1 Bato banɛnɛ bamekaka bokoma masolo ma midjɔ iminɔkɔ a ndanda e biso. 2 Bakomaka meako mimina elenge ebatɔndeaka bo, na bato bia ibaenɛkɛ na miso midjɔ iminɔkɔ, donga ta mbangi, baimeaka basali ko batombaka mandi ma boleha meako mi Ndjakomba. 3 Na tina emina, ta pamba e mbi, ngɔngɔ i bohomba bodjeba soti e midjɔ misusu mia iminɔkɔ ta mbangi, naenɛki bopele ta pamba e mbi, bokomea meako mimina na bodjo adi wɛ, moto o gala Teopile. 4 Namikomi tine boo oboani bodjeba meako imi midia wɛ midi soti.

5 A ehole edaka Elode mokondji o ibonga i Yuda, nganga o Ndjakomba omɔti kombe e nde edaka Djakalia, adaka ta engbanga e banganga ba Ndjakomba ba iputo i Abiya*. Mwali o nde, Elisabɛti adaka o denga i Alona*. 6 Bo basusu babae badaka bato ba bodjo ta boso bo Ndjakomba ko badaka basuma mɛnɛ mibeko ko bilomu bi Kumu. 7 Na bea baidaka na mwana, tine boo Elisabɛti adaka mwali motete ko bo basusu babae baimeaka babange.

8 Busa bomɔti, Djakalia adaka akɔ mosala mo nde mo bonganga bo Ndjakomba, tine boo edaka ngala e nde e bokɔ. 9 Bokimana elama e banganga ba Ndjakomba, ahɔmɔkɔ na djonga tine botumba mbeka e paka malasi ta tei e polo esɛnɔke* e Kumu. 10 Ta ehole e botumba mbeka e paka malasi, iputo i bato banɛnɛ badaka bongɔnɔ sokolu.

11 Mbala emɔti, obwɛndji o Kumu asainedjaka na Djakalia, aemaka diko ta ebɔ e bami ta polo ekatumbebo paka malasi* tina e Ndjakomba. 12 Ehole emoenɛkɛ Djakalia, alengesanaka ko alumaka na bɔɔ. 13 Endolo obwɛndji abalaka na nde: «Djakalia pɛ boda na bɔɔ, tine boo Ndjakomba aoki miongɔnɔ mi wɛ. Mwali o wɛ Elisabɛti aoboteake mwana momi ko wa mobakeake kombe e Yoane. 14 Mwana omina adake sepi enɛnɛ tina e wɛ ko bato banɛnɛ basepabi na bobotama bo Yoane. 15 Tengasa adabi mosali monɛnɛ ta boso bo Kumu. Amwɛtebi vino kaoko mana mapipo*, tine boo alumabi na Mwembo Mosɛnɔke donga ta sɔpɔ i nange e nde. 16 Asɔmbedjabi bato banɛnɛ ba Isalɛlɛ ta pamba e Kumu Ndjakomba* o bobo. 17 Adalabi ta boso bo Kumu, na mwembo ko na kpatsi e mbaeli o Ndjakomba Elia, tine bosɔmbedja milema mi ba tata ta pamba e bɛngɛ, ko bato ba itio ta ndjea e bowɛi*, abɔngedjabi bato tina e Kumu.» 18 Na bea Djakalia abalaka na obwɛndji: «Nadjebake meako mimina midi soti moda nda? Tine boo mbi naimei mobange, ko mwali o mbi aimei ko mobange.» 19 Obwɛndji amosɔmbedjaka: «Mbi nadi Gabiyɛlɛ*, nakaemae ta boso bo Ndjakomba. Nalomami tine botɔndea wɛ bwɛndi bopele. 20 Na bea elenge okiti mibalo mi mbi, mikokedjamabi ta ehole ebɔngedjama; waimeake emimi ko odaetebi na enɔeli e bobala mbunoko isu imeake modjɔ momina.»

21 Ta ehole emina, bato badaka bamba Djakalia ko bakamoaka moda moyeyoaka yo ta tepelo esɛnɔke. 22 Ehole eimaka yo, aidaka naikina na enɔeli e bobala na bu ko bato badjebaka boo aeni ndjɛnɛ ta tepelo esɛnɔke. Tengasa aimeaka bobala na bu na bimbete ko adikaka emimi. 23 Ehole esidjaka Djakalia ngala e nde bokɔ mosala mo bonganga bo Ndjakomba, asɔmbɔkɔ ta ndako e nde. 24 Ngɔngɔ i moehole, mwali o nde Elisabɛti alwaka demi ko asabombaka songe batano. Asabaleaka: 25 «Endja eka ekɔi Kumu na mbi: adimi botingoani edɛdi ta modjɔ mokɔkini sɔni ta miso ma bato.»

26 Ngɔngɔ i songe basamano, Ndjakomba alomaka obwɛndji Gabiyɛlɛ* ta ibonga imɔti i Galilea, ekabeame Nasaleta. 27 Amolomaka adi moseka mwali odaa pɛ boda na bami ohɔmɔkɔ na moki, na momi omɔti, kombe e nde Esepu. Yo adaka ta pako e kumu Dapiti. Kombe e moseka mwali edaka Malia. 28 Obwɛndji akweaka adi Malia ko abalaka na nde: «Osisoi! Ndjakomba akɔi na wɛ mongandi, ko adi engbanga na wɛ!» 29 Malia ayegebanaka na kɔpi emina; asahɔdjɔkɔ eka etingodjaka ndese emina. 30 Endolo Obwɛndji abalaka na nde: «Pɛ bobanga Malia, tengasa odihi mongandi ta boso bo Ndjakomba. 31 Endja walwoake demi ko wabotake mwana momi, omopabi kombe e Yesu. 32 Adabi moto monɛnɛ ko bamobeabi Mwana o Ndjakomba yona odi odiko i losusu. Kumu Ndjakomba amodedjabi ta ngbɛndɛ e kɔkɔ e nde Dapiti. 33 Adabi Kumu ta denga i Djakobo, ko bokumu bo nde bodaetebi na suka*.»

34 Malia abali na obwɛndji: «Modjɔ momina modabi moda nda? Tengasa napakini aputoana na momi.» 35 Obwɛndji amosɔmbedjaka: «Mwembo Mosɛnɔke aduabi ta diko i wɛ ko ngulu e Ndjakomba yona odi odiko i losusu aodipabi na esii e nde. Ko yo yona obotamabi na wɛ adabi mosɛnɔke, abeamabi Mwana o Ndjakomba. 36 Elisabɛti, mwange e wɛ mwali, alwai demi i mwana momi ta bobange bo nde, idi edɛdi na songe basamano, yona odaka bo babea mwali motete. 37 Tengasa pɛ modjɔ monɔi Ndjakomba* na bopipo.» 38 Na bea Malia amosɔmbedjaka: «Nadi mobuli o Kumu. Kina boo misusu mikɔme na mbi oko moda mobali wɛ.» Ko obwɛndji amokinaka.

39 Ngɔngɔ i baasu, Malia akɛkɛ pɛpɛlɛ ta ibonga imɔti i ikoli i Yudea. 40 Akweaka ta ndako e Djakalia ko aiseaka Elisabɛti. 41 Oko ta ehole eokaka Elisabɛti ndese e Malia, mwana akumanaka ta sɔpɔ i Elisabɛti. Ibea alumaka na Mwembo Mosɛnɔke, 42 ko agamaka na ngulu: «Ndjakomba aodjongoi bonɔ bali basusu, mwana odi ta sɔpɔ i wɛ, adjongoami na Ndjakomba! 43 Mbi nadi nda? Tine boo nange e Kumu adue adi mbi? 44 Tengasa, oko ta ehole eiseini wɛ, mwana akumani na sepi enɛnɛ ta sɔpɔ i mbi. 45 Odi Mwali osepi! Wɛ iyo opala meako i mi mibalaka Kumu Ndjakomba na wɛ, mikokedjamabi!»

46 Ibea Malia abalaka*:

«Kina boo molema mo mbi mosusu mokumedje Kumu!

47 Nalumi na sepi enɛnɛ

tina e Ndjakomba, Moheledji o mbi.

48 Tengasa aendjini na miso ma nde ma epaeli,

mbi mobuli* o nde otaka ekumu!

Soti, donga edɛdi mbunoko bihole bisusu,

bato basusu babeabini mwali o mongandi!

49 Tengasa, Ndjakomba yona odi odiko i losusu akɔi na mbi midjɔ mi bokamoa;

Kombe e nde edi Esɛnɔke!

50 Ko bopele bo nde bokayeyoe bihole bisusu

adi bia bakamosume!

51 Akɔi meako mi bokamoa na ngulu e ebɔ e nde,

ananganedji bato ba mopopo.

52 Ahombedja bato ba ngulu ta ngbɛndɛ i bobo,

endolo angɔdji bato ngasa*.

53 Akapɛ mia adi bato ba ndja,

ko akayanedje badieli mɔmɔ ngasa.

54 Soti adoi akamoa Isalɛlɛ, mosali o nde,

ko abositi boinedja bopele bo nde;

55 moda mobala yo na ba kɔkɔ ba biso, adi

Abalayama ko na bwela bo nde tine kɔbili na kɔbili.»

56 Malia adaka adi Elisabɛti mbuti na songe basato, ngɔngɔ ayanaka ta ndako e nde.

57 Ehole e masu ma bobota bo Elisabɛti makokaka, abotaka mwana momi. 58 Bato badaka mbuti na nde ko denga i nde baoka bo Kumu amokɔi mongandi monɛnɛ ko basepaka na nde engbanga emɔti.

59 * Ta isu i bomwambe, bakɛkɛ na mwana tine bomolena epole. Bapalaka bomopa kombe e Sange e nde Djakalia. 60 Endolo nange e nde alonaka ko abalaka: «Ngasa, kombe e nde Yoane.» 61 Bamotondeaka: «Ngasa, pɛ moto omɔti o denga i wɛ odi na kombe emina!» 62 Na bea basolaka na sange e mwana na bimbete, ebɛngi badjebe kombe apalaka yo babee mwana. 63 Djakalia ahɔdjɔkɔ moo ibaya mokɛkɛ ko akomaka ena mibalo imi: «Kombe e nde Yoane.» Bato basusu bakamoaka. 64 Mbala emɔti Djakalia asɔmbɔkɔ naikina bobala ko akumedja Ndjakomba na kɔpi epipo. 65 Ibea, bato basusu badaka mbuti balumaka na bɔɔ; ko ibonga i makoli masusu ma Yudea badaka batomba sɔngi e meako mimina. 66 Bato basusu ibaokaka modjɔ momina, badaka balɛdjɛ eni basahɔdjɔ: «Mwana omina adake ngɔngɔ nda?» Ngulu e Kumu edi na nde.

67 Djakalia, sange e mwana, alumaka na Mwembo Mosɛnɔke ko abalaka mibalo i mi:

68 «Kumu, Ndjakomba o Isalɛlɛ, akumedjame;

tengasa adoi akɔmedja bato ba nde ko bobaimedja basɔmi!

69 Alopi tina e biso Moheledja o ngulu,

ta tei e denga i Dapiti, mosali o nde.

70 Amikokedji oko elenge amaka yo bala ehele na ndjea e basɛnɔke ba mbaeli ba Ndjakomba.

71 Alolomea Moheledji alotingoe ta mɔmɔ ma bato babe;

ko na bokumu adi baloni ba biso.

72 Ainedji bopele bo nde adi ba kɔkɔ ba biso.

Ko aibosa bwela bo nde bosɛnɔke.

73 Akokedja bhɛli e bhɛlɛ yo na Abalayama, kɔkɔ* e biso boo

74 Alodongedjabi ta mɔmɔ ma baloni ba biso;

tine lomokɔme napɛ bɔɔ,

75 na bosɛnɔ ko na bodjo ta boso bo nde,

masu masusu ma mohelo mo biso.

76 Ko wɛ, mwa mba, odabi mbaeli

o Ndjakomba yona odi odiko i losusu,

tengasa odalabi boso bo Kumu,

tine bobɔngedja ndjea e nde,

77 botɔndea bato ba nde boo abaheledjabi

ko ayɛbi mabe ma bobo.

78 Edi oko bea, tengasa Ndjakomba o biso aluma na bopele,

na tine emina, alopabi bohu, bokadonge o diko,

elenge akaime modakabusa ehuma.

79 Aimabi tine boinedja bohu

adi bato badi ta bulu ko ta modidi mo bogwa,

ko bodaledja mako ma biso ta ndjea e bomwi*.»

80 Mwana akandoaka ko Mwembo mo nde moimeaka na ngulu. Adaka ta polo i bitengelenge mbunoko ta isu isinedja yo ta miso ma bato ba Isalɛlɛ.