1 Ana Yagl Kade ka yegl mere na di narse, ama yegl di narukwa, Na ka erme di tenaglka i, ene bogl atne edidre, pre mediglkwa yoba dumo Efesus makai si meglkwa i, ye yagl ta dedigo, ugwa i, u plau dinan, ene ten, ye i pi Efesus yoba tenabiwe dugwa.

Ye yegl di kodidre, yegl dugwa, Na kugl kuri 7-pela ogona wo mina ake idre, lam gol 7-pela yeimara suna wan u ikne ikne eiga yagl moglka i, ene pre mediglkwa yoba dumo Efesus meglkwa i, yegl di teiwe dugwa. 2 Ene mabuno siragl mere erikwa i, na pre kan eriwe dugwa. Ene kogon podo ersre, ege kide yogwa igne ama adigl gigledi meglkwa i, na prika. Te, ene makai simara suna i, yoba kide udre, ka kane kane dinamnedi eriko, ene kanige erekrikwa i, na ama priwe dugwa. Yoba tau ka kibi didre, Jisas dedugwa yoba muniwe digwa i, ene ye doko kan, ka kibi dimiwedi kandre, 3 te na pre ene yubun igwa ba adigl gigledi mogl, oglka erekrikwa i, na pre kan eriwe dugwa.

4 Yagl Kade ye Efesus pre mediglkwa yoba pre ka yegl didre, ama yegl dugwa, Ene Efesus yoba mabuno yegl mere erikwa i, wakai erikwa. Ba ene mabuno ta erikwa aglau erukwa i, na di pogl tenagle dugwa. Ene okna deno muduno narimere yegl, erme narekrikwa pre na kide prika. 5 Yegl pre okna ene deno muduno narimere ikra poglo di prisre, nomano yake teo! Ene nomano yake tedre, mabuno okna erimere yegl eraiglkwa paugwa. Ta erekribi, na u ene ken lamno i eglke edenaglka. 6 Ba ene mabuno wakai ta erikwa i, na ama dibo, ene praiglkwa. Yoba tau Nikolas yobama we digwa, ye ka mabuno kibi digwa i, ye mabunono na kide kanimere mere yegl, ene ama kide kanigwa pre ene tau wakai erimiwe dugwa.

7 Yagl Kade yegl didre, ama yegl dugwa, Ene pre mediglkwa yoba ta bage bage makai si meglkwa i, God Murubuglomo ene ka di togwa i ta pre pogl sinamnedi pribi, ene wakai ere kinano gudu praiglkwa paugwa. Yoba ta kuda yobuglo erabuka i, ede swara ta God dumomo wakaile suna paugwa i, na ye mogomo uro nenabedi tenaluwe dugwa. Ede i, yoba mogomo uro nedre, aimadi kamin wakai moraiglkwa paugwa ikra pre na diwe di, Yagl Kade yegl di narukwa.

8 Ana Yagl Kade ka yegl mere di narse, ama yegl di narukwa, Na ka erme di tenaglka i, ene bogl atne edidre, pre mediglkwa yoba dumo Smerna makai si meglkwa i, ye yagl ta dedigo, ugwa i, u plau dinan, ene ten, ye i pi Smerna yoba tenabiwe dugwa.

Ye yegl di kodidre, ama yegl dugwa, Na taragl mudu plau dinabedi ersre, te taragl mudu si dudinaglka yagle moliwa. Te, na okna goglsre, adigl u kor eiga yagle moglka i, na ene yegl di teiwe dugwa, 9 Ene yubun tau mere idre, goduglme mere yegl meglkwa i, na pre kan eriwe dugwa. Na ene goduglme meglme diga i, mige moni ya ki ene meglmara yeikrukwa pre diga ba ene kiano mina taragl wakai wakai i kodidre, wakai meglkwa. Te, Juda yoba tau ene kenaglno si meglkwa i, na ama pre kan erika. Yoba i, ye Juda yoba meglkwa pre God yobama munedi prikwa ba ye God yobama ta moglkrikwa. Ye Satan yugobunomo mina atne moglsre, ka mabuno yugu ta makai sigwa i, Satan yugumo mina makai simiwe dugwa.

10 Yagl Kade yegl didre, ama yegl dugwa, Ana ene kuri kaima ta moglsre, yubun podo ta inaiglkwa ba ene kudugl goglkrio dugwa. Ene prio! Yagl Kide ene ta eribi kanagledi pre yoba tau nomane tenan, yoba i ene tau si kane sibi, ene 10-pela de mere yubun podo inaiglkwa. Taragl yegl mere plau dinabuka ba ene na kana duglo bogl pai molo. Te, ene na pre goraiglkwa mere yegl ta panan, ama na kana kide kodokrio! Ene yegl eribi, na topo wakai ta ene tenaglka. Topo i, king bitno gagl mere yegl yogo, kagie kor kaima meglkwa bitno gagl we dimiwe di, yegl dugwa.

11 Yagl Kade yegl didre, ama yegl dugwa, Ene pre mediglkwa yoba ta bage bage makai si meglkwa i, God Murubuglomo ene ka di togwa i ta pre pogl sinamnedi pribi, ene wakai ere kinano gudu praiglkwa paugwa. Yoba ta kuda yobuglo erabuka i, namba 2 dai ikra ye kuri kaima ta ere kide ere tekrabuka ba ye wakai ka kaima morabuka pre diwe di, Yagl Kade yegl dugwa.

12 Ana Yagl Kade ka yegl mere di narse, ama yegl di narukwa, Na ka erme di tenaglka i, ene bogl atne edidre, pre mediglkwa yoba dumo Pergamum makai si meglkwa i, ye yagl ta dedigo, ugwa i, u plau dinan, ene ten, ye i pi Pergamum yoba tenabiwe dugwa.

Ye yegl di kodidre, yegl dugwa, Na we, bainet ta koglo koglo nogwa na drana mina ede meda ugo, moglka i, na ene yegl di teiwe dugwa, 13 Ene taun Pergamum meglmara i, Satan dumo i ye siamo king yogo, dumo i kide yogwa ba ene dumo kide moglsre, na duglo bogl meglkwa i, na pre kan eriwe dugwa. Te, yagl ta kagie Antipas we digwa, na kana kuno ere yoba di tedre, na kana kide kodokrukwa pre yoba Satan taunmo meglkwa i ere mogl, ye si geglkwa. Igne i, ene ama na kana kide kodokre, Jisas pre meduniwe di, nogugl di pai meglkwa i, na priwe, dugwa.

14 Yagl Kade ye Pergamum yoba pre ka yegl mere di narsre, ama yegl dugwa, Ene yegl erikwa i, wakai erikwa ba ene aglau tau erikwa i, na ama di pogl tenagle dugwa. Ene pre mediglkwa yoba makai simara suna i, yoba tau ka mabuno kibi digo, ene kanige erikwa. Yoba ka mabuno kibi digwa i, ye yagl ta kagie Balam, yoba okna ibo ka beke tomere mere yegl beke teigwa. Yagl Balam i ye okna king ta kagie Balak we digwa i Israel yoba tadaglme mina yage sinaiglmedi ero dugo, Balak ye Israel yoba mie tau god kibi kagno mina teigwa i nedre, yagl abu ta bogl kunogl nenaiglmedi eruko, Israel yoba kaima yage sigwa. 15 Ana yoba tau ene meglmara ka mabuno kibi dime diga i, yoba kagno Nikolas yobama we digwa i pre diga. Ye ene meglmara suna moglsre, mabuno kide Balam erumere mere yegl, yoba eraiglmedi beke teigwa. 16 Yegl pre ene nomano yake teo! Ene nomano yake tekribi, na tabre u, bainet ta ikne ikne nogwa na drana mina ede meda ugwa i mina yoba i kuda bogl tenaluwe di, yegl dugwa.

17 Yagl Kade yegl didre, ama yegl dugwa, Ene pre mediglkwa yoba ta bage bage makai si meglkwa i, God Murubuglomo ene ka di togwa i ta pre pogl sinamnedi pribi, ene wakai ere kinano gudu praiglkwa paugwa. Yoba ta kuda yobuglo eran, na bret ta mana we digwa ikra, teke yogwa i tebo, nenabuka. Te, na yoba i ama kagie kor ta kobuglo kruo mina bogl atne edidre, ye tenaglka. Ye kagie kor i, yoba tau ta prikraiglkwa ba ye yene prabiwe di, Yagl Kade yegl dugwa.

18 Ana Yagl Kade ka yegl mere di narse, ama yegl di narukwa, Na ka erme di tenaglka i, ene bogl atne edidre, pre mediglkwa yoba dumo Taiataira makai si meglkwa i, ye yagl ta dedigo, ugwa i, u plau dinan, ene ten, ye i pi Taiataira yoba tenabiwe dugwa.

Ye yegl di kodidre, yegl dugwa, Na gumuglna doga bauglo abuglage sumere mere yegl abuglage sugo, katna ain bras ake wigo dedigwa pogl di yomere mere yegl pogl dugo, na God Wam moglka i, ene yegl di teiwe dugwa, 19 Ene mabuno siragl mere erikwa i, na pre kan eriwe dugwa. Ene deno muduno ikne ikne tedre, na pre medigl pai meglkwa i, na prika. Te, ene yoba pere ake ple di tenamnedi kogon podo ersre, ege kide yogwa igne adigl gigledi meglkwa i, na ama prika. Te, ene okna na kogona kunabe erikwa ba erme tau podo erikwa i, na ama pre kan eriwe di, yegl dugwa.

20 Yagl Kade ye Taiataira yoba pre ka yegl mere di narsre, ama yegl dugwa, Ene yegl erikwa i, wakai erikwa ba ene aglau ta erikwa i, na ama di poragle dugwa. Abu Jesebel,* ye ka kep abu ta mole dugwa i, ene meglmara suna moglko, ene kanige erikwa. Abu i ye na niglna kogona yoba bakagl te, ye yagl abu ta bogl kunogl nedre, mie tau yoba god kibi kagno mina teigwa i, i nenaiglmedi obuno di togwa. 21 Na abu i nomane yake tedre, mabunomo kide i, kide kodinabedi sugl moglka ba ye nomanemo gigle dugwa. 22 Yegl pre ene prio! Na kide ta dedibo, abu i sinabuka. Te, yoba ta ye ka beke togwa i prisre, yagl abu ta bogl kunogl neigwa i ama nomano yake tekre, mabunono kide i, ere pai meglbi, ye ama yubun podo inaiglkwa. 23 Yoba i, ye abu Jesebel gagiglma mere yegl meglkwa i, yubun podo idre, nomano yake tekre pai meglbi, na ye si goraglka. Si goglbo, pre mediglkwa yoba ta bage bage makai si moraiglmara i, yoba ka i dibi prisre, pre pogl sinaiglkwa i, Yagl Kade kan yoba mudu nomano ya deno muduno wagle edumiwedi, pre pogl sinaiglkwa. Te, na ene swara swarade mabuno siragl mere erimere mere kuno ere te ikne edinaluwe di, Yagl Kade yegl dugwa.

24 Ene dumo Taiataira meglmara i, pre mediglkwa yoba tau ka mabuno kibi i duglo boglsre, ka i, ka atne padre, mem podo pame digwa ba ka i, Satan kamo kaima yogwa. Ba ene tau ka mabuno i ta duglo boglkrikwa i, ama ka ta di tenaglka. 25 Ene na kana prikwa i ake gi di mogl ebi, na okuo ede ikne unaglka. 26 Yoba ta kuda yobuglo ersre, na mabuno ta erio dimere mere duglo bogl pai mogl, gorabuka i, na ye yugobuno pere pere meglkwa i suglno morabedi tenaglka. 27 Na Nina kagna kade narsre, yugobuno pere pere suglno moratnedi narumere yegl, na yoba ta kuda yobuglo erabuka yobamo i ama tebo, ye ama yegl erabuka. Ye ain kuba ta akidre, yoba plet ya kap ki si deduagle erimere yegl, yobuglo ere, ye suglno morabuka.* 28 Te, na yoba i ama kugl kuri ta tagna mogl abuglage si pai moglkwa i, tenaluwe di, Yagl Kade yegl dugwa.

29 Yagl Kade yegl didre, ama yegl dugwa, Ene pre mediglkwa yoba ta bage bage meglkwa i, God Murubuglomo ene ka di togwa i ta pre pogl sinamnedi pribi, ene wakai ere kinano gudu praiglkwa paugwa.