1 Yesu abeaka batingami ba nde domi na babae, ko abapaka kpatsi e bobengana miembo mibe, na boheledja bato ba bipeko. 2 Abalomaka bodjebedja Bokumu bo Ndjakomba na boheledja bato ba bipeko. 3 Ko abatɔndeaka: «Pɛ botombani eka emɔti tine mɔndɔ: Pɛ pango, pɛ sɛki, pɛ mwɛmbɛ, pɛ palanga ko moto omɔti pɛ botomba bisendja bibae. 4 Bakoasɔni ta ndako emɔti, dani ena mbunoko okakinani polo emina. 5 Endolo bamiti oasɔni, dongani ta ibonga i bobo, ko bhubholani dutu i mako ma bino: adake embete e sambi e bobo.» 6 Batingami bakɛkɛ ko badaka banɔe ta ngando isusu boleha Bwɛndi Bopele ko boheledja bato ba bipeko pamba isusu.

7 Elode, Gupɛnɛlɛ, aokaka gala e meako misusu mibalaka bo ko aimeaka bosatungea, tengasa bato bakina babalaka: «Yoane Mobatisi asapusoaka ta tei e bago.» 8 Bato bakina badaka babala: «Elia aimani.» Bato bakina badaka babala: «Edi omɔti o ba mbaeli ba Ndjakomba bayou apusoi ta tei e bago.» 9 Endolo Elode abalaka: «Edi Yoane Mobatisi yona olenedjaka mbi molo, apusoi! Moto omina nda wokaka mbi akɔkɔ midjɔ imi misusu adi mɛnɛ nda?». Na bea ahombaka aenɛ Yesu.

10 Bapɔsɔlu bahulaka ko batɔndeaka Yesu meako misusu mikɔkɔ bo. Yesu abatombaka ko akɛkɛ na bu basadea bo bɛnɛ mbuti na ibonga ibeaka bo Betesaida. 11 Endolo emumu e bato badjebaka bea, bamokimanaka. Yesu abasɔkɔ, abalehaka Bwɛndi bo Bokumu bo Ndjakomba na aheledjaka bia badaka na posa e mohelo. 12 Busa bobangaka botita, batingami domi na babae basalindaka mbuti na Yesu ko bamotɔndeaka: «Yanedja bato, bakɛ awɛɛ ta mabonga na ta mako imi madi mbuti mbuti ko bahombe mia, tengasa lodi iya ta etengelenge.» 13 Endolo yo abalaka na bu: «Ino bɛnɛ bapani mia!» Bamosɔmbedjaka: «Lodi oko na miɛmbɛ mitano na swi babae. Bala bo lokɛ asomba mia tina e bato ibi basusu!» 14 Bato badaka ena bonɔ mbuti na koto itano. Yesu abalaka na batingami ba nde: «Badedjani na mobondo bibole tuku itano tuku itano.» 15 Batingami basumaka ko bakɔkɔ oko bea. 16 Yesu atombaka miɛmbɛ mitano na swi babae. Angɔdjɔkɔ miso o diko ko apaka Ndjakomba mɛlɛsi tine leka lomina. Amapaka adi batingami ba kabane emumu bato. 17 Bato basusu bayaka ko bagolaka. Bandoanaka bikengakengi bia bidikaka ko balumedjaka mitinga domi na babae.

18 Busa bomɔti, Yesu aongɔnɔkɔ asatswa na bu ko batingami ba nde badaka engbanga na nde. Yo abahɔdjɔkɔ: «Bato bakabale mbi nadi nda?» 19 Bamosɔmbedjaka: «Bato bakina bakabale boo wɛ odi Yoane Mobatisi, bakina ko wɛ odi Elia, na bakina bakabale odi omɔti o ba mbaeli ba Ndjakomba ibayou opusoa.» 20 «Yesu abahɔdjɔkɔ: ibea ta tina e bino, okabaleni mbi nadi nda?» Piɛlɛ amosɔmbedjaka: «Wɛ odi Kilito o Ndjakomba.»

21 Yesu abakebedjaka mɛnɛ badae pɛ botondea moto. 22 Yesu abakeaka: «Eboani bo Mwana o Moto aoke saya enɛnɛ. Basuku ba ibonga bamolone, bakondji ba banganga ba Ndjakomba na balehi ba mobeko, bamodumbe bamowake ngɔngɔ isu i basato, apusoabi.»

23 Yesu abalaka na bu basusu: «Moto akapala bokimanani, asalone yo mɛnɛ atombe ekulusu e nde isu na isu ko akimaneni. 24 Tengasa moto opali boheledja bomɔ bo nde, abobungedjake; endolo yona wabungedjake bomɔ bo nde ta tina e mbi, aboheledjabi. 25 Tɛtɔ adiake moto nda ekadabo adie ngondo esusu ko abungedji kaoko akabedja mohelo mo nde? 26 Moto akokani sɔni ko na mibalo mi mbi, Mwana o Moto pongono amokabi sɔni ehole eduabi yo na ekumu e nde, na e kumu e Sango ko na babwɛndji basɛnɔke. 27 Nabali na nu soti: bakina badi iya bagwɛtebi, boso bo baenɛ Bokondji bo Ndjakomba.»

28 Ngɔngɔ i meako mimina, enɔkɔ masu bomwambe, Yesu abaeka Piɛlɛ, Yoane na Djake; akɛkɛ na bu ta diko i ikoli tine bongɔnɔ. 29 Ehole edaka yo aongɔnɔ, boso bo nde bohombanaka moda mokina na bisendja bi nde bimeaka bipu ipɛɛ. 30 Gbundumo bato babae badaka basolana na nde, edaka Mose ko Elia. 31 Bahuamaka na ekumu e Ndjakomba. Badaka babala na Yesu tine mwɛngɔ mo nde mosuka, imua makokedjamake ta Yelusalɛmɛ. 32 Piɛlɛ na binande bawɛkɛ hiɔ. Ehole esiswaka bo, baɛnɛkɛ ekumu e Ndjakomba ewhui Yesu na bami babae bia badaka na nde engbanga. 33 Ehole egbɔtɔ bo na Yesu, Piɛlɛ abalaka na nde: «Molehi, edi bopele lodae ya, lopike ndako isato: emɔti tine wɛ, emɔti tine Mose, emɔti tine Elia.» Enakobea Pielɛ aidjebaka meako mibalaka yo. 34 Ehole edaka yo abala bea, itute imɔti iduaka bobahua. Batingami baokaka bɔɔ bonɛnɛ aenɛ boo itute bobahua. 35 Ko moholi momɔti moimaka ta itute bobala: «Iyo adi Mwana o Mbi, iyo ohɔi mbi, mokani!» 36 Ehole esiaka moholi bobala, baenɛkɛ Yesu oko yo mɛnɛ. Ta ehole emina, batingami babombaka meako mimina ko baitɔndeaka nongo moto omɔti.

37 Aya busa, bakinaka ikoli, emumu e bato baduaka asakana na Yesu. 38 Ta ndanda e bato bamina banɛnɛ, moto omɔti abangaka bogama: «Molehi, naongɔni, endja mwana o mbi, nadi na nde oko omɔti! 39 Mbala isusu mwembo mobe mokamodumbe, ibea akaime bogama, mokamopukuse ko bosadumba ta kpɔtɔ, akaime boima masɔi ta monɔkɔ. Mwembo momina mokamokedje saya ko temomokine pɛpɛlɛ. 40 Naongɔnɔki batingami ba wɛ bamobengane, endolo bakokiti.»

41 Yesu abalaka: «Bato ba milema mipipo ko bataki bodjo! Mbunoko ehole nda edabi mbi na nu? Naohɔneni mbunoko ehole nda?» Abalaka na moto omina: «Dua na mwana o wɛ iya.» 42 Ehole aimeaka mwana mbuti na Yesu, mwembo mobe momopukusaka ko momodumbaka ta kpɔtɔ. Endolo Yesu abenganaka mwembo mobe momina, aheledjaka mwana ko amopaka adi sange e nde. 43 Ko bato basusu bakamoaka na ngulu enɛnɛ e Ndjakomba.

Ko moto na moto adaka bokamoa na misusu mikɔkɔ Yesu, atɔndeaka batingami ba nde: 44 «Hokamedjani bopele meako midi mbi botɔndeani edɛdi: Mwana o Moto akabamake ta mɔmɔ ma bato.» 45 Endolo baidjebaka mibalo mimina, tengasa midika Adibo mbombi tine baidjebaka eka epalaka Yesu bobala; ko babangaka bohɔdjɔ Yesu tina emina.

46 Batingami badaka baboma kitɛ tine bodjeba: A ndanda e bobo, onɔi bina nde nda? 47 Yesu adjebaka midjɔ midaka bo balɛdjɛ, atombaka mwana mokɛkɛ omɔti, amoemeaka mbuti na nde, 48 ko abatɔndeaka boo: «Moto yona oasɔi mwana iyo ta kombe e mbi, asɔi mbi mɛnɛ, na yona oasɔini, asɔi yona olomakani, tengasa yona onɔi mokɛkɛ ta tei e bino, yo anɔi monɛnɛ.»

49 Yoane abalaka na Yesu: «Molehi, loenɛki moto omɔti adaki abengana membo mibe na kombe e wɛ lohombaka lomosie, tine aditi naiso engbanga.» 50 Endolo Yesu amosombedjaka: «Pɛ bomosiani, moto yona odi pɛ bolonani, edi tina e bino.»

51 Ehole ebatamaka masu ma Yesu bokina ngondo ye, atombaka meko boo akɛ ta Yelusalɛmɛ. 52 Alomaka balomami boso bo nde. Bato bamina bakɛ ko bakweaka ta ngando emɔti e Samalia tine bomobongedja midjɔ misusu. 53 Endolo bato ba ngando emina balonaka bomoasɔ, tine adaka akɛ ta Yelusalɛmɛ. 54 Ehole eokaka Djake na Yoane bea, babalaka: «Kumu, opali lobee mosa modonge o diko, motite ko mobedje bato bamina?»

55 Yesu ahombanaka tine bobaendja bopele ko abadosaka. 56 Ko bakɛkɛ ta ngando ekina.

57 Ehole edaka bo na ndjea, moto omɔti abalaka na Yesu: «Kumu, mbi nokimanake ta bisika bisusu bakɛkɛ wɛ.» 58 Yesu abalaka na nde: «Ebanga adi na makuku ko na mbulu ba diko badi na mopo; endolo mwana o moto yo aditi na polo e bosambea molo.»

59 Yesu abalaka na moto okina: «kimani» Endolo moto omina amosɔmbedjaka: «Kumu pani enɔi nakɛ apusea Sange e mbi boso.»

60 Yesu amosɔmbedjaka: «Kina bago bapuse bago, endolo wɛ kɛ aleha Bokumu bo Ndjakomba.»

61 Moto okina abalaka na Yesu: «Kumu, napalaka nokimane, endolo pani enɔi nakɛ boiseana na denga i mbi.» 62 Yesu amosɔmbendjaka: «Molieli o gbie talɛ mɛngɛ sangɔngɔ. Akaedja ngɔngɔ aboaniti na Bokumu bo Ndjakomba.»