1 Ana na taragl yegl mere kandre, ta ama kaniga i, sipsip nagigle ye Saion muglo ibo adigl moglko, yoba 144,000 bogl akie adigl meglkwa. Yoba i, sipsip nagigle ya, ye nem kagno akie mabro mina bogl padiglko, na kaniga.

2 Kan moglsre, prika i, heven ibo gita mere yegl ta sigo, be dugo, na prika. Be dugwa i, nigl kade mu podo dumere yegl didre, kamun gur podo dumere mere yegl, ama be dugwa. 3 Ye taragl gita mere yegl yogwa i sidre, God siamo king yomara ya taragl 4-pela ikra meglmara ya te, bitno yagl 24-pela meglmara gumanomugl giglage kor ta digwa. Ye giglage kor ta digwa i, yoba ta beke inaiglkwa kuno erekrukwa ba makandigle yoba meglmara suna i, yoba 144,000 sipsip nagigle ye topo si ikne edugwa yobamo i keme beke inaiglkwa paugwa.

4 Yagl keme 144,000 meglkwa i, ye abu abai bogl mabuno kide ta erekre, mabuno du keme erikwa. Ye sipsip nagigle aglo mere omara i, sika sigwa yoba meglkwa. Te, God ye topo si ikne edugwa i, ka ebrie mere yoba kaya mokna tau komono kana dogwa i, i pere ede, i pi God teigo, God taraglmo yomere mere yegl, yoba i ye mogl pere edidre, God ya sipsip nagigle yobama meglkwa. 5 Ye ka digwa i, ka kibi dikre, mabuno erikwa i, yoba ye kenaglno sinaiglkwa mere yegl ta erekrikwa. Angelo suota ka di nogugl edigwa

6 Ana na taragl yegl mere kan kodidre, ta ama kaniga i, angelo pere ta kamun mitna ibo wogo, kaniga. Angelo i, ye God kamo wakai, aimadi kamun yenabuka i, makandigle yoba mudu di tenagledi idre, ede ogwa. Yoba kantri pere pere moglsre, yugobuno pere pere mogl, kano pere pere paugwa meglkwa i, mudu di tenagledi pidre, 7 ka podo yegl dugwa, Ene God kuduglmo goglsre, ye debie sio! I siragl pre ye yoba ka tage tenabuka igne i u kodumiwe dugwa. Ye swara kamun mitna ibo ya dumo makan ere yedre, mudi nigl ya nigl kor ogo beigwa i, ere yogwa pre ene ye swara kagie kade teo! di, angelo i yegl dugwa.

8 Ana angelo i yegl di kodugo, angelo ta ama ye mokomugl udre, yegl dugwa, Dumo kade Babilon i, u kide pi kodumiwe* dugwa. Yoba ta ere mogl, yoba ta spak erabedi nigl wain teimere mere yegl, Babilon yoba meglkwa i, ye mabuno kide yoba uglo koglo koglo yugobuno pere pere meglkwa i beke teigwa yobamo meglmiwa. Ye yoba kumugl abai ya yagl abu ta bogl mabuno kide eraiglmedi beke teimiwa. Beke teigwa ba erme dumo i, u kide pi kodumiwe di, angelo namba 2 i, yegl dugwa.

9 Ana angelo suo i u ka yegl di kodibriko, angelo namba 3 ye moknomugl udre, ka podo yegl dugwa, Yoba ta agl bugla are ikra ye kiamo kagie kade tenabo mo, ye muno ganemo mabuglo mina mo ogo mina inabuka i, 10 God ye dem podo kubrabuka i, inabiwe dugwa. Inabuka i, nigl wain, nigl kor bogl suru mix erekriko, gigle dumere mere yegl, God yoba mitno goglkre, ka gigledi tage tenan, inaiglkwa.

Sipsip nagigle yene angeloma bogl kan meglbi, yoba i doga ya kobuglo de pamara i mina doga de, giugl podo praiglkwa. 11 Yoba ta agl bugla are i mo ye kiamo i kagie kade tedre, ye kagie muno gane mere yegl ta inaiglkwa i, ye doga dedre, giugl praiglkwa i, ege ege etne ya eduer bu yeikran, pre pai meglbi, ede inge aimadi kamin ede egli enabiwe di, angelo i yegl dugwa. 12 Taragl yegl okuo plau dinabuka pre God yobama ye yegl erabedi sugl moraiglkwa paugwa. God yobama i, ye God kamo duglo boglsre, Jisas pre medigl pai meglkwa yoba i pre diga.

13 Ana na taragl yegl mere kan kodigo, yoba ta heven ibo moglsre, ka ta dugo, na prika. Ye ka dugwa i, Ene yegl boglo! dugwa. Erme ya okuo pra, yoba ta Yagl Kade pre mediglsre, gorabuka i, ye gun yenabiwe di, yegl boglo dugwa. Yegl dugo, God Murubuglomo yegl dugwa, Owo, yoba i kogon podo ersre, giugl prikwa i dudinan, ye wakan moraiglkwa paugwa. I siragl pre ye taragl ta idre, ede God moglmara unaiglkwa i, ye kogon wakai siragl mere erikwa i, idre, ede unaigkwa mere yegl pamiwe di, yegl dugwa.

14 Ana okuo na kaniga i, kamun kua kruo ta paugo, yoba ta Yoba Wam mere yegl moglmedi kaniga ikra, ye kamun kua tebe i, ame di moglko, na kaniga. Ye king bre gagl ta gol mina bekigwa i, bre mina edidre, di kuba nogwa ta ogo mina ake moglkwa. 15 Ye kamun kua tebe ame di moglko, angelo kor ta God yugumo yomara ede meda udre, ye yagl ta kamun kua tebe ame di moglkwa i ka podo di te, yegl dugwa, Kugl makandigle paigwa i, mogono de kodugwa pre erme ene di kubanen mina sinatnga ege yomiwe di, yegl dugwa. 16 Angelo i yegl dugo, yoba ta kamun kua tebe ame di moglkwa i, magididre, kugl mogo makandigle paugwa i, di kuba mina si yugwa.

17 Taragl yegl plau dugo, angelo pere ta ama God yugumo, heven ibo yomara i mogl, di kuba nogwa ta akidre, ede meda ugwa. 18 Angelo i ede meda ugo, angelo pere ta bogl kiglmara doga sugl moglkwa i, ye bogl kiglmara kide kodo, ede meda u angelo ta di kuba nogwa ake moglkwa i, yegl di togwa, Wain mogo makandigle paugwa i, bogl yogwa pre ene di kubanen nogwa i mina si inatniwe dugwa. 19 Yegl dugwa pre angelo ta di kuba ake moglkwa i magididre, ede wain mogo makandigle kogl paigwa i di kuba mina si idre, pia si wain mogo egrimara dumo kade i edugwa. Wain mogo egrimara dumo i, God ye dem kubro tenabuka dumo mere yegl yogwa. 20 Dumo i, taun kade yomara meda kra yogwa. Angelo i wain mogo pia si suna edugo, ye wain mogo i egrikwa. Egriko, bormai mere kide ede meda pi, nigl mere yegl ede wogwa. Bormai i, ake wai di ede eglke ogwa i, 300 kilomita mere yegl ogwa. Ana ede egli ugwa, hos ta adigl moran, u dra mina unabere mere yegl sige yogwa.