1 Ta ehole emina, bato bakɛkɛ baduaka adi Yesu. Bamotɔndeaka meako misusu mikɔkɔ Pilato moda mowaka yo Bagalilea ta ehole edaka bo batumbea Ndjakomba mbeka e makia. 2 Yesu abasɔmbedja: «Walɛdjɛkɛni boo Bagalilea bamina banɔkɔ Bagalilea basusu na bobe, tine babowoe bea?» 3 Ngasa, nabali na nu. Endolo omiti hombedjani milema, wagwakeni no basusu oko elenge bo. 4 «Ko bato domi na bo mwambe bia bagwa ehole ebukea egbili e Silowe: walɛdjɛkɛni boo bato bamina banɔkɔ na bobe bato basusu ba Yelusalɛmɛ? 5 Ngasa, nabali na nu: Endolo omiti hombedjani milema, wagwakeni elenge bo.»

6 Na bea Yesu abalaka pongono isɛ di: «Moto omɔti aonaka mole mo pigi ta gbie e nde e vino. Akɛkɛ ahomba mbuma aidiaka. 7 Na bea abalaka na mosali: "Endja: enɔi mbula basato, nakadue ahomba mbuma ta mole mu, tenadiake. Mokwɛlɛ! Tine modjikikali oko ngasa." 8 Endolo mosali amosɔmbedjaka: "Kumu, petemokina; nalongeake kpɔtɔ mbuti ko naisake kasa djipɔlu. 9 Ehole ekina mabotakedea mbuma ta mbula o ngɔngɔ; momitikobota, oboani bomokwɛlɛ."»

10 Busa bomɔti bo sabata, Yesu adaka aleha ta sinagoga. 11 Mwali omɔti opekaka bianga domi na bo mwambe adaka ena. Mwembo mobe mo mobuka mokɔngɔ adaka mongundamake ko aidaka na mwɛngi mobosaninodja. 12 Ehole enɛkɛ Yesu mwali omina, amobeaka ko abalaka na nde: «Oheli na yogo e wɛ.» 13 Amobakeaka mɔmɔ, mbala emɔti, asaninɔdji ko abangaka bokumedja Ndjakomba. 14 Endolo mokondji o sinagoga, aoka kɛlɛ moda moheledja Yesu mwali omina ta busa bo sabata. Abalaka na emumu e bato: «Lodi na masu masamano ma mosala; dua ahombani mohelo ta masu mamina, te ta busa bo sabata!» 15 Kumu amosɔmbedjaka: «Ndjɔ ba melo mibae! Ta busa bo sabata, pɛ nongo omɔti ta tei bino taimedje ngɔmbɛ kaoko ane* o nde ta ikutu, bɛngi akɛ aeyakedja, kaoko aenusedja madiba? 16 Ko mwali yo, adi o mbota e Abalayama; Satana amonanga bianga domi na bo mwambe, aboaniti bohela ta busa bu bo sabata?» 17 Ehole ebalaka Yesu bea baloni ba nde baokaka sɔni. Endolo emumu e bato esusu basepaka na misala mibokamoa imikɔkɔ Yesu.

18 Yesu abalaka: «Bokumu bo Ndjakomba bo boani na ye? Naboboanedje mɛnɛ na eka nda? 19 Eboani na mbuma e motade etomba moto ko eonaka ta gbie e nde: ekakandoe, ekaime mole monɛnɛ, ko mbulu idiko botonga mopo ta bitape bi mole momina.»

20 Yesu abalaka naikina: «Naboanedje Bokumu bo Ndjakomba na ye? 21 Boboani na bole bo levile ekatombe mwali abongoanedji na kɔbɔ isato i palini, ko mobɔtu momina mosusu mohaloi.»

22 Yesu adaka akɛ ta Yelusalɛmɛ akatisaka mabonga manɛnɛnɛ na makɛkɛkɛ ko alehaka. 23 Moto omɔti amohɔdjɔkɔ: «Kumu, Ndjakomba aheledjabi oko bato bakɛkɛ?» Yesu amosɔmbedja: 24 «Kweani ta ekukɛ e embamba; tengasa nabali na nu, banɛnɛ bahombabi bokwea ko bakoketebi bokwea.

25 «Ehole esangɔdjɔbi moswa ndako ko akangabi ekukɛ na pungola, odikabini sokolu, obomakabini ekukɛ ko obalakabini: "Kumu, lodipoa!", Aosɔmbedjabini: "Natodjebakani!" 26 Na bea, obalabini na nde: "loyaka ko lo mwaka na wɛ, olehaka ta ndjea i mabonga ma biso manɛnɛ!" 27 Aosɔmbedjabi naikina: "Natodjebakani. Dongani mbuti na mbi, Ino bato babe!" 28 Oho edabi biyo na bokpɛkɛlɛ mino, ehole enɛbi no Abalayama, Isaka, Djakobo ko ba mbaeli ba Ndjakomba basusu ta Bokumu bo Ndjakomba; endolo ino odumbamabini sokolu! 29 Bato badongakabi ta dɔngɔ ikime moi na ikasame moi, ta sadiko na satina; tine boda polo emɔti ta mesa e Bokumu bo Ndjakomba. 30 Na bea, bato ba ngɔngɔ badakabi bato ba boso ko bato ba boso badakabi bato ba ngɔngɔ.»

31 Oko ta ehole emina, bakina bapalusai ba batamaka mbuti na Yesu ko babalaka: «Donga ya, kɛ pamba ekina, tengasa Elode ahombaka aowoe.» 32 Yesu abasɔmbedja: «Kɛni atɔndea ebanga* omina: "Nabenganaka miembo mibe ko naheledjaka bato busa bu mbunoko puma, ko ta isu i basato nasidjake mosala mo mbi*." 33 Endolo etungi nakɛ oko busa bu, puma na puma sɛnɛ, tengasa eboaniti na mbaeli o Ndjakomba agwɛ sokolu e Yelusalɛmɛ.»

34 «Yelusalɛmɛ, Yelusalɛmɛ, wɛ iyo okowoe ba mbaeli ba Ndjakomba ko okabowoe na mabanga bato bakolomee Ndjakomba! Mbala djeka ikahombe mbi bobongoanedja bana ba wɛ polo emɔti, elenge ekabongoanedje kɔkɔ bana ba bobo ta mangbangu ma bobo! Endolo wɛ oipalaka! 35 Endja ndako e wɛ edɛdi esundolamake*! Nabali na nu: Oenɛtebinini mbunoko busa bobalabino: "Ndjakomba adjongoe yona aduake na kombe e Kumu*!"»