1 Ana okuo, angelo i ere mogl, nigl ta yoba nedre, kor aimadi moraiglkwa ikra obuno di naruko, kaniga. Nigl i, God ya sipsip nagigle sia kingno yomara ogo bei ede meda udre, glas mere yegl pogl dugwa. 2 Nigl i, dumo Jerusalem konbaunamo yomara suna ede ime pi, ede ta paimara i koglo koglo ede, suna ede ogwa. Ede i, yoba mogomo uro nebi, kor aimadi moraiglkwa. Bugla yugu swara mina, ba yomere yomere, ege 12-pela ede i mogo koglkwa. Te, ede i yaudomo, yoba yugobuno pere pere meglkwa i, idre, wakai kaima moraiglkwa pre yogwa.

3 Ana God okna ibo dumo makan ere kide erumere mere yegl, dumo i mina ta erekrabuka, dudunabuka. Te, dumo Jerusalem suna i, God ya sipsip nagigle ye sia kingno suna i yenan, God niglmo kogonmo yoba ye niglmo kogonmo ersre, 4 God guma dra kanaiglkwa. Te, God kagie ye mabro mina bogl padran, panabuka. 5 Igne i, eduer ta yeikran, ermine keme yenabuka. Te, ken lam mo ade ta abuglage sinabuka i, ta paikrabuka. I siragl pre Yagl Kade God yene abuglage si tenabuka. Te, ye niglmo kogonmo yoba i, God bogl aimadi kamin taragl mudu ere yogwa i, bitno mogl, sugl moraiglkwa.

6 Ana angelo i ere mogl, na ka ta di nare, yegl dugwa, Ene ka mudu pitnga i, ka kaima paugwa pre kaima plau dinabuka. Te, siragl ta tabre plau dinabuka paugwa i, Yagl Kade ye niglmo kogonmo yoba pre pogl sinaiglmedi prisre, ye angelomo ta dedugo, ye u obuno di togwa. Yagl Kade i, ye ka kep yoba i Godno moglsre, kiano sugl moglmiwe dugwa.

7 Angelo i yegl didre, ama Jisas yegl dumiwe dugwa, Ene kano! Na tabre unaglka. God kamo ene kep ere, buk mina bogl atne edinatnga magigl i, yoba ta wakai ere prabuka yobamo i, ye gun yenabiwe di, yegl dumiwe dugwa.

8 Na Jon moglka i, na ka mudu i prisre, taragl mudu i kaniga. Na pre kan ere kodidre, angelo ta taragl kane kane obuno di narukwa i, kagie kade tenagledi yage kagle mina kobragai paiga 9 ba angelo i mane didre, Yegl ta erekro! dugwa. Na ene bogl akie God niglmo kogonmo yoba muglka. Te, ene agiglnma tau, ka kep yoba meglkwa i yebi, ka buk mina magigl bogl motnga i, yoba ira ta wakai ere praiglkwa yobamo i nono God niglmo kogonmo yoba akie munga. Yegl pre ene God swara kagie kade to dugwa.

10 Ana angelo i ka yegl di kodidre, ama yegl di narukwa, God kamo buk mina kep ere boratnga magigl i, teke padiglkro! dugwa. I siragl pre taragl kane kane i, plau dinabuka magigl erumiwe dugwa. 11 Yoba ta mabuno kide ya mabuno deglbi yogwa ta erikwa i, ye ere moraiglkwa. Te, yoba ta mabuno wakai ya mabuno du ta ere meglkwa i, ye ere moraiglkwa pamiwe dugwa.

12 Ana mokomugl i, Jisas yegl dugwa, Kanio! Na tabre unaglka. Te, na unaglka igne, na topo wakai ake idre, u yoba swara swarade mabuno wakai ta eraiglmere i, topo tenaluwe dugwa. 13 Na moglka i, na taragl mudu plau dinabedi ersre, te, na taragl mudu ama si dudinaglka moglka. Na okna ibo, taragl kane kane paikrukwa igne moglka. Te, okuo ime ama aimadi kamin moraluwe di, yegl dugwa.

14 Jisas yegl didre, ama yegl dugwa, Yoba ta kuguglno gaglno nigl edigwa i, gun yenaiglmiwe dugwa. Ede ta yoba mogomo uro nedre, kor moraiglkwa ikra, God ye uro nenaiglmedi tedre, ye dumo kade ikra togl dra yenabara ede suna unaiglmedi pra we dinabiwe dugwa. 15 Ba yoba ta agl mere yegl meglkwa i, meda moraiglmiwe dugwa. Te, yoba ta kumo giai erikwa mo yagl abu ta bogl kunogl neigwa mo yoba pere si geglkwa mo god kibi kamage ere teigwa i ya te, yoba mudu ta ka kibi mabuno wakai pre, ka kibi digwa i, ye ama meda moraiglmiwe dugwa.

16 Jisas yegl didre, ama yegl dugwa, Na Jisas moglka i, na angelona ta ka mudu pitnere mere yegl di nogugl edenan, God yobama bage bage makai sigwa i praiglmedi pre dedigo, ugwa. Te, ka kep yoba okna digwa, ede mabuno mina dre kor erumere mere yegl, Devit gawamo ta unabiwe digwa i, na moglka. Te, kugl kuri ta tagna mogl abuglage si pai moglmere yegl, na ama yegl moluwe di, Jisas yegl dugwa.

17 God Murubuglomo ya te, yoba ta ye Krais ebie mere yegl meglkwa i, ye Ede wo! digwa. Te, yoba ta buk magigl yogwa i prabuka yobamo i, ye ama Ede wo! dinabuka paugwa. Yoba ta nigl goglkwa i, unabuka paugwa. Yoba ta nigl nenagledi prabuka i, ye nigl ta nedre, kor aimadi morabuka i, topo tekre, yoko kaima nenabuka paugwa.

18 Na God kamo kep ere boglka magigl i, ene yoba ta praiglkwa i, na ene yegl di teiga, yoba ta ka tau yene prumere i suna edenan, God ye yubun tau tenabuka. Buk i mina yubun tau unabe dumere yegl, yoba i morabara God yubun yegl tenabuka pre diga. 19 Te, yoba ta ka magigl paugwa i tau i eglke edenan, God ye buk i mina taragl wakai wakai pre dugwa i, ye morabara i eglke edenabuka. Na diga i, ede ta yoba mogomo uro nebi, kor moraiglkwa ikra ye mogomo uro ne dinabedi ersre, God dumomo, siti kor ta yenabara suna i, ama taragl wakai wakai i tenabuka igne, ye ta ikrabuka pre diga.

20 Ana yoba ta ka i di narukwa yobamo i yegl dugwa, Na tabre unaluwe dugwa. I pra. Yagl Kade Jisas, ene ede wo.

21 Nono Yaglno Kade Jisas ene yoko kaima ere wakai ere te pai morabedi prika. Kaima.