Língua

21 ज़िभरे कैबू मां मौत ते ज़िन्दगी दूईये भोतिन,

ते ज़ै तैसेरो इस्तेमाल केरनो ज़ानते तै तैसेरो फल भोगेलो।

2 अस बड़े बार गेलती केरतम, ज़ै ज़ोने मां गलती न केरे, तैए सिद्ध मैन्हुए, ते सारे जानी कैबू केरते।

3 ज़ैखन अस अपने कैबू मां केरनेरे लेई घोड़ां केरे ऐशी मां लगाम लातम, त अस तैन केरि सारी जानी भी फेरी सखम। 4 हेरा, पैनेरां ज़िहाज़ां भी, अगर बडां भोतन, ते तेज़ हवाई सेइं च़लां गातन, फिरी भी एक्‍की निकड़ी पतवारी सेइं च़लानेबालो अपने मेर्ज़ी सेइं फिराते। 5 तेन्च़रे ज़िभ भी, अगर अक निकड़ो अंगे, ते बेड़ि-बेड़ि घमण्डेरी गल्‍लां केरती, तक्‍का, थोड़ी ज़ेरि अग्गी सेइं केत्रे बड़े-बड़े जंगले मां अग लाई गातीए। 6 ज़िभ भी अक अग्गरी ज़ेरिए, ज़िभ इश्शे जानी मां अक बुरो हिस्सोए, ते सैरी जानी पुड़ कलंक लातीए, ते ज़िन्दगरी दुनियाई मां अग लातीए, ते नरकेरी अग्गी सेइं बलती रहतीए।

7 हर किसमां केरे जंगली जानबर, च़ुड़ोलू, ते पेटेरे भारे बाले जीप जन्तू ते दरियारे जानबर त इन्सानेरे हथ्थे एज्जी बटतन ते एवरे भी आन। 8 पन ज़िभी मैन्हन मरां कोई भी कैबू मां न केरि सके, तै अक एरी बलाए ज़ै कधे रुके न, तै सप्पेरे ज़ेहरेरी ज़ेरिए नुकसान देनेबालीए।

9 इस्से ज़िभी सेइं अस प्रभु ते बाजी परमेशरेरी तारीफ़ केरतम, ते इस्से सेइं मैन्हु, ज़ै परमेशरेरे रूपे मां बनेवरोए श्राप देतम। 10 एक्‍की ऐशी सेइं शुक्र ते श्राप निसतन। हे मेरे ढ्लाव ते बेइनव एरू न लोड़े भोवरू। 11 कुन एक्‍की नागे मरां मिट्ठू ते लूनू पानी निस्सी बटते? 12 हे मेरे ढ्लाव ते बेइनव, कुन फैगेरो बुट्टे पुड़ ज़ैतून, या दाछ़ी पुड़ फैगू लेगि बटतन? तेन्च़रे लूनो नाग भी मिट्ठू पानी न निस्सी बटे।

15 सबर केरने सेइं न्याय केरनेबालो मनाव गाते,

ते नर्म शब्द हेड्डन भी ट्लोड़ते।

18 एरे लोक भी आन ज़ैन केरू बगैर सोचे सेमझ़तां ज़ोनू तलवारारू ज़ेरू चुभते,

पन अक्लमन्देरे ज़ोने सेइं लोक बेझ़ोतन।

19 ऐशी मरां निसोरी सच़्च़ाई हमेशा बनोरी राहेली,

पन ऐशी मरां निस्सोरू झूठ एक्‍की पलेरू भोते।

19 ज़ैड़ी बेड़ि गल्‍लां भोतिन, तैड़ी पाप भी भोते,

पन ज़ै अपनु आशी बन्द रखते तै अक्ली सेइं कम केरते।

28 बेवकूफ भी ज़ैखन च़ुप रहते, तैखन अक्लमन्द गनो गाते;

ते ज़ै अपनु आशी बन्द रखते तै समझ़ी बालो गनो गाते।

26 अगर कोई अपनो आप भक्त समझ़े, ते अपनि ज़िभी कैबू मां न रख्खे, तै अपने आपे धोखो देते, ते तैसेरी भक्ति बेफैइदी आहे।

अक्ल ते मैफरे लेई प्राथना

1 मीं अपने आपे सेइं ज़ोवं, "अवं रोड़ी चाल च़लेलो,

ताके मेरी ज़िभी सेइं पाप न भोए;

ज़ांतगर दुष्ट मेरे सामने,

तांतगर अवं लगाम लेइतां अपनु आशी बंद केरतां रेखेलो।"✝

12 कौन मैन्हु आहे ज़ै ज़िन्दगरी इच्छा रखते,

ते कने लम्मी उमर चाते कि भलियाई हेरे,

13 त तै अपनि ज़बान बुरी गल्‍लां केरने करां बाज़ रख्खे

ते अपने ऐशेरी खबरदारी केरे कि

तैस करां कोई धोखेरी गल न निस्से।✝

30 धर्मी अपने ऐशी मरां अक्लरी गल्‍लां केरतो,

ते न्यायेरी गल ज़ोते।

31 तैसेरे परमेशरेरो कानून तैसेरे

दिले मां बस्सोरो रहते,

तैसेरे पव न घिश्कन।

28 तैखन मेरी ज़बान तेरे धर्मेरू बियान केरेली,

सैरी दिहैड़ी तेरी तारीफ़ निसती राली।

4 हे यहोवा, मेरे ज़बानी पुड़ कोई गल नईं

ज़ैस तू पूरे तरीके सेइं ज़ानतो न भोस ज़ैन अवं ज़ोइलो।

2 हे यहोवा झूठ ज़ोनेबाले ऐशी सेइं

ते धोखो देने बैली ज़िभी करां मेरी रक्षा केर।

3 यहोवा सेभी झूठी ज़िभन

ज़ैन सेइं बेड़ि-बेड़ि गल्‍लां निस्चन केट्टी छ़डेलो।

4 तैना ज़ोतन, "असां अपने ज़िभी सेइं ज़ींतमेले,

इश्शे ओठ इश्शे बस्से मां आन; इश्शो मालिक कौने?"

9 हे प्रभु, तैन उलझा,

तैन केरि भाषाई मां गड़बड़ी छ़ड;

किजोकि मीं नगरे मां हर पासे ज़ुलम ते लड़ाई लाहोरीए।

9 एल्हेरेलेइ परमेशरे तै बड़ो महान भी केरो, ते तैस तैन नवं दित्तू ज़ैन सेब्भी नंव्वन करां बड्डूए। 10 कि सुर्गे मां ते धेरती पुड़ ते धेरतलरे बुने; तैना सब यीशुएरे नंव्वे पुड़ ज़ैधूए टेकन। 11 ते बाजी परमेशरेरी महिमारे लेई हर अक ज़िभ मन्ने कि यीशु मसीह प्रभुए।

प्यार सेब्भना रोड़ी बत

1 अगर अवं मैन्हु, ते स्वर्गदूतां केरि भाषां केरि, ते प्यार न रेखी, त अवं ठन-ठन केरनेबाली पितल, ते झ़न-झ़न केरनेबाली झ़ाझ़ाईं।

36 अवं तुसन सेइं ज़ोतां, कि ज़ैना-ज़ैना बेकार गल्‍लां मैन्हु ज़ोले, न्यायेरे दिहाड़े लोकन अपनि हर एक्‍की तैस गल्‍लरो हिसाब देनो भोल्हो। 37 किजोकि तू अपने गल्‍लेईं सेइं धर्मी ते अपने गल्‍लेईं सेइं दोषी भोल्हो।"

5 ज़ैखन लोक नगर ते गुम्मट बनाने लगे; तैखन तैन हेरनेरे लेई यहोवा अव। 6 ते यहोवा ज़ोवं, "अवं कुन हेरताईं, कि सब अक भोरेन, ते भाषा भी तैन सेब्भी केरि अक्‍के आहे, ते तैनेईं एरू कम भी शुरू कियूं; ते हुन्ना ज़ैन किछ तैना केरनेरी कोशिश केरेले, तैस मां किछ भी तैन केरे लेई नामुमकिन न भोल्हु। 7 एल्हेरेलेइ एज्जा, अस ओस्तां तैन केरि भाषाई मां बड़ी गड़बड़ी छ़डम, कि तैना एक्‍की होरेरी बोली न सेमझ़ी सकन।" 8 एल्हेरेलेइ यहोवाए तैना तैस ठैरारां सैरी धरती पुड़ फैलाए; ते तैनेईं तैन नगर बनानू बन्द कियूं। 9 इस वजाई सेइं तैस नगरेरू नवं बाबेल भोवं; किजोकि सैरी धेरतरी पुड़ भाषाई मां ज़ै गड़बड़ी आहे, तै यहोवा तैड़ी छ़डी, ते तैट्ठां यहोवा मैन्हु सारी धेरती पुड़ फैलाए।