1 Busa bomɔti bo sabata Yesu akatisaka gbie e mbuma i bule. Batingami ba nde badaka babuka mingbɔndu mi bule,* badjisianaka na mɔmɔ ma bobo ko badaka badjiyaka. 2 Mo ebole okina o bapalusai babalaka: «Tina ndani wakɔkɔni midjɔ misiama ta busa bo sabata*?» 3 Yesu abasɔmbedjaka: «Oilangani imi mikɔ Dapiti, ehole eoka yo ndja, yo na bato badaka na nde? 4 Akweaka ta Ndako e Ndjakomba, atombaka miɛmbɛ imibondjeaka bo Ndjakomba, amiyaka.» Ko amipaka pongono adi bia badalaka na nde, dongedja oko banganga ba Ndjakomba baboanaka bomiyaka*.

5 Ko abalaka na bu: «Mwana o Moto adi mokondji o busa bo sabata.»

6 A isu ikina i sabata, Yesu akweaka ta sinagoga tine boleha. Edaka oho moto omɔti etumbɛ o ebɔ eondɔke. 7 Balehi ba mobeko na bapalusai badaka baendja Yesu na miso mabe, tine boendja kaoko aboani boheledja moto ta busa bo sabata, tengasa badaka bamohomba na modjɔ mo bomopunda. 8 Endolo yo adjebaka malɛi ma bobo; abalaka na moto odaka etumbɛ o ebɔ eondɔke: «Angɔ, kɛ aemae ta boso bo bato.» Asangɔdjɔkɔ ko aemaka ta boso bo bato. 9 Yesu abalaka na bu nadi na ihɔdjɔ i bohɔdjɔni: «Esiama ta isu i sabata nde? Bokɔ bopele kaoko bokɔ bobe, boheledja mohelo mo moto kaoko bomobungedja.» 10 Na bea, Yesu abaendjaka bo basusu, abalaka na moto* etumbɛ o ebɔ eondɔke: «Ninɔdja ebɔ.» Aeninodja, ko ebɔ e nde ehelaka. 11 Endolo balehi ba mobeko ko bapalusai balumaka na kɛlɛ ko basabaleanaka ta tei e bobo modjɔ moboani na su bokɔ tina e Yesu.

12 Ta masu mia, Yesu akɛkɛ ta ikoli tine bongɔnɔ, anɔdjɔkɔ bulu bosusu ta bongɔnɔ Ndjakomba 13 Ehole eya busa, abeaka batingami ba nde ko, ahɔi domi na babae, ababeaka na kombe e bapɔsɔlu: 14 Simo obakeaka yo kombe Piɛlɛ, Andele, mwange nde, Djake, Yoane, Pilipo, Batelemi; 15 Matayo, Toma, Djake, mwana o Alipe*, Simo, obeaka bo Djelote; 16 Yuda, mwana o Djake, ko Yudasi Isikaliota, yona oimeaka molɔngi.

17 Yesu atitaka na bu nase i ikoli, baemaka ta polo ebhuda. Emumu e batingami ko emumu e bato baduaka adi yo: badongaka ta Yudea* esusu, ta Yelusalɛmɛ ko na mabonga masusu madaka ta mokula moduwa enɛnɛ, e ngondo e Tula na Sidona. 18 Baduaka tine bomoka na bomohɔdjɔ abaheledjaka na bego i bobo. Ibia batungeamaka na miembo mibe bahelaka. 19 Moto na moto ta emumu apalaka oko amopee, tengasa ngulu eimaka adi yo ko ebaheledjaka bo basusu.

20 Na bea, Yesu aendjaka batingami ba nde ko abalaka:

Sepi adi no batakeli,

tengasa Bokumu bo Ndjakomba bodi tine bino!

21 Sepi adi no badi na ndja edɛdi,

tengasa ogolabini!

Sepi, adi no bayeaka edɛdi,

tengasa osɛkɛbini!

22 Sepi ta ehole eokeinibo swɛ,

Ehole enɛkɛnibo ngasa ko bosingakabini,

Ehole eobenganabinibo ko bokoseabini midjɔ misusu mibe,

Ta tina e mbi Mwana o Moto.

23 Sepani ko daani na sepi ehole akokedjamake meako mimina; tengasa iputi inɛnɛ idi ibombamake tine bino o diko. Edi oko bea bakɔkɔ ba bobo banɔngedjaka ba mbaeli ba Ndjakomba*.

24 Endolo ndjokwa, na nu badieli,

tengasa opelini bodieli bo bino!

25 Ndjokwa na nu bia bagoli edɛdi,

tengasa waokakeni ndja!

Ndjokwa na nu bia badi bosɛkɛ edɛdi,

tengasa wadake ta ilaka ko wayeakeni!

26 Ndjokwa na nu bato basusu babalaka bopele na tina e bino,

Tengasa bakɔkɔ ba bobo banɔngedjaka ba mbaeli ba boloa!

27 «Endolo nabali na nu, ino bia baokakani: palani baloni ba bino, kɔni bopele na bia baokeakani swɛ. 28 Djongoani bia baolakedjakani, ongɔnɔni Ndjakomba tine bia baonɔngedjakani. 29 Moto akoboma epapata ta mobanga momɔti, mopa mobanga mokina. Moto akatomba mokoto mo wɛ, mokinea ko simisi 30 Pa adi moto yona ahɔdjɔkɔ; iyona oandoi eka e wɛ, pɛ bomohɔdjɔ aesɔmbedje. 31 Misusu mikapaleno boo bato bakina bokɔmeni*. 32 Okapaleni oko bia bakopaleni, tina nda odi boamba ikabo itikoanake? Bato ba babe bakapale pongono bia ba kabapale. 33 Ko ekadabo okɔi bopele na bia bakokɔmeni bopele, tina ndani odini boamba ikabo itikoanake? Bato babe bakakɔe pongono ko bea. 34 Endolo okabekedjani oko adi bato bia badi na nu na ndingo e bosɔmbedjani, tina dani odini boamba ikabo itikoanake? Bato ba babe bakasabekedjane pongono bɛngi ba sasɔmbedjeane. 35 Endolo ino palani baloni ba bino bakɔmeakani bopele, okababekedjani leka lo bino pɛ bobaputedjani ikabo i bino ladake inɛnɛ. Ibea wadakeni bana ba Yona odi odiko i losusu, tengasa adi mopele na bato bia tebadime bopele bokabakɔe bo ko na bato babe. 36 Okeakani bato ndjokwa, elenge Sange e bino akokeyo bato ndjokwa*.»

37 Pɛ bosambedjani bato ko Ndjakomba ato sambedjabini; pɛ bodumba bato na midjɔ ko Ndjakomba atodumbabini; yɛni bato na midjɔ ko Ndjakomba aoyɛbini. 38 Pani bato leka ko Ndjakomba aopabini. Alumedjabi mabenga ma bino botɔɔ bosopeana. Ndjakomba aengɛbini na mwɛngi oko elenge akaengɛ wɛ bato bakina.

39 Yesu abalaka na bu isɛ imɔti: «Moto o gwa miso aboani bodaledja minande ogwa miso? Akakɔ bea, bo basusu babae bakwake ta mombɔndɔ. 40 Motingami aboaniti bonɔ molehi o nde; endolo moikoi yona oikoi bopele adake elenge molehi o nde. 41 Tina nda wenɛkɛ ebumbu edi ta diso i mwange e wɛ, enakobea otaenɛkɛ ibaya idi ta diso i wɛ? 42 Mondumbandani moboani na wɛ botɔndea mwange e wɛ: "Maninga, amba nodongedje ebumbu edi ta diso i wɛ," endolo wɛ otenɛkɛ ibaya idi ta diso i wɛ. Ndjɔ ba melo mibae! Dongedja boso ibaya idi ta diso i wɛ, ko wenɛke bopele ta boso bo mwange e wɛ boo odongedje ebumbu ta diso i nde.»

43 «Mole mopele temobote mbuma ibe ko mole mobe temobote mbuma ipele. 44 Mole na mole mokadjebane na mbuma i yu, tebabuke mbuma i pigi ta ipumba i ndjubɛ ko pongono tebatswɛ mbuma i vino ta mole mondjube. 45 Moto mopele akainedje meako mipele imibolama ta molema mo nde, moto mobe akainedje meako mibe imibolama ta molema mo nde. Tengasa monɔkɔ mo moto na moto mokaimedje imiluma ta molema mo nde.»

46 «Tina ndani okabenini "Kumu, Kumu", ko tokɔeni meako mi mbi? 47 Napalaka noinedjeni moto oboani bodua adi mbi, aoki meako mi mbi ko amisi ta mosala aboani na nda: 48 Moto omina aboani na moto yona opikaka ndako: alongaka mombɔndɔ mombɛngɛ ko angɔdjɔkɔ moboko diko i mabanga. Ehole edua pela, madiba malinda ndako, endolo ndako eikwa tine boo aepika bopele. 49 Endolo moto yona oki meako mi mbi ko amisiti ta mosala aboani na moto yona opika ndako e nde ta kpɔtɔ, apika makwe ta mabanga. Ehole ekweaka madiba ta ndako emina, mbala emɔti ekwaka, ko ndako emina ebeha esusu mɛnɛ.»