1 Oko ta ehole emina, koto na koto i bato baputoanaka ena, polo eboisa mako eidaka. Yesu abalaka boso na batingami ba nde: «Dani na edinga, na levile e bapalusai, badi ndjɔ o melo mibae. 2 Misusu mibolama mienɛmɛbi, misusu mi mbombi midjebamabi. 3 Na tina emina, misusu mabalake no ta modidi miokamabi ta moyi; ko misusu mibalabi no na popoli ta itoi, ta bikenge bi ndako bidipamake mibalamabi ta diko i ndako.»

4 «Notɔndeini, baningani: Pɛ bobangani bia bakowoe mokuku, tine boo baboaniti bokɔ eka ekina. 5 Napalaka noinedjeni moto oboani na nu bobanga. Bangani yona, ngɔngɔ i bowa, adi na kpatsi e bodumbani ta mosa mo ipelu. Soti, nabali na nu, edi yo oboani na nu bobanga!

6 «Te batɛke ba mbulu batano na palanga i bibende na motuya modi pɛ tina? Enakobea, Ndjakomba ta bose nongo mbulu omɔti. 7 Akadjebe nongo motuya mo swee i bino. Pɛ bobangani: onɔini mbulu bia na tina!»

8 Nabali na nu: moto obalabi ta boso bo bato: «Mbi nadi o Yesu;» ibea Mwana o Moto abalabi na nde pongono ta miso ma babwɛndji ba Ndjakomba: «Moto yona adi o mbi.» 9 Endolo moto akabala ta miso ma bato: «Mbi naditi o Yesu;» ibea Mwana o Moto abalabi na nde pongono ta miso ma babwɛndji ba Ndjakomba: «Moto yona aditi o mbi.» 10 Ko moto yona obalabi bobe ta tina e Mwana o Moto ayɛmɛbi; endolo yona osingabi Mwembo Mosɛnɔke ayɛmetebi.

11 «Ehole eotombabini bo ta ba sinagoga kaoko ta boso bo bakondji bɛngi bosambedjeni, pɛ bosatungeani na eka edi no bobala ta ehole edi no bosamba. 12 Tengasa Mwembo Mosɛnɔke aolehabini ta ehole yena eka eboani na nu bobala.»

13 A ndanda e bato, moto omɔti abalaka na Yesu: «Molehi, bala na mwange e mbi akabane bodieli bokina sange biso.» 14 Yesu amosɔmbedjaka: «Omina ohɔini mosambedji koako mokati o midjɔ mi bodieli bo bino nda?» 15 Ko abalaka na bu basusu: «Kɔni engɛlɛ! Tengasa osaka dani na posa ebolumedja bodieli, mohelo mo moto moditi tine bodieli bodi na nde.»

16 Abatɔndeaka isɛ imɔti: «Modieli omɔti adaka na gbie e nde emoboteaka mbuma djinɛnɛ. 17 Adaka alɛdjɛ ko bosahɔdjɔ: "Nakɔe bo? Naditi na polo e bobomba mbuma i mbi." 18 Ngɔngɔ abalaka endja: "Eka eboani na mbi bokɔ: Nabukake ndako i boso, na tongake inɔi na bonɛnɛ, bɛngi naise mbuma i mbi ibule ko na madieli makina oho. 19 Ngɔngɔ, asabaleaka yo mɛnɛ: O, mohelo mo mbi olumi na bodieli bonɛnɛ tine bianga binɛnɛ! Pɛ bosatungea naikina, yaka, mwaka ko sepa." 20 Endolo Ndjakomba abalaka na nde: "Moto otaka e bowɛi! Oko ta bulu bu wagwaka. Ko na bea, lolumedja wɛ lodikabi na nda?"» 21 Edi oko bea adi moto yona okabombe leka tine e nde yo mɛnɛ, endolo aditi modieli ta miso ma Ndjakomba.

22 Ngɔngɔ Yesu abalaka na batingami ba nde: «Endjani eka abalaka mbi na nu: pɛ bosatungeani ta mohelo mo bino, tine leka loboyaka. Pɛ bosatungeani na mikuku mi bino, tine bisendja bibolwa. 23 Tengasa mohelo monɔi mia na motuya, ko mokuku monɔi bisendja na motuya. 24 Endjani bingbondo: Tebaone gbie, tebabukake eka emɔti, editi na ndako e bobomba leka ko editi na ndako; endolo Ndjakomba akabayedje. Na bea ino onɔitini mbulu, na tina? 25 Ndani ta tei e bino, aboani bokaedja masu ma nde ma mohelo, nabokɛsɛdji bodi na nde? 26 Omitidani na mwɛngi mo bokɔ moeka mokɛkɛ, tina nda odini bosatungeani na lokina? 27 Endjani moda mokatɔe pulɛlɛ: Te i salake, ko te djisatongeake bisendja. Endolo, notɔndeakani, nongo Salomo ta bokumu bo nde bosusu, ailwa nongo bisendja bipele bokokana na pulɛlɛ. 28 Ekadabo Ndjakomba akaloadje ndjani idi busa bu ta gbie ko puma djadumbamake ta mosa: aboaniti bolwadja no? Bato ba bodima bokɛkɛ! 29 Pɛ bosatungeakani: "Ayake so nde? Amwake so nde? Alwake so nde?" 30 Edi bato bakadae pɛ bodjeba Ndjakomba bakasatungee na meako mimina mi ngondo bihole bisusu. Endolo ta tina e bino, Sange e bino akadjebe boo odini na lu na posa. 31 Hombani boso bokumu bo Ndjakomba ko losusu lodiki lopamabi na nu.»

32 Pɛ bobangani, engbanga e bhata ekɛkɛ! Tengasa Sange e bino asepi bopani Bokumu.

33 Tɛkɛni leka lo bino ko pani palanga adi batakeli. Bombani leka lo bino ta ibenga ikadae pɛ bobeha, bombani bodieli bo bino ta busa, oho moibi ataimea ko sɛ batabedja. 34 Tengasa polo edi bodieli bo wɛ, adi molema mo wɛ oko ena.

35 «Salingoani ta mosala ko sangatanani boo milinda mi bino midae bihole bisusu mibwanake. 36 Dani elenge basali bia bambaka ihule i Kumu o bobo yona ahulake ta tɛkɛ e moki, na tina e bomodipoa ekukɛ ta ehole aimeake yo ko abomake yo ekukɛ. 37 Sepi adi basali ta ihule i Kumu o bobo abataneake badi mosu! Nabali na nu, edi soti: alwabi bisendja bi mosala, abadedjabi ta mesa ko abapabi mia ma boyaka. 38 Ekadabo ahuli na bulu kaoko ta kɔkɔ o boso, akabatanea mosu, yana mɛnɛ adabi na basali na sepi!»

39 «Djebani bopele mɛnɛ: ekada boo Moswa ndako akadjeba ehole eboani moibi bo dua, atakinake boo akwe ta ndako e nde. 40 Ino pongono, sangatanani tengasa Mwana o Moto aduabi ta ehole edi no pɛ bolɛdjɛ.»

41 Piɛlɛ abalaka: «Kumu, edi tine biso abalaka na wɛ isɛ i mina kaoko tine bato basusu?» 42 Kumu asɔmbedjaka: «Mosali okaisebo molema ko na bowɛi adi nda? Edi yona, kumu amopabi mosala mobosɛndjɛlɛ ndako ko bopa adi bakina basali ma bobo mia ta ehole eboani. 43 Sepi na mosali, yona ta ihule i Kumu o nde, amotaneake adi ta mosala! 44 Ta Soti, nabali na nu, Kumu amopabi kpatsi ebobanea leka lo nde losusu. 45 Endolo ekada boo mosali mwali asabalei ta molema: "kumu o mbi atahulake edɛdi"; aimei bonɔngedja basali bamina bali, boyaka, bomwaka ko bolangoa; 46 Bea kumu o nde ahulabi ta isu idi mosali pɛ bodjeba; amopabi etumbo epipo ko amoisabi ta molɔngɔ mo basali babe. 47 Mosali yona okadjebe midjɔ mikapale kumu o nde, endolo amiti mikɔ na bokokedja posa e kumu o nde akɛsɛmɛbi mbalake djinɛnɛ. 48 Tengasa, yona okadae pɛ bodjeba bokɔ midjɔ mikapale kumu ko akɔi meako miboani na nde bodiha etumbo; bamokɛsɛbi mbalake djikɛkɛ. Adi moto ndani odihi lonɛnɛ, bamosɛngɛbi lonɛnɛ: basɛngɛke adi moto boboana nalodihi yo.»

49 «Mbi nadua tine boisa mosa ta ngondo. Posa e mbi edi na moenɛ mabwana! 50 Natungi nadie inelo* imɔti ko molema mo mbi modi na mosa tine boo napakini ainama! 51 Olɛdjini nadua apa bogo ta ngondo? Ngasa, nabali na nu, nadoi agbɔtodja. 52 Tengasa, donga iya edɛdi batano ta ndako emɔti bagbɔtɔbi: basato bolona babae, ko babae bolona basato; 53 Sange e moto agbɔtɔbi na mwana o nde ko mwana agbɔtɔbi na sange e nde; nange moto agbɔtɔbi na mwana o nde o mwali ko mwana mwali agbɔtɔbi na nange e nde; bokio bo mwali agbɔtɔbi na mwali o mwana o nde momi, mwali o mwana o nde momi agbɔtɔbi na bokio bo nde mwali*.»

54 Abalaka naikina na emumu e bato: «Ehole enino itute iangɔi ta pamba ekasame modakabusa, okabaleni: "Mbua adoi akwa" ko ekakɔme oko bea. 55 Ko ehole enino mopɛpɛ modongi ta satina, okabaleni: "Busa bu edjungu edake epipo", ko ekakɔme oko bea. 56 Ndjɔ ba melo mibae! Okadjebeni botikoanedjani bimbete bi ngondo ko na bi busa. Tina ndani otadjebakani bihole biedɛdi?»

57 «Tina nda ino bɛnɛ totikoanedjeni midjɔ midi ta tei e bino na bodjo? 58 Ehole edi wɛ na modjɔ na moto ko okɛini ta boso bo djudji, kɔɔ na ngulu boo okaneni ehole edi no na ndjea. Tengasa aotombake ta boso bo djudji, ko djudji akaopa ta mɔmɔ ma pulusu ko pulusu aisake ta bɔlɔkɔ. 59 Nabali na wɛ: oimetebi ena oko opute nyongo e wɛ, mbunoko ta palanga esuka.»