1 Abalaka pongono na batingami: «Modieli omɔti adaka na mobanei o leka lo nde. Bato bamopundaka adi mokondji boo: abedjaka leka lo wɛ. 2 Amobeaka ko abalaka na nde: "Eka eokaka mbi na kombe e wɛ nda? Tombeani sɔngi e mosala mopa mbi, tine oboaniti boda na ikina mobanei o leka lo mbi." 3 Mobanei asabaleaka: "Nakɔe bo, kumu o mbi adongedjini mɛnɛ ta mosala mo bobanea leka? Enakobea naditi na ngulu ebolia gbie, nokake sɔni tine bosɛngɛ. 4 Nadjebi eka eboani mbi bokɔ, tine bato basɔeni Adibo ta ehole adongedjakeni mokondji o mbi ta mosala." 5 Okobea abeaka moto omɔti na omɔti a ndanda e bato badaka na nyongo e kumu. Abalaka na o boso: "nyongo e kumu edi motuya nda?" 6 Amosɔmbedjaka: Mimbonda mi munɛ mokama. Mobanei amotɔndeaka: "Tomba mokanda mo wɛ mo nyongo, daa ya ko koma pɛpɛlɛ tuku itano i mimbonda mi munɛ." 7 Abalaka na okina: "ko wɛ, nyongo e mokondji edi motuya nda?" Amosɔmbedjaka: "Sɛki i lɔsɔ mokama". Mobanei amotɔndeaka: "Tomba mokanda mo wɛ mo nyongo, daa ya koma pɛpɛlɛ tuku bo mwambe". 8 Ibea, mokondji asakoaka mobanei o kaso tine bowɛi bo nde. Tengasa bato ba ngondo ye badi na bowɛi bonɔ bana ba bohu.»

9 Endja: «Mbi nabalaka na nu: Imeani bange i badieli bataka ebodjɔ, tengasa ehole edabi bo pɛ boda, basɔbini ta ndako e seko. 10 Yona okaise molema ta baamidjɔ bakɛkɛ, akaise molema pongono ta midjɔ minɛnɛ. Yona odi na boloa ta baamidjɔ bakɛkɛ adi pongono na boloa ta midjɔ minɛnɛ. 11 Ekada boo oidaka na bodjo ta mondumba mo bosala bodieli bo bolowa bo ngondo ye, moto oboani aopɛni bodieli bopele nda? 12 Enakobea omiti enɛmɛni bodjo ta bobanea leka lo bato bakina, odi bopani leka lo bino bɛnɛ nda?» 13 «Mosali omɔti aboaniti bosalea bakumu babae. Tengasa, aboani bolona omɔti ko bopala okina, kaoko bosapa na omɔti ko bolona okina. Oboaniti boda mbala emɔti mosali o Ndjakomba ko na palanga*.»

14 Bapalusai, ibadaka na ekpaka e palanga bonɔ badaka baoka meako mimina misusu bataaka Yesu. 15 Yesu abalaka na bu: «Ino okasainedjeni bodjo ta miso ma bato, endolo Ndjakomba akadjebe milema mi bino. Tengasa eka ekalɛdje bato boo edi enɛnɛ, ekapɛ Ndjakomba kɛlɛ.

16 Ehole e mobeko mo Mose ko na buku i ba mbaeli ba Ndjakomba eyeyoa mbunoko ehole e Yoane Mobatisi. Donga ta ehole emina, Bwɛndi Bopele bo Bokumu bo Ndjakomba bodi bolehama ko bato basusu baboani boana na ngulu boo bakwe oho. 17 Busa na kpɔtɔ boboani bodimoa pɛpɛlɛ, endolo edi na bopipo boo nongo mo itɔnɔ o mobeko akwɛ.

18 Momi mosusu odongedji mwali o nde ta moki ko asɔi okina akɔi bɔɔli, ko yona oasɔi mwali odongedji bo ta moki akɔi bɔɔli.»

19 «Edaka na moto omɔti modieli, iyona odaka alwa bisendja bipele ko bi motuya monɛnɛ. Masu masusu ahelamaka bopele ko adaka ayaka elenge moto akɔkɔ tɛkɛ. 20 Ta boso bo ekukɛ e ndako e modiele motakeli omɔti asasambeaka ena. Kombe e nde Ladjalo, ko mokuku mo nde moluma na pola. 21 Adaka na posa e bosindja ndja e nde nongo na mbumbu ikwaka ta mesa e modieli; Ta polo emina, mbwa aduaka aomboa pola i nde. 22 Motakeli agwaka ko babwɛndji bamotombaka bamodedjaka mbuti na Abalayama. Modieli pongono agwaka ko bamopuseaka. 23 Adaka anɔngɔ mɛnɛ ta polo e ngando i bago. Ta ehole eangɔdjɔkɔ yo miso aenɛkɛ bohali Ladjalo adi mbuti na Abalayama. 24 Na bea alɛbɛkɛ: "Sange mbi Abalayama, okeani ndjokwa! Loma Ladjalo adube sɔngɔ e mosapi mo nde ta madiba tine botitimedjani molema, tengasa naenɛkɛ saya enɛnɛ iya ta mosa mu." 25 Endolo Abalayama amosɔmbedjaka: "Mwamba, lɛdjɛ odiaka bodieli bonɛnɛ ta mohelo mo wɛ mosusu, enakobea Ladjalo adaka aenɛ saya enɛnɛ. Edɛdi, mohelo mo nde modi ta iheme, ko wɛ wenɛkɛ saya. 26 Ko naikina, mombɔndɔ monɛnɛ modi ta pakaso e biso na nu. Mwɛngi moditi bato bodonga oho adi no bokatisa djɔno adi so, kaoko bodonga adi so bokatisa oho adi no." 27 Modieli abalaka: "Nongɔni Sange mba, loma nongo Ladjalo ta ndako e sange mbi, 28 oho nadi na bangi mbi batano. Akɛ abatɔndea, basaka dua pongono ta polo ye e saya." 29 Abalayama asɔmbedjaka: "Bangi wɛ badi na Mose na ba mbaeli ba Ndjakomba tine bobatɔndea boo baboke!" 30 Modieli abalaka: "Ngasa etabɔngɔ, sange mbi Abalayama. Endolo moto ogwa akakɛ oho Adibo, bahombedjake milema mi bobo." 31 Endolo Abalayama amosɔmbedjaka: "Bamiti oka Mose na ba mbaeli ba Ndjakomba, badimetebi nongo bapangoame na moto akapusoa adi bago."»