Legalidades

Gavman yoba moraiglmara mogl atne edinamga

1 Ana yoba kade gavman meglkwa i, God prumere u nono bitno meglko, God yene no bitno moraiglmedi i edugwa pre ye meglmara mogl atne edidre, kano pramga paugwa. 2 Yoba ta ye kano sedibi, ye ama God kamo sedigwa. Yoba mabuno yegl ta eribi, ye ka inaiglkwa.

3 Yoba ta mabuno wakai erikwa i, ye gavman yoba ta kuduglno gogl tekraiglkwa. Yoba ta ye no sinaiglmedi kudugl geglkwa i, ye mabuno kide erikwa pre gavman yoba kuduglno gogl teigwa. Yegl pre ene ta kuduglno goglkramnedi pribi, mabuno wakai erio. Yegl eribi, gavman yoba ta ene ere sikraiglkwa. Ye kandre, ene wakai erimiwe dinaiglkwa. 4 God ye ene wakai moraiglmedi gavman yoba kade ta meglkwa i, kogon dedugo, erikwa. Ba ene kano sedidre, mabuno kide ye mane dimara i eribi, ene kuduglno goraiglkwa i, kuno erukwa. I siragl pre God ye gavman yoba kogon ta ama togwa i, yoba mabuno kide ta eribi, ye ere te ikne edidre, ere sinaiglmedi kogon togwa. 5 Yegl pre ene gavman yoba nono bitno meglkwa i kano praiglkwa paugwa i, mem suo paugwa. Ta we, ene ye kano sedibi, ka inaiglkwa. Te, ta we, ene ye kano duglo boraiglkwa i, mabuno du paugwa pre ene ye kano duglo boglsre, mabuno du eunedi prisre, wakai praiglkwa.

6 Ana gavman yoba nono bitno meglkwa i, kano duglo boramga paugwa pre mige moni taks ta norio dinaiglkwa i, ama nono tenamga paugwa. God ye gavman yoba nono ake ple di noraiglmedi kogon dedugo, ye ege ege kogon i erikwa pre mige taks tenamga i, kuno erukwa. 7 Yegl pre taks kane kane siragl mere ta norio dinaiglkwa i, ene teo. Tedre, gavman yoba i ama nono bitno meglmedi kuduglno goglsre, pre i mitna edio.

8 Ene dina ta eribi, panabuka i, tabre te ikne edio. Mige moni ya ki ta dina erumun, panabuka i, te ikne edimun, dudunabuka. Yegl paugwa ba kogon swara ta ege ege eramga paugwa i, dina mere yegl ta paugwa. Kogon i, deno muduno yoba tenamga paugwa. Yegl eramga i, dina mere yegl aimadi aimadi pai morabuka. I ta dudumedi prikramga.Te, ene prio! Ene yoba pere deno muduno tebi, ene God lomo mudu pamere erikwa mere yegl panabuka.

12 Yoba God kamo prikrikwa meglmara i, ene suna meglkwa pre ene mabuno wakai duglo bogl wan moraiglkwa paugwa. Yegl eribi, ye ene yoba kide moglsre, kide erime dibi, dinaiglkwa ba okuo God jasno moragledi unabuka igne, ene mabunono wakai i mina ye God kagie kade tenaiglkwa .

Gavman ya kogon bitno yoba kano pramga paugwa

13 Ene Yagl Kade we di prisre, gavman mudu ene bitno mere yegl ta moraiglkwa i, kano praiglkwa paugwa. King moglkwa i, ye gavman mudu akugwa pre ene ye kamo praiglkwa paugwa. 14 Te, gavna meglkwa i, king ye dede, yoba kide eraiglkwa i ka tage tedre, wakai eraiglkwa i ka wakai di tedre, eraiglmedi dedugwa pre ene ye kano ama praiglkwa paugwa.

17 Yegl pre ene siragl we di pitne? Nono mige taks Rom king tenamga kuno erumo mo tekramne? digwa. 18 Yegl digwa ba Jisas ye nomane kide idre, digwa i, pre kan ersre, ye yegl di togwa, Ene mabuno kibi erikwa yoba meglkwa. Ene siragl pre na aglau ere dinan, pramnedi na kira pogl prime? 19 Ene mige silva ta naribi, kanaluwe dugwa. Yegl dugo, ye mige silva ta yu teigo, 20 Jisas mige i kandre, yegl dugwa, Ira kwiamo ya kagie mige i mina pame? dugwa. 21 Dugo, ye di ikne ede, Rom king kwiamo ya kagie pamiwe digwa. Yegl digo, Jisas ye yegl di togwa, Yegl eran we, taragl ta Rom king pre yenabuka i, Rom king teo. Te, taragl ta God pre yenabuka i, God teo! dugwa.

Pita ye yene pre ya Jisas pre taks togwa

24 Okuo Jisas ye duglo beglkwa yagl bogl ede dumo Kaperneam eigwa. Eigo, taks igwa yoba Pita moglmara wigwa. Ye tawa teigwa yugu pre taks i meglkwa. Ye ede Pita moglmara udre, kira pogl yegl digwa, Ene tisano God yugumo pre taks tomo mo tekrume? digwa. 25 Yegl digo, Pita di ikne ede, Tenabiwe dugwa. Pita yegl didre, ye aglke kor ede pi Jisas yugugl moglmara ogwa ba ye ka swara ta dikruko, Jisas tabre Pita yegl di togwa, Saimon, ene siragl we di pitne? King makandigle meglkwa i, ye yoba ira taks norio di teime? Yene wanoma taks norio dimo mo yoba meda taks norio dime? dugwa. 26 Jisas yegl dugo, Pita di ikne ede, Yoba meda taks norio dime dugwa. Yegl dugo, Jisas aglke kor yegl dugwa, Kaima. Wanoma ta tekraiglkwa 27 ba yoba i kide pre dinaiglkwa pre nono taks tenabuglka. Yegl pre ene ede pi nigl nubun huk edin, buglo bagle komono kana ta sinatnga i, dra ake ada bogln, mige mogo ta atne yenan, kanatnga. Mige mogo i, ene i pi na pre ya ene pre akie taks to di, Jisas yegl dugwa.

25 Ana yoba ta ene kot ere tenagledi eran, jas moglmara pikre, tabre ere wakai erabrika. Kowai ye ene gudu i pi jas moglmara edenan, jas ene kibr nem ogo mina yenan, ye ene i pi kane yugu ede dinabuka pre diga. 26 Taragl yegl plau dinan, na ene kaima di teiga, ene kane yugu kodokratnga. Mige mogo swara keme ta tenatnga pai moran, ene ede meda ukratniwe di, Jisas yegl dugwa.

18,19 Yegl ersre, ene na duglo beglmedi ene gudu i pi king ya gavana moraiglmara edenaiglkwa. Edibi, na kana yoba kade wagle ya yugobuno pere pere ta moraiglkwa i, ama di tenaiglkwa. Ene di tenaiglkwa i, ene ka siragl mere didre, mem siragl mere dinaiglkwa i, pre yubun dekrio. I siragl pre ege i ene ka siragl mere dinaiglkwa i, beke tenaglka.

Maria dumo Betlehem mogl, Jisas kuglkwa

1 Ana igne i Rom King, Sisar Ogastus we digwa i ere mogl, lo ta padiglsre, yoba mudu uglo koglo koglo meglkwa i, kagno inamniwe dugwa. 2 Rom gavman ege i, keremoknayene yoba kagno yegl mere igwa. Te, igne i yagl ta kagie Kwirinius we digwa i, provins Siria gavana moglkwa.*

3 Ana Rom king lo yegl mere paduglkwa pre yoba mudu ede yugunomugl pidre, gavman yoba kagno tenamnedi ede eigwa. 4 Yegl pre Josep ama ye distrik Galili, dumo kebra Nasaret moglmara i kide kodo, ede distrik Judia pi dumo kebra ta Betlehem we dimara i ogwa. I siragl pre dumo i, okna King Devit yugomugl yogo, Josep Devit gawamo ta moglkwa pre dumo Betlehem ye yugomugl yogwa. 5 Te, ye ogwa igne, Maria dane paugo, ye Josep bogl akie ede ebrika. I siragl pre Maria ye Josep moglmara enabedi di padigl kodigwa pre gavman yoba ye kagno suo akie tenabugledi ede ebrika.

9 I siragl pre na dumo Efesus moglmara i, kudana ikne mere meglkwa ba God na dumo magigl i kogon podo eratnedi konbauna yauro nare kodugwa pre na dumo Efesus magigl i kogon ere kodidre, okuo ede meda enagledi prika.

10 Di ikne edekruko, Pailat aglke kor yegl dugwa, Ene ka ta di ikne edekratno? Na ene i meda edenaglka mo ede prak mina si goraglka i, na mina paugwa. Mo, i ta pre kan erekitno? dugwa.

11 Yegl dugo, Jisas di ikne ede, yegl dugwa, God mogl mitna edugwa i, ene namba ta tekruma, ene taragl swara ta ere narekitngo. Yegl paugwa pre ene tadaglmenen kebra paugwa ba yoba ta na ene ogon mina edugwa i, tadaglmemo podo kaima pamiwe dugwa.