1 Ibolea i bato basusu bangɔkɔ ko bakɛkɛ na Yesu ta boso bo Pilato. 2 Oho, bamopundaka na mibalo imi: «Lotanei moto iyo apa bato ba ibonga i biso molo mobe: asiaka bato badae pɛ boputa puti e mokondji Sedjale ko abali yo mɛnɛ boo adi Kilito, epalaka e bale boo Kumu.» 3 Pilato amohɔdjɔkɔ: «Odi mokondji o Bayuda?» Yesu amosɔmbedjaka: «Wɛ obali.» 4 Pilato abalaka na bakondji ba banganga ba Ndjakomba ko na emumu e bato: «Naeniti modjɔ mobe moboani na mbi bopa moto iyo etumbo.» 5 Endolo bapingedja na bopipo mɛnɛ: «Akapɛ bato ba biso molo mobe na bileho bi nde. Abanga ta Galilea, ko anɔkɔ ta Yudea esusu, edɛdi, aimei iya.»

6 Ehole eoka Pilato mibalo mia, ahɔdjɔkɔ: «Moto yo adi moto o Galilea?» 7 Ehole eoka Pilato boo Yesu adongaka ta ibonga idaka Elode Gupɛnɛlɛ; amolomaka adi Elode, yona odaka ta Yelusalɛmɛ masu mamina. 8 Elode asepaka mɛnɛ ta boenɛ Yesu. Tengasa, aokaka babala tine nde ko asepaka basakane donga ehele. Adaka na edinga boo Yesu akɔke embete e ngindola. 9 Amohɔdjɔkɔ mahɔdjɔ manɛnɛ, endolo Yesu aimosɔmbedjaka. 10 Bakondji ba banganga ko na balehi ba mobeko badaka ena ko bamopundaka na midjɔ mibe. 11 Elode na basoda ba nde baimeaka bomota ko bomonyɔkɔlɔ. Bamolwadjaka esendja epele ko bamosɔmbedjaka adi Pilato. 12 Donga ehele Elode na Pilato baiyokanaka; endolo ta busa bua, baimeaka bopalana.

13 Pilato atitanedjaka bakondji ba banganga ba Ndjakomba, bakondji ba ibonga ko na bato. 14 Abalaka na bu: «Odɔini na moto iyo bobala bo apaka bato ba bino molo mobe. Na bea, na mosambedji ta boso bo bino ko na modihiti nongo na mobunga ko na modjɔ mobe mo mopundi na nu. 15 Elode pongono aimodiaka nongo na mobunga, na tina emina amosɔmbedjaka adi so. Moto iyo akɔiti nongo bobe bomɔti boboani na nde bodia etumbo ebogwa. 16 Namokɛsɛkɛke oto mbalake, ngɔngɔ na mokinake.» 17 Engi tɛkɛ e Pasika, Pilato adaka aimedja mobɔlɔkɔ omɔti.* 18 Endolo bo basusu bagamaka engbanga: «Owa moto omina! Lotingoaso Balabase!» 19 Balaba apeamaka ta bɔlɔkɔ tine boo aisaka wusuwusu ta ibonga inɛnɛ ko aowaka moto. Na tina emina bamoisaka ta bɔlɔkɔ. 20 Pilato apalaka botingoa Yesu, asɔmbɔkɔ naikina bobahɔdjɔ. 21 Endolo bato bagamaka: «Abakame ta ekulusu abakame ta ekulusu!» 22 Pilato abahɔdjɔkɔ mbala e basato: «Bobe bokɔi yo nda? Na modihiti nongo na mobunga momɔti bɛngi agwɛ. Namokɛsɛdjake mbalake ngɔngɔ na motingoake.» 23 Endolo bapingedjaka naikina: «Mobaka ta Ekulusu.» Ko migamo mi bobo midimamaka: 24 Pilato adimaka bakokedje posa e bobo. 25 Atingoaka moto ohɔdjɔkɔ bo ko yona oisaka bo ta bɔlɔkɔ tine mobulu ko aowaka moto, Pilato abapaka Yesu bɛngi bakokedje posa e bobo.

26 Ehole epeaka bo Yesu ngbandengba, basakanaka na Simo, moto o Kulɛnɛ, yona odaka ahule ta gbie. Basoda bamopeaka ko bamotombedjaka ekulusu bɛngi asonge na Yesu. 27 Emumu e bato ekimanaka Yesu, bali pongono badaka bayea ko bosatungeaka tina e nde. 28 Yesu ahombanaka ko abaendjaka, abalaka: «Ba maa ba Yelusalɛmɛ, pɛ boyeani tina e mbi! Endolo yeani tina e bino ko bana ba bino! 29 Tengasa masu maduake babalabi: "Sepi adi batete ko ibadi pɛ bonungea!" 30 Babalakabi na makoli: "Kwani diko i biso!" Ko na makoli: "Lokundani!" 31 Tengasa bakakɔ midjɔ mi na mole motɔtu bea, ekɔbi bo na mole mokakanake nde?» 32 Bakɛkɛ na baoweli ba bato babea ngbandengba, bɛngi bagwɛ na Yesu. 33 Aimeaka bo ta polo ekabe bo «Egɔgɔlɔ e molo», basoda babakaka Yesu ta ekulusu, engbanga na batɔmbi babae, omɔti ta e bɔ e bami okina ta e bɔ e bali. 34 Ibea Yesu abalaka: «Sange mbi, bayɛ, tengasa batadjebaka eka akɔkɔ bo.»*Bakabanaka bisendja bi nde na boboma djonga.* 35 Bato baemaka ena ko baendjaka. Bakondji ba Bayuda bamotaka* eni babala: «Aheledjaka bakina bato; atako saheledja yo mɛnɛ, akada adi Kilito, yona ohɔ Ndjakomba!» 36 Basoda pongono badaka bomosɛkɛ; babatamaka ko bamopaka mana ma ngayi*. 37 Babalaka: «Okada Bakondji ba Bayuda, saheledja wɛ mɛnɛ!» 38 Ta diko i molo mo nde bakomaka: «Moto iyo adi Bakondji ba Bayuda.»

39 Omɔti obaoweli ba bato obakaka bo ta ekulusu amosingaka: «Wɛ oditi Kilito? Saheledja ko heledjaso pongono!» 40 Endolo okina agameaka mina nde. Amosɔmbedjaka: «Wɛ otabanga Ndjakomba, wɛ odihi etumbo moda momɔti na nde? 41 Tine biso, etumbo edi bodjo, tengasa lodihi etumbo eboani na misala mi biso; endolo yo akɔiti bobe.» 42 Ko abalaka: «Yesu, omalɛdjɛni ehole eduabi wɛ boda Kumu.» 43 Yesu amosɔmbedjaka: «Nabali na wɛ, edi soti: oko busa bu wadake na mbi ta paladiso*.»

44 Edaka mbuti na midi: modidi mokɔmɔkɔ ta ngondo esusu mbuti na bihole bisato ngɔngɔ i midi. 45 Lido edaka esɛpi ta tepelo ealeaka bipasa bibae. 46 Yesu agamaka na moholi mopipo: «Sange mbi, nasɔmbedji mwembo mo mbi ta mɔmɔ ma wɛ*.» Ngɔngɔ i bobala bea, Yesu agwaka. 47 Kapitɛne o basoda mokama o Loma aenɛkɛ yo modjɔ momina; akumedjaka Ndjakomba ko abalaka: «Soti mɛnɛ moto iyo adaki bodjo!» 48 Emumu e bato baduaka aendja modjɔ momina, baenɛkɛ eka ekɔmɔkɔ. Na bea bayanaka bapeli mɔmɔ ta melo* na ndjokwa. 49 Badjebani ba Yesu, na bali ibamopakeaka donga ta Galilea, ba semeaka bohali ko baendjaka eka edaka anɔmɔ.

50,51 Edaka na moto omɔti kombe e nde Esepu. Adaka moto o ibonga i Alimatayo. Moto omina adaka mopele ko bodjo, ko ambaka bodua bo Bokumu bo Ndjakomba. Adaka omɔti o ibolea i basuku, endolo aidimaka eka ekɔkɔ basuku bakina na edima bo bokɔ. 52 Akɛkɛ adi Pilato amɔhɔdjɔ mokuku mo Yesu. 53 Atitedjaka mokuku momina ta ekulusu, amohuaka na mbendja e motuya monɛnɛ ko amoisaka ta ikila itɔkɔ bo ta ibanga, ta polo eda bo pɛ bopusea moto boso. 54 Edaka mɔmɔkɔ mo isu i mosalingo mo busa bo sabata. 55 Bali badalaka engbanga na Yesu donga Galilea, baduaka engbanga na Esepu; baendjaka ikila ko baenɛkɛ moda mosambeaka bo mokuku mo Yesu. 56 Ngɔngɔ bayanaka ta ibonga inɛnɛ ko basalingoaka na minɛ na misoloa miso elitindi tine bosopea mokuku. Isu i sabata, bahemaka, tine bosuma mobeko.