1 Ana okuo, angelo pere ta heven ibo kide kodo, ede atne ugo, na kaniga. Angelo i, kagie kade paugo, ama abuglagemo podo sugwa pre makandigle pogl dugwa. 2 Angelo i ede atne udre, ka podo yegl dugwa, Dumo kade Babilon i, u kide pi kodumiwa*. U kide pi kodugo, erme murubuglo kide kane kane dumo i kipai meglbi, kua kide ya dua kabu kide, yoba i pi God tawa gagl tenaiglkwa kuno erekrukwa meglkwa i, ama dumo Babilon moraiglkwa. 3 Yoba spak erabedi nigl wain teimere mere yegl, Babilon yoba i, yoba uglo koglo koglo yugobuno pere pere meglkwa i, kumugl abai ya yagl abu ta bogl mabuno kide eraiglmedi kinano sigwa. Yegl eriko, te king makandigle meglkwa i, ye Babilon yoba bogl ama mabuno kide eriko, Babilon yoba ye taragl kane kane idre, ame wakai kaima dinamnedi bubuno geglkwa pre bisnis man mige moni podo igwa. Yegl erikwa pre God ye ere kide ere tomiwe di, angelo i yegl dugwa.

4 Di kodugo, yoba pere ta heven ibo mogl, ka ta dugo, prika. Ka yegl dugwa, Ene na yobanama meglkwa i, ene dumo Babilon kide kodo, teke ede meda pio!* dugwa. Ta manan, ene Babilon yoba tadaglme erimere yegl eraiglmiwa. Ye erimere mere yegl eribi, na ye yubun tenaglka i, ene ama akie i dinaiglkwa pre diwa. 5 I siragl pre Babilon yoba tadaglme ere br si meglko, br i ede mitna heven ibo ogwa mere yegl paugwa. Ye mabuno kide erikwa i, God pre moglsre, ka tage tenabuka pamiwe dugwa.

6 Ye yoba pere ta mabuno kide ere teimere kuno yegl mere ene ye ere ikne ede teo! dugwa. Te, ye mabuno kide swara swarade erikwa i, ene ege suo mere ere kide ere te ikne edio. Ye nigl kide kap swara mina koglsre, yoba pere teigwa i, ene kap suo mere kogl, te ikne edio dugwa. 7 Ye bona gana podo sidre, kagie kade imere mere ye giugl prisre, kide praiglmedi ere teo. I siragl pre ye nomano mina prikwa i, No abu werai mere moglkre,* abu kwin mere yegl munga pre ege swara ta kai erekramniwe di prikwa. 8 Ka yegl digwa pre ege swara ta yubun podo unan, ege swara i mina Babilon yoba tau geglbi, tau kai giglange sidre, kidan podo goraiglkwa. Yagl Kade God ye ka tage togwa pre ye dumono doga denabiwe dugwa.

9 Ana king makandigle meglkwa, ye Babilon yoba bogl mabuno kide ersre, taragl kane kane bubuno gogl, ame wakai digwa yoba ikra, dumo Babilon i doga denan, ede inge ede egli enabuka i, ye kanaiglkwa igne, kide pre, kai podo eraiglkwa. 10 Ye Babilon ka podo tage yumere mere yegl ama i dinamnedi kudugl gogl, eglke iro adigl moglsre, yegl dinaiglkwa, Aiye, kodo! Dumo kade Babilon, dumo gigledi yogwa ba ege sugunagle, wan aua mina, God dumo i ka tage te kodumiwe di, yegl dinaiglkwa.

11 Ana ka yegl dibi, makandigle yoba taragl podo podo i pi dumo Babilon maket ere neigwa yoba i, ama Babilon u kide ogwa i pre kide prisre, kaimo eraiglkwa. I siragl pre ye taragl kane kane i pi maket eribi, topo sinaiglkwa yobamo ta moglkrikwa i pre kai eraiglkwa. 12 Ye taragl maket erikwa i, gol ya silva ya kobuglo tau mige podo boglkwa i maket ersre, bis nuguno mige podo boglkwa ya lap kruo, wakai kaima yogwa i maket erikwa. Ye taragl yegl maket ersre, ama lap gogl kaima ya gogl mere ta maket ersre, lap silk mina bekigwa i ama maket ersre, ede kane kane ta demene wakai erikwa i maket erikwa. Te, taragl kane kane elefan signo mina bekidre, ede tau mige podo boglkwa i mina bekigwa i, maket ersre, taragl ain mo ain bras mo kobuglo ta kruo kama suna suna paugwa i mina bekigwa i, ye maket erikwa. 13 Bisnis man ye taragl yegl mere maket ersre, ama sinamon ya sup kane kane yoba kaya mokna mina garaiglkwa i, maket ersre, ede nuglo myr ya frankinsens ya ede nuglo tau ama demene wakai erikwa i, maket erikwa. Te, ye ama nigl wain ya oliv nuglo maket ersre, plaua wakai yogwa ya wit ya kau ya sipsip maket ersre, hos ya karis maket erikwa. Taragl kane kane yegl maket ersre, te yoba kiano bogl meglmiba nigl kogon yoba moraiglmedi ama akie maket erikwa ba yoba ta topo sinaiglkwa i, ta moglkrikwa pre ye kai eraiglkwa.

14 Bisnis man i, ye kai ersre, ama yegl dinaiglkwa, Yoba taragl wakai dumo Babilon inamnedi praiglkwa i, dudugwa. Bona gana ya mige moni ya taragl wakai wakai dumo Babilon yogwa i, mudu wau boglkwa pre okuo ta yenan, kankraiglmiwe dinaiglkwa.Ol bisnisman i gat ol kain kain gutpela kago. (18.12-14) 15 Bisnis man ye okna taragl kane kane maket ersre, mige moni podo igwa yobamo i, erme Babilon yoba giugl podo prikwa i kandre, no ama giugl yegl i dinamnedi kudugl gogl, eglke iro adigl moglsre, kide pre, kai eraiglkwa. 16 Kai ersre, ama yegl dinaiglkwa, Babilon yoba wakai kaima meglkwa i, ye okna kugugl gagl kruo, wakai kaima yogwa i edidre, kugugl gagl gogl kaima ya gogl mere yegl ta edidre, gol ya kobuglo tau mige podo boglkwa ya bis nuguno mige podo boglkwa i edigwa ba erme yubun idre, u kide pi kodigwa. 17 Ege sugunagle, wan aua mina ye migeno ya bona ganano podo yogwa i, u kide pidre, dudu kodumiwe di, yegl didre, kai eraiglkwa.

Ana na ama kaniga i, sip akigwa yoba meglkwa i, ya yoba sip mina wanigwa ya sip mina kogon erikwa i, yoba mudu mudi nigl mina bisnis erikwa i bogl akie eglke iro adigl moglsre, 18 ede inge dumo Babilon ede egli ogwa i kandre, ka podo yegl digwa, Dumo Babilon yomere mere yegl, taun swara yegl ta yeikrume digwa. 19 Ye makan kugane wobro bitno mina edidre, dumo Babilon mirie gogl, kai ersre, yegl digwa, Dumo kade ikra, u kide pi kodidre, yubun podo yumiwa. Sip nem yagl ta meglkwa i, ye mudu dumo Babilon migemo ya bona ganamo i mina ye mige moni podo igwa ba erme dumo kade i, wan aua mina u kide pi kodumiwe di, yegl digwa.

20 Ene yoba heven ibo meglkwa i, God yobama ya ye dedugwa yoba ya kamo kep yoba meglkwa i, ene gun yeo! I siragl pre Babilon yoba okna ene ere kide ere teigwa i, God kan moglkwa pre erme ka tage tedre, ere ikne ede tomiwe, di, angelo i yegl dugwa.

21 Ana taragl i plau dugo, mokomugl i angelo gigledi ta moglkwa i, kobuglo ta kugl wit si deduagle erikwa yomere yegl, podo kide ta ake mitna ede, pia si mudi nigl atne edugwa. Edidre, yegl dugwa, Na kobuglo pia si atne edimere mere yegl, God dumo Babilon yegl mere muglkude kaima si atne edenan, okuo ta yeikrabiwe dugwa. 22 Dumo Babilon i, okuo yoba ta mogl, taragl gita mere yegl sidre, pu mige ya biugel sidre, giglage ta dikraiglkwa. Te, yoba ta taragl ta maket eramnedi bekekribi, yoba ta ama kugl mogo si deduagle erekraiglkwa. 23 Dumo Babilon wau yenan, yoba okuo dumo i, ken lam ta gaglkraiglkwa. Te, yagl abu ta bogl idre, gun yei, ka dinaiglkwa i ama okuo ta manabuka. I siragl pre Babilon yoba ebrie mabunono mina ya ka dimara mina nibine mere yegl didre, yoba uglo koglo koglo meglkwa i, bakagl teigo, bisnis man dumo Babilon meglkwa i, u yoba yaglno kade kaima eigwa. 24 Babilon yoba i, ye God kamo kep yoba ya God yobama si geglkwa pre God kide kanugwa. God kanugwa i, yoba mudu ta makandigle moglsre, yoba pere ta si geglkwa i, God ye dumo Babilon swara mabuno moglkwa mere yegl kanugwa pre ye dumo Babilon ere kide ere tenabiwe di, angelo i yegl dugwa.