1 Ana angelo 7-pela ye plet ake meglkwa ikra swarano ta na moglmara udre, Ene ede wo! dugwa. Ene un, na taragl ta ene obuno di tenaglka. Konbauna abu ta mabuno kide mina ede okna pidre, nigl bage bage meglmara tebe ame di moglkwa i, God ye siragl mere ka tage tenabuka i, na ene obuno di tebo, kanatniwe dugwa. 2 King makandigle meglkwa i, ye abu i bogl mabuno kide eriko, te, makandigle yoba ama ye bogl mabuno kide ersre, du erikwa. Yoba nigl wain nedre, spak erimere mere yegl, ye du erimiwe dugwa.

3 Dugo, God Murubuglomo na moglmara si kau si naruko, angelo i na auro i pi dumo wau yomara edugo, na abu ta moglko, kaniga. Abu i, ye agl bugla are ta, nagie gogl koglkwa, bolamugl au si moglkwa. Agl bugla are i nagie mina, kagie kane kane bogl padiglkwa paugwa. Ye kagie kane kane i, mem paugwa, God ka kide di teigwa mere yegl paugwa. Te, ye bre 7-pela koglsre, bre yogagle 10-pela ama koglkwa. 4 Abu i, kugugl gagl edumara i, kala gogl kaima ya gogl mere yegl yogwa edugwa. Te, taragl gol mina bekigwa ya kobuglo tau mige podo boglkwa i edidre, bis nugu tau mige podo boglkwa i ama togugwa. Te, ye ogo mina kap ta gol mina bekigwa i, ake moglkwa. Kap i mina, ye mabuno kide ya mabuno deglbi kane kane erukwa i, atne kau sugwa mere yegl paugwa. 5 Te, ye mabuglo mina kagie ta beglkwa paugwa. Kagie i, mem atne kaima paugwa. Ye kagie beglkwa i, yegl beglkwa, Dumo Kade Babilon, ye makandigle yoba ta konbauna abu meglkwa i mo mabuno kide, deglbi yogwa erikwa i, mano moglmiwe di, yegl beglkwa. 6 Te, na kaniga i, abu i ye God yobama meglkwa i ya yoba Jisas kamo di nogugl edigwa i, si goglsre, bormaino mina spak erukwa mere yegl pamedi kaniga.

Na abu i kandre, nagna podo koglko, 7 angelo i na di pre, Ene siragl pre nagn koglne? dugwa. Abu ta agl bugla are au sugwa i ya te, agl bugla ye bre 7-pela koglsre, bre yogagle 10-pela koglko, ene kanga i, mabunomo atne paugwa ba na ene di tebo, pratniwe dugwa. 8 Ene agl bugla ta kanga i, okna moglsre, erme moglkrukwa ba ye kuri ta mogl, makan mur ta ede atne kaima omara ime mogl, ede egli unabuka. Ede egli udre, okuo ye u kide enabara enabiwe dugwa. Ye ede egli unan, makandigle yoba ye kandre, nagino koraiglkwa. Makandigle yoba i, God ye okna ibo, dumo makan ere yeikrukwa igne yoba ta kagno ye aimadi kor moraiglkwa bukmo mina bogl atne edekrukwa meglkwa i pre diga. Yoba i nagino koraiglkwa i, siragl pre agl bugla i okna moglkwa, erme moglkrukwa ba okuo aglke kor u plau dinabiwe di, yegl dugwa.

9 Angelo i yegl didre, ama yegl dugwa, Na ka erme dinaglka i, yoba ta nomanemo wakai panan, ye pre pogl sinabuka kuno erabiwe dugwa. Agl bugla are bre 7-pela koglkwa i, muglo meglbi 7-pela i nogugl edugwa. Te, abu ikra, ye muglo meglbi 7-pela i mina ame di moglkwa. 10 Bre 7-pela i, mem suo paugwa. Ta, muglo meglbi 7-pela i nogugl edigwa. Te, ta, king 7-pela ama i nogugl edugwa. King 7-pela i, 5-pela geglko, swara ta erme moglkwa. Te, swara ta ukrukwa ba ye unan, ye ege sugunagle keme morabuka paugwa. 11 Te, agl bugla ta okna moglsre, erme moglkrukwa i, ye king namba 8 ta morabuka. Ye 7-pela meglmara i mina udre, okuo ede pi ye u kide enabara enabiwe di, angelo i yegl dugwa.

12 Ana angelo i ka yegl di kodidre, ama yegl dugwa, Agl bugla are bre yogagle 10-pela koglko, kanga i, king 10-pela i nogugl edigwa. King i, erme king moglkre, dumo ta sugl moglkrikwa ba ye okuo agl bugla are i bogl kagno kade idre, ege sugunagle wan aua mere yegl king moraiglkwa. 13 King 10-pela i ye nomano swara yedre, yobuglno ya kagno kade i swara ede, agl bugla i tenaiglkwa. 14 Te, king 10-pela i ama sipsip nagigle kuda bogl tenaiglkwa ba sipsip nagigle ye yobuglo ere tenabuka. I siragl pre sipsip nagigle i, ye yoba kade makandigle meglkwa i Yaglno Kade moglsre, king makandigle meglkwa i Kingno moglkwa. Te, sipsip nagigle yoba ta agle didre, kere yugo, kamo mina adigl gigledi meglkwa i, ye bogl akie moraiglmiwe dugwa.

15 Angelo i yegl didre, ama yegl dugwa, Konbauna abu ta kanga ikra ye nigl bage bage meglmara i, tebe ame di moglkwa. Nigl i, makandigle yoba mere kide, kantri pere pere moglsre, ka pere pere digwa i, i nogugl edugwa. 16 Agla bugla are i ya bre yogagle 10-pela kanga i, ye ere mogl, konbauna abu i kide pre tedre, ye sidre, bona ganamo mudu ibi, ye yokoko morabuka. Yokoko moran, ye ogo nagie nedre, si doga mina edibi, de tege erabuka. 17 King 10-pela ye konbauna abu ere kide ere tenaiglkwa i, God ye eraiglmedi prukwa pre ye mabuno yegl ere tenaiglkwa. God ye yegl eraiglmedi prukwa pre nomane tenan, ye nomano swara yedre, dumo sugl meglkwa i, mudu agl bugla are ikra sugl morabedi tenaiglkwa. Ye dumono agl bugla are i tedre, ye moglmara atne mogl ebi, God kamo mudu plau di kodinabuka. 18 Te, konbauna abu ta kanga i, ye ka ebrie mere siti ta i nogugl edugwa. Siti i, siti kade ta yei mitna ede, siti tau king makandigle meglkwa i, mudu egre atne edugwa, i nogugl edumiwe di, angelo i yegl dugwa.