1 Ana okuo na kaniga i, dumo makan ya kamun mitna ibo erme paigwa i, imim daiglko, God dumo makan kor ya kamun mitna ibo kor ere yogwa.* Te, dumo makan kor i, mudi nigl ama moglkrukwa. 2 Te, na ama kaniga, God sitimo, dumo Jerusalem kor i, God moglmara heven ibo yei, ede atne ugo, na kaniga. Abu ta ede yagl enabedi pre yoba ekin wakai gagl teimere mere yegl, God ye dumo Jerusalem kor i, ere wakai ere yei kodidre, ede atne edugwa. 3 Ede atne edugo, yoba ta sia king yomara mogl, ka podo ta dugo, na prika. Ye yegl dugwa, Ene kanio! God sel yugumo erme yoba meglmara suna yenan, God ye yoba meglmara suna kipai moran, yoba i ye yobama moraiglkwa. God ye meglmara suna moglsre, 4 kaino nuglo ta yage sinabuka i koko ede tenabuka. Te, yoba okuo ta goglkribi,* yoba kai ersre, kai giglage sigwa ya giugl prikwa i, okuo ama ta manabuka. I siragl pre taragl kane kane okna pamere yegl ta paikrabuka. Dudumiwe di, yegl dugwa.

5 Ana na taragl yegl mere kanigo, yoba ta sia king mina ame di moglkwa i, yegl dugwa, Ene kano! Na taragl mudu ere i kor ediwe dugwa. Yegl didre, ama yegl dugwa, Na ka diga i, kaima didre, ka dimara adigl moraglka pre ene na ka dimere yegl, bogl atne edo dugwa. 6 Ye yegl didre, ama na di nare, yegl dugwa, I dudumiwe dugwa. Na moglka i, na taragl mudu plau dinabedi ersre, te, na taragl mudu ama si dudiga moglka. Yoba ta nigl gorabuka i, na ye nigl ta nedre, kor aimadi morabuka nigl i, ogo beimara i kogl tebo, ye topo narekre, yoko kaima nenabiwe dugwa.

7 Ye yegl didre, ama yegl dugwa, Yoba ta kuda yobuglo erabuka i, na ye taragl kane kane tenagle diga i, tedre, ye Godmo moglbo, ye na wana mere yegl morabiwe dugwa. 8 Ba yoba tau ye kudugl goglsre, na pre mediglkre, yoba kide kaima ta meglkwa i ya te, yoba si goglsre, yagl abu ta bogl kunogl nedre, kumo giai erikwa yoba ya te, yoba god kibi kamage ere teigwa ya yoba ka kibi digwa mudu i, ye taragl ta inaiglkwa i, namba 2 dai ikra inaiglkwa. Namba 2 dai i, ye doga kade, kobuglo de paugo, doga podo nigl nubun mere yegl domara pi denaiglkwa i pre diwe dugwa.

9 Ana mokomugl i, angelo 7-pela, God yubun 7-pela okuo kaima yoba tenagledi plet mina si kau sidre, ye togo, ake meglkwa ikra, swarano ta udre, na ka ta di narukwa. Ye na di nare, yegl dugwa, Ene ede wo. Un, na sipsip nagigle abu ta yugwa i, obuno di tebo, kanatniwe dugwa. 10 Ye yegl dugo, God Murubuglomo na moglmara si kau si naruko, angelo i ye na ake i pi, muglo ta yei ede mitna kaima omara i edidre, God sitimo, dumo Jerusalem, God heven ibo moglmara yei, ede atne ugwa ikra obuno di narukwa. 11 Dumo Jerusalem i, God abuglagemo mina abuglage sugwa. Abuglage sugwa i, kobuglo ta mige podo boglkwa, kagie jaspa we digwa i abuglage sumere yegl sidre, glas pogl dumere mere yegl ama pogl dugwa.

12 Ana na dumo Jerusalem kaniga i, kobuglo togl podo ta ere winabo digo, togl dra 12-pela yogwa. Togl dra swara swarade i, Israel yoba yugobuno 12-pela meglmere i, kagno beglkwa paugwa. Te, togl dra swara swarade i, angelo swara swarade sugl kan meglkwa. 13 Togl dra i, ade umara suota yogo, ade beimara ama suota yogwa. Te, nigl bre suota yogo, nigl beye ama suota yogwa. 14 Te, kobuglo togl ere winabo dimara i, kobuglo 12-pela komono kana padiglsre, kobuglo tau tebe yei ede kuglo eigwa. Kobuglo 12-pela i mina, sipsip nagigle dedugwa yagl 12-pela meglmere i, kagno paugwa.

15 Ana angelo ta na ka di narukwa i, ye buglo sie ta gol mina bekigwa i ake moglkwa. Buglo sie i, ye dumo kade ikra ya togl dra ya te, kobuglo togl yogwa i, sie yenabuka pre yogwa. 16 Dumo kade i, uglo 4-pela yogo, sie olto ya sie prak kuno yogwa. Angelo i ye buglo sie mina sie yedre, kanugwa i, siemo olto ya siemo prak i, suo akie 2,200 kilomita yogwa. Te, dumo i ede mitna ogwa i, ama makanagle sie yomere yegl, kuno yogwa. 17 Te, angelo i ama kobuglo togl toiemo sie yedre, kanugwa i, 65 mita yogwa. Nono yoba sie yomnere mere, angelo i sie yegl mere akidre, dumo i sie yogwa.

18 Ana kobuglo togl i, ye kobuglo ta kagie jaspa we digwa i mina beglkwa. Te, taun i, gol pe kaima sugwa i mina keigwa yogwa. Gol i, glas mere yegl pogl dugwa. 19 Ana kobuglo 12-pela makandigle bogl padiglmara i, God ye wakai kaima yenabedi kobuglo kane kane mige podo boglkwa i idre, kobuglo i swara swarade ekin gagl togwa. Ana kobuglo 12-pela i, namba 1, kobuglo jaspa yogo, kobuglo namba 2 i kobuglo sapaia yogo, namba 3 i kobuglo aget yogo, namba 4 i kobuglo emeral yogo, 20 kobuglo namba 5 i sadonikis yogo, kobuglo namba 6 i konilian yogo, kobuglo namba 7 i krisolait yogo, kobuglo namba 8 i beril yogo, kobuglo namba 9 i topas yogo, kobuglo namba 10 i, krisopres yogo, kobuglo namba 11 i haiasin yogo, kobuglo namba 12 i, ametis we digwa i yogwa. 21 Kobuglo swara swarade makandigle bogl padiglkwa i, yegl mere paigo, togl dra 12-pela swara swarade yeimara i, bis mogo pel we digwa i swara ta dua ere padiglkwa. Te, taun suna konbauna yogwa i, gol mina erikwa. Gol i, wakai kaima yei, glas mere yegl pogl dugwa.

22 Ana na dumo Jerusalem kaniga i, God yugumo suna i ta yogo, kankrika. I siragl pre Yagl Kade God ye yobuglomo pai kawa togwa i, ya te sipsip nagigle yene taun suna miurka pre yugu ta yenabuka i ta paikrukwa. 23 Te, dumo i ama ade mo ba abuglage sinabrika i ta paikrukwa. I siragl pre God abuglagemo dumo i abuglage si togo, te sipsip nagigle i, dumo i ken lamo mere yegl moglkwa. 24 Yoba yugobuno pere pere moraiglkwa i, ye dumo Jerusalem abuglage sinabara wan meglbi, king makandigle moraiglkwa i, ye God ya sipsip nagigle kagno kade tenamnedi taragl wakai wakai i ede dumo Jerusalem suna unaiglkwa. 25 Ana dumo i, mim ege swara ta paikrabuka pre togl dra ege swara ta yogiglkraiglkwa. 26 Togl dra ege ege yauro edibi, yoko yenan, yoba yugobono pere pere uglo koglo koglo moraiglkwa i, ye God ya sipsip nagigle kagno kade tenamnedi ama taragl wakai wakai i ede suna unaiglkwa. 27 Te, taragl deglbi yogwa ya yoba ta mabuno ta God kide kanugwa erikwa ya ka kibi digwa i ege swara ta ede suna ukraiglkwa. Yoba ta kor aimadi moraiglkwa, kagno sipsip nagigle bukmo mina paugwa yobamo i keme ede suna unaiglkwa.