1 तैस दिहाड़े मूसेरी किताब लोकन ज़ोरे सेइं पेढ़तां शुनाई। ते तैस मां एन लिखोरू मैल्हू, कि कोई अम्मोनी या मोआबी परमेशरेरी सभाई मां न एज्जी सखे।✝ 2 किजोकि तैनेईं अन्न पानी एन्हतां इस्राएली लोकन ज़ैखन तैना मिस्रे मरां निसोरे थिये तैन सेइं मुलाकात नईं कियोरी, बल्के बिलाम तैनेईं लानत देनेरे लेई भेंट देइतां कुजेवरो थियो, फिरी भी इश्शे परमेशरे तै लानत बरकती मां बदलो। 3 ऐह कानून शुन्तां, तैनेईं इस्राएली लोकन मरां गैर कौमां केरे लोक अलग-अलग किये।

4 एस करां पेइले एल्याशीब याजक ज़ै इश्शे परमेशरेरे भवनेरे कमरां केरो अधिकारी ते तोबियाहेरो रिश्तेदार थियो। 5 तैनी तोबियाहेरे लेई अक बड्डो कमरो तियार कियोरो थियो, ज़ैस मां पेइले अन्नबलि केरनेरू सामान ते लोबान ते भांडां ते अन्न, नंव्वो दाछ़रो रस ते तेलेरो दशोवं हिस्सो, ज़ै लेवी, गीतां ज़ोनेबालन ते पहरदारन देनेरो हुक्म थियो। ते याजकां केरे लेई सल्‍लोरी च़ढ़तल भी रखी गाती थी। 6 पन अवं तैस मौके यरूशलेम नगरे मां न थियो, किजोकि बाबेलेरे राज़े अर्तक्षत्रेरे बतियोवं साले मां अवं राज़े कांजो च़लो जेव। फिरी बड़े दिहाड़ना बाद मीं राज़े करां छुट्टी मग्गी, 7 अवं यरूशलेम नगरे जो अव, तैखन मीं पतो लग्गो, कि एल्याशीबे तोबियाहेरे लेई परमेशरेरे भवनेरे अंगने मां अक कमरो तियार केरतां, केत्री बुराई कियोरीए। 8 एन मीं बड़ू बुरू लग्गू, ते तोबियाहेरू सारू घरेरू सामान तैस कमरे मरां बेइरोवं शारू। 9 तैखन मेरे हुक्मे सेइं तैना कमरे शुद्ध कमाए, ते मीं परमेशरेरे भवनेरां भांडां ते अन्नबलि देनेरू सामान ते लोबान तैन मां फिरी रखेई दित्तू।

10 फिरी मीं पतो लग्गो कि लेवी लोकन तैन केरो हिस्सो नईं दित्तो जेवरो। ते एस वजाई सेइं कम केरनेबाले लेवी ते गीतां ज़ोनेबाले अपने-अपने उडारे मां कम केरने जो वापस जेवरेन। 11 तैखन मीं हाकिमन झ़िड़क देइतां ज़ोवं, "परमेशरेरो भवन किजो शारोरोए?" फिरी मीं तैना अकोट्ठे केरतां, सब तैन केरे ठारी पुड़ रख्खे। 12 तैखन करां सारे यहूदी अन्न, ते नंव्वे दाछ़रो रस ते तेलेरो दशोवं हिस्सो भण्डारन मां आन्ने लगे। 13 मीं भण्डारां केरे अधिकारी शेलेम्याह याजक ते सादोक मुन्शी, ते लेवन मरां पदायाह, तैन केरे बाद हानान, ज़ैन मत्तन्याहेरू पोट्लड़ू ते जक्‍कूरेरू मट्ठू थियूं, च़ुने। तैना त भरोसेरे काबल गने जेवरे थिये, ते अपने लेवी ढ्लां केरे लेई बंटनु तैन केरू कम थियूं। 14 अवं प्राथना केरताईं, हे मेरे परमेशर! मेरू इन कम मेरे हक्‍केरे लेई याद रख, ते ज़ैन-ज़ैन रोड़ू कम मीं परमेशरेरे भवन ते तैस मां कियोरी आराधनारे बारे मां कियोरेन तैन न मिटा।

15 तैन्ने दिहाड़न मां मीं यहूदा मां बड़े लोक लाहे कि ज़ैना आरामेरे दिहाड़े भी कुण्डन मां दाछ़ ढ्लन्च़ते, पूले आनते, ते गधन पुड़ लदते थिये। तेन्च़रे दाछ़रो रस, दाछ़, फैगू ते बड़े किसमां केरो बोझ आरामेरे दिहाड़े यरूशलेम नगरे मां आनते थिये। तैखन ज़ैस दिहाड़े तैना खानेरी चीज़ां बेच़ते थिये, तैस्से दिहाड़े मीं तैना खबरदार किये। 16 फिरी तैस मां सोर नगरेरे लोक रेइतां मेछ़ली ते बड़े किसमां केरो सौदो आनते, यहूदी केरे हथ्थे यरूशलेम नगरे मां आरामेरे दिहाड़े बेच़ते थिये। 17 तैखन मीं यहूदारे रईस लोकन झ़िड़कतां ज़ोवं, "तुस लोक ऐह बुराई किजो केरतथ, ज़ै आरामेरे दिहाड़े अपवित्र केरतथ? 18 कुन तुश्शे दादे-पड़दादे एन न थिये केरते? ते कुन इश्शे परमेशरे एना सैरी मुसीबतां एस नगरे पुड़ न छ़ेडी? फिरी तुस आरामेरे दिहाड़े अपवित्र केरनेरे लेई इस्राएले पुड़ परमेशरेरो क्रोध भी भड़कातथ।"

19 ज़ैखन आरामेरे दिहाड़े करां पेइले दिहाड़े यरूशलेम नगरेरे केरे आसे-पासे आंधरू भोने लगू, तैखन मीं हुक्म दित्तो, कि फाटकां केरां दारां बन्द कमाथ, ते ऐह भी हुक्म दित्तो, कि तैना आरामेरे दिहाड़े पूरे भोने तगर नईं खोलने। तैखन मीं अपने किछ सेवक फाटकां केरे अधिकारी ठहराए, कि आरामेरे दिहाड़े कोई बोझ अन्तर न आनो गाए। 20 एल्हेरेलेइ बुपारी ते बड़े किसमां केरो सौदो बेच़ने बाले यरूशलेम नगरे करां बेइर एक्‍की दूई बार रुके। 21 तैखन मीं तैन खबरदार केरतां ज़ोवं, "तुस लोक शहरपनाहरे सामने किजो बिशतथ? अगर तुस फिरी एन्ने केरेले त अवं तुसन गिरफ्तार केरेलो।" एल्हेरेलेइ तैना तैस वक्ते करां आरामेरे दिहाड़े फिरी न आए। 22 तैखन मीं लेवी लोकन हुक्म दित्तो, कि अपने आपे शुद्ध केरतां फाटकां केरि रखवाली केरनेरे लेई एंइते राथ, ताके थैकरी दिहाड़ी पवित्र मन्नी गाए। हे मेरे परमेशर! मेरे लेई एन भी याद रख ते एपनी बेड़ी दयारे मुताबिक मीं पुड़ तरस खा।

23 फिरी मीं तैन्ने दिहाड़न मां एरे यहूदी लाहे, ज़ैनेईं अश्दोदी, अम्मोनी ते मोआबी कौन्शां ड्लाहोरी थी। 24 तैन केरे बच्‍चां केरि अध्धी बोली अश्दोदी थी, ते तैना यहूदी भाषा न थिये केरि सखते, तैना दूईये कौमां केरि बोली केरते थिये। 25 तैखन मीं तैना डांटे ते कोसे, ते तैन मरां किछन मार भी दुवाई ते तैन केरे बाल भी ढ्लूड़े। ते तैन परमेशरेरी कसम भी खुवाई, "असां एपनी कुइयां तैन केरे मट्ठन जो ड्लेइतां न देमेले ते न अपने लेई ते न अपने मट्ठां केरे लेई तैन केरि कुइयां ड्लांमेले। 26 कुन इस्राएलेरो राज़ो सुलैमान गैर कौमरे कौन्शां केरे वजाई सेइं पापे मां न थियो फसोरो? बड़े कौमन मरां तैसेरे बराबर राज़ो न भोव, ते तै अपने परमेशरेरो ट्लारो भी थियो, ते परमेशरे तै सारे इस्राएले पुड़ राज़ो च़ुनो, पन तै भी गैर कौमरे कौन्शेइं पापे मां फसव। 27 त कुन असां तुश्शी शुन्तां, एत्री बुराई केरम कि गैर कौमां केरि कौन्शां ड्लेइतां अपने परमेशरे खलाफ पाप केरम?"

28 ते एल्याशीब महायाजकेरे मट्ठे योयादारू अक मट्ठू, होरोनी सम्बल्‍लतेरो ज़माई थियो, एल्हेरेलेइ मीं तै एप्पु करां केढी छ़डो। 29 हे मेरे परमेशर! तैन याद केर, किजोकि तैनेईं याजकेरो दर्जो ते याजक ते लेवी केरो करार अशुद्ध कियोरोए।

30 एस तरीके सेइं मीं तैना सब गैर कौमन मरां शुद्ध किये, ते हर एक्‍की याजक ते लेवी तैन केरि बैरी ते कम्मां दित्तां। 31 फिरी मीं लेकड़री भेंट आन्नेरे बारे मां खास वक्त ठहराव, ते पेइली-पेइली फसलरी पैदावार देनेरो इंतज़ाम भी कियो। हे मेरे परमेशर! मेरे हक्‍केरे लेई मीं याद केर।