1 Ana okuo God yugumo yugugl kra i, yoba ta ka podo di meda edidre, angelo 7-pela ikra yegl di togwa, Ene God dem kubrukwa plet 7-pela mina ake meglkwa i, i pi toide makandigle edio dugwa. 2 Yegl dugo, angelo namba 1 moglkwa i, ye plet ta ake moglkwa ikra, i pi toide makandigle edugo, yoba ta agl bugla are muno ganemo idre, ye kiamo kagie kade teigwa i, ogono nagino mina, num kide kaima, giu kide erukwa num i, deigwa.

3 Ana angelo namba 2 plet ake moglkwa ikra i pi toide mudi nigl edugo, mudi nigl ede u yoba geglkwa bormaino mere yegl ogwa. Mudi nigl ede u bormai ogo, taragl ta mudi nigl atne meglkwa i, mudu geglkwa.

4 Ana angelo namba 3 plet ake moglkwa ikra i pi toide nigl ta ogo bei wimara ya nigl bage bage wimara i edugo, nigl mudu u bormai koglo eigwa. 5 U bormai koglo eigo, angelo ta nigl bage bage sugl moglkwa i, yegl dugwa, God yo, ene den mudu pe kaima sugwa te, ene okna aimadi moglsre, erme mogl pai motnga i, ene makandigle yoba yubun yegl tenga i, mabuno du ersre, teniwa. 6 I siragl pre ene yobanma ya kanen kep yoba ye si gogl, bormaino toide i meda edigwa i, ene ere mogl, ye bormai kogl nenaiglmedi tenga. Ye inaiglkwa pamara i, te ikne ediniwe di, yegl dugwa. 7 Angelo i yegl dugo, yoba heven ibo tawa bogl ta yogo, meglkwa i, yegl digwa, Yagl Kade God yo, yobugln pai kawa togwa motnga i, ene yoba ka tage tenga i, mabuno du ya mabuno kaima keme etniwe di, yegl dugwa.

8 Ana angelo namba 4 ye plet ake moglkwa ikra i pi toide ade mina edugo, God ere mogl, ade niga podo dinan, yoba ade podo denaiglmedi erukwa. Ye ade podo deigwa i, doga mere yegl deigwa. 9 Ade niga podo kide dogo, yoba ade dedre, God kagie di kide yei teigwa. God ye yubun i dedenabuka mo dedekrabuka mo i, ye wagle paugwa ba yoba i nomane yake tedre, God kagie kade tenaiglkwa i kodo, ye kagie di kide yei teigwa.

10 Ana angelo namba 5 ye plet ake moglkwa ikra, i pi toide agl bugla are ikra sia kingmo mina tebe edugwa. Toide edugo, agl bugla are dumo ta sugl moglmara i, mudu mim eruko, yoba ama giugl podo prisre, yene drano giugl kaiglkwa. 11 Yegl ersre, ye num dedre, giugl pre, erikwa i pre God heven ibo moglkwa i, di kide yei teigwa. Ye nomane yake tedre, mabunono kide, kide kodinaiglkwa i, kodo, ye ere pai meglkwa.

12 Ana angelo namba 6 ye plet ake moglkwa ikra i pi toide nigl kade ta, kagie Yufretis we digwa womara i edugo, nigl i dare ede atne pi kodugwa. I siragl pre king tau ade umara kra meglkwa i, unaiglmedi pre God ye nigl i darenabedi erukwa.

13 Ana na taragl ta ama kaniga i, murubuglo kide suota koglko mere yegl meglko, na kaniga. Murubuglo kide swara ta toki podo ikra dra mina meda ugo, te ta agl bugla are ikra dra mina meda ugo, ta ama agl bugla are kamo kep yagl, ka kibi dugwa ikra dra mina meda ugo, erukwa.

14 King dumo uglo koglo koglo meglmara i, murubuglo kide pidre, kimagl tau ersre, king auro yunamnedi eigwa. Ye pi auro yunamnedi erikwa i, God ye yobuglomo pai kawa togwa moglkwa i, egemo kade unan, king i God kuda bogl tenaiglmedi pre pi, di makai sigwa. 15,16 Ye king i amino bogl auro yu, dumo ta ka Hibru mina kagie Armagedon we dimara i, edigo, na kaniga.

Na taragl yegl mere kan moglko, Yagl Kade ama ka yegl dugwa, Ene prio. Na unaglka i, kunogl gogl yoba ede yugugl ugo, yugu nem kandre, wai kuglmere mere yegl, na unaglka. Yoba ta ugl paikre, kuguglmo gaglmo ede, kor wan moglmere mere yegl ta morabuka i, ye gun yenabuka. Ba yoba ta kuguglmo gaglmo edekre, yokoko wan moglmere mere yegl ta morabuka i, yoba ye toromo kanibi, ye agai gorabiwe di, yegl dugwa.

17 Ana angelo namba 7 ye plet ake moglkwa ikra toide kamun mitna ibo edugo, God yugumo yugugl kra ime, sia king yomara i, yoba ta ka podo di, I dudumiwe dugwa. 18 Yegl dugo, kamun gur di moglko, mu podo dugo, kamun tai ama sugo, imem podo kide kaima ta ama ugwa. Imem i, yoba koragle dumo makan mina meglkwa igne ede u erme pra, imem podo kide yegl ta ukrumere mere yegl ugwa. 19 Imem podo kide yegl ugwa pre siti kade Babilon i, buko di ede bage suota ogo, yugobuno pere pere sitino kade ama si deduagle erukwa. Babilon yoba kagno paugwa i, God pre moglsre, ye dem podo kubrukwa i, wain gigledi moglkwa i nenaiglmedi togwa mere yegl paugwa. 20 Te, imem podo kide yegl mere ugwa pre ailan bage bage yogwa i, mudu imin daiglko, muglo meglbi ama yage sigwa. 21 Te, aragl mogo podo kide kaima ama yage sugwa. Mogo swara swarade yubunmo 50kg mere yegl heven ibo yei, yage, yoba si geglkwa ba yoba tau kor meglkwa i, God kagie di kide yei teigwa. I siragl pre God ye yubun tedre, aragl mogo yage sinabedi erukwa i, yubun podo kide togwa pre ye kagie di kide yei teigwa.