1 Ana okuo na kaniga i, angelo ta heven ibo kide kodo, ede atne ugo, na kaniga. Angelo i, ye ki ta ake moglsre, sen kade ta ama akie ake moglkwa. Ye ki ake moglkwa i, makan mur ta yei ede atne ime ogwa i yaurnabuka pre ake moglkwa. 2 Ye ede atne udre, toki podo ikra si akidre, ye bugla yugu 1,000 kane panabedi sen mina si kane sugwa. Toki podo i, ye toki ta okna ibo moglkwa ikra moglko, ye kagie Satan we didre, Yagl Kide ama we dumga. 3 Angelo ta kaniga ikra, ye Satan si kane sidre, makan mur ta yei ede atne ime omara i pia si atne edidre, makan mur dra yomara si kegl dugwa. Ye yegl erukwa i, bugla yugu 1,000 kane pai mogl, yugobuno pere pere meglkwa i, bakagl te dinabedi erukwa. Ba bugla yugu 1,000 i dudinan, ye ede meda udre, ege sugunagle keme meda wan morabuka paugwa.

4 Ana na ama kaniga i, sia king tau yogo, yoba tau sia mina ame di meglko, kaniga. Yoba i, God ye yoba kotno praiglmedi namba togwa. Te, na ama kaniga i, yoba tau ye Jisas kamo yoba di tedre, God kamo ake gi di meglkwa pre yoba ye nuguno si gare edigwa i, kiano mina meglko, na kaniga. Yoba i, ye agl bugla are ikra mo ye kiamo bekigwa i kagie kade tekre, ye muno ganemo ogono mo mabro mina ikrikwa meglkwa. Na kan moglko, yoba i adigl u kor pidre, bugla yugu 1,000 Krais bogl akie yoba suglno meglkwa. 5 Ege i, yoba geglkwa tau komnaye kana adigl u kor eigwa. Ba yoba tau geglkwa i, igne i ta adiglkrikwa. Bugla yugu 1,000 i dudugo, ye mokomugl adigl u kor eigwa. 6 Ana yoba komnaye kana adigl u kor enaiglmara i, ye taragl wakai wakai idre, gun podo yebi, te God ye yene pre i pere edenabuka. Yoba i, namba 2 dai ikra ye ta akekrabuka ba ye tawa teigwa yoba mere yegl, God ya Krais kogono ersre, bugla yugu 1,000 Krais bogl akie yoba suglno moraiglkwa.

7 Ana bugla yugu 1,000 i dudinan, Satan ye kane pai moglmara ikra kide kodo, ede meda unabuka. 8 Ye ede meda udre, yoba yugobuno pere pere uglo koglo koglo moraiglkwa i, bakagl tenabuka. Yugobuno pere pere i, kagno Gok ya Magok we dinamga. Satan ye bakagl tedre, God yobama kuda bogl tenaiglmedi i makai sinabuka. Ye i makai sinan, ye pikaugl mere yegl, mere kide kaima moraiglkwa. 9 Ana na kan moglko, yoba i uglo koglo koglo mogl udre, God yobama pai meglmara mogl winabo digwa. God yobama pai meglmara i, dumo Jerusalem, siti ta God wakai kanugwa i pre diga. Ye God yobama kuda bogl tenamnedi mogl winabo digo, doga bauglo heven ibo yei, ede atne u, ye gagl tege erukwa. 10 Gagl tege eruko, God angelomo ta ere mogl, yagl kide, ye yoba bakagl togwa i, pia si doga kade, kobuglo de paugo, doga podo nigl nubun mere yegl domara i, edugwa. Agl bugla are ikra ye kamo kep yagl kibi bogl komono kana pi, doga de miurara i edenan, ye akie giugl aimadi kamin pre pai moraiglkwa.

11 Ana okuo na kaniga i, sia king kruo, podo kide ta yogo, yoba ta sia king i mina ame di moglko, na kaniga. Te, dumo makan ya kamun mitna ibo i, ye moglmara teke pidre, imim daglkwa. 12 Ana na ama kaniga i, yoba geglkwa, yoba kade ya yoba yoko meglkwa i pra, ye sia king yomara gumamugl adigl meglko, God buk tau, yoba mabunono buk i mina bogl atne edugwa i, pogl edugwa. Buk i poglsre, yoba geglkwa i mabuno siragl mere ta erikwa i kere kandre, ye erimere mere yegl kot ere togwa. Te, ye buk ta ama poglkwa i, yoba aimadi kamin kor moraiglkwa buk ikra ama poglkwa. 13 Ana igne i yoba ta geglko, ogono nagino mudi nigl atne yogwa i, adiglko, te yoba mudu ta goglsre, ede pi geglkwa yoba meglmara eigwa i, adiglko, God ye mudu mabuno siragl mere erimere yegl, kot ere tedre, 14 yoba geglkwa i ya te, ye dumo ta pai meglmara i, akie pia si doga kade ta nigl nubun mere yegl de pamara ikra atne edugwa. Yoba ta ede doga kade de pamara eigwa i, i namba 2 dai. 15 Yoba ira ta ye kagno kor moraiglkwa buk i mina atne ta paikrukwa i, God ye mudu pia si doga kade, nigl nubun mere yegl de pamara i, edugwa.