1 Ta ehole emina, kumu monɛnɛ o Loma Sedjale Ogusitɛ, apaka mobeko boo bato basusu bakɛ bokomedja kombe tine bodjeba motango mo bato basusu badaka ta ngondo ekondjaka yo ta Loma. 2 Edaka mbala e boso e bokomedja kombe ehole edaka Kilinusu gupɛnɛlɛ ta ngondo e Sulia. 3 Bato basusu bakɛkɛ bokomedja kombe, moto na moto na ibonga i nde mɛnɛ. 4 Esepu akinaka Nasaleta ta ekenge e ibonga i Galilea. Akɛkɛ ta Bɛtɛlɛmɛ ta ekenge e ibonga i Yudea, tengasa adaka moto o denga i ibonga ibotamaka Dapiti.

5 Akɛkɛ bokomedja kombe e nde engbanga emɔti na Malia, mwali o nde ohɔmɔkɔ na moki ko yona odaka na demi. 6 Enakobea ehole edaka bo ta Bɛtɛlɛmɛ, masu ma bobota bo nde makokaka. 7 Ibea Malia abotaka mwana momi o boso o nde, amohuaka na bisendja ko amosambeaka ta eyedji e bhata, tengasa polo eidaka tine bobo ta ndako ekasɔe bo bakɛndɛli.

8 Ta ibonga imina, babanei ba bhata badaka ta gbie tine e bobanea bhata na bulu. 9 Obwɛndji o Kumu asainedjaka ta boso bo bobo, ibea bohu bo ekumu e kumu ebadipaka ko baimeaka na bɔɔ mɛnɛ. 10 Na bea obwɛndji abalaka na bu: «Pɛ bobangani, tengasa nadoi aotɔndeani Bwɛndi bo mɔti bopele, ibu bosepedjabi bato basusu. 11 Na bulu bo busa bu, baoboteini Moheledji ta ibonga i Dapiti, yo adi Kilito, Kumu. 12 Ko endja embete e bokamoa iye eopini mbi: wataneakeni mwana mopu oboti bo, ahuami na bisendja ko asambi ta eyedji e bhata.»

13 Na mbala emɔti, obwɛndji ko na bakina banɛnɛ baduaka aputoana na nde ko babangaka bokumedja Ndjakomba. Babalaka:

14 «Ekumu adi Ndjakomba iyona odi diko i losusu,

ko bogo ta kpɔtɔ adi bato bakamopale!»

15 Ehole eyanaka babwɛndji o diko, babanei ba bhata basabaleanaka: «Lokɛni ta Bɛtɛlɛmɛ tine bodjeba meako imi misimea, milotɔndei Kumu.» 16 Bakɛkɛ pɛpɛlɛ ta Bɛtɛlɛmɛ ko bataneaka Malia, Esepu na mwana mopu, asambi ta eyedji e bhata. 17 Ehole enɛ bo mwana, babalaka meako misusu mibatɔndeaka obwɛndji ta tina e mwana omina. 18 Bato basusu ibaokaka meako mimina ta minɔko mi babanei ba bhata, bakamoaka mɛnɛ. 19 Malia abaneaka meako mia ta molema ko bohomba bodjeba tina e meako mimina. 20 Ngɔngɔ, babanei ba bhata bayanaka. Badaka bokumedja Ndjakomba ko boemba ndjembo, tine meako misusu miokaka bo na mienɛkɛ bo, tengasa mibwanaka na mia mibatɔndeaka obwɛndji.

21 Ngɔngɔ i masu bomwambe, ehole ebolena mwana epole eimeaka; ibea bamobakeaka kombe e Yesu, oko moda motɔndeaka obwɛndji Malia boso bo alwae demi. 22 Ko yana aimeaka ehole e bosasɛnodja, bobwana na mobeko mo Mose*, Esepu na Malia bakɛkɛ na mwana ta Yelusalɛmɛ tine bomoinedja Kumu; 23 tengasa boboana na moda mokomama ta mobeko mo Kumu: «Mwana mosusu momi o boso yona oboti bo aboani bomobondjea adi Kumu* elenge ikabo*.» 24 Boboana na mobeko mo Kumu, bapaka adi Ndjakomba mbeka edowa mwali na momi kaoko bana ba bimbenga babae*. 25 Moto omɔti adaka ta Yelusalɛmɛ kombe e nde Simeona. Moto omina adaka bodjo na isuma, adaka amba isu igɔledjamabi Isalɛlɛ, ko Mwembo Mosɛnɔke modaka na nde. 26 Mwembo Mosɛnɔke mo motɔndeaka boso boo agwɛtebi mbunoko akaenɛ Kilito, Kumu. 27 Mwembo Mosɛnɔke mo molomaka, ta tepelo, oko ta ehole emina, baboti ba Yesu bakɛkɛ na nde tine bokokedja meako imihɔdjɔkɔ mobeko. 28 Simeona amotombaka ta mɔmɔ ma nde ko akumedjaka Ndjakomba. Abalaka:

29 «Edɛdi, Kumu, okokedji mbuno e wɛ;

kina mosali o wɛ aheme na bogo. 30 Tengasa miso ma mbi maeni Moheledji*,

31 yona obɔngedja wɛ tina e bato basusu:

32 Yo adi moi mo bohu adiko i bato

badi pɛ boda Isalɛlɛ,

ko gala adi bato ba nde, Isalɛlɛ*.»

33 Sange e nde na nange e nde badaka bokamoa meako midaka Simeona abala ta tina e nde. 34 Simeona abadjongoaka ko abalaka na Malia nange e Yesu: «Mwana iyo alomama bo adae ibaku tina e botitedja kaoko boangɔdjɔ bato banɛnɛ ba Isalɛlɛ. Adabi embete ekitɛ ebogbɔtodja bato; 35 na bea aimedjabi ta bohu malɛi imabolama ta milema mi bato; ko wɛ, nange e nde, ookabi saya ta molema elenge bakoindea ikɔngɔ.»

36 Edaka na mbaeli o Ndjakomba mwali omɔti kombe e nde Ana, mwana mwali o Panuwele, o pako e Aselo. Aimeaka mobange mɛnɛ. Ayeyoaka ta moki mbula sambo na muma nde omoasɔkɔ donga ta bobwɛngɛ bo nde. 37 Adikaka mwali o bogwa mbunoko akokedjaka mbula tuku bo mwambe na banei*. Adaka ta tepelo bihole bisusu, bokɔmea Ndjakomba bulu na moi, ko na bokia mia ko bongɔnɔ. 38 Aimeaka ehole emina, apaka Ndjakomba mɛlɛsi na botɔndɔ meako tina e mwana adi bato basusu bia bambaka mohelo mo Yelusalɛmɛ.

39 Ehole esidjaka baboti ba Yesu meako misusu boboana na moda molomaka mobeko mo Kumu, bayanaka ta Nasaleta ibonga i bobo mɛnɛ yena edaka ta Galilea. 40 Mwana akandoaka, asapingedjaka, alumaka na mongandi ko na epaeli e Ndjakomba edaka diko i nde.

41 Baboti ba nde bakɛkɛ mbula na mbula ta Yelusalɛmɛ, tine tɛkɛ e Pasika. 42 Ehole ekokedjaka Yesu mbula domi na babae, bakɛkɛ ta tɛkɛ elenge edaka bokɔkɔ* bo bobo. 43 Ehole esiaka masu ma tɛkɛ, bahulaka, mwana Yesu adikaka ta Yelusalɛmɛ endolo baboti ba nde baidjebaka. 44 Balɛdjɛkɛ adaka adale engbanga emɔti na bange i nde ba mɔndɔ ko bakɔ busa itombo. Ngɔngɔ bamohombaka ta tei e denga ikina ko na badjebani ba nde; 45 endolo baimodiaka. Ko basɔmbɔkɔ ta Yelusalɛmɛ a mohomba. 46 Ngɔngɔ i masu masato, bamotaneaka ta Tepelo, adi na mobondo a ndanda e balehi ba mobeko, abahokamedja ko abahɔdjɔkɔ mahɔdjɔ. 47 Bato ibadaka bamohokamedja, badaka bakamoa na bowɛi bo nde ko na misɔmbedja mi nde. 48 Ehole emoenɛ baboti ba nde bakamoaka; nange e nde abalaka na nde: «Mwamba, olokɔi boo tina nda? Sange e wɛ ko na mbi, lohombaka na bɔɔ!» 49 Abasɔmbedjaka: «Tina ndani wahombakanini? Otadjebakani boo natungi nadae ta ndako e sange e mbi*?» 50 Endolo bo baidjebaka tina e kɔpi emina ebabalea yo. 51 Ngɔngɔ Yesu ayanaka na bu engbanga emɔti ta Nasaleta, adaka abasuma ko nange e nde abaneaka meako mimina misusu ta molema. 52 Ko Yesu akandoaka, na djebeli ko adaka asepedja Ndjakomba ko na bato*.