1 Ngɔngɔ i bokwea ta Yeliko Yesu akatisaka ibonga imina. 2 Edaka oho moto omɔti kombe Djakayo; adaka mokondji o ba putedji ba puti ko adaka modieli. 3 Adaka na posa e boenɛ Yesu. Endolo elenge adakayo mokuwe, aibɔngɔkɔ bomoenɛ, tine emumu e bato. 4 Apotaka boso ko aiweaka ta mole mo sikomɔle, bɛngi aenɛ Yesu ehole anɔke yo ena. 5 Ehole eimeaka Yesu ta polo emina, angɔdjɔkɔ miso ko abalaka na Djakayo: «Tita pɛpɛlɛ, Djakayo, tengasa etungi busa bu nadae ta ndako e wɛ.» 6 Djakayo atitaka pɛpɛlɛ ko amoasɔkɔ na mongandi ta ndako e nde. 7 Aenɛkɛbo bea, bato basusu banungunaka ta tina e Yesu, babalaka: «Moto iyo akɛi ada ta ndako e moto mobe!» 8 Djakayo, angɔkɔ ta boso bo Kumu, abalaka na nde: «Kumu, napake ndanda e bodieli bo mbi adi batakeli; ko nakakatoa moto palanga, namosɔmbedjake mbala inɛi.» 9 Yesu abalaka ta tina e nde: «Busa bu, mohelo mokwei ta ndako ye, tengasa yo pongono adi omɔti o ibota i Abalayama. 10 Mwana o moto aduaka tine bohomba ko boheledja ibia babungaka.»

11 Yesu abalaka naikina isɛ tine bato baduaka aoka mibalo mi nde. Adaka mbuti na Yelusalɛmɛ ko balɛdjɛkɛ boo Bokumu bo Ndjakomba boimeaka mbuti na bosaenɛmedja. 12 Endja moda mobalaka yo: «Moto omɔti o ibota i gala akɛkɛ ta ngondo e bohali bɛngi bamoimedje kumu; ko ahule ta ngondo e nde. 13 Boso bo bokɛ, abeaka basali ba nde domi, apaka adi omɔti na omɔti ebende e wolo e motuya monɛnɛ ko abalaka na bu: * "Kɔni mombongu na palanga emina mbunoko ihule i mbi." 14 Endolo bato ba ibonga e nde baimopalaka. Balomaka bato ngɔngɔ i nde bɛngi bamotɔnde boo: "Iso loloni wɛ boda kumu o biso." 15 Nongo bea bamoimedjaka kumu ko ahulaka ta ibonga i nde. Abeaka basali ba nde ibia bapaka yo palanga, bɛngi adjebe mbuka adiaka bo. 16 Mosali o boso aimeaka ko abalaka: "kumu, nabakeaka bibende bi wolo domi ta djia djipakani wɛ." 17 Kumu abalaka na nde: "Edi bopele, odi mosali mopele. Tengasa odaki na bodjo ta midjɔ mikɛkɛkɛ, noimedji gupɛnɛlɛ o mabonga domi." 18 Mosali o babae aduaka ko abalaka: "Kumu, na bakeaka bibende bi wolo bitano ta djia djipakani wɛ." 19 Kumu abalaka na yona: "wɛ, noimedji gupɛnɛlɛ o mabonga matano." 20 Okina mosali aduaka ko abalaka: "Kumu, endja ebende e wɛ e wolo iye. Naebomba ta epasa e esendja." 21 Nadaka na bɔɔ na wɛ, tengasa okadɛ moto omongangale: okatombe eka eda wɛ pɛ bosambea, okabuke ta polo eda wɛ pɛ bona. 22 Kumu abalaka na nde: "Mosali mobe, nosambedjaka na bokimana na mibalo mi wɛ mɛnɛ. Odjebaka boo, nadi moto omongangale, nakatombe leka lokadae mbi pɛ bobomba, nakabuke leka lokadae mbi pɛ bona. 23 Na bea, tina ndani oibomba palanga e mbi ta ndako ekabombe bo palanga ekabee bo bange?* Ta ihule i mbi, naboanaka boedia na mbuka." 24 Ngɔngɔ abalaka na bia badaka ena: "Mokatoani ebende e wolo emina ko epani adi yona odi nadju domi." 25 Babalaka na nde: "kumu, adi nadju ehele domi!" 26 "Amosɔmbedjaka: Nabali na nu soti, moto yona odi na eka bamopabi naikina bonɔ; endolo adi yona odi ngasa, bamokatoabi eka edi na nde. 27 Ta tina e baloni ba mbi ibalonaka nadae kumu, duani na bu iya ko baowani ta miso ma mbi."»

28 Ngɔngɔ isidjaka Yesu bobala bea, adalaka boso ta ndjea ekɛkɛ ta Yelusalɛmɛ.

29 Ehole ebatamaka yo ta ibonga i Betepasa ko na Betania, mbuti na ngomba e Olipa, alomaka batingami babae boso. 30 Abalaka na bu «kɛni ta ibonga dia idi boso bo bino. Ehole aimeakeno, wataneakeni mwana o ane atingi, yona oda moto pɛ bobakama. Motingoani ko duani na nde iya. 31 Ko moto akohɔdjɔni: "Tina ndani wa motingoakani?," Balani na nde: "Kumu adi na posa na yu."»

32 Ibalomamaka bakɛkɛ ko bataneaka oko elenge ebalaka Yesu na bu. 33 Ta ehole etingoaka bo mwana o ane, baswa nde babalaka na bu: «Waetingoakani tina nda?» 34 Basɔmbedjaka: «Kumu adi na posa na yu.» 35 Ko bahulaka na yu adi Yesu; babakeaka bisendja bi bobo diko i ane ko babakeaka Yesu. 36 Yana adakabo badale, bato bandaka bisendja bi bobo na ndjea. 37 Abatamaka yo mbuti na Yelusalɛmɛ, ta ndjea enɔkɔ ta ngomba e Olipa, emumu e batingami, balumaka na mongandi, bakumedjaka Ndjakomba na moholi mopipo tine bimbete bi ngindola bienɛkɛ bo. 38 Babalaka: «Kina boo Ndjakomba yona odi diko i losusu adjongoe, yona aduake na kombe e Mokondji! Bogo ta busa ko ekumu adi Ndjakomba ta bisika binɔi odiko!»

39 Bakina bapalusai, ibadaka ta emumu, babalaka na Yesu: «Molehi, tɔndea batingami ba wɛ bakine daka!» 40 Yesu asɔmbedjaka: «Nabali na nu, nakabasia bakine daka, mabanga magamabi!»

41 Ehole ebatamaka Yesu na ibonga inɛnɛ ko aenɛkɛ yo, ayeaka tine eyu. 42 Abalaka: «Eso eda boo wɛ pongono odjebaka ta isu di, iyena eolwɛke bogo! Ndjokwa! Edɛdi modjɔ momina modi mobombamake ta miso ma wɛ! 43 Tengasa masu maduake baloni ba wɛ baohikabini na bianeli bipipo, baodeabini ko baombambamedjabini pamba djisusu. 44 Baobedjabini mɛnɛ, wɛ na bato ba wɛ! Bakinetebini ibanga imɔti ibaki diko i ikina! Tine boo oisipoani ehole aduaka Ndjakomba aokamoani!»

45 Yesu akweaka ta tepelo ko aimeaka bobengana batɛki. 46 Abalaka na bu: «Makomi mabalaka: "Ndako e mbi edabi ndako e miongɔnɔ." Endolo ino, oimedjini ndako e baubi!»

47 Yesu adaka aleha masu masusu ta bopango bo tepelo. Bakondji ba banganga ba Ndjakomba, balehi ba mobeko, na bakumu ba bato, bahombaka enɔeli e bomowa. 48 Endolo baidjebaka mondumba mo bokɔ, tengasa bato basusu badaka bamohokamedja na edinga.