नहेम्याह 12

याजक ते लेवी

1 ज़ैना याजक ते लेवी शालतीएलेरे मट्ठे जरुब्बाबेल ते येशुअ सेइं साथी बाबेलेरे गुलैमी मरां यरूशलेम नगरे जो जेवरे थिये, तैना इना थिये: सरायाह, यिर्मयाह, एज्रा, 2 अमर्याह, मल्‍लूक, हत्तूश, 3 शकन्याह, रहूम, मरेमोत, 4 इद्दो, गिन्‍नतोई, अबिय्याह, 5 मिय्यामीन, माद्याह, बिल्गा, 6 शमायाह, योयारीब, यदायाह, 7 सल्‍लू, आमोक, हिल्किय्याह ते यदायाह। येशुअरे दिहाड़न मां याजक लोक ते तैन केरे भियालां केरे प्रधान इना थिये।

8 फिरी इना लेवी जे: येशुअ, बिन्नूई, कदमीएल, शेरेब्याह, यहूदा ते तै मत्तन्याह ज़ै अपने भियालन समेत शुक्र केरनेरे कम्मे पुड़ रखोरो थियो। 9 ते तैन केरे भियाल बकबुक्याह ते उन्नो तैन केरे सामने एपनी-एपनी सेवाई मां लगोरे रहते थिये।

येशुअरी खानदानी

10 येशुअरू मट्ठू योयाकीम थियूं ते योयाकीमेरू एल्याशीब ते एल्याशीबेरू योयादा, 11 ते योयादारू योनातान ते योनातानेरू मट्ठू यद्दू थियूं। 12 ज़ैस वक्त योयाकीम महायाजक थियो तैस वक्त इना याजक अपने-अपने पूर्वजां केरे घराना केरे प्रधान थिये, मतलब सरायाहेरो त मरायाह। यिर्मयाहेरो हनन्याह। 13 एज्रारो मशुल्‍लाम; अमर्याहेरो यहोहानान। 14 मल्‍लूकी एरहो योनातान। शबन्याहेरो यूसुफ। 15 हारीमेरो अदना; मरायोतेरो हेलकै। 16 इद्दोएरो जकर्याह; गिन्‍नतोनेरो मशुल्‍लाम; 17 अबिय्याहेरो जिक्री; मिन्यामीनेरे मोअद्याहेरो पिलतै; 18 बिल्गारो शम्मू; शमायाहेरो यहोनातान; 19 योयारीबेरो मत्तनै; यदायाहेरो उज्जी; 20 सल्‍लैरो कल्‍लै; आमोकेरो एबेर। 21 हिल्किय्याहेरो हशब्याह; ते यदायाहेरो नतनेल।

22 एल्याशीब, योयादा, योहानान ते यद्दू एरे दिहाड़न मां लेवी लोक अपने पूर्वजां केरे घराना केरे प्रधानां केरां नंव्वां लिखां गातां थियां, ते फारसेरे दारा राज़ेरे राज़े मां याजक केरां भी नंव्वां भी लिखां गातां थियां। 23 ज़ैना लेवी अपने पूर्वजां केरे घराना केरे प्रधान थिये, तैन केरां नंव्वां एल्याशीबेरे मट्ठे योहानानेरे दिहाड़न तगर इतिहासेरी किताबी मां लिखां गातां थियां। 24 ते लेवी केरे प्रधान इना थिये: हशब्याह, शेरेब्याह ते कदमीएलेरू मट्ठू येशुअ; ते तैन केरे सामने तैन केरे भियाल परमेशरेरे भक्त दाऊदेरे हुक्मेरे मुताबिक आमने-सामने तारीफ़ ते शुक्र केरने पुड़ च़ुने जेवरे थिये। 25 मत्तन्याह, बकबुक्याह, ओबद्याह, मशुल्‍लाम, तल्मोन ते अक्‍कूब फाटकन कां भण्डारन पुड़ पहरो देनेबाले पहरदार थिये। 26 योयाकीमेरे दिहाड़न मां ज़ैन योसादाकेरू पोट्लड़ू ते येशुअरू मट्ठू थियूं, ते नहेम्याह हाकिम ते एज्रा याजक ते शास्त्री केरे दिहाड़न मां एन्ना थिये।

यरूशलेमेरी शहरपनाहरी प्रतिष्ठा

27 यरूशलेम नगरेरे शहरपनाहरी प्रतिष्ठा केरनेरे मौके लेवी एपनी सैरी ठारन मां तोप्पे, कि यरूशलेम नगरे मां पुज़्ज़ी गान, ज़ैस सेइं आनन्द ते शुक्र केरतां झ़ेल्‍ली ते सैन्गी ते सितार बज़ेइतां, ते भजना ज़ोइतां तैस प्रतिष्ठा केरन। 28 त गीतां ज़ोने बालां केरू खानदान यरूशलेम नगरेरे च़ेवरे पासां केरे मुल्खे मरां ते नतोपाती लोकां केरे ड्लाव्वन मरां, 29 ते बेतगिलगालेरां, ते गेबा ते अज्मावेतेरे उडारन मरां अकोट्ठे भोए। किजोकि गीतां ज़ोनेबाले यरूशलेमेरे आसे-पासेरां ड्लाव्वन मां बेस्सी जेवरे थिये। 30 तैखन याजक ते लेवी लोकेईं अपनो आप शुद्ध कियो। ते तैनेईं लोक ते फाटक ते शहरपनाह भी शुद्ध की।

31 तैखन मीं यहूदी हाकिम शहरपनाही पुड़ च़ैढ़तां तैन केरि दूई टोली बनेई, ज़ैना शुक्र केरते बार धूमधामी सेइं च़लते थिये। तैन मरां अक टोली दक्षिणेरे पासे, मतलब कूड़ो नंव्वेरे फाटकेरे पासे शहरपनाही पुड़ बांमेइं-बांमेइं च़ली। 32 ते तैस टोली पत्पती इना च़ले, मतलब होशायाह ते यहूदारे अधे हाकिम, 33 ते अजर्याह, एज्रा, मशुल्‍लाम, 34 यहूदा, बिन्यामीन, शमायाह, ते यिर्मयाह, 35 ते याजकां केरां किछ मट्ठां नरशिंगे घिन्तां, जकर्याह ज़ैन योनातानेरू मट्ठू थियूं, योनातान शमायाहेरू मट्ठू थियूं, शमायाह मत्तन्याहेरू मट्ठू थियूं, मत्तन्याह मीकायाहेरू मट्ठू थियूं, मीकायाह जक्‍कूरेरू मट्ठू, जक्‍कूर आसापेरू मट्ठू थियूं। 36 ते तैसेरे भियाल शमायाह, अजरेल, मिललै, गिललै, माऐ, नतनेल, यहूदा ते हनानी परमेशरे भक्त दाऊदेरे बाज़े ट्लेइतां खड़े थिये; ते तैन करां अग्री-अग्री एज्रा शास्त्री च़लो। 37 एना नागेरे फाटके करां सिद्धे दाऊदेरे नगरेरे पेवड़न पुड़ च़ढ़े, शहरपनाही ऊँचाई पुड़मेइं बांमेइं च़ले, दाऊदेरे भवनेरे बांमेइं च़ले, पूरबेरे पासे पैनेरे फाटके पुड़ पुज़्ज़े।

38 ते शुक्र केरने ते धूमधामी सेइं च़लनेबालां केरि होरि टोली, ते तैन करां पत्पती अवं, ते अधे लोक तैन सेइं मिलने शहरपनाही पुड़ बांमेइं-बांमेइं भट्ठां केरे गुम्मटे कां खुल्‍ली ठैरी शहरपनाही तगर। 39 ते एप्रैमेरे फाटक ते पुराने फाटक, ते मछ़ली फाटक, ते हननेलेरे गुम्मटे तगर, ते हम्मेआ नंव्वेरे गुम्मटे मेइं भोइतां भैड फाटक तगर च़ले, ते पहरेदारां केरे फाटके कां खड़े भोइ जे। 40 तैखन शुक्र केरनेबाले दूईये टोली ते अवं ते मीं सेइं साथी अधे हाकिम परमेशरेरे भवने मां खड़े भोइ जे। 41 ते एलयाकीम, मासेयाह, मिन्यामीन, मीकायाह, एल्योएनै, जकर्याह ते हनन्याह नंव्वेरे याजक नरशिंगे ट्लेइतां थिये। 42 मासेयाह, शमायाह, एलीआजर, उज्जी, यहोहानान, मल्किय्याह, एलाम, ते एजेर (खड़े थिये) ते गीतां ज़ोनेबाले ज़ैन केरो प्रधान यिज्रह्याह थियो, तैना बेड़ी उच्‍ची आवाज़ी सेइं गाते बज़ाते राए। 43 तैस दिहाड़े लोकेईं बेड़ी-बेड़ी मेलबलि च़ैढ़ी, ते आनन्द मनाव। किजोकि परमेशरे तैन बड़ो आनन्द दित्तोरो थियो। कौन्शां मट्ठां कुइयेईं भी बड़ो आनन्द मनाव। यरूशलेम नगरे मां आनन्द मनानेरी आवाज़ दूर-दूर तगर शुनोती थी।

भवनेरी सेवकाई

44 तैस दिहाड़े खज़ानन् मां, सल्‍लोरी च़ढ़तलां केरि, पेइली-पेइली फसलरी पैदावार, ते दशोवं हिस्सां केरे कमरां केरे अधिकारी रख्खे जे, कि तैन मां नगरां-नगरां केरे ऊडारां केरे मुताबिक चीज़ां जम्हां केरन, ज़ैना कानूनेरे मुताबिक याजक लोकां केरे ते लेवी लोकां केरे हिस्से मां कियोरी थी। किजोकि यहूदी लोक हाज़र भोवरे याजकां केरे ते लेवी केरे वजाई सेइं खुशी भोवरे थिये। 45 एल्हेरेलेइ तैना अपने परमेशरेरे कम्मे मां ते शुद्धतारे बारे मां एहतियात केरते राए। ते गीतां ज़ोनेबाले ते पहरदार भी दाऊद ते तैसेरे मट्ठे सुलैमानेरे हुक्मेरे मुताबिक तैन्ने केरते राए। 46 किजोकि बड़े च़िरे पेइले दाऊदेरे ते आसापेरे दिहाड़न मां गीतां ज़ोनेबाले लोकां केरे भी प्रधान थिये, ते परमेशरेरी तारीफ़ ते शुक्र केरनेरां गीतां ज़ोते थिये। 47 जरुब्बाबेल ते नहेम्याहरे दिहाड़न मां सारे इस्राएली, गीतां ज़ोनेबाले ते पहरेदारां केरो रोज़ेरो हिस्सो देते राए। ते तैना लेवी केरो हिस्सो पवित्र केरते थिये। ते लेवी हारूनेरे खानदानेरो हिस्सो पवित्र केरते थिये।