ inalaꞌ, awúun máꞌ rí nda̱yo̱o̱ xáne na̱ka̱-rambánuu ga̱jma̱á numuꞌ ge̱jyoꞌ. 24 Gúꞌthu̱u̱n ga̱jma̱á mbá jañii a̱kui̱nꞌ rí Táta̱ mambáyíꞌ, kajngó jmínu̱úꞌ máꞌ ma̱ꞌgá gáya̱ꞌlaꞌ wapha.

25 Rí xúge̱ꞌ rá, na̱ju̱mu̱ꞌ rí ndaꞌyóo ma̱xu̱ꞌmáa ma̱ꞌga̱a ga̱jma̱á nindxa̱ꞌlaꞌ Epafrodíto̱, tsí ikháanꞌlaꞌ máꞌ ni̱xu̱ꞌmáa ni̱ꞌkha̱ rí mambáyíꞌ ná rí ndaꞌyóꞌ. Ikhaa̱ ñajuu̱n mbáa dxájuꞌ tsí phú nambáyíꞌ ná awúun ñajun, jamí xa̱ꞌ wíji̱i̱ ga̱jma̱á nindxu̱ꞌ ga̱jma̱á numuu ajngáa máján. 26 Numuu rí ikhaa̱ ra̱ꞌkhá tháán ndaꞌñáaꞌlaꞌ mbá xúgiáanꞌlaꞌ, jamí phú xtáa̱ gaꞌkho̱ numuu rí ni̱dxawíínlaꞌ rí ndiyóo̱ nandii. 27 Gakon máꞌ rí ndiyóo̱ nandii, rí asndo inu ma̱ja̱ñúu̱. I̱ndo̱ó máꞌ numuu rí Ana̱ꞌlóꞌ niñáwíin a̱kui̱in jaꞌyoo̱, jamí asndo mangúúnꞌ máꞌ niñáwíin a̱kuii̱n jaꞌyeꞌ, kajngó ma̱xárigu i̱mba̱ jíná inuu rí jíná máꞌ xtáá. 28 Ikhaa jngó ma̱xu̱ꞌmáa̱ ma̱ꞌgaa̱ mbá nacha̱ jayu ga̱jma̱á nindxa̱ꞌlaꞌ, kajngó ído̱ gúyáa̱laꞌ mbu̱júꞌ, ma̱ꞌdxu a̱kia̱nꞌlaꞌ, xúꞌkhue̱n máꞌ mangúúnꞌ náxáxtáá gaꞌkho̱ guéño. 29 Ikhaa jngó mbá gagi gúdríguíi̱laꞌ numuu rí xa̱bi̱i Ana̱ꞌlóꞌ ñajuu̱n, xúꞌkhue̱n máꞌ gu̱ya̱-makúúnlaꞌ tsí jaꞌñúú xómá ikhaa̱. 30 Numuu rí ga̱jma̱á numuu ñajuun Krísto̱ nixtáa̱ máꞌ rí ma̱ja̱ñúu̱. Maske máꞌ ngamí rí ma̱ja̱ñúu̱, nixná-tíꞌña-mine̱e̱ꞌ rí ma̱ꞌnii̱ ñajun rí tsíꞌngo̱o̱ mu̱ne̱ ikháanꞌlaꞌ ga̱jma̱á numuꞌ.

15 A̱gu̱ya̱álaꞌ rí nimbáa ma̱xárthanga̱a rí xkawe̱ꞌ ná inuu i̱mba̱a̱ꞌ rí xkawe̱ꞌ niꞌñuu̱. A̱ꞌkhue̱n gakon, jámba̱ miꞌtsú gu̱ne̱-mijnálaꞌ rí máján, jamí gajmíí mbá xúgíin xa̱bo̱ mangaa.