1 Yesu aendjaka mbuti na nde aenɛkɛ badieli baisaka bipeli ta sanga ikadae ta tepelo. 2 Aenɛkɛ pongono mwali omɔti ogwa na momi motakeli, apaka bibende bibae bi palanga. 3 Abalaka: «Notɔndeakani, edi soti: mwali yo ogwa na momi motakeli api bonɔ bato basusu. 4 Tengasa, bato basusu bapaka ibondja ikɛkɛ mɛnɛ bokima bodiele bo bobo. Endolo yo, ta botaka bo nde, api losusu lodaki na nde tine ahelame na lu.»

5 Bato bakina badaka babala tine tepelo: Endja moda modi ndako ye na mabanga mapele ko na leka lobondjeaka bo Ndjakomba! Endolo Yesu asɔmbedjaka: 6 «Masu maduake, pɛ ibanga ikina ta na mabanga imi maenɛkɛ no; idiketebi ibaki diko i ibanga ikina: masusu mabukeanabi.»

7 Bamohɔdjɔkɔ: «Molehi, ehole ekɔmɔbi modjɔ momina nda? Embete einedjabi modjɔ momina mokaimeabi nda?» 8 Yesu asɔmbedjaka: «Sangatanani, pɛ bosakoseani. Tengasa bato banɛnɛ baduabi na kombe e mbi, ko babalakabi: "Edi mbi Masiya! Kaoko ehole emina eimei!" Endolo pɛ bobakimanani. 9 Ehole eokabi no gala i bila ko na wusuwusu, pɛ bobangani. Tengasa midjɔ mimina miboani bokɔmɔ boso; endolo edaetebi mɛnɛ suka e ngondo.»

10 Na bea abalaka naikina: «Ekomi emɔti eanedjabi ekomi ekina, bokumu bomɔti boanedjabi bokumu bokina; 11 Kpɔtɔ i kumanabi ta bisika tungu na tungu, ndja ko na mihulɔhulɔ; midabi na bopipo; Midjɔ mibokamoa ko bimbete binɛnɛ bienɛmɛbi ta busa. 12 Endolo boso bo midjɔ mimina, bopeabini, ko bonyɔkɔlɔbini, bokababini bɛngi bosambedjebini ta ba sinagoga ko boisabini ta bɔlɔkɔ; bosambedjabini boso bo bakondji ko bo ba Gupɛnɛlɛ tina e mbi. 13 Edabi tine bino enɔeli eboda batemo ta tina e mbi. 14 Isakani ta malɛno ma bino boo, oditini na tina ebosatungeani na midjɔ miboani na nu bobala ta ehole akɛke no ta bosamba. 15 Tengasa mbi mɛnɛ nopabini mibalo ko djebeli iye edi pɛ nongo omɔti ta tei e baloni ba bino aboani bolongeani. 16 Edae basange i bino, banange i bino, bange i bino, denga i bino ko badjebani ba bino; baokababini; bakɔbi boo baleneabi banɛnɛ ta tei e bino bitumbu bi bogwa, tine mbi. 17 Bato basusu baolonabini tina e mbi. 18 Endolo pɛ nongo moswe momɔti ta molo mo bino mobungetebi. 19 Na tina emina: bhingi e bino, eheledjabi mihelo mi bino.»

20 «Ehole enɛbi no Yelusalɛmɛ ehikami na basoda, odjebabini, ta ehole emina yena, bobeha bo yu boimei mbuti. 21 Na bea, ibadabi ta Yudea batiabi ta makoli; ibadabi ta tei e Yelusalɛmɛ batiabi bohali, ibadabi ta gbie bahuletebi ta ibonga. 22 Tengasa edabi masu ma esambi, tine bokokedja misusu mikomama*. 23 Ndjokwa edabi ta masu mamina, tina e bali ba memi ko na bia banungeakabi! Tengasa edabi na saya epipo ta ngondo ko kɛlɛ e Ndjakomba enɛmɛbi tina e bato bamina. 24 Baowamabi na ilɔndɔ, babapeabi elenge babuli ta bikomi bi bakɛndɛli, ko ngondo ibapangano badalakakabi Yelusalɛmɛ mbunoko ehole ebapa bo ekakokabi.»

25 «Edabi na bimbete ta modakabusa, ta songe ko ta ndjɔtɔ. Ta ngondo, ta tina e ngilimo bato ba ibonga dabi na milema diko, na bokɛsɛdji tine ngilimo i dua djinɛnɛ ko na mula. 26 Banɛnɛ bagwabi na bɔɔ na bolɛdjɛ midjɔ misusu mikɔmɔbi ta ngondo. Tengasa ngulu i busa djikwabi. 27 Na bea baenɛbi Mwana o Moto bodua ta itute, na ngulu ko na ekumu enɛnɛ*. 28 Ehole ebangabi midjɔ mimina bokɔmɔ, angɔni ko emeani melo, tengasa botingoama bo bino bobatami.»

29 Ngɔngɔ Yesu abalaka na bu isɛ di: «Endjani mole mo pigi ko mele mikina: 30 Ehole enino kasa ibangi botɔ, wadjebakeni bodidi bopele bobatami. 31 Oko moda momina tina e bino, ehole enino midjɔ mimina boimea, djebani Bokumu bo Ndjakomba bobatami. 32 Nabali na nu, edi soti: Ehole ye enɔebitebi mbunoko midjɔ misusu mienɛme. 33 Busa na kpɔtɔ lonɔbi, endolo mibalo mi mbi minɔetebi.»

34 «Sangatanani! Pɛ bobedjani milema mi bino milume na posa i boyaka, bolangoa, na bokɛsɛdji bo mohelo; pɛ bea busa bo esambi botaneabini gbundumo, 35 elenge elambo. Tengasa ataedjake bato basusu badi ta kpɔtɔ. 36 Pɛ bowɛni, ongɔnɔkɔni bihole bisusu! Ta ndjea emina wadiakeni ngulu e bolonga misusu mimeake ko waemakeni ta boso bo Mwana o Moto.» 37 Ta ehole e moi, Yesu alehaka ta bopango bo tepelo; endolo mɔmɔkɔ, aimaka ta bopango bo tepelo akɛkɛ anɔdjɔ bulu ta ngomba e Olipa. 38 Ko bato basusu badaka badua bihuma bisusu tine bomohokamedja.