1 Ana okuo na prika i, yoba mere kide heven ibo mogl, ka ta digwa mere yegl prika. Ye digwa i, yegl digwa, Nono Godno kagie kade tenamga paugwa. Ye kagie podo kaima paugo, yobuglomo podo paugo, ye swara nono ere yumiwe digwa. 2 Te, God mabuno du ya mabuno kaima keme ersre, yoba ka tage togwa pre kagie kade tenamga pamiwa. Konbauna abu ta mabuno kide mina ede okna pidre, yoba uglo koglo koglo meglkwa i, mabuno kide ersre, u kide enaiglmedi erukwa abu ikra we, ye ka tage tomiwa. Te, abu i, ye okna God niglmo kogonmo yoba si goglkwa i pre erme God ere ikne ede tomiwe digwa.

3 Ye ka yegl didre, aglke kor God kagie kade tenamniwe digwa. I siragl pre God dumo Babilon ere kide ere tedre, si gaglkwa, ede inge ede egli ugwa i, aimadi kamin u pai morabiwe digwa.

4 Digo, bitno yagl 24-pela meglkwa ikra ya taragl 4-pela meglkwa ikra yage kobragai padre, God sia king mina ame di moglkwa i kagie kade te, yegl digwa, Kaima. Nono God kagie kade tenamga pamiwe digwa.

5 Mokomugl i, yoba ta sia king yomara moglsre, yegl dugwa, Ene God niglmo kogonmo yoba moglsre, ye kuduglmo geglkwa yobamo meglkwa i, nono Godno kagie kade teo! dugwa. Ene yoba kade meglkwa mo yoba yoko meglkwa mo i pra, ye kagie kade teo! di, yegl dugwa.

6 Dugo, yoba mere kide ka ta digo, na prika. Ye ka digwa i, nigl podo ta mu dumere mere mo kamun gur podo dumere mere yegl, ka podo didre, yegl digwa, Nono Yaglno Kade God, ye yobuglomo pai kawa togwa moglkwa i, kagie kade tenamga paugwa. I siragl pre ye taragl kane kane bitno moglmiwe digwa. 7,8 Nono gun podo yedre, ye debie sinamga i, siragl pre sipsip nagigle ye abu inabuka igne i u kodugo, God ye ebie kugugl gagl kruo, wakai kaima, pe sugwa i edenabedi togo, abu i yene ere wakai ersre, sugl moglmiwe digwa. Ana kugugl gagl kruo i, God yobama mabuno du erikwa i, i nogugl edugwa.

9 Ka yegl di kodigo, angelo ta di nare, Ka ta dibo, boratne dugwa. Sipsip nagigle ye ebie bogl, bogl ibrika pre kaya mokna podo keigo, God ye yoba ta akie nenaiglmedi agle dugwa yobamo i, gun yenaiglmiwe di, yegl boglo dugwa. Didre, na ama di nare, Na ka diga magigl i, God kamo kaima yomiwe dugwa. 10 Angelo i yegl dugo, na ye kagie kade tenagledi kagle mina yage kobragai paiga ba ye di nare, Yegl ta erekro! dugwa. Na ene bogl akie God niglmo kogonmo yoba mugliwa. Te, ene agiglnma tau Jisas kamo ake gi di mogl, yoba pere di teigwa i, ye bogl ama akie nigl kogon yoba keme muniwa. God Murubuglomo yoba si kau si togo, ka kep ere digwa i, ye Jisas kamo swara dinaiglmedi pre erukwa. Yegl pre ene na kagna kade narekre, God swara kagie kade to dugwa.

11 Ana okuo na kaniga i, heven ibo ede u koglo koglo ogo, yagl ta hos kruo au si moglko, na kaniga. Yagl ta hos kruo au sugwa i, ye kagie suo ye teigwa. Kagie i, Ka Kaima Keme Dugwa te, Ka Dumara Adigl Moglkwa Yagle. Ye yoba ka tage tedre, kuda bogl togwa i, mabuno du keme ersre, ere togwa. 12 Ye gumuglo i, doga bauglo abuglage sumere mere yegl abuglage sugo, ye bre mina king bitno gagl tau mere edugwa. Te, ye ogo nagie mina kagie ta beglkwa paugwa ba ye kagie i, yoba mudu ta pre pogl sikrikwa. Yene swara pre pogl sugwa. 13 Ye gagl olto ta edugwa i, bormai mina was erikwa mere yegl edugwa, te ye kagie ta God Kamo we digwa.

14 Ana yagl i hos au si idre, ugo, na kandre, yoba heven ibo meglkwa i, ye ami mere yegl moglsre, hos kruo ama au si idre, ye mokomugl wigo, na kaniga. Yoba i, ye kugugl gagl kruo, pe kaima sugwa edigwa. 15 Ana yagl ta ye eimara ede okna ogwa ikra bainet nogwa ta dra mina ede meda ugwa. I siragl pre ye bainet i mina yoba yugobuno pere pere meglkwa i, si atne edenabuka. Ye si atne edidre, ain buglo muglbo ta ake mogl, ye suglno morabuka.* Te, God, ye yobuglomo pai kawa togwa moglkwa i dem podo kubrumara i mina yoba wain mogo egrimere mere yegl, yagl i God kudamo ikne yegl egre atne edenabuka. 16 Ye bikie mina atne kagie ta boglsre, te tebe kugugl gagl olto edumara i bikie mina ama kagie beglkwa paugwa. Ye kagie i, king mudu Kingno ya yoba kade mudu Yaglno Kade we di, yegl beglkwa.

17 Na taragl yegl mere kandre, ama angelo ta ade mina suna ibo adigl moglko, na kaniga. Angelo i ka podo didre, kua mudu ta kamun mitna pur di wan meglkwa i, yegl di togwa, Ene u makai sio! God ene mie podo nenaiglmedi ere wakai ere yei tomiwe dugwa. 18 King ya ami keptan ya kuda yoba, yobuglno podo paugwa i, ogono nagino nenaiglkwa. Te, hos ya yoba hos au sigwa ya yoba kane kane, yoba pere boino pai teigwa mo yoko meglkwa i, ya te, yoba kade meglkwa i, mudu geglbi, ene ye ogono nagino ne, mie podo nenaiglmiwe di, angelo i yegl dugwa.

19 Ana angelo i yegl dugo, agl bugla are ikra yogo, makandigle king meglkwa i yeigo, ye amino bogl makai sigo, na kaniga. Ye makai sigwa i, yagl ta hos kruo au si idre ugwa ikra ye amimo bogl, kuda bogl tenamnedi makai sigwa.

20 Ana na kan moglko, yagl ta ugwa i, udre, agl bugla are i ya te, ye kamo kep yagl kibi ta moglkwa ikra si akidre, ye kor miurko, suo akie pia si doga kade, kobuglo de paugo, doga podo nigl nubun mere yegl domara i, edugwa. Ana ka kep kibi erukwa yagl we diga i, agl bugla are gumamugl kimagl tau ersre, te yoba ta agl bugla are muno ganemo idre, ye kiamo kagie kade tenaiglmedi bakagl togwa yagle ikra pre diga. 21 Ana yagl ta hos au sidre, ugwa i, ye yoba suo i si doga mina edidre, bainet ta dra mina ede meda ugwa i mina ye ami mudu u makai sigwa i si goglko, kua mudu udre, yoba geglkwa i ogono nagino ne, dano podo erukwa.