1 Ana angelo namba 5 ye biugelmo pu dugo, biugelmo be dugwa igne, angelo ta okna kugl kuri mere yegl heven ibo pai, yage atne makandigle sugwa i, kaniga. Ana angelo i moglko, God ere mogl, ye ki ta togwa. Ki i, makan mur ta yei ede atne ime ogwa i, yaurnabuka pre togwa. 2 Ana angelo i, ye ki idre, makan mur ikra yauro edugo, ede inge podo ede egli ugwa. Ede inge i, yugu dogwa inge erumere mere yegl, inge podo kide ede egli u kamun mitna ya ade sugwa i pra, si kegl dugo, mim erukwa. 3 Ana ede inge podo erumara suna i, taragl tau mogode mere yegl meglkwa, ede inge bogl akie ede egli udre, yage makandigle si, ake wai digo, na kaniga. Taragl i, God ye toki kide yoba simere mere yegl ye yoba giugl kaiglbi, giugl praiglmedi yobuglo togwa. 4 God ye yobuglo yegl tedre, ama ye di te, yegl dugwa, Ene kugl kan makandigle paigwa mo ede swara ta ere kide erekrio. Yoba ta na muno gane mabro mina padigl tekrika i keme ene ere kide ere tenaiglmiwe dugwa. 5 Ene yoba ta si goglkraiglkwa ba ene ba 5-pela mere yoba giugl kagl wan meglbi, yoba giugl podo praiglmiwe di, yegl dugwa. Toki kide ta yoba giugl kaiglko, ye giugl primere mere yegl, taragl mogode mere yegl meglkwa i yoba giugl kaiglbi, ye giugl yegl mere praiglkwa paugwa. 6 Igne i, yoba giugl podo yegl prisre, goramnba di pre, goraiglkwa konbo dokinaiglkwa ba ye goraiglkwa i, kuno ta erekrabuka. Ye kor mogl, giugl pre moraiglkwa.

7 Ana taragl mogode mere yegl weigo, kaniga i, ye hos ta ede kuda wagle enamnedi weimere mere yegl weigo, na kaniga. Taragl i bitno mina, king bitno gagl gol mina bekigwa mere yegl ta edigwa. Te, ye gumano drano yoba gumano drano kunere yegl keglkwa. 8 Te, ye bitno yugo abu bitno yugo olto sumere mere yegl olto sugo, ye signo laion signo keglmere yegl keglkwa. 9 Ye pitno mina taragl ta paugwa i, soldia ain pitno mina padiglmere yegl paugwa. Te, ye koyeno tama si, pur digwa igne, kwige sugwa. Hos mere kide muku di, karis gudu idre, ede kuda wagle eigo, kwige sumere mere yegl kwige sugwa. 10 Taragl mogode mere yegl meglkwa i, ye deno yagle i, toki kide skopion deno yagle keglmere mere yegl keglko, God ye ba 5-pela mere wan mogl, yoba sinaiglmedi yobuglo togwa i, ye deno yagle mina yoba sinaiglkwa. 11 Te, taragl mogode mere meglkwa i, ye kingno ta moglkwa. Kingno i, angelo kide ta mur mina atne ime mogl, ede meda ugwa ikra, moglkwa. Ye kagie ka Hibru mina Abadon we digo, ka Grik mina Apolion we dumga.*

12 Ana yubun podo suota unaiglkwa paugwa i, swara ta yegl mere udre, dudugo, na kaniga ba suo ama unabrika pai moglkwa.

13 Ana angelo namba 6 ye biugelmo pu dugo, be dugwa igne, yoba ka ta dugo, na prika. Yoba ta ka dugwa prika i, God gumamugl ede nuglo demene wakai erukwa garamnedi bogl ta gol mina kugl yeimara ikra, kau bre yogagle bogl puduno 4-pela pamara i, yoba ta magigl moglsre, ka dugwa. 14,15 Ye ka ta dugwa i, angelo namba 6 biugel ake moglkwa ikra di te, yegl dugwa, Ene pi angelo kide 4-pela ye nigl Yufretis womara kane pai meglkwa i, i meda edo dugwa. Ene ye i meda edin, ye yoba mudu makandigle meglkwa i, si buno di bage suota edidre, bage swara ta si gogl kodinaiglmiwe di, yegl dugwa. Angelo 4-pela kide i, God ye dumo i si kane sugo, ye kanana sugl mogl, bugla yugu, ba, ege, aua God padigl tomere i plau dinan, ye ede meda pi yoba ere kide ere tenaiglkwa. Ana angelo ta biugel ake moglkwa i, ye i meda edugo, 16 angelo kide ye ami tau bogl yoba sinamnedi i makai sigwa. Ami i, soldia hos au sigwa i, 200 milion mere yegl meglmiwe di, yoba yegl digo, na prika.

17,18 Ana taragl yegl mere na gumuglnamugl eruko, kan kodidre, ta ama kaniga i, ami hos au sigwa ikra ye hosno bogl ama meglko, kaniga. Ami meglkwa i, ain gogl ya morodugwa ya didugwa pitno mina padiglkwa. Te, hos i, ye bitno laion bitno keglmere mere yegl keglko, ye drano mina doga bauglo ya ede inge ya kobuglo de paugwa i, ede meda wigwa. Taragl yegl mere ye drano mina ede meda u, yubun suota i nogugl edidre, yoba mere kide si geglkwa. Yoba makandigle meglkwa i, si buno di bage suota edidre, bage swara ta mudu si geglkwa mere yegl paugwa. 19 Hos i, ye drano mina ya deno yagle mina ama yoba sibi, kuno erabuka. I siragl pre ye deno yagle i, toki mere yegl paugo, deno yagle puduno ime, toki bitno mere yegl paugo, deno yagle i mina ye yoba ere sidre, giugl teigwa.

20,21 Ana yubun yegl mere plau didre, dudugo, yoba makandigle kor mogl pai meglkwa i, ye nomano yake tekre, murubuglo kide ya taragl kwiano, yoba ye ogono mina bekigwa i kagno kade te pai meglkwa. Ye taragl gol ya silva ya bras mina bekidre, ede kobuglo mina bekigwa i, gumuglno mina taragl swara ta kankre, kinano mina taragl swara ta prikre, konbauna ama wan kankrikwa ba yoba taragl i kagno kade te pai moglsre, ama yoba pere si gogl pai meglkwa. Ye taragl yegl mere ere pai moglsre, kumugl abai ya yagl abu ta bogl kunogl nedre, kumo giai ersre, yoba pere taraglno kunogl neigwa i, kide kodo, nomano yake tekre, ere pai meglkwa.