नहेम्याह 3

शहरपनाहरी मरम्मत

1 तैखन एल्याशीब महायाजके अपने सैथन समेत हिम्मत केरतां भैड फाटकेरी मरम्मत की। तैनेईं तैसेरी प्रतिष्ठा की, ते तैस फाटकेरे पल्‍ले भी लाए। ते हम्मेआ नंव्वेरे गुम्मटे तगर बल्के हननेलेरे गुम्मटे तगर तैनेईं शहरपनाहरी प्रतिष्ठा की। 2 तैस करां अग्रोवं यरीहोएरे मैन्हेइं शहरपनाहरी मरम्मत की, ते तैट्ठां अग्रोवं इम्री एरे मट्ठे जक्‍कूरे मरम्मत की।

3 फिरी मछ़ली फाटक हस्सनारे मट्ठेईं मरम्मत की। तैनेईं तैसेरी केड़ी लेई ते तैसेरे पल्‍ले, जंदरे ते अड्डे लाए। 4 इसेरे अग्रोवं मरेमोत ज़ैन हक्‍कोसेरू पोट्लड़ू ते ऊरिय्याहेरू मट्ठू थियूं तैनी मरम्मत की। ते तैट्ठां अग्रोवं मशुल्‍लामे ज़ैन मशेजबेलेरू पोट्लड़ू, ते बेरेक्याहेरू मट्ठू थियूं मरम्मत की। तैट्ठां अग्रोवं बानारे मट्ठे सादोके मरम्मत की। 5 तैट्ठां अग्रोवं तको ड्लाव्वेरे लोकेईं शहरपनाहरी मरम्मत की। पन तैन केरे रईस लोकेईं अपने मालिकेरे सेवाई मां तैसेरी मद्दत न की।

6 फिरी पुराने फाटकेरी मरम्मत पासेहेरे मट्ठे योयादा ते बसोदयाहेरे मट्ठे मशुल्‍लामे की। तैनेईं तैसेरी केड़ी लेई, ते तैसेरे पल्‍ले ते जंदरे ते अड्डे भी लाए। 7 ते तैट्ठां अग्रोवं गिबोनी मलत्याह ते मेरोनोती यादोने ते गिबोनी ते मिस्पारे मैन्हेइं फरात दरियाएरे पार रानेबाले हाकिमेरे तखतेरी मरम्मत की। 8 तैन करां अग्रोवं हर्हयाहेरे मट्ठे उज्जीएले ते बाकी सुनारेईं मरम्मत की। तैस करां अग्रोवं हनन्याहे, ज़ै खुशबूदार चीज़ां बनानेबालो थियो तैनी मरम्मत की। ते तैनेईं खुल्‍ली शहरपनाही तगर यरूशलेम नगर मज़बूत कियूं। 9 तैन करां अग्रोवं हूरेरे मट्ठे रपायाहे मरम्मत की, ज़ै यरूशलेमेरो अधे ज़िलहेरो हाकिम थियो। 10 ते तैस करां अग्रोवं हरुमपेरे मट्ठे यदायाहे अपने घरेरे सामने मरम्मत की। ते तैस करां अग्रोवं हशब्नयाहेरे मट्ठे हत्तूशे मरम्मत की। 11 हारीमेरे मट्ठे मल्किय्याह ते पहत्मोआबेरे मट्ठे हश्शूबे एक्‍की हिस्सेरी ते भट्ठेरे गुम्मटेरी मरम्मत की। 12 तैस करां अग्रोवं यरूशलेमेरे अधे ज़िलेरे हाकिम हल्‍लोहेशेरे मट्ठे शल्‍लूमे एपनी कुइयन सेइं साथी मरम्मत की।

13 वैदरे फाटकेरी मरम्मत हानून ते जानोह नगरेरे लोकेईं की, तैनेईं तै बनाव, ते तैनेईं तैसेरां दारां ते जंदरे ते अड्डे भी ते पल्‍ले भी लाए, ते 1000 हथ शहरपनाह मतलब कूड़ा फाटके तगर मरम्मत की।

14 कूड़ा फाटकेरी मरम्मत रेकाबेरे मट्ठे मल्किय्याहे की, ज़ै बेथक्‍केरेमेरो ज़िलेरो हाकिम थियो। तैनी तैसेरां दारां ते जंदरे ते अड्डे ते पल्‍ले भी लाए।

15 नागेरे फाटकेरी मरम्मत कोल्होजेरे मट्ठे शल्‍लूमे की, ज़ै मिस्पा ज़िलेरो हाकिम थियो। ते तैस छत दित्ती ते तैस जंदरे ते अड्डे ते पल्‍ले भी लाए। ते तैनी राज़ेरी बागी करां लेइतां शेलह नंव्वेरे कुण्डे करां शहरपनाह भी तैन पेवड़न तगर मरम्मत की ज़ै दाऊदपुरे करां उन्ढे एइती थी। 16 तैसेरां बाद अजबूकेरे मट्ठे नहेम्याहे ज़ै बेतसूरेरे अधे ज़िलेरो हाकिम थियो, दाऊदेरे कब्रसतानेरे सामने तगर बनेवरे पैनेरे कुण्डे तगर, बल्के बहादरां केरे घरन तगर भी मरम्मत की।

शहरपनाहरी मरम्मत केरनेबाले लेवी

17 तैसेरां बाद बानी एरे मट्ठे रहूमे किछ लेवी लोकन सेइं साथी मरम्मत की। तैस करां अग्रोवं कीलारे अधे ज़िलेरे हाकिम हशब्याहे अपने ज़िलेरे पासे मरम्मत की। 18 तैसेरां बाद तैसेरे लेवी सैथन समेत कीलारे अधे ज़िलेरे हाकिम हेनादादेरे मट्ठे बव्वै मरम्मत की। 19 तैस करां अग्रोवं एक्‍की होरि हिस्सेरी मरम्मत की, ज़ै शहरपनाहरे मोड़े कां हथियारां केरे घरां कां चड़ैई पुड़े, येशुअरे मट्ठे एजेरे मरम्मत की, ज़ै मिस्पारो हाकिम थियो। 20 फिरी एक्‍की होरी हिस्सेरी मतलब तैस मोड़े करां लेइतां एल्याशीब महायाजकेरे घरेरे दारे तगर मरम्मत जब्बैरे मट्ठे बारूके तने मने सेइं की। 21 तैसेरां बाद एक्‍की होरी हिस्सेरी मतलब एल्याशीबेरे घरे करां लेइतां तैसेरे घरेरे कूने तगर मरम्मत मरेमोते की, ज़ैन हक्‍कोसेरू पोट्लड़ू ते ऊरिय्याहेरू मट्ठू थियूं।

याजकेईं शहरपनाहरी मरम्मत

22 तैसेरां बाद तैन याजकेईं मरम्मत की ज़ैना आसे पासेरे रानेबाले थिये। 23 तैसेरां बाद बिन्यामीनी ते हश्शूबे अपने घरेरे सामने मरम्मत की। तैस करां पत्रोवं अजर्याहे, ज़ैन मासेयाहेरू मट्ठू ते अनन्याहेरू पोट्लड़ू थियूं तैनी अपने घरेरे सामने मरम्मत की। 24 तैखन एक्‍की होरी हिस्सेरी, मतलब अजर्याहेरे घरे करां लेइतां शहरपनाहरे मोड़े तगर बल्के तैसेरे कूने तगर हेनादादेरे मट्ठे बिन्नूईए मरम्मत की। 25 फिरी तैस मोड़ेरे सामने ज़ै उच्‍चे गुम्मट राज़ेरे मेहलेरे बेइर बांदो कैदखानेरे अंगने कांए, तैसेरे सामने ऊजैरे मट्ठे पालाले मरम्मत की। तैसेरां बाद परोशेरे मट्ठे पदायाहे मरम्मत की। 26 भवनेरे सेवक त ओपेले मां पूरबेरे पासे पैनेरे फाटकेरे सामने तगर ते बेइर बांदे गुम्मटे तगर रहते थिये। 27 पदायाहेरे बाद तकोई लोकेईं एक्‍की होरी हिस्सेरी मरम्मत की, ज़ै बेइर बांदे गुम्मटेरे सामने ते ओपेलेरी शहरपनाही तगरे।

शहरपनाहरे मरम्मत केरनेबाले बाकी लोक

28 घोड़ो फाटके पुड़ किछ याजकां केरे टोलां अपने-अपने घरेरे सामने मरम्मत की। 29 तैसेरां बाद इम्मेरे मट्ठे सादोके अपने घरेरे सामने मरम्मत की। ते तैखन पूरबेरे फाटकेरे रखवाले शकन्याहेरे मट्ठे शमायाहे मरम्मत की। 30 तैसेरां बाद शेलेम्याहेरे मट्ठे हनन्याह ते सालापेरे शेइयोवं मट्ठे हानूने एक्‍की होरी हिस्सेरी मरम्मत की। तैखन बेरेक्याहेरे मट्ठे मशुल्‍लामे अपने घरेरे सामने मरम्मत की। 31 तैसेरां बाद मल्किय्याह ज़ै सुनार थियो भवनेरे सेवक ते बुपारी लोकां केरि जगाई तगर च़ुनोरे ठारारे फाटकेरे सामने कूनेरे कमरे तगर मरम्मत की। 32 ते कूने बाले कमरे करां लेइतां भैड फाटके तगर सुनार ते बुपारी लोकेईं मरम्मत की।