1 अर्तक्षत्र राज़ेरे राज़ केरनेरे बिहोवं सालेरे नीसान नंव्वेरे महीने मां, ज़ैखन राज़ो शराब पीने लगोरो थियो तैखन मीं तैस शराब पीने जो दित्ती। तैस करां पेइले राज़े अवं कधी उदास न थियो लाहोरो। 2 तैखन राज़े मीं पुछ़ू, "तू त बिमार भी नईं, फिरी तेरू तुत्तर किजो उदास भोवरूए? ई त मनेरी उदासी भोल्ही।" तैखन अवं बड़ो डेरि जेव। 3 तैखन मीं राज़े जुवाब दित्तो, "राज़ेरी उमर लम्मी भोए! ज़ैखन तैन नगर ज़ैस मां मेरे दादे-पड़दादां केरि कब्रां उज़ड़ी जेवरूए ते तैसेरे फाटक अग्गी सेइं फुकोरेन, ते मेरू तुत्तर उदास कि न भोए?" 4 इन्ना गल्‍लां शुन्तां तैखन राज़े मीं पुछ़ू, "फिरी तू कुन चातस कि अवं तेरे लेई केरि?" तैखन मीं सुर्गेरे परमेशरे कां मने मां प्राथना की, ते राज़े जुवाब दित्तो; 5 "अगर राज़े ठीक लग्गे, ते अपने दासे पुड़ खुश भोए, ते मीं यहूदा प्रदेश ते मेरे दादे-पड़दादां केरे कब्रां केरे नगरे जो भेज़, ताके अवं तैसेरी मरम्मत केरि।" 6 तैखन राज़े कां रानी भी बिशोरी थी, तैखन राज़े मीं पुछ़ू, "तेरू सफर केत्री दिहैड़ी केरू भोल्हु? ते तू केइस वापस एज्जेलो?" राज़ो मीं भेज़नेरे लेई मां राज़ी भोव। ते मीं ज़ोवं अवं केइस वापस एज्जेलो। 7 फिरी मीं राज़े सेइं ज़ोवं, "अगर राज़े ठीक लग्गे, त फरात दरियारे पार हाकिमां केरे लेई इस बारे मां चिट्ठी दित्ती गान कि ज़ांतगर अवं यहूदा प्रदेशे मां न पुज़्ज़ी तांतगर तैना मीं अपने मुल्खे मांमेइं गाने देन। 8 ते सरकारी जंगलेरे रखवाले आसापेरे लेई भी इस बारे मां चिट्ठी मीं दित्ती गाए, ताके तै मीं भवने सेइं लगोरे राज गढ़ेरे लेई केड़ी केरे लेई, ते शहरपनाहरे लेई भी ते तैस घरेरे लेई भी ज़ैस मां अवं गेइतां रेइलो, लकड़ी दे।" मेरे परमेशरेरी सिद्धी नज़र मीं पुड़ थी, एल्हेरेलेइ राज़े मेरी मिन्नत कबूल की।

9 तैखन मीं फरात दरियारे पार हाकिमन कां राज़ेरी चिट्ठी दित्ती। राज़े मीं सेइं साथी किछ सेनापति ते सुवार भी भेज़ोरे थिये। 10 एन शुन्तां कि अक मैन्हु इस्राएली केरि मद्दत केरनेरे लेई एवरोए, होरोनी सम्बल्‍लत ते तोबियाह अधिकारी ज़ै अम्मोनी थियो, तैन दूईने बड़ी बुरी लग्गी।

11 ज़ैखन अवं यरूशलेम नगरे मां पुज़्ज़ो, ते तैड़ी अवं ट्लाई दिहाड़े राव। 12 तैखन अवं किछ मैन्हु साथी नेइतां राती उठतां तियार भोव। मीं कोन्ची सेइं न ज़ोवं कि मेरे परमेशरे यरूशलेमेरे बारे मां मेरे मने मां कुन छ़डोरूए। ज़ैस जानबरे पुड़ अवं सुवारी केरतो थियो तैसेरे अलावा होरो कोई जानबर मीं सेइं साथी न थियो। 13 अवं राती वैदरे फाटके मांमेइं निस्तां अजगर पैनेरे नागेरे पासे, ते कूड़ा फाटकेरे पासे जेव, ते यरूशलेम नगरेरी ट्लुटोरी शहरपनाह ते फुकोरे फाटक लाए। 14 तैखन अवं अग्रोवं गेइतां नागेरे फाटके ते राज़ेरे कुण्डे कां जेव। पन मेरे सुवेरारे जानबरे अग्रोवं गाने जेई बत न थी। 15 तैखन अवं रातो-रात किद्रोन नाले मांमेइं निस्तां शहरपनाह हेरतो-हेरतो उबरो च़लो जेव। ते घुमतां वैदरे फाटकेरे अन्तर जेव, ते एन्च़रे सेइं वापस अव। 16 ते नगरेरे हाकिम न थिये ज़ानते कि अवं कोरहां जेवरो थियो ते कुन केरतो थियो। ते तांतगर मीं न बाकी यहूदन सेइं किछ ज़ोवरू थियूं ते न कोन्ची याजके ते न कोन्ची रईसे ते न कोन्ची हाकिमे ते न कोन्ची होरी कम केरनेबाले सेइं ज़ोवरू थियूं।

17 पन ज़ैखन अवं वापस जेव, तैखन मीं तैन सेइं ज़ोवं, "तुसां त एप्पु हेरतथ कि असां केत्री बुरी हालती मां अहम, कि यरूशलेम नगर उज़ड़ी जेवरूए ते एसेरे फाटक फुकोरेन। त एज्जा असां यरूशलेम ते एसेरी शहरपनाहरी मरम्मत केरम, ताके एजने बाले वक्ते मां इश्शी बदनामी न राए।" 18 फिरी मीं तैन सेइं ज़ोवं, कि मेरे परमेशरेरी सिद्धी नज़र मीं पुड़ केन्च़रे भोइ ते राज़े मीं सेइं कुन-कुन गल्‍लां ज़ोवरी थी, तैखन तैनेईं ज़ोवं, "एज्जा असां हिम्मती सेइं मरम्मतरू कम केरम।" ते तैनेईं एस भले कम केरनेरे लेई हिम्मत की।

19 एन शुन्तां होरोनी सम्बल्‍लत ते तोबियाह नंव्वेरो अधिकारी ज़ै अम्मोनी थियो, ते गेशेम नंव्वेरो अक अरबी, इश्शो मज़ाक बनाने लगे। ते असन घटिया सेमझ़तां ज़ोने लगे, "तुस एन कुन कम लगोरेथ केरने। कुन तुस राज़ेरे खलाफ बगावत केरेले?" 20 तैखन मीं जुवाब देइतां तैन सेइं ज़ोवं, "सुर्गेरो परमेशर इश्शू कम कामयाब केरेलो, एल्हेरेलेइ असां तैसेरे दास हिम्मत केरतां इन मरम्मतरू कम केरमेले। पन यरूशलेम नगरे मां न कोई तुश्शो हिस्सो ते न कोई तुश्शू हक्‍के ते न तुश्शी कोई यादगारे।"