Maria

Obwɛndji atɔndi gala e bobotama bo Yesu

26 Ngɔngɔ i songe basamano, Ndjakomba alomaka obwɛndji Gabiyɛlɛ* ta ibonga imɔti i Galilea, ekabeame Nasaleta. 27 Amolomaka adi moseka mwali odaa pɛ boda na bami ohɔmɔkɔ na moki, na momi omɔti, kombe e nde Esepu. Yo adaka ta pako e kumu Dapiti. Kombe e moseka mwali edaka Malia. 28 Obwɛndji akweaka adi Malia ko abalaka na nde: «Osisoi! Ndjakomba akɔi na wɛ mongandi, ko adi engbanga na wɛ!»

30 Endolo Obwɛndji abalaka na nde: «Pɛ bobanga Malia, tengasa odihi mongandi ta boso bo Ndjakomba. 31 Endja walwoake demi ko wabotake mwana momi, omopabi kombe e Yesu. 32 Adabi moto monɛnɛ ko bamobeabi Mwana o Ndjakomba yona odi odiko i losusu. Kumu Ndjakomba amodedjabi ta ngbɛndɛ e kɔkɔ e nde Dapiti. 33 Adabi Kumu ta denga i Djakobo, ko bokumu bo nde bodaetebi na suka*.»

Bobotama bo Yesu kilito

18 Endja moda mobotama Yesu Kilito: Malia, nange e nde, ahɔmɔkɔ moki na Esepu. Endolo boso boo badae ndako emɔti, Malia aimeaka na demi na ngulu e Mwembo Mosɛnɔke.

Yembo e Malia

46 Ibea Malia abalaka*:

«Kina boo molema mo mbi mosusu mokumedje Kumu!

47 Nalumi na sepi enɛnɛ

tina e Ndjakomba, Moheledji o mbi.

48 Tengasa aendjini na miso ma nde ma epaeli,

mbi mobuli* o nde otaka ekumu!

Soti, donga edɛdi mbunoko bihole bisusu,

bato basusu babeabini mwali o mongandi!

49 Tengasa, Ndjakomba yona odi odiko i losusu akɔi na mbi midjɔ mi bokamoa;

Kombe e nde edi Esɛnɔke!

50 Ko bopele bo nde bokayeyoe bihole bisusu

adi bia bakamosume!

51 Akɔi meako mi bokamoa na ngulu e ebɔ e nde,

ananganedji bato ba mopopo.

52 Ahombedja bato ba ngulu ta ngbɛndɛ i bobo,

endolo angɔdji bato ngasa*.

53 Akapɛ mia adi bato ba ndja,

ko akayanedje badieli mɔmɔ ngasa.

54 Soti adoi akamoa Isalɛlɛ, mosali o nde,

ko abositi boinedja bopele bo nde;

55 moda mobala yo na ba kɔkɔ ba biso, adi

Abalayama ko na bwela bo nde tine kɔbili na kɔbili.»

4 Esepu akinaka Nasaleta ta ekenge e ibonga i Galilea. Akɛkɛ ta Bɛtɛlɛmɛ ta ekenge e ibonga i Yudea, tengasa adaka moto o denga i ibonga ibotamaka Dapiti.

5 Akɛkɛ bokomedja kombe e nde engbanga emɔti na Malia, mwali o nde ohɔmɔkɔ na moki ko yona odaka na demi. 6 Enakobea ehole edaka bo ta Bɛtɛlɛmɛ, masu ma bobota bo nde makokaka. 7 Ibea Malia abotaka mwana momi o boso o nde, amohuaka na bisendja ko amosambeaka ta eyedji e bhata, tengasa polo eidaka tine bobo ta ndako ekasɔe bo bakɛndɛli.

19 Malia abaneaka meako mia ta molema ko bohomba bodjeba tina e meako mimina.

34 Simeona abadjongoaka ko abalaka na Malia nange e Yesu: «Mwana iyo alomama bo adae ibaku tina e botitedja kaoko boangɔdjɔ bato banɛnɛ ba Isalɛlɛ. Adabi embete ekitɛ ebogbɔtodja bato; 35 na bea aimedjabi ta bohu malɛi imabolama ta milema mi bato; ko wɛ, nange e nde, ookabi saya ta molema elenge bakoindea ikɔngɔ.»

48 Ehole emoenɛ baboti ba nde bakamoaka; nange e nde abalaka na nde: «Mwamba, olokɔi boo tina nda? Sange e wɛ ko na mbi, lohombaka na bɔɔ!» 49 Abasɔmbedjaka: «Tina ndani wahombakanini? Otadjebakani boo natungi nadae ta ndako e sange e mbi*?» 50 Endolo bo baidjebaka tina e kɔpi emina ebabalea yo. 51 Ngɔngɔ Yesu ayanaka na bu engbanga emɔti ta Nasaleta, adaka abasuma ko nange e nde abaneaka meako mimina misusu ta molema.

3 Ngɔngɔ i moehole omɔti, mana ma vino masiaka. Nange e Yesu abalaka na nde: «Baditi naikina na mana ma vino.» 4 Endolo Yesu amosɔmbedjaka: «Mwali, modjɔ mo mbi na wɛ nda? * Ehole e mbi ebwanakini.» 5 Na bea nange e Yesu abalaka na basali: «Kɔni misusu mabalake yo na nu.»

25 Mbuti na ekulusu e Yesu edaka nange e nde, ngɛnɛ mwali o nange nde, Malia mwali o Kelopasi ko Malia o Magadala. 26 Ehole enɛkɛ Yesu nange e nde aemi mbuti na motingami opalaka yo; abalaka na nange e nde: «Mwali, endja mwana o wɛ momi!» 27 Ngɔngɔ abalaka na motingami: «Endja nange e wɛ.» Oko ta ehole emina, motingami omina amotombaka adi yo.

Ibota ipele i Yesu

31 Nange e Yesu ko na bange i nde baimeaka; badaka sokolu ko balomaka moto bomobea. 32 Emumu e bato edaka emohiki. Bamotɔndeaka: «Oka, nange e wɛ, bange i wɛ, ko bangɛnɛ i wɛ*, badi sokolu bohombaka.»

33 Yesu asɔmbedjaka: «Nange e mbi ko bange i mbi ba nda?» 34 Ngɔngɔ aengɛngɛnedji miso, abalaka: «Endjani, nange e mbi ko bange i mbi ibi! 35 Tengasa yona akɔkɔ bopala bo Ndjakomba yo adi mwange e mbi, ngɛnɛ e mbi kaoko nange e mbi.»

55 Iyo te mwana o sapate? Malia te nange e nde? Djake, Esepu, Simo ko Yuda baditi bange i nde? 56 Ko bangɛnɛ i nde loditi na bu iya?»