1 Ehole esidjaka Yesu bobala meako mimina misusu na emumu e bato emohikaka, ayanaka ta Kapalanauma. 2 Oho, kapitɛne o basoda mokama o Loma adaka na mosali o nde omɔti yona opalaka yo mɛnɛ. Mosali omina adaka apeka na yogo mbuti na bogwa. 3 Ehole eokaka kapitɛni bobala na tina e Yesu, alomaka bakumu ba Bayuda adi Yesu boo bamotɔnde adue aheledja mosali o nde. 4 Ehole eimeaka bakumu ba Bayuda adi Yesu, bomongɔnɔkɔ mɛnɛ ko babalaka: «Moto omina aboani na wɛ omokamoe, 5 Tengasa akapale bato ba biso ko edi yo moto olotongea sinagoga e biso.» 6 Na bea Yesu akɛkɛ na bu engbanga emɔti. Ehole eimeakabo mbuti na ndako e kapitɛne o basoda mokama o Loma, alomaka babinande boo batɔnde Yesu: «Kumu, pɛ bosatungea mbi nabosaniti boo okwe ta ndako e mbi. 7 Edi na tina emina, napalakiti mbi mɛnɛ bodua adi wɛ. Endolo bala oko kɔpi emɔti, mosali o mbi ahelake. 8 Mbi mɛnɛ, nadi na bakondji bia bakasume mbi, nadi na basoda pongono bakasumeni. Nakabala na omɔti: "kɛ!", Akɛi; nakabala na okina: "Dua!", Adoi; ko nakabala na mosali o mbi: "Ko bo!", Akɔi.» 9 Ehole eokaka Yesu mibalo mimina, asepaka na nde mɛnɛ. Ahombanaka adi emumu e bato bamokimanaka ko abalaka: «Notɔndeakani: "Nongo ta Isalɛlɛ, naipakenɛ moto o bodima moda mu!"»

10 Ehole eyanaka bato balomaka kapitɛni bataneaka ta ndako, mosali omina amahela.

11 Aya busa Yesu akɛkɛ ta ibonga imɔti na kombe e Naine. Batingami ba nde na emumu e bato bakɛkɛ na nde engbanga. 12 Ehole eimeaka yo mbuti na modipe mo ibonga, basakanaka na bato bakɛ apusea mwana omɔti ogwaka. Mwana momi adaka o ikinda, o mwali ogwa na momi. Ko bato banɛnɛ ba ibonga imina badaka na nde engbanga. 13 Oko ta ehole emoenɛkɛ Kumu, ko amokeaka ndjokwa enɛnɛ. Abalaka na nde: «Kina boeya!» 14 Ko Yesu abatamaka mbuti, apeaka mosongo, ko bato iba songaka baemaka. Yesu abalaka: «Mwenga, nabali na wɛ, angɔ!» 15 Mwana yona ogwaka asisoa; adaka na mobondo ko abangaka bobala. Yesu amopaka adi nange e nde. 16 Bato basusu balumaka na bɔɔ, ko bakumedjaka Ndjakomba babalaka: «Mbaeli o Ndjakomba monɛnɛ aimi ta ibonga i biso!» Ko pongono: «Ndjakomba adoi akɔmedja bato ba nde!» 17 Gala e meako imikɔ Yesu enanganaka ta Yudea esusu ko ta ngando i mbuti mbuti.

18 Batingami ba Yoane bamotɔndeaka midjɔ iminɔkɔ misusu. Ibea Yoane abeaka batingami ba nde babae, 19 ko abalomaka adi Kumu Yesu bɛngi bamohɔdje: «Edi wɛ Masiya, yona oboani bodua kaoko loboani boamba moto okina?» 20 Ehole eimeaka bo adi Yesu, babalaka na nde: «Yoane Mobatisi alolomi adi wɛ tine lohɔdje: "Edi wɛ, yona aduake kaoko eboani na su boamba moto okina?"» 21 Oko ta ehole emina, Yesu aheledjaka bato banɛnɛ ba bego, bitumbɛ, bato badaka na miembo mibe ko bato ba miso mago banɛnɛ. 22 Na bea Yesu ayanedjaka bato ibalomaka Yoane: «Kɛni amotɔndeni imi misusu mieni no ko miokino: bato iba bagwa miso baeni, bitumbɛ ibaondɔ mako badali, bato ba bohoka booki, bato ba mabha basɛnɔi, bato ibagwa basombi ta bomɔ, ko Bwɛndi Bopele batɔndeamaka adi batakeli. 23 Sepi adi moto wadake pɛ boda ibaku tina e mbi!»

24 Ehole eyanaka bato ibalomaka Yoane, Yesu abangaka botɔndea bato banɛnɛ ta tina e Yoane. Abalaka: «Okɛkini ta etengelenge aendja nda? Mososongo mokumani na mopɛpɛ? Ngasa? 25 Emitida bea okɛkɛni aendja mɛnɛ nda? Moto yona oloaki bisendja bi gala? Ngasa, bato ibakalwae bisendja bi gala bakahele ta bodieli bakadae ta ndako i bakondji. 26 Ibea okɛkini mɛnɛ aendja nda? Mbaeli o Ndjakomba omɔti? Soti, notɔndeini, yona anɔi nongo mbaeli o Ndjakomba. 27 Edi tina e Yoane ekomama:

"Nalomi ta boso bo wɛ molomami o mbi

Ebɛngi abɔngedje ndjea e wɛ."

28 «Nabali na nu, ta ndanda e bato babotama na mwali, pɛ moto onɔi Yoane na bonɛnɛ; enakobea, yona odi mokɛkɛ bonɔ ta Bokumu bo Ndjakomba adi monɛnɛ bonɔ yo. 29 Bato basusu na baputedji ba puti ibamokaka badimaka boo Ndjakomba adi bodjo ko badima boinama na ndjea e Yoane. 30 Endolo Bapalusai ko balehi ba mobeko balonaka bibɔngedji bi Ndjakomba ta tina e bobo, baidimaka boinama na Yoane.»

31 Yesu abalaka naikina: «Naboani bokokanedja bato ba ehole ye na nda? Baboani na ba nda? 32 Baboani na bana bia badi na mobondo ta polo e bhuda, basayeanaka bo na ibo:

"Lohueyaka piololo, oibuwani;

Loembaka ndjembo indjokwa, oiyeani!"

33 Tengasa, Yoane Mobatisi aduaka, aiyakaka miɛmbɛ ko aimwaka mana ma vino. Obalakani bo? Obalakani: "Adi na mwembo mobe!" 34 Iya adua Mwana o Moto, ayaka mia, amwaka vino ko obalakani: "Adi na posa eboyaka ko bomwaka vino, adi mwange e baputedji ba puti ko bato babe!" 35 Endolo djebeli e Ndjakomba bodjebani edi bodjo ta pamba e bato basusu bia bakamodime.»

36 Mopalusai omɔti amobeaka bo akayaka mia ta ndako e nde, akweaka ta ndako emina ko adaka ta mesa tine boyaka. 37 Ta ibonga imina edaka na, mwali omɔti o mabe. Ehole aokaka yo boo Yesu adi ta ndako e Mopalusai, aduaka na molangi molumake na malasi ma motuya monɛnɛ. 38 Adaka mbuti na mako ma Yesu, aeyaka, ko mbisoli i nde, ipoedjaka mako ma Yesu. Adaka ahakoa mako ma Yesu na swe i nde ko amabhimbaka eni amasopea malasi mamina. 39 Ehole enɛkɛ Mopalusai yona obeaka Yesu bea, asabaleaka: «Esedabo moto iyo adi soti mbaeli o Ndjakomba, aboanaki adjebe mɛnɛ moda mo mwali iyo osapea boo adi mwali o gala ebe.»

40 Yesu abalaka na Mopalusai: «Simo, nadi na meako mibobala na wɛ», «Molehi, bala.» 41 Ko Yesu abalaka: «Moto omɔti abekedjaka bato babae bibende bi pata. Moto o boso aboanaka bosɔmbedja motuya mo bibende bi pata mikama mitano; okina, motuya mo bibende bi pata tuku itano. 42 Ibea pɛ nongo moto omɔti ta ndanda e bobo aidaka na enɔi e boputa nyongo e nde. Ta tei e bobo babae, omopalabi mɛnɛ nda?»

43 Simo asɔmbedjaka: «Nalɛdji edi yona odi na nyongo enɛnɛ.» Yesu abalaka na nde: «Wɛ olongi.»

44 Yesu ahombanaka adi mwali ko abalaka na Simo: «Wɛ oeni mwali iyo? Nakwei ta ndako e wɛ; wɛ opitini madiba ma bososa na mako; endolo yo, asosi mako ma mbi na mbisoli i nde ko adji hakoi na swe i nde. 45 Wɛ obhimbitini endolo yo, donga akweaki mbi ta ndako wɛ, akiniti bobhimba mako ma mbi 46 Osopeitini malasi ta molo mo mbi endolo yo, asopeini malasi ta mako ma mbi. 47 Edi tina e mina notɔndeaka bo mabe ma nde masusu mayɛmi, tine bo ainedjini epaeli enɛnɛ. Endolo ta pamba e moto oyɛi bo na nyongo ekɛkɛ ainedjabi epaeli ekɛkɛ.» 48 Ibea Yesu abalaka na mwali omina: «Mabe ma wɛ mayɛmi.» 49 Bato bia badaka na nde bayaka mia ta mesa baimeaka bosabaleana ta tei e milema mi bobo! «Asenɛkɛ nda ebɛngi ayɛ mabe ma bato?» 50 Endolo Yesu abalaka na mwali omina: «Edimeli e wɛ eoheledji. Kɛɛ na bogo.»